Adelantámonos un poco y cellebramos el día del llibru faciendo terapia musical con Xuan Bello, una de les figures de más sonadía nes lletres asturianes. Coneutamos con Italia dende onde Barbara Biagioli nos desplical'orixe un poco picante de los perconocíos tortellini y con Colombia dende onde Andrés Toro mos fala de La Xiralda. Como cada miércoles tenemos retayos d'historia con Pilar Sánchez Vicente que güei mos recuerda la secuenciación del ADN de losrestos de la cueva d'El Sidrón en Piloña. Asomámonos a la pantallina con Iván Llera que nos fai un percorríu pelos talent show más seguíos de la tele. Y, como non, na pantallona falamos con Vítor Suárez de les películes qu'opten a Oscar la prósima finde selmana. 

Arrancamos una selmana más cola nuesa particular superlliga. Conocemos "Lo que ocultan los árboles", un xuegu de rol asturianu que ta en campaña de crowdfunding con Llara Fuente, la so illustradora. Seguimos nel cursu de feminismu pa dummies con Jennifer Berrocal que nos avera a los mitos alrodiu la violencia machista. Nun dexamos los mitos porque l'historiador Faustino Zapico sigue desarmando la historia y güei toca'l mitu del pucherazu nes elleiciones del 12 d'abril de 1931. Nes moderneces y presumicios de Llucía Miravalles perfilamos la figura de Vivienne Westwood, creador de la moda punk. Percorremos con Xuan Nel Turiel les cais de Berlín que, como equí, nun tan llibres de polémica colos sos nomes. A un añu d'andanciu seguimos coles píldores que nos alministra l'enfermeru Xosé Ambás reflexonando sobre la situación sanitaria. Como cada martes mos averamos a la viesca cola bióloga Ánxeles Rodríguez cola que güei cellebramos el Día Internacional de la Madre Tierra. Y entrevistamos a una tortuga. Sí, a una tortuga.

Algamamos l'ecuador de la selmana y afrontámoslo col nuesu particular filandón. Conocemos les noticies del mundu con David Fernández y coneutamos con Bárbara Biaglioli n'Italia y Andrés Toro en Colombia colos sos reportaxes selmanales. Pel diván facemos terapia musical col actor asturianu Pedro Durán. Percorremos les efemérides con Pilar Sánchez Vicente que güei fai alcordanza a los noventa años de la proclamación de la Segunda República n'España. L'arqueóloga Irene Faza mos cuenta en qué consiste "Falando sele", el proyeutu de recuperación de memoria oral nel conceyu de Piloña qu'impulsa y de les xornaes de memoria democrática que tan faciendo estes selmanes en comuña les asociaciones Les Ablanes de Piloña y Reflexu de Mieres. Asomámonos a la pantallina pequeñina de la tele con Iván Llera que mos fala de programes d'otres autonómiques que prestaría adaptar a TPA y con Vítor Suárez sentámonos nel patiu de butaques pa falar de los grandes fracasos de taquilla na hestoria del cine. Y, como cada miércoles, finamos col consultoriu pa resolver les duldes de los oyentes.

Llegamos al idus d'abril que diríen los romanos, el tiempu nel que los díes s'abren. Y p'abrise aprendemos con Marcos Salazar esos datos absurdos qu'ayuden a romper el xelu. Facemos conexón directa con Berlín dende onde Xuan Nel nos fala de cómo espacios de la II Guerra Mundial se tresformen en llugares d'ociu.  Tendremos otra lleición del cursu de feminismu pa dummies con Jennifer Berrocal que güei mos desplica qué ye'l términu del heteropatriarcáu. Una selmana más tenemos moderneces y presumicios con Lluci Miravalles, de Ringo Rango, que mos fala de moda y teunoloxía. Nesti día internacional del besu, Lucía Montejo, la nuesa historiadora del arte mos avera a los besos tráxicos. Y de momentos tráxicos y d'esperanza nos fala l'enfermeru Xosé Antón Ambás que mos cuenta cómo foi l'entamu l'andanciu a un añu vista. Falamos col hestoriador Eduardo Abad, de la Universidá d'Uviéu y coordinador del llibru "El antifranquismo asturiano en (la) Transición" recién espublizáu pol Colectivu d'Historia Crítica. Y finamos, como cada martes, falando de medio ambiente cola bióloga Ánxeles Rodríguez que mos esplica'l "síndrome de déficit de natura".

Arrancamos un miércoles más cola nuesa particular visión del mundu y conectando con Bárbara Biaglioli dende Italia y Andrés Toro dende Colombia. Pel diván pasa a facer terapia musical, Sonia Fidalgo, presentadora de TPA. Averámonos con Pilar Sánchez Vicente a la Nicaragua sandinista a traviés de la figura de Gaspar García Laviana. L'historiador Xuan Fernandi preséntanos el so llibru "L'escudu d'arnes de Xixón" nel que conoceremos, ente otres coses, el porqué de que tea Pelayo nel escudu la ciudá. Asomámonos a la pantallina con Iván Llera p'analizar el fenómenu televisivu del momentu como ye'l documental de Rocío Carrasco. Y, con Vítor Suárez, facemos un percorríu peles películes polémiques na historia del cine.

Recuperando tres les vacaciones seguimos deprendiendo datos absurdos pa romper el xelu con Marcos Salazar. Coneutamos con Berlín dende onde Xuan Nel Turiel nos fala de por qué se ven tantes tuberíes a la vista na ciudá. Con Lluci Miravalles seguimos falando de moderneces y presumicios y cuéntanos qué ye eso de la moda "anti-bride". Seguimos col cursu de feminismu pa dummies col que Jennifer Berrocal nos amuesa la segunda parte de cantares asturianos de conteníu feminista. Nun dexamos el feminismu porque Lucía Montejo mos cuenta la polémica alrodiu "Pasiones mitológicas", la última esposición nel Muséu d'El Prado. Seguimos desarmando la Historia con Faustino Zapico que nesti programa nos avera la figura de María Antonieta y qué hai y non de verdá alrodiu la so figura. Asomamos a la viesca pa conocer xunto cola bióloga Ánxeles Rodríguez la importancia de les migraciones animales. Y a un añu d'andanciu entamamos un percorríu colos profesionales que s'enfrentaron a ello n'Asturies y güei falamos con Xosé Antón "Ambás", enfermeiru nel HUCA y con Dulce Jiménez, directora de la residencia de mayores El Carbayu de Ciañu.

Saludamos ya les vacaciones repasando l'actualidá d'Asturies y del mundu a la nuesa manera. Coneutamos Italia y Colombia de forma simultánea onde Bárbara Biaglioli y Andrés Toro fálannos de muyeres nel espaciu como Valentina Tereshkova o la italiana Samantha Cristoforetti. Tenemos una nueva tanda de coses random pa romper el xelu nun ascensor con Marcos Salazar que güei nos fala de los cantares que peor avieyaron. Pela terapia musical nel nuesu diván pasa'l cantante y compositor Alfredo González. Nos retayos d'historia va falanos Pilar Sánchez Vicente d'arte paleolíticu y de les representaciones de la muyer nel mesmu. Con Iván Llera percorremos l'actualidá de la pantalla piquiñina. Y güei, Día Internacional de la Visibilidá Transxéneru, vamos falar con Marián Lago, de l'asociación Disex. Y pa finar, como cada miércoles, resolvemos les duldes de los nuesos oyentes nel consultoriu.

Mirando de regüeyu ya pala Selmana Santa seguimos aportando visiones diferentes d'Asturies y del mundu. Arrancamos col nuesu particular filandón nel que conectamos col nuesu corresponsal en Berlín, Xuan Nel Turiel, que nos falará del grupu alemán Corvus Corax que, tamién, tien vinculu con Asturies anque seya de rebote. Tenemos nueva lleición del cursu de feminismu pa dummies con Jennifer Berrocal que güei mos trae cantares asturianos con mensaxe feminista. Nes moderneces y presumicios de Llucía Miravalles vamos averanos a la figura de la reina Victoria d'Inglaterra, la primer influencer. Una selmana más desarmamos la Historia con Faustino Zapico que va falanos de lo qu'hai de verdá alrodiu l'apostol Santiago. En "La viesca" la bióloga y educadora ambiental Ánxeles Rodríguez falaranos de la biomimética. Acompañaranos la escritora Jessica Gómez pa presentar el so nuevu llibru "Mamá en busca del polvo perdido". Y rematamos col radioteatru qu'esta selmana vuelve cola obra "La primer fola", col patrociniu del Conceyu de Castrillón, dirixía por Sergio Buelga ya interpretada por Pedro Fernández y Marcos SL.

Llegamos a la metá de la selmana con tiempu revueltu, pero non tan revueltu como tenemos el programa. Arrancamos coles noticies absurdes del mundu que nos trae David Fernández. Coneutamos con Bárbara Biaglioli que mos cuenta les tradiciones tipiques de la Selmana Santa n'Italia y con Andrés Toro que nos fala del bocadiello beleño y lo poco que se parez a lo que nos conocemos por bocadiellos. Tenemos terapia musical nel diván col escritor y axitador cultural Dolfo Camilo Díaz. Con Pilar Sánchez Vicente seguimos percorriendo la hestoria a traviés de les efemérides, que güei s'averen al güelpe d'estáu de Videla n'Arxentina. Conocemos les novedaes qu'aporten a la televisión estos díes con Iván Llera. Falamos con Pelayo Rodríguez, autor de "Una sentencia llamada bullying" que nos contará la so esperiencia pa col acosu escolar. Y, como cada miércoles, tenemos consultoriu pa intentar resolver les duldes de los oyentes.

Llegó la primavera y nótase nos nuesos collaboradores que lleguen más faladores que nunca. Estrenamos seición con Marcos Salazar de coses "random" coles que romper el xelu y con David Fernández averámonos a les noticies absurdes del mundu. Tenemos la segunda parte del pallabreru feminista con Jennifer Berrocal nel so cursu de feminismu pa dummies. Seguimos desarmando la historia con Faustino Zapico qu'agora tomóla colos vikingos. Nel percorríu poles muyeres artistes vamos conocer a Plinio y les muyeres n'antigüedá con Lucía Montejo. Pegamos un saltu al arte de la costura con Llucía Miravalles de RingoRango que nos fala de Balenciaga. Con Ánxeles Rodríguez, la nuesa bióloga y educadora ambiental, vamos conocer la importancia de protexer los inseutos. Y como aparte de sentir, tamién vemos, ponemos un güeyu pala tele y falamos con Carlos Alba "Cellero" responsable de "Animalada xabaz", el nuevu programa pala reciella que ta a piques d'estrenar TPA.