Sentir Asturies

Llegamos al últimu programa de los especiales braniegos. Recuperamos la historia de les muyeres artistes n'antigüedá con Lucía Montejo, de los mitos alrodiu los vikingos con Faustino Zapico y deprendemos vocabulariu feminista con Jennifer Berrocal. Nes moderneces y presumicios de Llucía Miravalles falamos de Balenciaga y na viesca, cola bióloga Ánxeles Rodríguez, falamos d'inseutos. Na pantallina d'Iván Llera falamos de los estrenos más importantes de la temporada en televisión. Recuperamos la entrevista a Pelayo Rodríguez que mos fala del so llibru "Una sentencia llamada bullying" nel que cuenta la so esperiencia personal. Y pesllamos recuperando delles de les duldes que mos unviaron los oyentes al consultoriu. 

Seguimos na cuenta atrás pa entamar la segunda temporada y seguimos esbillando lo meyor de la primer temporada. Güei falamos de la monxa Claricia cola historiadora del arte Lucía Montejo, de los mitor alrodiu los esclavos n'Exiptu con Faustino Zapico y de La Inquisición con Pilar Sánchez Vicente. Recuperamos el pasu pel diván de la cantante Anabel Santiago, una de les voces más reconocíes de la música asturiana. Falamos de moderneces y presumicios con Llucía Miravalles, de Ringo Rango, que mos acerca a la moda de los 2000. Tamién toca cine cola pantallona de Vítor Suárez col que recordamos delles de les sagues más conocíes. Y finamos recordando dalgunes de les duldes de los nuesos oyentes nel consultoriu. 

Seguimos navegando setiembre y col güeyu puestu na nueva temporada. Pero de momentu seguimos recordando los meyores momentos de la temporada pasada. Recuperamos la terapia musical que ficimos al presentador de TPA, Laude Martínez. Con Pilar Sánchez Vicente falamos de los vicios inconfesables de los emperadores romanos. Recordamos otra lleición de la pantallina d'Iván Llera na que falamos d'Eurovisión. Tamién facemos alcordanza de les píldores que mos mandó Xosé Antón Ambás sobre la llucha contra la COVID na sanidá asturiana. Falamos con Susana Sela y Maitetxu Isla que mos presenten el so llibru "¡Bum!" pala reciella. Y finamos cola nuesa bióloga Ánxeles Rodríguez que mos fala de la microbiota.

Llegó setiembre y ya queda poco p'arrancar cola nueva temporada. Pero de momentu, cola resaca braniega, seguimos recordando los meyores momentos de la temporada pasada. Recuperamos el pasu pela nuesa terapia musical del cantante y compositor asturianu Alfredo González. Falamos con Marián Lago, del coleutivu DISEX, sobre la llei trans. Con Pilar Sánchez Vicente averámonos a les venus y l'arte paleolíticu. Falamos del prime time y conciliación na televisión con Iván Llera. Recordamos qué yera eso de la biomimética que mos contó Ánxeles Rodríguez. Y pesllamos col radioteatru "La primer fola", de Sergio Buelga, con Pedro Fernández y Marcos SL. 

Llegó la fin d'agostu y del branu y nos seguimos apurando pa esbillar los meyores conteníos de la temporada recuperando delles entrevistes d'interés. Entamamos falando con Blanca Fernández, escritora moza qu'espublizó la esitosa novela "L'home de les caparines" (Ediciones Radagast). Seguimos con noveles porque falamos con Nicolás Bardio, autor de "La embaxada prieta" (Hoja de Lata), un thriller políticu na corte de Llión del sieglu XII. Tamién pasó pel estudiu otra xoven promesa de les lletres asturianes, Alma Hidalgo, ganadora del premiu "Entaína a escribir" entamáu pola Direición Xeneral de Política Llingüística y l'Institutu Asturianu de la Mocedá. Y non too van ser lletres, porque tamién mos visitaron el cineasta Pablo Casanueva y el cocineru Lluís Nel Estrada pa presentanos la so road movie "Tierra de quesu" qu'emitió con ésitu d'audiencia la TPA. Y rematamos cola terapia musical aprovechamos pa conocer un poco más a Arantza Margolles, conductora d'esti programa, historiadora y divulgadora. 

Entamamos cola cuenta atrás porque ya asoma'l fociquín setiembre. Seguimos con Arantza Margolles, Lluís Fanjul y MarcosSL esbillando lo meyor de la temporada que rematamos. Güei facemos alcordanza de los cortes d'humor que fizo l'equipu a lo llargo de tolos programes. Tamién recuperamos la entrevista al empresariu InaciuI glesias que mos faló d'empresa y mediu ambiente. Y, pa rematar,recordamos el pasu pel nueso diván de la perconocía cantante Cristina del Valle, parte del grupu "Amistades peligrosas"

Averámonos pasín ente pasua la fin del branu y seguimos esbillando lo meyor de la temporada con Arantza Margolles, Lluís Fanjul y Marcos SL. Y como agostu ye tiempu de folixa y desenfrenu seguimos ufiertándovos dalgunos de los meyores momentos de los retayos d'Historia de Pilar Sánchez Vicente. Y como tamién ye tiempu de disfrutar d'un bon llibru, recuperamos la entrevista con Xuan Bello, una de les voces más conocíes de la lliteratura asturiana. 

¿Qué diba ser de la vida ensín teatru? Pues nos tenemos claro que diba ser daqué peor. Por eso güei recuperamos delles de les pieces qu'emitimos esti añu dirixíes por Sergio Buelga. Viaxamos al pasáu más llonxanu con "El descensu real n'Arnáu" y "Pasión nel castiellu de Gauzón" interpretaes por Lucía Carracedo, Pedro Fernández y Lluís Antón González. Como ye branu ye bon momentu pa garrar "La primer fola" con Pedro Fernández y Marcos SL. O aprovechar que nun fai muncho calor pa facer "El camín de Don Gaspar" interpretada por Sergio Buelga y Lluís Antón González.