Skipulagsmál eru sívinsælt viðfangsefni jafnt í daglegri umræðu sem og stjórnmálaumræðu og líður vart sá dagur þar sem þau eru ekki til umræðu í fjölmiðlum. Á morgun kemur út stórvirki í bókaútgáfu, Samfélag eftir máli, sem er heildstætt yfirlit yfir sögu skipulagsmála á Íslandi og þar rekur höfundurinn, Haraldur Sigurðsson skipulagsfræðingur, þróun bæjarskipulags á Íslandi frá því um aldamótin 1900. Haraldur heimsækir okkur hér á eftir.

Íslenska fjarheilbrigðisfyrirtækið Kara Connect hefur komið á laggirnar sérstöku Stuðningstorgi sem gerir Grindvíkingum kleift að sækja sérhæfða aðstoð sérfræðinga sér að kostnaðarlausu. Þetta er gert í samstarfi við Almannavarnadeild Ríkislögreglustjóra og Rauða Krossinn. Sigrún Eggertsdóttir frá Kara Connect kemur til okkar á eftir og segir okkur betur frá því sem þarna er boðið upp á.

Torgið er nýr umræðuþáttur hér á RÚV sem verður í beinni útsendingu í kvöld. Á Torginu er talað um öll þau helstu málefni sem tíðrædd eru á kaffistofum landsins og fólkinu í landinu gert kleift að varpa fram spurningum um leið. Umsjónafólk Torgsins eru þau Sigríður Halldórsdóttir og Baldvin Þór Bergsson og þau segja okkur frá málefnum kvöldsins.

Á Batavegi kallast hagsmunarhópur fólk sem tekst á við langvarandi afleiðingar umferðarslysa. Þar sameinast tjónþolar, aðstandendur, fagaðilar í endurhæfingu ásamt starfsfólki stofnana og ýmissa samtaka og vinna saman að úrbótum. Hópurinn stendur fyrir viðburði í kvöld þar sem fjallað er um málefni fólks á batavegi og stofnandi hópsins, Anna Linda Bjarnadóttir, segir okkur betur frá hópnum Á batavegi.

Líkt og við fjölluðum um fyrir helgi þá afhentu samtök ferðaþjónustunnar ýmsar viðurkenningar á 25 ára afmælisráðstefnu samtakanna. Þ.á.m. nýsköpunarverðlaun ferðaþjónustunnar sem féllu í skaut Pink Iceland í ár. Pink Iceland sérhæfir sig í ferðaþjónustu sniðna að hingsegin fólki og er þetta í annað sinn sem þau hljóta þessi verðlaun. Við heyrum í Evu Maríu Þórarinsdóttur Lange frá Pink Iceland í þættinum.

Rýmkað hefur verið fyrir íbúa og atvinnurekendur til að athafna sig í Grindavík og á milli 20-30 starfsmenn sjávarútvegsfyrirtækisins Þorbjarnar hf. eru komnir til vinnu. Í tilkynningu sem lögreglustjórinn á Suðurnesjum sendi frá sér í morgun segir að verið sé að meta stöðuna á lagnakerfi bæjarins og innviðum bæjarins. Víðir Reynisson er á línunni hjá okkur í upphafi þáttar og við spyrjum hann út í framhaldið í Grindavík.

Við stýrið halda þau Hrafnhildur og Kristján Freyr.

Í kvöld býður Ferðafélag Íslands til Háfjallakvölds þar sem haldið verður upp á 96 ára afmæli félagsins. Sérstakur heiðursgestur og fyrirlesari er einn frægasti háfjallagarpur heims, Garrett Madison frá Seattle í Bandaríkjunum. Þrátt fyrir ungan aldur hefur hann klifið Everest 11 sinnum, K2 þrisvar í 6 tilraunum, og síðastliðið vor bæði Nuptse og Lothse. Auk þess hefur hann klifið öll hæstu fjöll hverrar heimsálfu (7 Summits) margsinnis, oftar en ekki sem leiðsögumaður. Tómas Guðbjartsson læknir kemur til okkar á eftir og segir okkur frá þessari ofurhetju auk þess að segja okkur frá nýlegri fjallaferð sem hann tók þátt í m.a. í Suður Ameríku, og Nepal.

Á forsíðu Heimildarinnar sem út kom fyrir helgi er að finna fyrirsögnina Costa del Kaupþing. En í blaðinu fjallar Aðalsteinn Kjartansson blaðamaður um að eiginkonur fjögurra fyrrverandi stjórnenda Kaupþings sæki í fjársjóðskistur á Jómfrúareyjum til að fjárfesta í breskum hjúkrunarheimilum, íslenskum hótelum og lúsxusvillum á Spáni. Við ætlum að fá Aðalstein til okkar á eftir til að segja okkur betur frá en auk þess ætlum við að forvitnast um nýjan vikulegan þjóðmálaþátt sem er að fara af stað á heimildin.is

Sigríður Dúa Goldswothy er nýlega búin að senda frá sér bókina Morðin í Dillonshúsi en þar er rakin örlagasaga mæðgnanna Sigríðar Ögmundsdóttur og Huldu Karenar Larsen. Að morgni 26. febrúar 1953 gerðist sá hörmulegi atburður í Dillonshúsi við Suðurgötu 2 í Reykjavík að eiginmaður gaf eiginkonu sinni og þremur ungum börnum þeirra eitur og svipti svo sjálfan sig lífi. Sigríður kemur til okkar á eftir.

Júlíus Júlíusson á Dalvík eða Júlli á Dalvík heldur úti vef sem heitir einmitt julli.is. Þar má finna ýmislegan fróðleik m.a. alls konar tengt jólum og jólatstússi - við heyrum í júlla í þættinum.

Og við ætlum líka að heyra í Magga Kjartans á eftir en sá geðþekki tónlistarmaður hlaut um helgina Súluna, menningarverðlaun Reykjanesbæjar, fyrir árið 2023.

En við byrjum á þessu. Berglind Harpa Svavarsdóttir þingkona Sjálfstæðisflokksins gagnrýnir að íslenskir læknanemar, sem stunda nám erlendis, hafi ekki sömu tækifæri og aðrir til verknáms hér heima. Þetta geti dregið úr líkum á að þeir skili sér heim að námi loknu. Berglind Harpa er á línunni hjá okkur.

Það er síðdegisútvarpið sem heilsar á föstudegi, 24. nóvember. Í hljóðveri sitja þau Hrafnhildur og Kristján Freyr.

Ef fólk hefur ekki tekið eftir því þá er svartur föstudagur í dag en hann verður vart myrkari heldur en í Góða hirðinum þar sem engin tilboð verða á boðstólum í dag, ekkert stress og engin læti. Heldur verða slökkt ljósin í búðinni og boðið upp á piparkökur og spil. Við heyrum í Frey Eyjólfssyni, verkefnastjóra hjá Góða hirðinum sem myrkur í máli mun spjalla við okkur um neysluhyggju Íslendinga.

Skriðuklaustur í Fljótsdal hlaut á dögunum nýsköpunarviðurkenningu Samtaka ferðaþjónustunnar en þar hafa forstöðumenn um árabil lagt áherslu á nýsköpun og nýtt stafrænar lausnir við menningarmiðlun. Skúli Björn Gunnarsson, forstöðumaður, segir nýjar kynslóðir kalla á nýja miðlun og hann ætlar að segja okkur aðeins frá þeirri tækni sem stofnunin hefur tileinkað sér.

Nú þegar aðventan er á næsta leiti koma alls konar verur á kreik. Ævintýri í Jólaskógi, er klukkutíma langt vasaljósaleikhús sem fram fer í Guðmundarlundi í Kópavogi og þar kynnast áhorfendur ýmsum persónum úr jólafjölskyldu okkar Íslendinga, þeim Grýlu, Leppalúða, jólasveinunum og tröllasystkinum þeirra. Anna Bergljót Thorarensen segir okkur meira frá vasaljósaleikhúsinu.

?Gefum íslensku séns - íslenskuvænt samfélag? er nafn á átaki á vegum Háskólaseturs Vestfjarða á Ísafirði og gengur það út á að auka vitund fólks um hvernig innflytjendur læra íslensku með aðstoð nærsamfélagsins. Verkefnið hlaut í Evrópumerkið sem er viðurkenning fyrir nýsköpun í tungumálakennslu og við hlerum verkefnastjórann Ólaf Guðstein Kristjánsson um átakið.

Katla Margrét Þorgeirsdóttir leikkona hefur í gegnum árin farið með fjölmörg hlutverk hjá Leikfélagi Reykjavíkur og leikur hún nú aðalhlutverkið í leiksýningunni Með Guð í vasanum en sýningin fjallar um Ástu og samferðafólk hennar - lífs og liðið og baráttu mannsandans við að sleppa tökunum. Katla er föstudagsgestur okkar.

Hús­næðisstuðning­ur við Grind­vík­inga var kynnt­ur á blaðamanna­fundi ríkisstjórnarinnar í Ráðherra­bú­staðnum í morgun en til að mæta hús­næðisþörf­inni á m.a. að kaupa allt að 210 nýj­ar íbúðir. Katrín Jakobsdóttir forsætisráðherra er nýkomin frá Grindavík og er í símanum.

Í dag fór hópur pípulagningameistara til Grindavíkur til að skoða hús með tilliti til skemmda á lögnum og til að lagfæra það sem til þarf og í verður komist . Böðvar Ingi Guðbjartsson er formaður félags pípulagningameistara og við hringjum í hann á eftir.

Á 25 ára afmælisráðstefnu Samtaka ferðaþjónustunnar hélt Tryggvi Freyr Elínarson frá Datera erindi sem hafði yfirskriftina Munu tæknifyrirtæki taka yfir ferðaþjónustubransann en ferðabransinn eins og margir aðrir geirar stendur frammi fyrir gríðarlega hraðri tækniþróun með tilkomu nýrrar gervigreindar. Við ætlum að fá Tryggva Frey til okkar á eftir til að fara yfir þær áskoranir sem ferðaþjónustubransinn stendur frammi fyrir og spyrja hann út í hvað fyrirtækin þurfi að gera til að heltast ekki úr lestinni.

Út er komin bókin Hagfræði daglegs lífs í stuttu máli. Bókin er sú þriðja í ritröð í félagsvísindum sem Háskólaútgáfan gefur út en áður hafa komið út bækurnar Kynþáttafordómar í stuttu máli og Áfangastaðir í stuttu máli. Það er Gylfi Zoega prófessor í hagfræði við Háskóla Íslands sem skrifar Hagfræði daglegs lífs og í bókinni skýrir hann hvernig nota má aðferðir hagfræðinnar til að taka alls konar ákvarðanir um ráðstöfun tíma milli svefns og vöku. Við ætlum að fræðast betur um bókina á efitr þegar að Gylfi kemur til okkar.

Og eins og alltaf á fimmtudögum þá förum við í MEME vikunnar með Atla Fannari Bjarkasyni.

Við rákum augun í færslu á feisbúkk þar sem að Kristján Berg oft kallaður fiskikóngurinn var að auglýsa eftir Grindvíkingum í vinnu. Við sláum á þráðinn til Kristjáns á eftir.

Forsetahjónin eru í opinberri heimsókn í Reykjavík í dag. Einn viðkomustaðurinn er Skalli í Árbæ og samkvæmt okkar heimildum gæddu forsetahjónin sér á ís hjá henni. Guðlaugu Steingrímsdóttur eða Gullu í Skalla.

Ísraelsmenn hafa samþykkt fjögurra daga vopnahlé á Gaza en forsætisráðherra Ísraels sagði í gær að samkomulagið þýði ekki að stríðinu sé lokið. Samkomulagið felur í sér að gíslum verði sleppt og flutning hjálparganga til Gaza. Bjarni Pétur Jónsson fréttamaður kemur til okkar á eftir til að fara nánar yfir stöðuna fyrir botni miðjarðarhafs.

Í Kastljósinu í gær var fjallað um aðstæður íslenskra kvenna sem afplána í fangelsi hér á landi. Í umjföllun Lindu Blöndal kom fram að aðstæðurnar eru vægast sagt slæmar. þar sem nauðsynleg meðferð er ekki í boði og ef þær ná ekki bata í fangelsi enda flestar aftur á götunni. Linda Blöndal kemur til okkar á eftir og fer yfir stöðu þessara kvenna með okkur.

Sýningin Orð gegn orði var frumsýnd í Þjóðleikhúsinu um helgina en þetta margverðlaunað verk sem sló í gegn á West End og Broadway. Hér heima er það Ebba Katrín Finnsdóttir sem fer á kostum í sýningunni sem er einleikur settur á svið í Kassanum. Í verkinu er meðal annars tekist á við ágengar spurningar um feðraveldið, réttarkerfið, kynferðisbrotamál, siðgæði, sekt og sönnunarbyrði. Ebba Katrín ætlar að koma til okkar í Síðdegisútvarpið á eftir ásamt Þóru Karítas Árnadóttur leikstjóra verksins.

Á aðventu 2023 mun Einar Skúlason ganga gömlu póstleiðina frá Seyðisfirði til Akureyrar með jólakort og jólakveðjur til fólks og fyrirtækja á Akureyri í farteskinu til styrktar Krabbameinsfélagi Akureyrar og nágrennis. Einar er annálaður göngugarpur og hann kemur til okkar í lok þáttar og segir frá þessari ástríðu sinni og fyrirhuguðu ferðalagi.

Idol stjörnuleit er að fara aftur af stað á Stöð 2 með tilheyrandi tónlistarveislu en þættirnir vöktu mikla lukku síðasta vetur. Sigrún Ósk Kristjánsdóttir er kynnir þáttanna en hún ætlar að mæta til okkar á eftir ásamt Sögu Matthildi Idol stjörnu Íslands 2023.

En við byrjum eins og alla miðvikudaga í Brussel en þar er Björn Malmquist fréttamaður.

Þann 23. nóvember nk. verður boðið upp á málstofu undir yfirskritftinni Erum við að kaupa til að henda? Þar verður fjallað um mikilvægi hringrásar í fatnaði og hönnun. Áherslan er að vekja athygli neytenda, hönnuða og framleiðenda á málefninu og hvetja til umhverfisvænni framleiðslu, hönnunar og neysluhegðunar. Bjarney Harðar eigandi 66°Norður og Álfrún Pálsdóttir frá Hönnunarmiðstöð koma til okkar og segja betur frá.

Við ræddum tvívegis við Grindvíkinginn Pál Val Björsson fyrr í mánuðinum, en þá var stöðug skjálftahrina í og við Grindavík. Hann var að heiman þegar að rýming bæjarins fór fram þann 10.nóvember síðastliðinn en hefur eins og aðrir þurft að dvelja annars staðar síðan. Páll Valur ætlar að koma til okkar í Síðdegisútvarpið á eftir og við spyrjum hann út í hvernig síðustu dagar hafa verið.

Við ætlum að fletta bókinni Fornihvammur með höfundi hennar Maríu Björg Gunnarsdóttur en þar var á sínum tíma reist sæluhús sem síðar varð merkur áfangastaður á ferðalögum landsmanna yfir Holtavörðuheiði. María þekkir vel til staðhátta þarna en hún bjó þar í fjölmörg ár með fjölskyldu sinni sem rak þar bæði gisti og veitingahús.

Í kvöld er Kveikur á dagskrá og verður þátturinn helgaður jarðhræringum á Reykjanesskaga. Ingólfur Bjarni Sigfússon kemur til okkar og segir okkur betur frá þvi.

Það er leiðindaveður víða á landinu og við ætlum heyra í Guðjóni Helgasyni upplýsingafulltrúa ISAVIA og spyrja út í hvaða áhrif veðrið hefur á flugsamgöngur til og frá landinu.

Í vikunni verða sýndar þrjár sýningar af Hnotubrjótnum í Hörpu í flutningi Kyiv Grand Ballet og Sinfóníuhljómsveit Íslands. Ballettstjarnan Petra Conti, aðaldansari Kyiv Grand Ballet, á sér stór­brotna sögu en hún sigraðist á krabba­mein­i árið 2016 og í kjöl­farið hef­ur hún lagt mikið kapp á að láta gott af sér leiða með söfnun fyrir krabbameinssjúk börn í gegnum söfnunarátakið Pointe Shoes for Cure. Þar býður Petra upp ballettskó sína (pointe shoes) að sýningum loknum og rennur allur ágóði til styrktar krabbameinssjúkum börnum. Ása Berglind Hjálmarsdóttir verkefnastjóri dagskrárgerðar Hörpu kemur til okkar og segir okkur betur frá.

En við byrjum á þessu. Rauði krossinn vinnur nú að því að koma upp neyslurými í einingarhúsum en Terra einingar hafa boðið Rauða krossinum einingar án endurgjalds. Á línunni hjá okkur er Sigurbjörg Birgisdóttir sérfræðingur hjá Rauða krossinum.

Það er síðdegisútvarpið sem heilsar á mánudegi, 20. nóvember. Í hljóðveri sitja þau Guðrún Dís og Kristján Freyr

Vinnum gullið er nafn ráðstefnu sem fram fór í dag á Grand hótel í Reykjavík en þar var fjallað um stöðu og réttindi afreksíþróttafólks. Starfshópur á vegum mennta- og barnamálaráðuneytisins fer með þennan málaflokk og er markmiðið að draga úr allri óvissu er varðar framfærslu og ýmis réttindi afreksíþróttafólks. Ásmundur Einar Daðason mennta- og barnamálaráðherra segir okkur nánar frá því hvernig við vinnum gullið!

Neysluvatnslögnin til Vestmannaeyja er stórskemmd eftir að togveiðiskipið Huginn VE missti niður akkeri sem festist í lögninni á föstudagskvöld. Atvikið telst alvarlegt þar sem vatnslögnin er eina flutningsæð neysluvatns til Vestmannaeyja. Við heyrum í bæjarstjóranum, Írisi Róbertsdóttur.

Sjúkraþjálfarinn Fanney Magnúsdóttir vakti athygli á því í hlaðvarpi á dögunum að vandamál tengdum grindabotninum ætti ekki að vera sama feimnismál og áður. Konur eigi ekki að þurfa að fela öll sín mál en svo væru grindabotnsvandamál einnig vandamál karla. Þeir geti einnig strítt við þvagleka, risvandamál og allskonar vandamál tengt blöðruhálskirtlinum. Fanney kemur til okkar og ræðir við okkur um grindarbotninn.

Jón Þór Víglundsson upplýsingafulltrúi Slysavarnarfélagsins Landsbjargar verður á línunni hjá okkur. En Landsbjörg hefur óskað eftir aðstoð björgunarsveita af öllu landinu til að létta undir með sveitum á suðvesturhorni landsins sem hafa staðið vaktina á Reykjanesskaga vegna jarðhræinganna við Grindavík.

Íslenska hátæknifyrirtækið Carbon Recycling International gangsetti á dögunum eina skilvirkustu efnaverksmiðju í heimi sem endurnýtir 150.000 tonn af koltvísýringi á ári. Verksmiðjan er staðsett í Kína og öll framleiðslutækni byggð á íslensku hugviti sem sannreynd var í verksmiðju CRI í Svartsengi. Við heyrum meira frá Ólafi Stefánssyni verkfræðingi hjá CRI um þetta áhugaverða verkefni.

Mikill skortur hefur verið á ADHD lyfinu Elvanse upp á síðkastið og ekki von á fleiri skömmtum af lyfinu hingað til lands í bráð. Formaður lyfjafræðingafélags Íslands sagði í samtali við Morgunblaðið í dag að 7000 manns væru á þessu lyfi hér á landi og að í mörgum tilvikum væri verið að setja fólk beint á þetta lyf í stað þess að prófa önnur lyf áður en að hennar sögn stríðir það algerlega gegn verklagsreglum Sjúkratrygginga Íslands því lyfið sé amfetamínafleiða og sé því eins nálægt amfetamíni og ADHD lyf verða. Vilhjálmur Hjálmarsson formaður ADHD samtakanna er kominn hingað til okkar.

Grindvíkingurinn Sigríður María Eyþórsdóttir skrifaði harðorðan pistil sem birtist á Vísi í vikunni. Pistillinn fjallaði um tvöfaldar hörmungar Grindvíkinga og skrifar Sigríður um falsörlætis tilboð bankanna um að frysta húsnæðislán Grindvíkinga sem hún segir gagnsæa blekkingu til að nýta sér hörmungar sem nú dynja yfir heilt sveitarfélag. Sigríður María kemur til okkar í Síðdegisútvarpið á eftir.

Edda Sif Pind Aradóttir, framkvæmdastýra #Carbfix er komin á lista TIME yfir 100 áhrifamestu viðskiptaleiðtoga á sviði loftslagsmála!

Tímaritið TIMEbirti í fyrsta sinn birt lista yfir 100 áhrifamestu viðskiptaleiðtoga heims á sviði loftslagsmála og þeirra á meðal er Edda.

Yfir helmingur allra VR félaga hefur orðið fyrir áreitni eða ofbeldi í starfi á ferlinum, eða 54%. Hlutfallið er hærra hjá erlendu félagsfólki eða 60% og hæst meðal kvenna á aldrinum 25 til 34 ára, eða 67%. Þetta kemur fram í nýrri könnun sem VR lét framkvæma meðal 30.000 félaga í september 2023. Við ætlum að ræða þessar sláandi niðurstöður við Ragnar Þór Ingólfsson formann VR á eftir.

Jólin hefjast í Hafnarfirði í dag og við ætlum að hringja í fjörðinn og heyra í Rósu Guðbjartsdóttur bæjarstjóra.

Akureyrarbær og Bergið Headspace hafa gert með sér samstarfssamning sem felur í sér aukna þjónustu við ungt fólk sem þarf stuðning og ráðgjöf, þróun á geðheilbrigðisþjónustu við ungt fólk, þjónustu sem byggir á snemmtækri íhlutun. Ríkur vilji er til að taka höndum saman og mæta óskum ungs fólks á svæðinu um þjónustu á svæðinu. Við heyrum í Sigurþóru Bergsdóttur stofnanda Bergsins.

Velferðarráð samþykkti í gær að ganga til samstarfs við Samhjálp, svo hægt verði að lengja opnunartíma kaffistofu Samhjálpar, fyrir þá gesti sem nýta neyðarskýli og hafa miklar og flóknar þjónustuþarfir. Edda Jónsdóttir framkvæmdastjóri Samhjálpar er á línunni.

Í vikunni var haldið heilbrigðisþing og í ár var áhersla lögð á gagna - og tæknivæðingu í heilbrigðiskerfinu. Sædís Sævarsdóttir ? varaforseti læknadeildar HÍ og verkefnastjóri hjá Íslenskri erfðagreiningu segir okkur betur frá þinginu en hún hélt erindi um framtíð einstaklingsmiðaðrar heilbrigðisþjónustu hér á landi.

Nýja Breiðafjarðarferjan Baldur er að verða tilbúin í áætlunarsiglingar milli Stykkishólms og Brjánslækjar um Flatey. Komu skipsins verður fagnað með athöfn í Stykkishólmi á morgun. Jóhanna Ósk Halldórsdóttir framkvæmdastjóri Sæferða verður á línunni.

Ís­lenska karlalandsliðið í knattspyrnu heim­sækir Slóvakíu í undan­keppni EM í Bratislava í kvöld. Slóvakar sigruðu fyrri viðureign liðanna hér heima og á því ís­lenska liðið harma að hefna. Með jafntefli eða sigri gætu Slóvakar tryggt sér sæti á EM en okkar menn eiga helst þann möguleika að komast þangað í gegnum um­spil Þjóða­deildarrinar á næsta ári. Þorkell Gunnar íþróttafréttamður fer yfir málin með okkur.

Tómas R. Einarsson er einn okkar ástsælustu djasstónlistarmönnum landsins sem hefur vopnaður kontrabassa gefið okkur hér á fróni fjölmarga funheita tóna í gegnum tíðina, oftar en ekki seiðandi sveiflu frá Kúbu. Nú hefur Tómas tyllt sér niður og krotað endurminningar sínar í bókina, Gangandi bassi - endurminningar djassmanns sem kemur út í dag. Tómas segir okkur frá bókinni.

Um sex sólarhringar eru liðnir frá því síðan meiriháttar skjálftahrina reið yfir Grindavík og nágrenni og olli verulegum skemmdum. Þá var óttast að stutt væri í eldgos og Grindavíkurbær því rýmdur. Enn hefur gos ekki hafist, en það þýðir þó ekki að dregið hafi úr líkum á gosi, heldur þvert á móti. Fréttamaðurinn Valur Grettisson fer yfir stöðuna á Reykjanesskaga með okkur.

Loks kemur til okkar að venju, Atli Fannar Bjarkason, með meme vikunnar og spennandi að sjá hvað kemur upp úr þeirri djúpu hít sem alnetið og smáforritin geyma á hverjum degi.

Um stýrið halda þau Hrafnhildur og Kristján Freyr á degi íslenskrar tungu.

Síðdegisútvarpið heilsar á miðvikudegi og við stýrið sitja þau Guðrún Dís Emilsdóttir og Kristján Freyr Halldórsson

Í þættinum í gær fjölluðum við um það að líkhúsið á Akureyri hefði verið auglýst til sölu eða leigu á Akureyri.net og í Morgunblaðinu og ræddum við við Smára Sigurðsson framkvæmdastjóra Kirkjugarða Akureyrar sem sagði að enginn bæri ábyrgð á rekstri líkhúsa. Frá því að heilbrigðiskerfið gefur út dánarvottorð og þar til kirkjugarður tekur við hinum látna er algjört gat í kerfinu, engum ber að sjá um ferlið frá dánarvottorði til greftrunar. Ein þeirra sem bent hefur á það óefni sem þessi mál eru í hér á landi er Jódís Skúladóttir þingmaður VG og hún verður á línunni hjá okkur á eftir.

Gylfi Þór Þor­steins­son for­stöðumaður fjölda­hjálp­ar­stöðva hjá Rauða krossinum kemur til okkar á eftir og fer yfir stöðuna með okkur nú þegar að tæpir fimm sólarhringar eru síðan að Grindvíkingum var gert að yfirgefa heimili sín.

Á morgun á að blása til samstöðutónleika fyrir Palestínu þar sem fjöldi okkar fremsta listafólks kemur fram. Ástandið á Gaza fer versnandi með degi hverjum en her Ísraels réðst í morgun inn á Al-Shifa, stærsta sjúkrahús Gaza. Þar fyrir innan segja Ísraelsmenn að Hamas starfræki einskonar höfuðstöðvar, sem samtökin harðneita. Nokkur þúsund manns voru inni á spítalanum þegar her Ísraels réðist þar inn. Við ætlum að beina sjónum okkar að palestínumönnum í þættinum og ræða samstöðutónleikana við þá Hjálmtý Heiðdal formann félagsins Ísland - Palestína og Kjartan Holm einn skipuleggjanda tónleikanna.

Fram kom í fjölmiðlum að tónlistarmaðurinn Mugison hafi afþakkað útnefningu sem bæjarlistamaður Ísafjarðarbæjar og hafi Menningarmálanefnd bæjarins í kjölfarið lagt til við bæjarstjórn að áætlaðir fjármunir vegna verðlaunafjár yrðu nýttir til jólaskreytinga í sveitarfélaginu, í stað þess að falla niður. Við ræðum Pétur Óla Þorvaldsson sem situr í Menningarmálanefnd bæjarins.

Á laugardaginn var singles day í lok mánaðar er svartur föstudagur og þar á eftir rafrænn mánudagur og því finnst okkur við hæfi að taka umræðu um þessa stóru tilboðsdaga og hversu skynsamlegt það er fyrir neytendur að nýta sér öll þau tilboð sem eru auglýst. Er fólk meðvitað um það hvort að það sé að gera góð kaup á þessum dögum eða ekki og vantar fólk allt þetta dót eða er það knúið áfram af markaðsöflum. Við ætlum að ræða þessa hluti við Dagbjörtu Jónsdóttur hjá Fundið fé.

En eins og alltaf á miðvikudögum þá byrjum við á Birni Malmquist, fréttamanni í Brussel.