此文章是根據受訪者訪問內容，以第一身撰寫
我是一個90後，媽媽半年前已經離開香港，而我則原本打算3月中移民。農曆年期間（2月限聚令頒布之前）
我係一個90後，媽媽喺半年前已經離開香港，而我本身都打算喺三月中移民。所以新年期間、二人限聚令實施前，我就爭取時間同三個朋友在家聚會，傾下移民前嘅準備同將來嘅打算。其中一位朋友當晚有流鼻水，不過佢一直也有鼻敏感，當時都無其他病徵，所以大家就如常食飯。
「喂喂？你有冇病？我好似中咗。」
第二日朝早，我就被朋友嘅電話嘈醒，一接聽電話，朋友就問我有無出現omicron嘅病徵，而佢尋晚返到屋企，都開始發燒、肌肉無力同骨痛，而我亦開始出現發燒嘅徵狀。
後生仔懷疑自己確診，第一時間好自然喺Google Search「懷疑確診的做法」，但今次完全無用。因為政府嘅防疫措施改完又改，網上資訊超級混亂，根本就無渠道令懷疑確診嘅人可以跟從。我用咗好多時間去查衛生署資料，先發現官方嘅指引每天都變緊，而且要仔細睇PDF檔案，碌到最後一頁，先見到俾呈陽性人士嘅建議，我已經忍唔住鬧爆「超唔organised！」，最重要嘅資訊竟然唔係放喺最前俾人睇，可以想像到，老人家又點會花時間去研究呢？
新年個陣，每天確診人數介乎200至300人。政府當時咬牙切齒話要「清零」。估唔到，事實反映區區300宗個案就可以「打爆」防疫系統。一開始我都試過聯絡衛生署，打過好多次都無人聽，就唯有去藥房買快速測試棒。
我好怕搭車會傳染到人，所以我自己行去附近嘅萬寧。到埗時先發現所有快測棒都被人買晒。售貨員幫手睇埋附近分店，都完全無貨。
而家嘅困局係，你要知道自己有無染疫，就只可以拎「樽仔」做深喉唾液檢測。去到診所之後，醫生好似一早就知衛生署嘅安排混亂，他索性唔派樽仔俾我，反而叫我在家休養，勸我先休息一下，再睇下個病點。
佢仲語重深長問我：「你真係要知道結果？真係要知嘅你先再去政府檢測中心喇。」
我其實都想知自己究竟有冇中招，所以就走去檢測中心。一去到，員工就話，「樽仔」派晒，當我同員工說明自己已開始發燒，他就好激動話「發燒你就返屋企喇，仲周街走？我唔知你點喎，你走喇」，就咁打發咗呢個懷疑確診人仕。
喺無可奈何嘅情況下，我就只能返到屋企，打俾上司「備案」，話自己會留喺屋企隔離14日。好彩佢都好諒解，覆咗句「你搞掂自己先返工喇，唔好擔心」。
因之前已經有同事嘅家人確診，他都有分享返當時嘅經歷，當時佢地一家人係密切接觸者，就畀人帶晒去竹篙灣隔離營。期間所有家庭成員都係呈陰性，但就無故被「囚禁」咗10多日，而同事嘅親戚每日都打電話去衛生署鬧，問佢哋「點解冇病都要去竹篙灣隔離」？最後因社區嘅陽性個案係咁升，同事一家人未住滿14天，就被趕出竹篙灣，大家聽完都唔知好嬲定好笑。朋友同事都認為，如打唔通衛生署熱線，病徵又唔重，咁不如自己買成藥，在家休養。
媽媽已離開香港，我同老豆一齊住，我最擔憂老豆。佢反而好放心，可能佢太相信政府，覺得有一日點都會清到零。不過返工係佢首要嘅事，我相信即使佢呈陽性，佢同佢嘅同事都會繼續返工，其實都有唔少日薪工唔返工就「手停全家口停」。老豆嘅公司每天都會要求員工做快測，他一直都係除性，所以我喺第三日便幫他訂了附近一間酒店房，等我可以自己留喺屋企隔離。
第一天懷疑自己染疫嘅狀況下，我竟然能夠同人交代同處理咁多「行政」程序，覺得自己真係唔簡單。返到屋企坐在電腦前面，「荒謬」、「混亂」呢兩組詞語開始喺腦海中不斷浮現。愈睇資料，心情愈差。你會發現，政府連delta同omicron嘅病患都無分開紀錄，萬一我入住隔離營嗰陣，同其他患者交叉感染，病情係咪會更糟糕呢？
所以，我內心其實一直都想避免入住竹篙灣，都係心存僥倖，希望衛生署爆煲就仲好。當官方都處理唔到，咁我自己居家隔離，存在嘅變數就更少，反而更安全。
當晚聚會中，其中一個朋友同我地背道而馳，佢堅信要跟住所有官方嘅防疫指令，所以堅持向政府如實申報佢確診嘅事，否則就是「講大話」同「不科學」。所以佢早已向衛生署申報自己確診，同時「企硬」，話如衛生署搵他，他就一定會公開我地嘅資料俾衛生署。
相比起病，呢件事反而令我更頭痛，結果我地就開咗個group，同當晚會面過嘅朋友討論之後嘅應對方法。同佢們傾咗一陣之後，便會明白點解佢要咁「聽話」，即使喺政府咁混亂嘅狀態下，佢都要如實申報，係因為公司唔會無端端俾你放14日假期，佢一定會要求你證明自己「病」咗，呢個都係點解社區檢測中心會大排長龍嘅原因。
留喺屋企第四日，都退晒燒喇，純粹有兩聲咳。第八日開始已經感覺身體完全恢復了，我亦托親戚買咗快速測試棒，掛哋我屋企門口。到第十二日，我就開始做快速測試，連續兩天都呈陰性，第十四日我就自行放監了。
而最「聽話」的朋友，喺申報咗陽性結果嘅第五日，衛生署先聯絡他，要他兩天內執好行李，準備入住竹篙灣。弔詭嘅係，衛生署之後一直無派人嚟接走佢。再過兩天，他先收到消防處打嚟，要他入住亞博接受隔離。不過，當時他已經轉陽為陰，又因為知道亞博嘅衛生情況特別惡劣，他就一口拒絕咗。
今日諗返起離港前嘅一個月，竟經歷了如此荒謬嘅景況。這個「自把自為」嘅處理方法，放在二月中呢個時空算係「犯晒法」，但係事隔一個月，每日確診個案已經去到五萬單咁多，而政府嘅指引同我當時自我隔離方法都差無幾喇。
我同班朋友每日都嘗試努力咁如常生活，政府就以科學為名，為清零而清零，將病患者搬離社區就等同清零？結果呢，就係要病咗嘅長者瞓喺醫院出面，變相謀害市民性命。
