OPEN HEAVENS
MATALA LE LAGI MO LE ASO TOONAI 16 ME 2026
(tusia e Pastor EA Adeboye)
Manatu Autu: Tausia ma a’oa’o tama i ala o le Atua (Raising Godly Boys)
Tauloto Tusi Paia: Faataoto 22:6 “A‘oa‘o ia i le tama e tusa ma lona ala; a o‘o ‘ina toeaina lava o ia, e le te‘a ‘ese ai.”
Faitauga - Tusi Paia: 1 Samuelu 2:18-26
I le tele o faalāpotopotoga i aso nei, ua tele atu le silasila i le a’oa’oina o teine na i lo tama. E lelei le a’oa’o o fanau teine ia avea ma talavou faamoemoeina, ae ua tatau fo’i ona faapenā le fa’ataua o le aoaoina o tama; e lē tatau ona tu’ufaua i latou. So’o se tama, o se tamā fo’i lea ma o se ta’ita’i i le lumanai mo aiga, ekalesia, faalapotopotoga po o le atunuu. Fai mai le Sakaria 13:7; “Ina ta ia o le leoleo mamoe, ona faataapeapeina ai lea o le lafu mamoe.” E malamalama le tiapolo i le fuaitau lenei, e taumafai lava e osofa’i leoleo mamoe o le lumanai a o le’i matutua i latou ina ia fa’ataapeapeina lafu mamoe ua fuafuaina latou te ta’ita’ia i aso o i luma. Soo se tama la’ititi a i ou talane, o se ta’ita’i lea a taeao ma o le ituaiga ta’ita’i o le a tula’i mai taeao e faalagolago i le ala e a’oa’oina ai o ia i le asō.
O Samuelu sa nonofo I le fale e tasi ma atali’i lē faatuatuaina o Eli, peita’i sa lē faapei o i latou auā o ia o se oloa na maua mai le tatalo (1 Samuelu 1;11), pulunaunau (1 Samuelu 1:25-28), ma le faatonutonu i ala o le Atua (1 Samuelu 1:22). Afai o oe o se matua, fa’amautinoa e te tatalo mo lau fanau tama e lē aunoa ma ofo atu i latou i le Atua. Ia lava lou taimi e mafuta ai ma i latou ma faatonu ia avea ma tamā lelei ua tāpena e auauna i le Atua. Afai e faia, faatasi ma le fesoasoani a le Atua, o le a e atinaeina i latou faapei o Samuelu.
Fai mai le Tusi Paia, na soifua a’e Iesu i le poto, malualii ma le alofaina e le Atua ma tagata (Luka 2:40,52). O le faavae lea fa’ale Atua, o soose tama e ao ona tausia ma aoaoina ia ola fa’aleagaga, mafaufau, lagona, ma le olaga fa’aletino. Fa’ata’ita’iga, ua faaalia i faamaumauga, o le toatele o i latou i falepuipui na ola mai ni tamā lē faamoemoeina, e le’i faia o latou tiute fa’atamā i olaga o latou fanau. O le toatele o fanau tama i aso nei ua tia’i e a’oa’o ma tausi e fesootaiga fa’aneionapo, uō e le iloa le Atua ma pese fa’ale lalolagi. O nisi matua faatoa faatonu latou atalii ina ua ma’itaga ai se tamaita’i, musu e alu i le aoga, po o le ave i le falepuipui. E sili le aoao o i latou a o laiti nai lo le taumafai e sui i latou mulimuli ane; e sili le puipuia na i lo le faia o se fa’asa’olotoga.
O le asō o le aso fa’avāomalō o fanau tama, ma ou te ole atu i matua uma, mātua tausi ma le ekalesia, puipui ma a’oa’o alii faapei ona outou faia i tamaitai. E tatau ona aoao fanau tama e tatalo ma fa’aaloalo i ta’ita’i. E ao fo’i ona aoao i latou e matata’u i le Atua, ia o latou fausia ai ni aiga i le Atua pe a matutua i latou. Ou te tatalo, soo se atalii, ia ola e avea ma ta’ita’i faamoemoeina ma ia avea o ni soifua e faafiafia i le Alii, i le suafa o Iesu. O soo se tama, o se taitai lea i le lumanai, e tatau ona avatu iai le aoaoga sili ona lelei e fesoasoani iai latou ia avea ma ni taitai lelei ma le faamoemoeina i aiga, nuu, ma le atunuu, i le suafa o Iesu, Amene.
