Enfocamos la fin de payares o paez que'l tiempu emburria pa ello. Arrancamos col nuesu particular filandón nel que recordamos el fenómenu de les Spice Girls más de dos décades dempués. Vamos preparándonos pales fiestes porque nes moderneces y presumicios de Llucía Miravalles, de Ringo Rango, tenemos les meyores propuestes pala Navidá. Onde de xuru foi difícil cellebrar muncho foi en Salem onde se diz que quemaben bruxes, eso si nun ye otru falsu mitu hestóricu de los que mos desarma Faustino Zapico. Coneutamos con Raúl Alonso dende Valladolid y Eva Cameán dende Galicia pa recibir los sos reportes como corresponsales pel mundu. Falamos con Fernando Argüelles, conocíu como Banskyastur, pa que mos presente la so iniciativa solidaria en forma calendariu qu'esti añu ta encamentada a la salú mental. Y falamos tamién col cantante Carlos Rubiera que mos va falar del so caberu trabayu, el llibru-discu "30 asturianaes"

Domingu y seguimos en Turón, nel conceyu Mieres, onde ya tan poniendo les potes a calentar pala fiesta'l pote. Arrancamos col nueso filandón nel que percorremos l'actualidá menos actual con David Fernández. Nun podemos pensar del pote ensín falar de les manes que ponen en valir la nuestra gastronomía y por eso falamos col cocineru Pedro Martino que tuvo'l martes faciendo un showcooking basáu nesti platu. Nel feminismu pa dummies de Jennifer Berrocal, como mierense que ye, aprovechamos pa conocer les actividaes ya iniciatives entamaes nel conceyu con motivu del 25 payares, día internacional contra la violencia de xéneru. Coneutamos con Xuan Nel Turiel dende Alemania, Andrés Toro dende Colombia y Carlos Sobrín dende L.laciana pa recibir los sos reportes. Visitaránnos, una selmana más, los viescollacios d'Aitor Riera que güei mos fala de protectores d'animales. Y, pa finar, falamos col periodista especializáu en gastronomía David Fernández-Prada que mos averará a delles iniciatives entamaes alrodiu la cultura y el bon comer nel conceyu Mieres.

Esta fin de selmana garramos el macutu y marchamos pal valle de Turón, nel conceyu Mieres. Arrancamos, como ye vezu, col nuestro filandón de l'actualidá menos actual onde David Fernández falarános del casu del falsu coma de Manel Monteagudo. Aprovechando que tamos nel conceyu Mieres, que ya ye cita obligada n'axenda cultural asturiana, falamos con Juan Ponte, conceyal de cultura. Y como tamos equí cola escusa de qu'esti añu ye'l XXX aniversariu de la fiesta'l pote, falamos con Violeta Pérez, vicepresidenta de la Sociedá Turonesa de Festexos (SOTUFE), alma mater d'esta y otres munches actividaes. Y ensín salir del conceyu falamos con otru mierense, l'historiador Faustino Zapico, que mos sigue desarmando la historia y tumbando los falsos mitos históricos como lo de que Napoleón yera tan piquiñín. Y pa baxar el pote nun hai nada meyor qu'echar a correr y por eso Claudia Lueje, la nuesa esperta en deporte y montaña, fálanos de les cites obligaes pala xente aficionao a les carreres nel conceyu Mieres. Y de Turón al cielu, facemos conexón colos nuesos corresponsales pa recibir el reporte d'Eva Cameán dende Galicia y de Raúl Alonso dende Valladolid.

Domingu de fútbol pero nos somos más de comer pipes que de xugalu. Arrancamos el programa col nuesu filandón cola actualidá menos actual na que güei David Fernández nos actualiza datos del casu del obispu de Solsona, fálanos de la secta de los miguelianos y de que la fía de la Pantoja quier ser notaria, él sabrá cómo lo fila.

Falamos con Lino Gómez Feito, una referencia del karate asturianu y estatal y actual seleccionador d'Asturies. Como non too va ser deporte, visítanos Sergio Buelga pa presentanos los sos talleres d'escritura de microteatru que se van facer esti mes en Xixón. Como ayeri nun mos cabíen tolos reportes de los nuesos corresponsales, coneutamos con Carlos Sobrín dende L.laciana, Andrés Toro dende Colombia y Silvia Fernández dende Andalucía.

Otra fin de selmana qu'aprovechamos p'asomanos a la natura con Aitor Riera y los sos viescollacios, que güei mos fala de los ratos. Y finamos col historiador Ramón Sordo que mos fala de "La Montera", el primer periódicu n'asturianu.

Entamamos una fin de selmana más, con cutu y borrina, la cuenta pa Sentir Asturies en toles sos acepciones. Arrancamos col nueso particular filandón nel qu'abordamos l'actualidá menos actual y nel que güei Alma Hidalgo mos fala de les polémiques alrodiu l'actriz Verónica Forqué y David Fernández mos fala de "Juan Pilila", la polémica serie infantil danesa que ta acabante de llegar al nueso país. Tenemos les moderneces y presumicios de Llucía Miravalles, de Ringo Rango, que güei mos fala de conseyos "beauty". Aprovechamos pa tomar un cafetín con Marian Lobo, vocera del proyeutu "Afayaivos conversando" nel que trabayen pol averamientu cultural ente persones en movimientu. Coneutamos colos nuesos corresponsales pel mundu y recibimos el reporte de Xuan Nel Turiel dende Alemania, Eva Cameán dende Galicia y Raúl Alonso dende Valladolid. Falamos col perconocíu músicu folk Rigu Suárez, la metá del dúu Baxel, que mos presenta'l discu de debut "El cantar del Simpatías". Y seguimos con música porque mos visita Toli Morilla pa presentar el so nuevu trabayu "Canciones transgénicas para el mundo mascota".