Sinetsi ala ez, lau hamarkada joan dira The Jayhawks taldea Minnesotan sortu zenetik. Mark Olson eta Gary Louris kantari-kantautoreak izan ziren sortzaileak. Bien artean egiten zituzten abesti gehienak eta, biek batera, armonia ederrak lortzen zituzten. 1995ean Olson Kaliforniara abiatu zen, Victoria Williams-ekin batera eta guztiek pentsatu zuten taldea pikutara joango zela, Olson eta Louris Americana soinu sortzaileak izanik. Baina Gary Louris, Marc Perlman, Tim O’Reagan eta Karen Grotberg taldekideek elkarrekin grabatzen jarraitu zuten, arrakastaz, gaur egun arte. Kanadan bizi dira eta Sanctuary Park disko berria ekarri digute, Bob Ezrin ekoizle bikainarekin Toronton grabatua.

Deskargatu hemen.

Entzun ditugun kantak:

Joni Mitchel kanadarra 1943an jaio zen Albertako lurretan. 20 urte zituela hasi zen kantuak idazten eta 1966an abiatu zen hegoalderantz. Detroiten bizi izan zen, handik bi urtera New Yorkera aldatu eta, azkenean, Kaliforniara heldu zen. Bertan, Warner diskoetxearekin hasi zen bere maisulanak grabatzen. Ondorengo hamarkadan 11 LP gauzatu zituen. Ñabardura anitzeko abestiak konposatu eta abestu zituen.

Egun, Joni Mitchellek 82 dituela, oraindik bizirik dago eta, tarteka, agerraldiak egiten ditu, azkenekoa Grammy sari bat eskuratzeko egin zuen. Gaurko Soinugelan bere kantu klasikoekin ekoiztutako bertsioak entzun ditugu:

Deskargatu hemen.

The Beatles taldea Liverpoolen sortu zen 1960. urtean. Lau taldekide historikoen artetik, John Lennon 1980an hil zuten, 40 urte zituela, eta George Harrison 2001ean zendu zen, 58 urterekin. Bizirik dirauten Ringo Starr-ek (85 urte) eta Paul McCartney-k (84 urte) aurten grabazio berriak kaleratu dituzte, hurrenez hurren. Ringorena country musika esparruan koka dezakegu, eta Paul McCartneyrena lan ederra dugu oso. The Boys of Dungeon Lane bakarkako bere 19. bilduma dugu, ia osorik Paulek bakarrik grabatua. Folk eta sikodeliaren artean dauden 11 kantuok aspaldiko Liverpoolen girotuak ditugu, Paul gaztea zen garaian.

Deskargatu hemen.

Entzun ditugun abestiak:

Gaurko Soinugelan hiru gauza ezberdin ditugu, baina denek dute komunean kultura gutxiagotuen adibideak direla, euskal kulturarenak zein gaelikoarenak. Hasteko, Sopelako Martia bikote berriak bere estreinako grabazioa ekarri digu, Zeru oro urez izenekoa. Jarraian, telefonoz, Joseba Tapia musikari handia elkarrizketatu dugu, Koldo Izagirre olerkariak egindako Mr. Eleizegi lan berriari buruz. Handik hainbat kantu entzun eta komentatu ditugu Tapiarekin. Bukatzeko, Belfast aldera egin dugu, Irlandara, Kneecap taldearen Fenian izeneko bigarren bilduma entzutera. Folketik abiatu eta raperainoko bidea egin dugu, beraz, gaurkoan.

Deskargatu hemen.

Entzun ditugun abestiak:

Ingalaterrako Dave Mason (Worcester, 1946) 2026ko apirilaren 19an zendu zen. Mason kantagile, abeslari eta gitarra jole ezinbestekoak 1967an Traffic taldea sortu zuen , Steve Winwood, Chris Wood eta Jim Capaldirekin batera. Traffic utzi ostean ibilbide oso oparoa izan zuen bakarlari moduan, baita AEBetan session man gisa ere, askotan ikusi baitugu beste musikari batzuen musika aberasten.

Inoiz, rockaren “Forrest Gump”-a moduan definitu zuen bere burua Mason-ek, rockaren historiako ia une eta talde handienetan agertzen zelako. Oso musikari maitatua zen eta zerrenda izugarria du kolaborazioetan, izan ere, Jimi Hendrix, The Rolling Stones, George Harrison, Paul McCartney, Eric Clapton eta Michael Jacksonekin grabatu zituen abestiak. Are, denbora laburrez izan bazen ere, Fleetwood Mac taldeko kide ofiziala ere izan zen 1990eko hamarkadan.

Deskargatu hemen.

Entzun ditugun bere kantuak:

Gaur, Getxoko Algorta auzokoak diren Arene 6 taldeko kideekin mintzatu gara. Punk-oi eta streetpunk egiten dute eta Ibon (ahotsa), Iñaki (bateria), Koldo (baxua), Jokin (gitarra) eta Altonaga (gitarra) dira boskotea osatzen dutenak. 2018an sortu zen taldea eta hiru bilduma argitaratu dituzte: Errautsetatik (2021), Bereizezinak (2023) eta Sutan (2026). Horiez gain, hainbat single ere atera dituzte.

Deskargatu hemen.

Entzun ditugun kantuak:

2016an, Born to Run liburuan, Bruce Springsteen-ek zera idatzi zuen: “Nire kantuak gehienbat autobiografikoak dira. Gauzek norberari zerbait esan behar diote, entzuleentzat ere esanahia izango badute”. 2022rako 340 kantu inguru idatzita zituen The Boss-ek.

Bere aitak irlandar sustraiak zituen; amak, berriz, italiarrak. Amak izan zuen eraginik handiena semearengan. Bruceren kantuen protagonistak gizonak izan ohi diren arren, emakumezko abeslari asko erakarri izan ditu, urteak joan, urteak etorri. Horregatik, Ingalaterrako Ace disko etxeak oso bilduma atsegina kaleratu zuen, Ladies Sings The Boss: The Songs Of Bruce Springsteen izenburupean eta, 19 kantuotatik, batzuk aukeratu ditugu gaurko Soinugelarako.

Deskargatu hemen.

Entzun ditugun kantuok:

Joan den martxoaren 7an, Augie Meyers hil zen Texasko San Antonio hirian, bere sorterrian bertan, 85 urte zituela. Bob Dylanek ondo ezagutzen zuen Augie, 60ko hamarkadatik, eta behin esan zuen Augie “erritmo sinkopatuaren eta konpasaren maisua zela, eta gehitu zuen: “hori ezin zaio inori irakatsi”.

Meyers Texasen hasi zen 1964an, Sir Douglas Quintet garage rock talde mitikoan, Dough Sahmekin batera. Luze ibili zen musikari horrekin eta, ondoren, Texas Tornados laukotea sortu zuen Dough, Flaco Jimenez eta Freddy Fender-ekin. Soinu jolea izan zen, baita Vox organo jolea ere, batez ere, baina kantari eta kantugile moduan ere nabarmendu zen. Bob Dylanekin grabatu zuen, baita grabazioak zuzendu ere. 1987an, Time Out of Mind eta Love and Theft grabatu zituen.

Deskargatu hemen.

Entzun dugun kantu sorta:

Azken hilabeteotan maite ditugun sortzaile batzuen grabazioak ekarri ditugu Soinugelara. Gaur, Maliko Kel Tamasheq nazioko musikariekin hasi gara. Tinariwen taldea 1979an sortu zen, eta gaur egun errefuxiatu moduan bizi dira Algeriako lurretan. Hoggar du izena euren azken grabazioak eta, bertatik, hiru kantu entzun ditugu.

Jarraian, The Long Ryders taldeari erreparatu diogu. Kaliforniako Los Angeles hirian batu zuten taldea behiala, eta orain dela lau urte bueltatu ziren estudio batera eta, oraintsu, High Noon Hymns diskoarekin itzuli dira.

Van Morrison irlandarrak etengabe grabatzen du, 15 bilduma sortu ditu azken hamarkadan. Iaz Remembering Now maisulana egin zuen, eta handik gutxira Somebody Tried to Sell Me a Bridge prest zuen, 18 blues kantuz osatutakoa, eta gaur Soinugelara ekarri duguna.

Amaitzeko, Ruper Ordorikak Lurra ikutu barik diskoa argitaratu zuen iaz, bere 21. bilduma, eta bertatik kantu batzuk entzun ditugu.

Deskargatu hemen.

Hau izan da gure gaurko abestien zerrenda:

Aurtengo urtarrilean zendu zen Bob Weir (San Francisco, 1947), 78 urte zituela. The Grateful Dead talde mitikoaren gitarra jotzaile erritmikoa izan zen Weir, baita abeslaria eta kantugilea ere. 1963an Jerry Garcia ezagutu zuen, Palo Alto hirian, 16 urte besterik ez zituela. The Grateful Dead taldea osatu zuten, ondoren, eta bertan ibili ziren 1995era arte, García hil ostean taldea desegin zen arte. Horrez gain, bere kabuz ere egin zituen grabazioak, eta beste talde batzuetan ere ibili zen: The Kingfish, Bobby and the Midnites, Scaring the Children eta Rad Dog.

Askoren iritziz, Bob Weir gitarra jole erritmiko bikaina zen, maisua, agian originalena. Sakontasuna sortzen zuen akordeak apurtzen. Doinu-notak gehitzen zituen eta, normalean goiko, 3-4 sokak soilik jotzen zituen, gitarra lepoaldeko goiko partean zuela. Piano joleen eragina nabari zuen, McCoy Tynerena hain zuzen ere, bere estiloan, oso ñabardura bitxiak gehituta.

Deskargatu hemen.

Entzun ditugun kantuak: