صدقني مفيش حاجة في الطريق تستاهل تخاف منها

مفيش حاجة مهما كانت صعبة تخليك تخاف تمشي الطريق

مادمت عارف وواثق ان ربنا ماشي معاك الطريق وماسك بيمينك، امشي وانت رافع راسك وواثق أنه مش هيتخلى عنك ولا يسيبك

وحتى لو خفت افتكر صوته وهو بيطبطب على قلبك وبيقولك أنا الرب الهك الممسك بيمينك القائل لك لا تخف أنا أعينك.

ومادام ربنا بيعينك مفيش حاجة تقدر تقف قدامك.

قبل ما تستسلم للهم وتشيله، سيبها على ربنا وقول له اتصرف، اوقات بيبقى أفضل حل في المشاكل هو أنك متشيلش الهم، لكن أنك تسيبها على ربنا.

تسيب المشكلة في ايده وقول له انا منتظر الحل والخلاص من ايدك أنت، منتظر أنك تحلها بطريقتك وبتدبيرك، منتظر تعولني في مشكلتي زي ما وعدت في كتابك المقدس.

لأن الكتاب كان بيقول: مُلْقِينَ كُلَّ هَمِّكُمْ عَلَيْهِ، لأَنَّهُ هُوَ يَعْتَنِي بِكُمْ، فمتقلقش يا صديقي هو جنبك وبيعولك في مشكلتك ومش بعيد عن أي وجع بتمر بيه.. بس المهم تعيش بالرجاء وبالإيمان أنه موجود وبيتصرف.

داود النبي كان في نظر الشعب وجليات طفل صغير مش هيقدر يقف قدام جليات او يحاربه بأي شكل من الأشكال والنتيجة معروفة في دماغ الناس من قبل حتى ما تبدأ.

لكن لما المواجهة او المبارزة بدأت كان للسما رأي تاني، وحسابات ربنا دايماً بتكون غيرنا وغير تفكير الناس، واتحول الطفل الصغير في نظرهم ونظر جليات اللي يدوب كان جاي كمان بطوب صغير ونبلة للبطل اللي نزع العار عن شعبه.

اللي قدر بطوبة ونبلة يوقع العملاق وياخد سيفه ويهزمه.

يمكن أحيانا قدراتنا تبقى قليلة، أو يمكن كمان تبقى محدودة جداً، ويمكن نبقى في نظر الناس محدودين، ولكن في نظر ربنا نبقى مبهرين وأقوياء.

متبصش طول الوقت لضعفك، لكن بص لربنا اللي سند ابونا داود زمان، ولسة بيسند كل واحد فينا، وحتى لو كنت ضعيف افتكر ان دايما صوت ربنا بيقولك تكفيك نعمتي، لأن قوتي في الضعف تكمل.

مش شرط يكون عندك كل حاجة علشان تعيش مبسوط وراضي في حياتك، ولا شرط تكون واصل لأعلى المراكز والأماكن علشان تعيش فرحان في حياتك.

لكن لو أنت مصدق أن بركة ربنا اللي في حياتك هي كفاية اوي وسبب كافي أنك تعيش مبسوط وراضي، هتعيش فرحان بكل حاجة موجودة في ايدك، ومش هتضايق طول الوقت أو تحس أن ناقصك حاجة.

في سفر الأمثال الكتاب كان بيقول: "بَرَكَةُ الرَّبِّ هِيَ تُغْنِي"، وهي فعلاً كفاية أنك تحس بالخير وبالبركة في حياتك لأن بركة ربنا مادام موجودة مش هيزيد معاها تعب ولا هتحس معاها أن ناقصك حاجة في حياتك.

كل فكرة بتيجي في دماغنا، بتبقى الأول مجرد كلمات بتترتب جنب بعضها بطريقة معينة علشان نوصل لشكل الفكرة النهائي.

والكلمات نفسها بتيجي من خلال قلبنا ومشاعرنا اللي جوانا، زي مثلاً لما تقول أنا متضايق، فتبدأ تفكر ازاي تقدر تسعد نفسك، وتبتدي تحط أفكار علشان تسعد نفسك فعلاً.

لكن هنا بتبدأ المشكلة، هل قلبك ده بيرشدك للطريق الصح، ولا بياخدك في طرق مش من المفروض أنك تمشي فيها أو تقرب منها!

القلب اللي يكون فيه ربنا، هتلاقي مع الوقت أن الكلمات اللي بتخرج منه حلوة ومليانة بالروح، فبالتالي الأفكار اللي هتيجي من خلال كلماته هتلاقيها مليانة سلام وحياة وروح وأمل.

راقب قلبك وغيره، لو حابب أن أفكارك في الحياة تكون أجمل، ولو حابب أن قرارتك تكون أحسن، خلي ربنا يكون في قلبك، وافتكر دايماً أن "قَلْبُ الْحَكِيمِ يُرْشِدُ فَمَهُ وَيَزِيدُ شَفَتَيْهِ عِلْمًا". 

موسيقي : رامز نادي