بهاي الحلقة من  أهلShift، بحكي مع البروفيسور فؤاد عازم - مدير قسم الخصوبة والتلقيح الخارجي في مستشفى إيخيلوف، عن واحد من أكثر المواضيع اللي بتشغل بال كل حدا بفكر بالإنجاب اليوم أو مستقبلاً :ليش صار الإنجاب أصعب؟

منبدأ الحوار بسؤال-  هل غرف الانتظار ملانه أكثر لأننا صرنا "واعيين" أكثر، ولا في إشي بيولوجي، بيئي، حقيقي عم يتغير؟ بروفيسور فؤاد بشرحلنا على الصراع بين "الساعة الاجتماعية"- رغبتنا نبني مهنة ومستقبل- وبين "الساعة البيولوجية" اللي ما بتستنى حدا وخاصةً عدد البويضات المحدود عند النساء، واللي بقل مع تقدم العمر. 

بحديثنا، بنركز على حقيقة طبية بمجتمعنا بنحاول نتجاهلها أو نحمّلها للمرأة وحدها: الرجل مسؤول عن 50% من حالات تأخر الإنجاب. ومنفكك مع بروفيسور فؤاد العلاقة المغلوطة بين "الرجولة" و"الخصوبة"، وبنسمع منه ليش جودة الحيوانات المنوية في تراجع مستمر عالمياً وفي مجتمعنا تحديداً نتيجة نمط حياتنا، التدخين، والسمنة.

منسمع من بروفيسور فؤاد عن سيرورة علاجات الـ IVF؛ ايش بصير فعلياً بجسم المرأة خلال هاي العلاجات، من التنشيط للسحب وصولاً للغرس. وبروفيسور فؤاد بعطينا قراءة واقعية للأرقام: شو يعني لما الطبيب يقول "نسبة نجاح 50%"؟ وكيف لازم نفهم الفشل في الدورات مش كـ "نهاية"، إنما كبيانات طبية بتساعدنا نعدّل المسار للمحاولة الجاي.

الحوار كمان بفكك خرافات بنسمعها وممكن بنصدقها: هل فعلاً لازم المرأة تضل "نايمة على ظهرها" أيام بعد إرجاع الأجنة؟ هل "التوتر" هو السبب الحقيقي ورا تأخر الحمل؟ ووينتا "الانتظار" بكون قرار خاطئ وبشكل خطر على فرصنا في المستقبل؟

منحكي كمان عن تجميد البويضات كأداة لتمكين الصبايا للحفاظ على خياراتهم المستقبلية، وعن أهمية الفحوصات الأساسية (AMH, FSH) اللي لازم كل صبية تعرفها عن جسمها. 

الهدف من هاي الحلقة مش بس تقديم معلومات، إنما تبسيط العلم ليكون أداة بإيد كل زوج وزوجة عشان يفهموا واقعهم الطبي بعيداً عن لوم الذات أو ضغط المجتمع. 

حوار صريح ومباشر، بذكرنا إنه الوعي، المعرفة بالحقائق هو أول خطوة باتجاه التشافي وبناء العائلة اللي بنحلم فيها.

تابعونا على Instagram و TikTok للمزيد من المحتوى – @shiftahel

تنويه هام: المعلومات في هاي الحلقة هي للتوعية العامة، ومش بديل عن استشارة طبية شخصية.

تعوّدنا نفكر في الحمل كمسار طبيعي، بسيط، وبمشي بخط مستقيم. بس الحقيقة لكثير عائلات هي مختلفة تماماً- الدخول لحمل بكون رحلة، مسار طويل، وأحياناً معركة صامتة مع التوقعات ومع الذات.

في هاي الحلقة بستضيف رنين مراوي حبيب - صاحبة استوديو قوة وبيلاتيس في حيفا ومرشدة لتعزيز الصحة. 

رنين، اللي بنَت حياتها المهنية وعلاقتها مع جسدها على الانضباط والحركة، لاقت نفسها بتواجه تحدي ما توقعته. 

لما قررت تبدأ برحلة الأمومة،  جسدها ما تجاوب معها كيف متعودة, والأصعب من هيك أنه ما كان في أي تفسير طبي واضح لعدم التجاوب.

في هاي الحوار منحكي عن  حالة "تأخر في الإنجاب غير المفسرة"، وكيف واجهت رنين هذا الواقع من خلال سيرورة علاجات الـ IVF. منسمع منها بكل شفافية عن: تغيّر علاقتها مع جسدها، دور الشريك والسند- حكينا مطولاً عن أهمية المساحة الجوهرية الي اخدها زوجها في هاي الرحلة، وكيف أثرت التجربة على علاقتهم.

حكينا كمان عن نظرة وتعليقات المجتمع,  ليش قررت رنين مشاركة رحلتها مع مئات آلاف المتابعين على الشبكات الاجتماعية وايش أثر هاي الشفافية عليها وعلى الآخرين. 

ختمنا الحلقة برسالة ذهبية عن مفهوم النجاح: رنين شاركت بمفهومها للنجاح وإعادة تعريفه من "نتيجة" فقط، لقدرة على الصمود والاستمرار يومياً.

هاي الحلقة هي دعوة لكل امرأة , زوج وعائلة بمروا في تحديات الإنجاب، ولكل حدا ببحث عن فهم أعمق للصراعات الإنسانية من ورا "صور النجاح" الي منشوفها. 

حلقة حقيقية، صادقة، ومؤثرة، راح تلمس كل من بخوض هاي الطريق أو بساند شخص فيها.

تابعونا على Instagram و TikTok للمزيد من المحتوى – @shiftahel

بهاي الحلقة بحكي مع أسرار كيّال - اخصائية نفسية تربوية، باحثة في علم النفس التربوي وطالبة دكتوراه في جامعة برايتون.منحكي معها عن مفهوم الإرث النفسي. الإرث اللي بتعرفه أسرار كـ ذاكرة نفسية متوارثة – جهاز نفسي تكوّن عبر أجيال نتيجة تجارب وصدمات وسياقات اجتماعية وسياسية: الجهاز في جوانب تكيُّفية، وجوانب غير تكيُّفية.

بحديثنا منركز بشكل خاص على المجتمع الفلسطيني في الداخل - فلسطينيي الـ48، مع إسقاطات وارتباطات بالفلسطينيين حولين العالم ومع ربط بتجارب مشابهة في الوطن العربي. ومنجاوب على سؤال محوري: ايش يعني انه احنا جيل حامل تاريخ كامل، وكيف نقدر نعالج هذا التاريخ بدل ما نعيد إنتاجه؟

من خلال الحوار منتعرّف على معنى الإرث النفسي- جذوره، وكيف بنتقل بين الأجيال- من خلال العلاقات الأسرية ومن خلال الـ epigenetics - ما فوق الجينات. ومنقارن بين السلوك "التكيّفي" اللي ساعد أجدادنا ينجوا، والسلوك "غير التكيّفي" اللي ما بخدمنا اليوم.

وبالحلقة منحكي عن مجموعة من العوامل الصادمة والتجارب النفسية العميقة اللي أثّرت على الفلسطينيين بالداخل خلال السنين-  النكبة، الحرمان المسكّت، الصمت القسري، الصدمة الاستعمارية، انقطاع السردية، فقدان الأمان والإطار الجمعي، وغيرها - وأسرار بتعطي تفسير دقيق لكل واحد منها، وبترجع النا لجذوره التاريخية والسياسية، وبتشرح كيف هاي الصدمات والأحداث بعدها لليوم بتشكّل سلوكنا، علاقاتنا، وطريقة تعاملنا مع أنفسنا ومع أولادنا.

بالتحديد، تعمقنا في كيف تجارب الصدمة، والسياق الاستعماري وطريقة التعليم شكّلت دماغنا، تفكيرنا، وردات فعلنا. ومنناقش مع أسرار كيف جهازنا العصبي يشتغل أكثر بحالة تأهّب وردّ فعل سريع وحفظ معلومات، على حساب الأجزاء اللي بتدعم اللعب، التجربة الحيّة، والقدرة على رؤية الواقع بطريقة أعمق من "أسود / أبيض".

ومنحكي كمان كيف الصدمة بتعيش على الأطراف وبتخلّي الجهاز العصبي متأهب وجاهز يفرّغ- مرات بالغضب والعنف، ومرات بفرح عالي وطاقة مثل الدبكة والرقص. طرق مختلفة للتفريغ عن النفس بس خارجة من نفس الجرح.

منسمع من أسرار طرق عملية للتشافي وكيف منقدر نأخذ من هذا الإرث الجزء التكيفي اللي بخدمنا، ونكون واعيين للجزء غير التكيفي اللي ما بفيدنا وما نمرّره للأجيال الجاي. 

الحوار مش بس نظري - مليان أمثلة من الحياة اليومية وهو دعوة نفهم حالنا مش بس كأفراد، انما كجزء من قصة جماعية عميقة، فيها ألم كبير لكن فيها كمان إمكانية حقيقية للتشافي.

منختم الحلقة برسالة قوية من أسرار: الصدمات بتحجب الحب، لكن الحب هو اللي بشافي الصدمة

وأساس هذا التشافي هو إننا نحرّر حالنا من العجز المقرون بالعار - اذا أبطلنا العجز المقرون بالعار، بعلى عنا تقدير الذات - حب النفس. يعني التشافي ببلش من جوا - من استرجاع القدرة على الحب -  لما نرجع نحب حالنا، منصير نقدر نحب أولادنا، واللي حوالينا ومنسترجع إنسانيتنا. وبالنهاية احنا مجتمع كامل عم يدوّر على الحب والرعاية اللي انحرم منهم- على رعاية حقيقية - رعاية تعيد لمجتمعنا إحساسه بنفسه وقدرته يعيش. 

تابعونا على Instagram و TikTok للمزيد من المحتوى – @shiftahel

في هاي الحلقة من أهلShift، بحكي مع رينيه فراج أبو ديّة - أم لثلاثة أطفال، وصاحبة Renee Pilates وHer Journey by Renee.

رينيه بتمثل صورة الأمومة الحديثة، بنت بزنسين في السنوات الاخيرة خلال الأمومة، ومن حواليهم نشأ مجتمع نسائي صادق وداعم صار جزء من يومها ويوم كثير أمهات.

الحوار مع رينيه مش عن قصة نجاح سهلة، ولا عن توازن مثالي.

هو عن الحياة اليومية كيف ما هي بواقعها-منحكي عن الثمن وراء صورة الأم الريادية، عن الضغط وشعور الذنب اللي بتعيشه كل أم وعن العبء الذهني المستمر 24/7. رينيه بتشاركنا بشفافية كيف تخلصت من وهم "لازم أعمل كل اشي لحالي" وتعلمت تقول ببساطة: "أنا بحاجة لمساعدة"، وانه طلب المساعدة مش علامة ضعف.

منحكي عن الأشياء اللي الأمهات غالبًا بيسكتوا عنها وما بحبوا يشاركوها - مشاعر الذنب اللي بترافق الأم العاملة- من تحضير الأكل، للغياب عن البيت، للتعليقات الاجتماعية- وكيف بتتعامل مع الأحكام والتوقعات العالية اللي بتنحط على الأمهات من المجتمع.

رينيه بتحكيلنا كمان عن المجتمع النسائي الداعم اللي نشأ بالصدفة حوالين الاستوديو، وكيف تحول لمساحة آمنة للراحة والفضفضة بعيد عن المثالية.

هاي الحلقة قريبة من كل أم عاملة وكل أم بتحاول توازن,,, وبتفشل,,,  وبترجع تحاول. هي تذكير انه الأمومة مش لازم تكون مثالية، وانك مش لحالك في هاي الرحلة.

تابعونا على Instagram و TikTok للمزيد من المحتوى – @shiftahel

في هاي الحلقة من أهلShift، بستضيف الفنان الكوميدي عدي خليفة- زوج لرنا وأب لطفلين- شمس وكون.في الحوار مع عدي منمشي معه من الطفل… للإنسان…للزوج… للأب… للفنان,  بنفهم كيف كل مرحلة بنت اللي بعدها، وكيف بوازن بين عالمه الداخلي متطلبات حياته المختلفة. 

منرجع مع عدي للطفولة: الإشي اللي ضل معه، والإشي اللي تنازل عنه. منحكي عن علاقته العميقة مع ربّه، وعن الحدس اللي بيوجهه بقرارات كبيرة- من اختيارات الشغل، لوجوده جنب أبوه، لرفضه لفكرة “خطة باء”.منتعرف على عدي بابا، بحكيلنا عن اللحظة اللي حمل فيها ابنه شمس لأول مرة والبعد الجديد للحب اللي حسه، كيف تغيّرت أولوياته، وكيف هو ورنا عم ببنوا “كتالوج” خاص لتربية أولاده - بتبني طرق ومفهامين الي بتطابق في الدين والعلم منسمع عن السفرات، والعروض، والغياب اللي بيفرضه الشغل  وكيف بحاول يعوض، يكون حاضر، ويعيش “بذكريات أولاده المستقبلية”.

الحوار بيكشف كمان جانب ما بشوفه الجمهور من عدي: محل الضحك ببيته، الحساسية، والطفل اللي بعده جواته، وكيف جزء من شغله على حاله هو إنه يضل محافظ عليه. ومنرجع نحكي عن الكوميديا وعرض "عدي بابا والأربعين خازوق"  ليش بختار يجيب حاله فيه وقصصه الشخصية، وكيف الأبوة غيّرت رسالته. 

وبالنهاية، منسمع عن نظرة عدي لقدام: كفنان، كزوج، وكأب وعن الرسالة اللي بتمنى أولاده يسمعوها بعد سنين.

تابعونا على Instagram و TikTok للمزيد من المحتوى – @shiftahel

في هاي الحلقة من أهلShift، بحكي مع هشام ذياب، أب لأربع أولاد، ناشط اجتماعي، من مؤسسي مركز الوساطة في طمرة، ومرافق ومدرب لمديري مراكز الوساطة في المجتمع العربي. من خلال شغله في الميدان، ودوره اليوم في مرافقة وتدريب مديري مراكز الوساطة، هشام بشاركنا خبرة سنين طويلة من العمل في مرافقة خلافات وصراعات مختلفة. 

مع هشام، منحكي عن مفهوم "الوساطة"  كمهنة وكمهارة حياة أساسية لازم تكون جزء من تربيتنا اليومية. هذا الحوار برجعنا للأساس: البيت. منحكي عن كيف مفهومنا وتوجهنا للخلافات بتبلش من تربيتنا، وكيف طريقة تعاملنا معها كأهل هي اللي بتحدد سلوك أولادنا في المدرسة وفي الشارع. هشام بشاركنا إيمانه أنه كل مشكلة، مهما كانت صغيرة، هي فرصة لنعلّم أولادنا كيف يسمعوا، كيف يعبّروا عن غضبهم بكلمات مش بأفعال، وكيف كل مشكلة الها حل.

من خلال أمثلة وقصص من تجربته، منتعلم عن أدوات عملية مثل الإصغاء الحقيقي، أهمية التنازلات، وكيف مجرد إعطاء فرصة للكلام ممكن يحل %50 من المشكلة. منشوف كيف غياب هاي اللغة بالبيت هو اللي بيخلق الفراغ اللي بيكبر وبيظهر على شكل عنف بين شبابنا. 

منسمع عن مبادراته العملية، مثل دورة الوساطة اللي عملها لأولاد حارته، وتجربته مع طلاب صف خامس، كيف هاي التجارب بتثبت إنه تعليم مهارات الحوار من جيل صغير هو درس ضروري نعلمه لأولادنا.

هاي الحلقة هي دعوة لنغيّر نظرتنا للخلاف. في توقيت منواجه فيه واقع مجتمعي مؤلم، هذا الحوار هو  فرضة ننقل من محل الخوف واليأس، لسؤال "شو في بإيدنا نعمل؟" هشام "بيعطينا أمل ومسؤولية، وبذكرنا انه بالتوازي مع ضرورة التعامل مع واقعنا الصعب اليوم، الحل الحقيقي للمستقبل بيعتمد على قدرتنا على تربية جيل جديد بيعرف يحكي، يسمع، ويحل خلافاته بهدوء.

تابعونا على Instagram و TikTok للمزيد من المحتوى – @shiftahel

بهاي الحلقة، بحكي مع منال فريج: أم, جدة، مديرة حضانة دار السلام، ورئيسة مؤسسة الحياة للتوعية والتثقيف الصحي.

منال بتفتح قلبها وبتاخذنا معها بتجربتها الشخصية مع مرض السرطان وتبعياته الصحية. وبقلب هاي التجربة كان دورها كأم هو المحور, دور بتحبه كثير، حكينا كيف كانت تلاقي القوة والأمل بالرجعة للعناية بأولادها وبيتها, وكيف أولادها بنفس الوقت كانوا موجودين ليتحملوا مسؤوليات جديدة بالبيت.

حوارنا هو نظرة صادقة على الواقع اللي بتعيشه العائلة لما المرض يكون حاضر فيها. حكينا عن عن الأولاد اللي بتحملوا مسؤوليات جديدة، وعن أهمية وجود زوج داعم ومحب بهاي التجربة, عن الخوف اللي بكون جوا البيت، وعن الحوارات الصعبة اللي العائلة بتتجنبها عشان تحمي مشاعر بعض. وبين كل هاي التحديات، حكينا عن الإيمان والرضى كمصدر للقوة، وكيف كان تقبّل الواقع هو الخطوة الأولى للتعايش معه. 

تطرقنا كمان لنظرة المجتمع للمرض، وكيف ممكن جملة وحدة تسبب ألم كبير- وهذا بالضبط اللي دفع منال لتأسيس مؤسستها، عشان تغير هاي النظرة، وتشارك تجربتها، وتحكي عن أهمية أنه نسمع لجسمنا ونعيش حياة صحية.

منال بتلخص تجربتها بكلماتها الخاصة، وبتقول إنها "امرأة واجهت المرض بشجاعة وحولت تجاربها لرسالة حياة... وآمنت أن الألم ليس نهاية، انما هو فرصة للوعي والتغيير".

قبل ما تسمعوا الحلقة، مهم تعرفوا إنها محادثة ثقيلة بمواضيعها. لكنها بنفس الوقت، هي مساحة آمنة وصادقة جداً، بتجسد معنى الشجاعة الحقيقية، وبتعطي صوت للتجارب اللي كثير عائلات بتعيشها بصمت.

تابعونا على Instagram و TikTok للمزيد من المحتوى – @shiftahel

في هاي الحلقة من "أهلShift"، بلتقي مع دكتورة هديل الصانع، طبيبة، ناشطة اجتماعية، وأم لبنتين صغار.

راح نتعرف سوا على هديل من خلال هاي الهويات، ونشوف كيف الأمومة، الطب، والنشاط الاجتماعي بتشابكوا لخلق رؤية مميزة وشاملة.

حوارنا ببلش من الجذور- من بيت مبادر في اللقية، ومن قصة أم وأب حققوا انجازات بوجود تحديات كبيرة وزرعوا عندها معنى العمل الجماعي والانتماء.

من هناك، مننتقل لعالم الطب، ومنكتشف كيف نظرتها للمريض هي كـ "قصة كاملة"- فيها بيئة، عائلة, علاقات، ومجتمع- خلتها تبحث عن إجابات أعمق. هاي الإجابات أخذتها لدراسة لقب في الصحة العامة، لتفهم كيف صحتنا الشاملة مش بس بأجسامنا، انما كمان ببيئتنا، بالعدالة، وبالظروف اللي منعيشها.

وبالأخر، منوصل لقلب الحوار: الأمومة. هديل بتشاركنا بصراحة عن بداياتها الصعبة والوحدة الي شعرتها، عن وهم "التوازن" بين الشغل والامومة، وعن اللحظة اللي حست فيها إنها "استحت" من اختيارها لأكبر إنجاز بحياتها وكيف بالنسبة الها اليوم الأمومة هي "مطلب الساعة". 

تابعونا على Instagram و TikTok للمزيد من المحتوى – @shiftahel

في هاي الحلقة من "أهلShift"، بحكي مع حنان بري، أم لثلاثة أطفال. قبل سنتين، والد أولادها أخد الأطفال في رحلة,,, وما رجعوا. الخبر وصلها برسالة بتنشاف مرة واحدة فقط، ومن وقتها تغير كل شيء في حياتها.

من اللحظة اللي ابنها أسعد تشبث فيها وقال "أنا بدي أنتك" للرسالة اللي قلبت واقعها, حنان بتشاركنا في الطريق اللي مشت فيه بين الصدمة، الخسارة، ومحاولة الفهم.بتحكي معنا عن امومتها في السنتين الاخيرة- أمومة بتحضر بالصوت، بالدعاء، وبالذاكرة- بتشاركنا كيف غياب الأولاد بيحضر بكل التفاصيل الصغيرة وكيف بتحافظ على صلتها فيهم رغم المسافة. 

بالحديث مع حنان، منشوف كيف الحياة بتكمل مع الألم، وكيف في أم وامرأة بعدها كل يوم عم تبني أمل ومعنى جديد.

من المهم التنويه انه بودكاست "أهلShift" وراديو الناس منصات لعرض القصص الشخصية كما يرويها أصحابها. احنا مش طرف في هاي القصة ولا نتبنى أي موقف لا قضائي ولا قانوني. هدفنا هو توفير مساحة آمنة للأهل يشاركوا تجاربهم  وتحدياتهم من منظورهم الخاص.

وهدف حنان واضح توصل رسالة لأولادها إنها ما تخلت عنهم ولا للحظة، ولسا بتسعى وما وقفت تدور عليهم

تابعونا على Instagram و TikTok للمزيد من المحتوى - @shiftahel

*كل ما ورد في الحوار على مسؤولية ضيفة الحلقة.

كيف تغير شكل العائلة العربية؟ وكيف أثر هذا التغيير على علاقتنا بكبارنا ؟

في هاي الحلقة الخامسة من سلسلة "الحصانة المجتمعية"، بلتقي مع بروفيسور ربيع خلايلة، باحث بعلم الشيخوخة وواحد من أكثر الباحثين تأثيرًا بالعالم بمجاله.

أنا، بيسان أبو عبيد، وفي هذا الحوار الضروري، راح نحلل تأثير "الحداثة" على مجتمعنا، وكيف انتقلنا من العائلة الممتدة اللي كان فيها لكبير السن مكانة وسلطة، لواقع جديد مليان تحديات. راح نحكي عن واقع العلاقة بين الأجيال اليوم، اللي بتتحرك على طيف واسع: من الضغط اللي بعيشوه الأولاد اللي بيهتموا بأهلهم، وصولًا للجانب المظلم والمؤلم اللي بيشمل الإهمال، الاستغلال، وحتى التنكيل اللي بتعرضله، حسب الأبحاث، ٢٠٪ من كبارنا.

بهاي الحلقة راح تكتشفوا:

• مكانة كبير السن بين الماضي واليوم: كيف تغير دوره من "مسيطر على قرارات العائلة" لواقع مختلف تمامًا.

• إحصائية صادمة: ليش نسبة العرب ببيوت المسنين هي 0.5% فقط، وشو بتخبرنا هاي النسبة عن قيمنا والعبء على العائلات.

• "الجيل اللي بالنص": تحليل للضغط اللي بعيشه الأهل المسؤولين عن أولادهم وعن أهلهم الكبار بنفس الوقت.

• "الشيخوخة المتلى": ايش يعني شيخوخة ناجحة بعالم اليوم، وكيف منقدر نخطط لمستقبل في كرامة وقوة لكبارنا؟

• نصائح عملية: خطوات بسيطة لندعم أهلنا الكبار نفسيًا، ماديًا، واجتماعيًا، بطريقة تحفظ كرامتهم.

هاي الحلقة هي دعوة لنفتح حوار صريح ومحترم جوات بيوتنا عن موضوع مصيري بلامس كل واحد فينا.

عن السليلة:بودكاست Shiftأهل بالتعاون مع جمعية جوار بقدم سلسلة خاصة عن "الحصانة المجتمعية"، بتجمع بين الخبراء اللي بيعطونا الأدوات، والقصص الحقيقية اللي بتذكرنا انه احنا مش لوحدنا.

تابعونا على Instagram و TikTok للمزيد من المحتوى – @shiftahel