OPEN HEAVENS

MATALA LE LAGI MO LE ASO SA 15  FEPUARI 2026

(tusia e Pastor EA Adeboye)

Manatu Autu: O mea uma i tagata uma (All things to all men)

Tauloto Tusi Paia: 1 Korinito 9:22 “Ua ‘ou fa‘apei o sē vaivai i ē ‘ua vaivai, ‘ina ‘ia ‘ou maua ē ‘ua vaivai; ‘ua ‘avea a‘u ma mea uma mo tagata uma, ‘ina ‘ia i‘u lava ‘ina ola nisi ‘iā te a‘u.”

Faitauga - Tusi Paia: 1 Korinito 9:19-23

Sa ou alu I se tasi aso I se ekalesia ou te lauga ai, ma na o latou faailoa mai ia te a’u e lē mafai ona ou ulufale I le fale tele a’o see o’u seevae aua e fa’asā e le latou talitonuga. Sa o’u fesili pe i ai se isi mea e manana’o e aveese, ou te fiafia e tu’u ese, ae a maua lava le avanoa e lauga ai le talalelei ma manumaloina agaga ua lava lea mo a’u, e leai se mea e faigata ia te a’u ona tu’u ese. Na ofo le faifeau o le ekalesia, o ia fo’i lea ua avea nei ma faifeau RCCG. 

E taua tele i le Atua le galuega tāla’i ma e taua lo outou o uma e manumaloina agaga. O lo outou o uma, o la’u fa’auigaga, o atu uma e tusa ma le Afioga Paia a le Atua; Paga lea, ua manatu nisi kerisiano o le auai faatasi e fai uiga agasala ma e lē faaolaina o se tasi lea auala e manumaloina ai agaga mo Keriso: o lea manatu o se pepelo mai seoli. E lē mafai ona e ui i ala o le agasala ma faafoliga o loo lauga le talalelei ae manatu e talia e le Atua lau mea na fai. E tatau ona e faia mea uma e tusa ma ala o le Atua. 

Ina ua fai mai Paulo ua avea ia ma mea uma lava I tagata uma ina ia mafai ai ona ia laveaiina i latou, o lona uiga na ia lafoa’i lona nofo lelei saogalemu, ma le tele o isi mea ina ia oo atu ai I ituaiga tagata eseese. Na malie o ia e tia’i ese lona tulaga, aafiaga, ma lona nofo lelei e tāla’i atu ai i tagata faatatau ia Iesu. I le 2 Korinito 11:23-33 na ia faasoa mai ai nisi o tulaga na ia avea faataulaga ma puapuagatia ai mo le talalelei. Na sasaina o ia i laau i nisi aai, afatia lona vaa, ma fetogiina ia I ma’a I nisi o nofoaga. O le tumutumuga o lona faamoemoe ia aumai tagata i totonu o le mālō o le Atua, ma na ia loto naunau e fai soosemea pau lava ia aua ne’i o se agasala, ia taunuu ai lona faamoemoe. 

O aso nei, o nisi ua taua o fai evagelia, ua oofu, tautatala, ma amio pei o e le fa’aolaina, ma faapea mai, ona o lo latou manana’o ia liliu ia tagata. Peita’i a e suesue loloto i ai o le a e maitauina ai o i latou lava ua faaseseina ma faaliliuina. A ufitia se matauila i le pefu ma le apogāleveleve, o le a le toe susulu malosi. E faapena le agasala pe a faalavelaveia ai le molimau a se kerisiano mo Keriso ma avea ai o ia o se tagata tāla’i e leai se faauuga.

Le au pele e, ua uma ona avatu e le Atua ia te oe se fua e manumalō ai agaga ma e tatau ona e fa’a taulaga lou nofo lelei saogalemu ma le tele o isi mea e faataunuu ai lea poloaiga. Peita’i o lou usitai I Afioga Paia a le Atua e lē tatau ona e faatamala i ai, e ao ona e faamuamua. Ou te tatalo ia fesoasoani atu Agaga Paia ia te oe ia avea oe o se tagata molimau iloga ma malosi e manumaloina agaga mo Keriso, I le suafa o Iesu, Amene.

OPEN HEAVENS

MATALA LE LAGI MO LE ASO TOONAI 14 FEPUARI 2026

(tusia e Pastor EA Adeboye)

Manatu Autu: Tatalo mo faaipoipoga (Prayers for marriages)

Tauloto Tusi Paia: Failauga 4:9 “E sili ‘ona lelei o le to‘alua i le to‘atasi; auā ‘ua ‘iā te i lā‘ua le taui lelei i la la galuega.”

Faitauga - Tusi Paia: Salamo 128:1-6

1. Tamā ou te faafetai ia te oe le Alii e, I lou saunia o faaipoipoga, ma faaipoipoga a lau fanau uma I le lalolagi.
2. Le Alii e, faamolemole ia maua e lau fanau uma le filemu e tele, olioli ma le malologa ia latou faaipoipoga. Mo I latou e le’i faaipoipo, ia faapea fo’i ona o latou maua nei faamanuiaga pe a faaipoipo, I le suafa o Iesu.
3. Faamolemole aveese uma soose faapogai o misa ma fe’ese’esea’iga o taumafai e faaleaga le fealofani ma le nofo lelei i faaipoipoga a lau fanau i tuluiga uma o le lalolagi i le suafa o Iesu.
4. Le Alii e, faamolemole afio mai ma le faamalologa i ou aao i luga o ulugalii ma faaipoipoga loto tigā uma o siomia a’u. Aumai le mapusaga i aiga mafatia uma i le suafa o Iesu.
5. Tamā faamolemole faamanuia ulugalii uma o lau ekalesia o sauni e talia le fanau. Ia avea i latou o ni mātua olioli i le suafa o Iesu.
6. Le Alii e, faamolemole ia tumau lou alofa tunoa i lo’u aiga ma totonu o aiga uma o siomia a’u. Fesoasoani mai ia i matou ia o matou ola i ala o le Atua ma ola faapaiaina, i le suafa o Iesu.
7. Tamā faamolemole ia faia a’u ia atili ona o’u faamagalo, alofa ma agalelei i la’u faaipoipoga. Ia avea la’u faaipoipoga o se fa’ata’ita’iga fa’ale Atua i isi, i le suafa o Iesu.
8. Le Alii e, faamolemole ia tausia i maua ma la’u tane/ avā (poo lē o le a avea ma a’u tane/avā pe a fai e le’i faaipoipo) i le faamaoni ia ma ta’utinoga. Fesoasoani iā i maua ia aua ne’i pau atu i faaosoosoga ma mailei e toilalo ai i le tino ma le mafaufau, i le suafa o Iesu.
9. Le Alii pele e, faamolemole faamanuia le faatasiga i le va o i maua ma la’u tane / avā (poo le tane/ avā i le lumanai pe afai e le’i faaipoipo). Ia o matou ola fiafia i le tamāoaiga i soose vaega o ma olaga ma tutupu lauolaola pei o laau e toto i tafatafa o vaitafe, i le suafa o Iesu.
10. Tamā faamolemole saunia ni faufautua, ta’ita’i ma ni uo mo lo’u aiga, e aumaia fautuaga fa’ale Atua pe a manaomia. Aveese mamao ma i maua tagata faatauemu ma amioleaga, i le suafa o Iesu.
11. Tamā faamolemole faasino i lau fanau uma ala aupito sili ona lelei e fesootai ai ia latou tane/avā. Fesoasoani iā I latou ia ava ma faaaloalo ma tausia faapelepele e le tasi le isi i taimi uma, i le suafa o Iesu.
12. Tamā fesoasoani mai ia tutupu ma ola atili i matou lau fanau ma a matou fanau i le faatuatua ia te oe, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 13 FEPUARI 2026

(tusia e Pastor EA Adeboye)

Manatu Autu: Faalautele lou nofoaga (Enlarge your coast)

Tauloto Tusi Paia: Isaia 54:2 “Ia fa‘alautele le mea e tu ai lou fale ‘ie; ‘ia fāloina ‘ie puipui o mea ‘e te nofo ai. ‘Aua ‘e te fa‘aitiitia; ‘ia fa‘aumiumiina au maea ma ‘ia malolosi au fao.”

Faitauga - Tusi Paia: Kenese 13:14-17

I le faitauga mai le Tusi Paia o le asō, na fetalai le Atua ia Aperaamo e savali i le umi ma le lautele o le nuu na folafolaina mo ia ina ia mafai ona ia tilotilo atu i mea e lei vaai muamua iai. A e savali i se nofoaga, e masani ona mafai ona sili atu mea e te iloa atu i lo mea e te iloa pe a e tū i le tulaga e tasi. Na fetalai le Atua Silisili Ese ia Aperaamo, ‘ou te foai atu mea uma e te vaai atu iai’. E finagalo le Atua e faalautele le nofoaga o loo e iai, ma ou te folafola atu, ae te lei oo atu i le taimi lenei i le tausaga fou, o le a sili atu lou tulaga i lo le taimi nei, i le suafa o Iesu. 

Ina ua fai mai nisi o la’u fanau ua foai atu e le Atua le 114 eka i Amerika e avea mo nofoaga o togalauapiga a le Ekalesia RCCG, na ou malaga sei ou vaai iai, ma sa lagona lou fiafia. Ina ua fai mai lau fanau ua oo i le taimi e matou te ō ese ai,  na ou fai iai o le a ou nofo i le nofoaga i le po lea, ia tuu se taavale ae ia toe piki au i le aso na sosoo ai. Ina ua ō ese, na ou sau ia fafo ma le taavale ma amata ona tatalo e faafetai i le Atua mo lenei fanua o togalauapiga. O le taimi lea o le tau malulu, ma ina ua maea sina taimi ua ou maalili ma o lea na ou toe foi i totonu o le taavale. Ina ua toe mafanafana, na ou toe alu i fafo, ma na faafuasei ona faapea mai le Atua, ‘Savali faataamilo i le fanua, o le tele o mea e te vaai iai, o le tele foi lena o mea ou te foai atu’. Na ou usitai, ma o le asō, i le alofa tunoa o le Atua, o le fanua na amata i le 114 eka, ua 800 eka ua iai nei. I lena po ao ou savalivali solo, na ou vaai i se fale telē i tafatafa o le fanua, ona faapea mai lea o le Atua, ‘vaai atu i le fale le lā, o lou fale’. I le taeao na sosoo ai, na ou fai i lau fanau le tala i le fale, ma e lua tausaga mulimuli ane,  ae faasalalau e le tagata e ona, mo seisi na te faatauina. Na ō la’u fanau ma faatalanoa le faatauina o le fale ma ina ua maea ona malilie i le tau, na latou fai i le tagata e ona le fale, ‘e te iloa, o le lua tausaga talu ai na fai ai le Atua i lo matou tamā o ia e ona le fale lea?’. Na ia tali mai, ‘aisea na e le fai mai ai ia te a’u? Ua lua nei tausaga talu ona ma mafaufau ma lo’u toalua e fia faatau ese le fale’. 

Le au pele e, o lo’u Atua o Lē na faia le lagi ma le lalolagi, ma e mafai ona ia foai atu ia te oe mea uma ua maea ona ia faaali atu ia te oe. Ou te tatalo e faalautele e le Atua i le asō le lumanai o lo’o e vaai atu iai, ia sili atu i mea uma ua e vaai iai, i le suafa o Iesu. 

Tatalo

Le Alii e, faamolemole tatala o’u mata ia ou vaai atu i mea e sili atu i lo’u tulaga i le asō, ina ia ou tofo i au faamanuiaga e taumasuasua, i le suafa o Iesu, Amene. 

 HEAVENS

MATALA LE LAGI MO LE ASO TOFI 12 FEPUARI 2026

(tusia e Pastor EA Adeboye)

Manatu Autu: Fua mai ni fua mo Keriso 2 (Bear fruits for Christ 2)

Tauloto Tusi Paia: Ioane 15:16 “Tou te le‘i filifilia a‘u, ‘ae na ‘ou filifilia ‘outou ma ‘ou tu‘uina atu ‘outou, ‘ia ‘outou ō ma ‘ia ‘outou fua mai ni fua, ma ‘ia tumau o ‘outou fua; ‘ina ‘ia foa‘iina atu ‘iā te ‘outou e le Tamā mea uma lava tou te ole atu ai ‘iā te ia i lo‘u igoa.”

Faitauga - Tusi Paia: Ioane 15:1-16

O loo faaalia i le tauloto mai le Tusi Paia o le asō na faaolaina e le Atua lou agaga ina ia faaolaina isi tagata ona o oe. O oe o se tagata galue faatasi ma Keriso i lenei lalolagi tele. O le faanoanoaga, e toatele tagata e naunau e faalautele e le Atua o latou olaga, peitai e latou te le o faalauteleina lona malo. E ui e lelei lou tatalo i le Atua e faalautele lou olaga, o se tasi o auala e faalautele ai lou olaga o lou malosiaga e manumaloina o agaga ma ia fua mai ni fua. E moni e finagalo le Atua e faalautele ia te oe, peitai e le faia mo lou fiafiaga ae ia mafai ona siitia tagata e te talai atu iai mo ia. O le a ou talanoa atili atu taeao i le manaomia ona e ole atu i le Atua e faalautele lou tagata. 

E tele naua ni faamanuiaga o le manumaloina o agaga. O le tasi o ia manuia o le a leai se mea e faalavelave i le tali o au tatalo. A fua mai ni fua ma tumau i lou olaga, e mafai ona e ole atu i soo se mea i le suafa o Iesu, ona tali vave mai lea o le Tama i lou manaoga. I le tauloto mai le Tusi Paia o le asō, na fetalai Iesu, a e fua mai ni fua, ma tumau, o soo se mea e te ole atu ai i le Tamā i lona suafa, e na te foai atu ia te ia. O i latou e manumaloina agaga e latou te maua soo se mea mai le Atua, ma o soo se taimi e o atu i ona luma ma ole atu i mea o naunau iai, e mafai ona o atu ma le mautinoa e na te lē teena a latou talosaga. 

Sa iai se fitafita na lavea i se pulufana na gaui ai ponaivi o se tasi o ona  vae. Na tuu e le fomai se fasi uamea i totonu e faasao ai le vae ina ia mafai ona toe savali. O lona manua ma le uamea na matua tigā ma faigata ai ona savali. Peitai, e ui ina tigā, sa ia faaavanoa pea se aso se tasi e alu ai e talai le talalelei. I se tasi o ia aso, sa galue mai le taeao seia oo i le afiafi, na talai ma lauga atu le talalelei. Ina ua oo atu i le fale, ua matua luluti le tigā o lona vae. Na ia liliu atu i le Atua ma faapea atu, “Le Alii e, ou te manao ia e aveese lenei tigā ina ia sili atu lau auauna ia te oe”. Na maea ona moe loa lea. Ina ua ala ane, o le fasi uamea sa i totonu o lona vae, ua taatia atu i luga o le moega i ona autafa, ae leai ma se toto i luga o le moega. Ao moe o ia, sa faia e le Atua se taotoga o lona vae ma ua toe faafoisia ma le atoatoa. 

Le au pele e, o e naunau ea ia vave ona maua tali o au tatalo ma ia faifaipea? Ia avea le manumaloina o agaga o se mea fiafia i lou olaga, ia e faamuamua le manumaloina o agaga mo Iesu ona ia faamatagofieina lea o lou olaga faatasi ma le tele naua o tautinoga ofoofogia. Ia avea le manumaloina o agaga o se mea fiafia i lou olaga, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 11 FEPUARI 2026

(tusia e Pastor EA Adeboye)

Manatu Autu: Fua mai ni fua mo Keriso 1 (Bear fruits for Christ 1)

Tauloto Tusi Paia: Mareko 16:15 “Ua fetalai atu fo‘i o ia ‘iā te i latou, “Ō atu ia ‘outou i le lalolagi uma, ‘inā tala‘i atu ai le tala lelei i tagata uma lava.”

Faitauga - Tusi Paia: Ioane 15:14-16

I le faitauga mai le Tusi Paia o le asō, na fetalai Iesu na ia filifilia lona au soo e fua mai ni fua ma ia tumau ai. O le upu ‘fua’ o lona uiga o agaga. O loo faamanino mai e Iesu e na o i latou e usitai i ana poloaiga e taua o ana uo ma o soo se mea e latou te ole atu ai i le Tamā i lona suafa, e na te foai atu iai latou. O i latou e latalata ia te a’u, e filiga e manumalo agaga mo Keriso aua ou te iloa o le finagalo lea o le Atua. Ou te naunau e manumaloina agaga seia oo ina ou oti. Tusa pe leai ni avanoa, ou te faia avanoa ina ia ou talai atu Iesu i tagata. 

Na fai mai se tagata ia te au e leai se mea o faamauina ai na faailoga le aso fanau o Iesu, ona ia faaseā mai lea i le faailoga o lo’u aso fanau. Na ou faafetaia o ia ma ou fai iai e faaaoga e le Atua lo’u aso fanau e manumaloina ai agaga mo lona malo. Na filifilia i tatou e Iesu e fua mai ni fua ma tumau i lona malo, ma e tatau ona tatou faaaogaina soo se avanoa e tuliloaina ai. 

O se faanoanoaga tele ona o le toatele, e lē faatauaina le manumaloina o agaga. Na poloai Iesu iai tatou e o atu i le lalolagi ma talai atu le talalelei i soo se tagata, e pei ona tatou iloa i le tauloto mai le Tusi Paia o le asō. E lei valaau mai iai tatou e o atu i nofoaga e talia ai tatou e tagata pe faigofie ona faia ai le galuega. Na ia valaau mai iai tatou e o atu i le lalolagi atoa, pe lelei pe leaga. A aumai se galuega e le Atua ia tei tatou e o atu e faia, e tatau ona tatou o atu ma faia. 

I le Galuega 16:6-40, na maua se faaaliga e Paulo na ia vaaia se tamaloa o valaau mai ia te ia e alu atu i Maketonia e fesoasoani iai latou. I luma atu o le taimi lea, sa ia taumafai atu e talai le talalelei i ni nuu i Asia, peitai na faasāina e Agaga Paia. E te ono manatu ona na valaau le Atua ia te ia e alu i Maketonia o le a leai nisi e tetee mai poo ni puapuaga. Peitai, e lei leva ona taunuu Paulo ma Sila i lea nuu, ae fasia i laua ma lafo i le falepuipui. Ui i lea, e lei taofia ai mai le talai atu o le talalelei. O tagata e lei sauni e fetaiai ma mea faigata, e lē mamao le tulaga e oo iai i le usitaia o poloaiga a Iesu, e o atu i le lalolagi uma ma talai atu le talalelei.

Le au pele e, e iai taimi, ao e talai atu le talalelei, e teena pe ulagia oe e tagata. Peitai, ia outou loto tetele pe a tupu lea tulaga. Na fetalai Iesu o soo se tagata e sauaina ona o ia e maua e ia le taui e tele (Mataio 5:11-12). Ia e talai pea le talalelei i taimi uma pe talafeagai pe lē talafeagai, ona e susulu pea lea e pei o se fetu e faavavau (Tanielu 12:3). Ia e faamaoni e talai le talalelei  i soo se avanoa e te maua, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 10 FEPUARI 2026

(tusia e Pastor EA Adeboye)

Manatu Autu: Aso e taugalemu ai ma aso e lē taugalemu ai (In and out of season)

Tauloto Tusi Paia: 2 Timoteo 4:2 “Ia e tala‘i atu le ‘upu, ‘ia e fa‘amalosi i ona aso e taugalemū ai, ma ona aso e lē taugalemū ai, ‘ia e fa‘atonu atu, ‘ia e a‘oa‘i atu, ‘ia e apoapoa‘i atu ma le ‘onosa‘i uma ‘atoa ma le a‘oa‘o atu.”

Faitauga - Tusi Paia: Galuega 8:5-8

Ou te matua faatauaina le tala’iga o le talalelei ia Iesu Keriso. A’o ou talavou, sa matou sa’ili ma a’u uo avanoa e talai atu ai Iesu Keriso i tagata lautele. O nisi o matou sa fa’atau masini faaleotele leo, ona matou o solo lea e tala’i atu le tala lelei ia Iesu Keriso i soo se avanoa matou te maua. E iai se taimi sa matou malaga atu ai i se nu’u e ta’u o Ganma i le sitete o Kwara. O le nuu ua a’ave ona tala i le latou te’ena malosi o le talalelei, e leai se lotu o iai, ma e matua leai ma seisi e fia talai i lea nofoaga. Ina ua ou faalogo i iai, sa ou faapea ane: “Ea ‘ea? E tatau la ona ou alu e tala’i ai! “

O tagata sa latou taumaia ia te au lea nuu ua faapea mai, “Afai e te alu iai, e tau’ai nei oe i ma’a”. Na ou tali atu iai ua leva ona ou saili i se avanoa e tau’ai ai a’u i ni ma’a, ina ia mafai ona ou fai i le aposetolo o Paulo pe a ma fetaui i le lagi, o a’u foi sa puapuagatia mo Iesu. Sa ou fai i tagata o le matou aulotu, ou te alu i Ganma, e tusa lava po o le a le tau, ma na fai mai nisi e matou te ō faatasi.

Ina ua matou taunuu i Ganma, fai mai tagata e latou te le manana’o i le matou Iesu. Sa matou fai atu iai, matou te le solomuli, ona matou asiasi lea i fale taitasi ma tala’i le talalelei. Na ripoti matou i le latou matai sili, ona a’ami mai lea o matou. Ina ua matou taunuu atu, sa matou fai iai o loo matou auina atu le talalelei mo tagata uma. Sa matou fai atu ia te ia e matou te lē taufaaleaga i le latou tapua’iga, ma o matou o ni tagata lelei e ola i le tulafono. Ona ia faapea mai lea e matou te o e faaauau lo matou tala’iga. Ona toe o lea o isi tagata o le nuu ma molia i matou i le matai lava lea. Sa matou toe feiloa’i faalua ina ua ia toe ‘amia  matou. Sa matou molimau atu iai, matou te le o faatupu se vevesi.

I le taimi lea, o nisi o le matou ‘au malaga ua amata ona fefefe ma ua faapea mai e sili pe a matou malaga ese i le po lena.  Peitai, e lei faia le matou po mo ata tifaga ua uma ona fuafuaina.  Ona ou faapea atu lea, e matou te le malaga ese, sei vagana ua mae’a lelei ona faatino mea uma sa fuafuaina. Ona faatino lea o le polokalame mo ata tifaga, ma o le toatele o tagata sa ripotia i matou i le latou matai, ma te’ena Iesu i le amataga, ua lafoai o latou ola ia Keriso. I le aso, o loo iai se tasi o ofisa faa Itumalo a le Ekalesia RCCG i Ganma.

Le ‘au pele, o le ‘avea ma se tasi o le ‘au tau a le Atua i aso mulimuli, e tatau ona e nofo sauni e tala’i atu le Alii Faaola o Iesu i isi tagata, poo fea lava e auina atu iai oe e le Alii. Aua le tala’i na’o taimi e taugalemu ai, tala’i foi i taimi e lē taugalemu ai, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 9 FEPUARI 2026

(tusia e Pastor EA Adeboye)

Manatu Autu: Aua e te faatali i nei tuai (Dont wait until its too late)

Tauloto Tusi Paia: Faaaliga 3:20 “Fa‘auta, ‘ou te tu atu i le puipui ma tu‘itu‘i atu; ‘ai se tasi e fa‘alogo mai i lo‘u leo, ma tatala mai le puipui, ‘ou te ulufale atu ‘iā te ia, ma te talisua fo‘i ma ia, o ia fo‘i ma a‘u.”

Faitauga - Tusi Paia: Luka 18:18-25

I le tele o tausaga talu ai i Nigeria i Sasae, sa iai se tamaloa ua mauoa i auala piopio. Peitai, na faaalia le alofa mutimutivale o le Atua ia te ia ma ua auina atu se faifeau e talai atu ia te ia le talalelei ia Iesu Keriso. Na logo iai e le faifeau ua totogi uma e Iesu ana agasala, tusa poo le a le leaga, peitai na ia teena le faaolataga. Na ia fai i le faifeau, ‘faafetai lava, ua ou faalogo uma i mea ua e talanoa mai ai. E mafai ona mulimuli la’u fanau ia Iesu. A’o au, ua tuai’. Na tali atu iai le faifeau, ‘afai o loo iai pea le mānava ia te oe, e lē o tuai, o loo iai pea le taimi’. Peitai na ia teena ma faapea mai o lona olaga atoa na mafuta ma le tiapolo ma e fia iu foi ma ia. O le faanoanoaga, na maliu ini vaiaso mulimuli ane, ma ina ua maliu, ua tuai. Na ofo atu ia te ia le alofa mutimutivale o le Atua peitai na ia teena. Afai e lei tuuina atu lou ola ia Iesu, o loo ofo atu e le Atua le alofa mutimutivale ia te oe i le asō, faamolemole aua e te teena. 

I le faitauga mai le Tusi Paia o le asō, na sau se taitai talavou e mauoa ia Iesu aua ua ia iloa e iai se mea o misi i lona olaga. E le gata e mauoloa, e iai ona tulaga tofi tauoloa i le nuu, peitai sa lei faamalieina i lona olaga. Na ia manao i le ola e faavavau, o lea na sau ai ia Iesu ma se fesili faigofie ae uiga loloto, “Le a‘oa‘o lelei e, se a le mea ‘ou te faia, ‘ou te maua ai le ola e fa‘avavau?” (Luka 18:18). Ina ua fetalai iai Iesu e lē lava le tausi o tulafono ae tatau ona aveesea le tupua i lona olaga, i le faatau ese o mea uma ua ia te ia ae mulimuli ia Iesu, na foi lenei taitai i le fale ma le faanoanoa. Na ofo atu ia te ia le alofa mutimutivale o le Atua peitai na ia teena aua e sili atu ia te ia ana oloa i lo le ola e faavavau. E fou le alofa mutimutivale o le Atua i taeao uma (Auega 3:22-23) peitai e na te lē faamalosia se tagata e talia, o se faaiuga e faia saoloto e soo se tagata. Peitai o nisi tagata e faapea mai e latou te salamo i se taimi mulimuli ane. O se tulaga lamatia lea tulaga aua tatou te lē iloa le aso e toe afio mai ai Iesu ( Luka 12:40) e pei ona tatou vaai iai i le Luka 12:20. E mafai e le Atua ona valaau i o latou agaga i soo se taimi. 

Le au pele e, afai o loo e ola pea i le agasala, ou te valaaulia oe i le asō e te valaau i le Atua ao mafai, ‘aua e te faatali seia oo ina lē mafai (Isaia 55:6). Tusa poo le a le faaletonu o lou olaga ua tuanai, o loo ia faapea mai i le asō, e na te mafai ona faamamaina, ona sisina paepae lea e pei o le kiona (Isaia 1:18). Faataga Iesu e afio atu i lou loto i le asō (Faaaliga 3:20) ae lei tuai. Afai e lei tuuina atu lou ola ia Keriso, aua e te faatali nei e tuai. Talia lona alofa mutimutivale i le asō, i le suafa o Iesu, Amene. 

OPEN HEAVENS

MATALA LE LAGI MO LE ASO SA 8 FEPUARI 2026

(tusia e Pastor EA Adeboye)

Manatu Autu: Tatala atu ia te ia (Open up to him)

Tauloto Tusi Paia: 2 Korinito 6:2 “Auā ‘ua fa‘apea mai o ia, “O le tausaga e talia ai, na ‘ou fa‘alogo ai ‘iā te oe, o le aso fo‘i e fa‘aolaina ai, na ‘ou fesoasoani ai ‘iā te oe.” Fa‘auta, o lenei le tausaga e talileleia mai ai; fa‘auta, o lenei le aso e fa‘aolaina ai.”

Faitauga - Tusi Paia: Faaaliga 3:20-22

Fai mai manino le Iakopo 4:7 e tatau ona e gauai i le Atua, ma tetee i le tiapolo, ona latou sosola ese ai lea ma oe. E le mafai ona sola ese le tiapolo mai ia te oe pe afai e te lē gauai i le Atua. Afai e te lei fanaufouina, o Iesu Keriso o le Malamalama o loo finagalo e afio atu i lou olaga. E fia avatu ia te oe se amataga fou, peitai e na te lē faamalosia lou loto seia vagana ua e tatala le faitotoa o lou loto ia te ia i lau faitalia. Na fetalai i le faitauga mai le Tusi Paia o le asō, o loo ia tu ma tuitui pea i le faitotoa o lou loto, ma afai e te tatala atu ia te ia, o le a ia afio atu i totonu. Afai e tuitui pea o ia i le loto o le tagata ae musu pea lea tagata e tatala atu, e iai le aso e oo mai, ae ua tuai mo lena tagata ona tatala atu lona loto i le Alii. I lea aso, o le fatu o lea tagata ua lē toe tatā, ma afai e lei iai Iesu i totonu, poo le a lava lana aioi atu, ua lē toe mafai, ae o le a oo atu o ia i seoli i le nofoaga o loo iai le taufaitagi aue ma le lilivau o nifo. O le mafuaaga lea o loo ou aioi atu ai ia te oe e tatala lou loto i le Alii i le asō pe afai e te lei faia lava. 

E toatele tagata e fai mai ua latou talia Iesu e avea ma Alii ma Faaola, peitai e latou te lei gauai atoatoa i le Alii aua o nisi o vaega o latou olaga o loo pulea pea e le tino. O le toatele o ia tagata e ō i le lotu, ao nisi o loo galulue i totonu o le lotu, o nisi o faifeau, peitai e leai se eseesega o i latou ma tagata o loo i le lalolagi. A gauai moni se tagata i le Alii o Iesu, e avea Iesu ma pule aoao i lona olaga. Po’o le a lava le finagalo o Iesu, e na te faia lava. 

O Iesu o le malamalama ma ua na o ia lava e mafai ona tafiesea le pouliuli mai le olaga o lea tagata. O le pouliuli e mautinoa o loo pule aoao i olaga o i latou e lei tatalaina atu o latou loto ia Iesu, tusa pe fai mai o latou o Kerisiano. A nofo tupu pea le pouliuli i le olaga o se tagata, o le toilalo, faiaina, faanoanoaga, toe foi i tua le olaga ma soo se mea leaga o le a mulimuli i lona olaga. Pe moni ea e mafai ona e faapea mai o Iesu, o le malamalama, o loo pulea ma nofo tupu i lou olaga?

Le au pele e, afai e te lei gauai moni ia Iesu Keriso, o loo tu ma tuitui mai o ia i le faitotoa o lou loto. Tatala atu lou loto ia te ia i le asō, ona ia foai atu lea ia te oe se faamoemoega manuia mo lou lumanai i le suafa o Iesu, Amene. 

OPEN HEAVENS

MATALA LE LAGI MO LE  TOONAI 7 FEPUARI 2026

(tusia e Pastor EA Adeboye)

Manatu Autu: Taofi Mau Lou Saolotoga 2 (Maintain Your Freedom 2)

Tauloto Tusi Paia: Salamo 107:20 “‘Ua ia ‘auina atu lana afioga ma fa‘amālōlō ‘iā i latou ma lavea‘iina ai nai lo latou malaia.”

Faitauga - Tusi Paia: 2 Korinito 3:16-18

O le tiapolo o se gaoi, o lona uiga a alu atu i se tagata poo se aiga, o lona faamoemoe ia gaoi, fasioti ma fa’aumatia. E ese mai la le fa’amoemoe o Iesu. O Iesu na afio mai ina ia o tatou maua le ola tulu’i (Ioane 10:10). O le asō ou te fia faasoa atu nisi o auala e mafai ai e se tagata ua fa’asa’olotoina mai saisaitiaga a le tiapolo ona taofi ma faatumauina lona sa’olotoga ma fiafia moni I le ola tulu’i sautualasi mai ia Iesu.

O se fa’anoanoaga pe afai o se isi ua mae’a fa’asa’olotoina e le aao mata’utia o le Atua ae toe leiloa lona sa’olotoga ona o le vaivai, faatamala poo le valea. E faaumatia tagata pe a leai se poto (Hosea 4:6). E leiloa mea ua o latou maua pe a o latou lē tausisia faiga faavae Paia manaomia e faatumauina ai. O le Alo o le Atua e aumaia le sa’olotoga ma so’ose tasi e tu’u fa’asa’oloto e le Atalii e saoloto faamaoni o ia (Ioane 8:36). E le aumaia e le Atua se fa’asa’olotoga fa’avaitaimi a’o le sa’olotoga moni atoatoa, peita’i e tatau i se uso ua fa’asa’olotoina ona soifua ma ui i le ala o le sa’olotoga.

Fai mai 2 Korinito 3:17; o le mea o i ai le Agaga o le Alii o I ai le sa’olotoga. Poo fea lava e I ai le tiapolo, e lagona loa pe vaaia le Agaga o le Alii, ua i ai fo’i ma le sa’olotoga. Ina ia faatumauina lou saolotoga, e ao ona e faataga Agaga Paia e ta’ita’i ia te oe i mea uma e te fai. Avea Ia ma Alii o ou mafaufauga, upu ma amioga. Soosemea e pulea e le Alii e leai se tiapolo e mafai ona tu lata I ai. 

O le iloa o le Upu moni le isi auala e tumau ai lou sa’olotoga. Fai mai Ioane 8:32; e ao ona outou iloa le upu moni, e tu’u saoloto fo’i outou e le upu moni. E te iloa le upu moni faatatau i le tau na totogi e Iesu ina ia e saoloto? O e savali i lea upu moni? Ina ia tumau ona e ola saoloto e tatau ona e iloa le mea moni i le upu a le Atua ma faatumu ai lou tagata ina ia faapena ona fa’atumulia ai lou loto. O le upu a le Atua o le upu moni lea, ma a e iloa le upu, o le a fa’asa’olotoina ai oe. E ao ona avea le upu a le Atua ma au mea taumafa o aso ta’itasi. Ua fa’aalia mai I le Iosua 1:8; o se ki malosi I le olaga manuia o le mafaufau ma tautalatala I le upu a le Atua I le ao atoa ma le po. Ina ia aua aua ne’i toe pa’i le tiapolo I lou olaga, ia nofo mau le afioga a le Atua i totonu ia te outou i le poto uma lava (Kolose 3:16).

Na faamatala Iopu faatatau i lona fa’asilisiliina o afioga a le Atua i le tusi a Iopu 23:12). Le au pele e, o le a le taua o le upu a le Atua ia te oe? O le a le maualuga o lau faamuamua i fa’atonuga ma poloaiga a le Atua? Afai e te mana’o ia tumau le sa’olotoga ua e maua mai le Atua, ia faataga Iesu Keriso e avea ma ou Alii ma ia faamuamua ma faasilisili lana upu i lou olaga. Ina ia tumau lou olaga saoloto, ia e iloa le upu, usitai i le ta’ita’iga a Agaga Paia ma ia mafaufau ma tautalatala i le upu a le Atua e lē aunoa. I le suafa o Iesu, Amene.

OPEN HEAVENS

MATALA LE LAGI MO LE FARAILE 6 FEPUARI 2026

(tusia e Pastor EA Adeboye)

Manatu Autu: Taofi Mau Lou Saolotoga 1 (Maintain Your Freedom 1)

Tauloto Tusi Paia: Efeso 5:11 “‘Aua fo‘i tou te amio fa‘atasi ma galuega lē aogā a le pouliuli, ‘ae lelei ‘ona ‘outou ‘aumai ia mea i le malamalama.”

Faitauga - Tusi Paia: Ioane 5:5-14

A folafola e le Atua le faasaolotoga, o loo ia faatonuina le tiapolo, ‘faasaoloto loa au pologa, a e le faia, o le a ou oo atu loa ia te oe’. E leai seisi alofaga a le tiapolo ae usitai loa. Afai ua e puapuagatia ona o sauaga a satani, e pei o le sauaina, faatigā, uluitinoina poo le a lava, ou te folafola atu o lou vaitau lenei o le faasaolotoga tumau. I le suafa e sili i suafa uma lava, amata loa ona e savali i le manumalo. 

O le asō, ou te fia talanoa i ni auala e mafai ai ona faasaolotina se tagata ma savali faifai pea ma le saoloto. E ui e leai se tupe e totogia mo le faasolotoga mai sauaga a satani, ae e iai lava lona tau. O le tau muamua mo le savali ma le saoloto, o le lafoai atoatoa o lou ola ia Iesu Keriso. E ui na tele tausaga na sauaina ai le tamaloa mai le tuugamau i Katara, na ia lafoai lona ola ia Iesu. Na ia naunau e fia saoloto, ma o le aso na ia vaai ai i Lē e mafai ona faasaolotina o ia, na ia tamoe i luma, lafoai lona ola ia te ia ma ia maua loa le faamalologa (Mareko 5:1-20). E faapena foi la pe afai e tuuina lou ola ia Iesu ae o loo e fia savali i le saolotoga. E lē mafai ona e nofo i le togalauapiga a le tiapolo ae ete manatu e mafai ona e saoloto mai saisaitiaga, e lē mafai ona e toilalo i faaosoosoga ma e manatu e alu ese le tiapolo mai ia te oe. O tagata e taaalo i le agasala e lalata iai temoni ma o nei temoni e o mai ma aumai soo se saisaitiaga. 

I le faitauga mai le Tusi Paia o le asō, na faamaloloina e Iesu se tagata na iai sona ma’i mo le 38 tausaga. O le tiapolo ma lona malosiaga sa i tua o lenei ma’i tumau ma na matua faatigaina ai o ia. Ina ua maea ona faamaloloina e Iesu, ua tatou iloa ai le mafuaaga na maua ai le avanoa o le tiapolo e saisaitia lenei tagata, o le agasala. Ina ua maea ona faamaloloina, na fetalai iai Iesu e ‘aua nei toe agasala, ne‘i o‘o atu ‘iā te ia se leaga e sili i lenā ( Ioane 5:14). 

Afai e toe foi se tagata na faasaolotoina mai temoni e fai le agasala na tuu avanoa ai muamua i le tiapolo, e sili atu le leaga o le a oo iai nai lo le muamua (Luka 11:24-26). Afai na faasaolotoina se tagata na ulitinoina e se temoni ona o agasala e faia uiga inosia ma matagā, e lē tatau ona toe foi iai lea tagata e matamata ai. Afai o le ai tele na tatala ai le faitotoa i temoni o le ai tele i le olaga o se tagata, e tatau i lea tagata ona tapuni le faitotoa pe a faasaolotoina, ina ia tumau ai. 

Le au pele e, ua maea totogi e Iesu le tau o lou saolotoga peitai o lau matafaioi, o le tumau ai i lea saolotoga. Afai e iai se uiga agasala e te fiafia e fai faalilolilo e ono tatala ai le faitotoa mo sauaga a le tiapolo, ole atu i le Atua ia faasaoloto oe ma saili fesoasoani mai se auauna moni a le Atua, i le suafa o Iesu, Amene.