بمشاركة [ عمر ملائكة و مصطفى أحمد ]

اليوم التطور في التقنية أعطانا تطور كبير جداً في عالم البيانات.. ووفرة البيانات هذه إذا استخدمت بشكل صحيح ممكن تدر فوائد كبيرة للمستخدمين أصحاب البيانات… وكمان مقدمي الخدمات اللي عرفوا كيف يوظفوا هذه البيانات لمصلحة الطرفين.

وعشان نفهم الموضوع بشكل أكبر زارنا اليوم الشريك المؤسس والرئيس التنفيذي لشركة كوانتم صديقنا والدافور بزنسي الكبير عمر ملائكة… وكمان في وسط الحلقة انضم إلينا صديق جديد ودافور في عالم التقنية المالية والبرمجة الأستاذ مصطفى أحمد وهو مؤسس شركة ”بيبر“ اللي تقدم خدمات جديدة في عالم التقنية المالية.

بمشاركة [ عبدالرحمن السفياني و فيصل عسيري ]

مع تقدم التقنية في عالم البرمجة والتطور اللي صرنا نشوفه في أنواع التسهيلات الحياتية… صار كل يوم والثاني تطلع لنا مصطلحات جديدة تغير العالم وثلاثة أرباعنا مو فاهمين إيش معناتها. وأحد هذه المصطلحات هي مصطلح ”فينتيك“ واللي هو إختصار لكلمتي ”التقنية المالية“. والسؤال الأهم… إيش هي أبعاد التقنية المالية وتأثيرها على معاملاتنا اليومية؟ ولحسن الحظ صديقنا الدافور وخبير الفينتيك الأستاذ عبدالرحمن السفياني شارك معانا في حلقة اليوم وشرح لنا عن عالم وتاريخ التقنية لمالية وكل التفاصيل اللي ممكن تفيدنا اليوم. عبدالرحمن هو أحد مؤسسي شركة سبليفايد وهي أول منصة إلكترونية لخدمة قطاع الفندقة.

بمشاركة [ هاشم الزين ]

أكيد أغلبنا سمع ببرامج الذكاء الإصتناعي اللي كثير صاروا بيستخدموها زي شات جي بي تي وميد جيرني وغيرها… وكثير من الناس خايفين من هذه البرامج وتأثيرها السلبي على حياة البشرية. لكن هل فعلاً هذه التقنيات بتشكل خطر علينا؟ إي نعم في وظائف غالباً حتنقرض مع تطور هذه البرامج… بس هذا حالنا على مر التاريخ… نفقد وظائف بسبب التقنية ونكسب وظائف جديدة. وأهم عامل في هذه المعادلة اللي ممكن ينقذنا هو عامل الإبداع! وهذا الشيء اللي صديقنا المبدع د. هاشم الزين حب يناقشه معانا في حلقة اليوم.

بمشاركة [ خالد الحصيّن و بسام تركستاني و نوف النجيمي ]

طلب العلم هو من أهم الأعمال اللي ممكن نسويها في حياتنا… ومع إن زمان كانوا كثير من الطلبة وبالذات في مراحل التعليم المدرسي ما كانوا يحبوا الدراسة بشكل كبير… طلبة اليوم وبإستخدام التكنلوجيا قدروا يخللوا التعليم والتدريس شيء محبب إلى قلوبهم. وهذا الشيء اللي ضيوفنا اليوم قدروا يحققوه خلال السنوات الماضية! ومع إنهم مجرد طلبة مرحلة ثانوية ومازالوا في سن المراهقة… قدروا انهم يستثمروا وقت فراغهم في نشر العلم عن طريق منصة ”نغرس“.

ضيوفنا اليوم هم إثنين من مؤسسي المنصة… الطالب خالد الحصيّن نائب رئيس المنصة… والطالب بسام تركستاني الرئيس التنفيذي للمنصة… وشاركت معانا كمان اليوم دافورتنا المتميزية الأستاذة نوف النجيمي. منصة نغرس هي مبادرة تطوعية تساعد الطلاب أكاديميًا وتهدف لدعم وبناء مستقبل وجيل افضل. تطور الطلاب علميًا وتساعدهم في مسابقات متعددة بادراجهم في برامج خاصة من صنع مؤسسي المبادرة وتجهيزها لمساعدتهم وتوجيههم في الجامعة ومستقبلهم المهني. واللي يميز المنصه انها من الطلاب وإلى الطلاب… فكلهم في فريق العمل طلاب بيحاولوا مساعدة زملائهم الاخرين… ونشر الوعي والعلم والمعرفة هو هدفنا.

وممكن تتعرفوا على المبادرة بشكل أكبر عنطريق موقع نغرس: naghris.com

وممكن تتابعوهم على صفحتهم في الانستجرام: @naghris_sa

بمشاركة [ فواز برناوي ]

في حلقة اليوم زارنا ضيف كان لنا فترة بنحاول نستضيفه وأخيراً ضبطت مواعيدنا اللي كانت مخططة لبرنامج ثاني لكن بسبب الظروف لقينا نفسنا بنسجل حلقة لمستدفر ما خططنا لها! ضيفنا اليوم كان الدافور الخلوق الأستاذ فواز برناوي إللي اتكلمنا معاه عن مواضيع مختلفة تضمنت الأكل والأصناف المختلفة منه زي السيريه والبفتيك والمنتو والفرموزه وكيف حساسية التذوق عندنا ممكن تحدد نوع الأكل اللي ممكن نحبه وناكله، وكمان تبحرنا في حب التعلم وزيادة الفضول ومصادر المعرفة المختلفة زي الكتب والأفلام والبودكاست.

بمشاركة [ عمير طيبة و فيصل عسيري و هاشم الزين ]

وبالسلامة وصلنا حلقة رقم ٣٠٠ من بودكاست مستدفر! صراحة ما أتخيلنا إننا نوصل للي وصلنا له خلال السبعة سنوات اللي راحت، بس الفضل بعد الله يعود لكم يا مستمعيننا الدوافير اللي صمدتوا معانا عبر السنوات ودعمتونا وصبرتوا علينا :)

وقفتكم جنبنا وحماسكم المتواصل هو اللي يدفعنا لأننا نقدم أكثر وأكثر… وعشانكم قررنا نسوي حلقة اليوم بصيغة حلقاتنا الأولى واستضفنا الدوافير الأصليين إللي بدأوا معانا المشوار في أول حلقة من البرنامج عمير طيبة و فيصل عسيري وزي الحلقة الأولى صديقنا هاشم الزين دخل علينا في وسط الحلقة وشاركنا التسجيل… الحلقة كانت عفوية واتكلمنا فيها على الأفلام والسينما في السعودية وعلى الذكاء الاصطناعي و شات جي بي تي وغيرها من المواضيع المختلفة اللي إن شاء الله تعجبكم.

بمشاركة [ هاشم الزين ]

أي مجتمع له قوانينه وطرق التعامل العاصة به واللي تتحول لعادات متصرفات متعارف عليها اللي تضطر كثير من الناس انهم ما يتصرفوا على طبيعتهم. ودائماً ما نلاقي أنفسنا بنلبس أقنعة أحياناً تكون سلوكية وأحياناً تكون إجتماعية عشان تحمينا من كلام غيرنا، وفي نفس الوقت تعطي الناس إنطباع متقبل مجتمعياً عننا. وهذا الشيء اللي ضيفنا اليوم وصديقنا الصدوق الدافور والمهندس د. هاشم الزين اللي كتب مقالة عن الموضوع سرد فيها عشرة سلوكيات تتكون منها هذه الأقنعة.

ولو حابين تقرأوا المقالة بالإنجليزي ممكن تلاقوها على موقع د. هاشم: https://medium.com/@hashim.alzain/behind-the-mask-7bd2ae51913c

بمشاركة [ عمير طيبة ]

في حلقة اليوم رجع لنا الدافور الأصلي وأول ضيف في تاريخ البرنامج المهندس العبقري عمير طيبة واللي جلس وأتكلم معانا في مواضيع فلسفية وعلمية مختلفة، واللي تضمنت كلام عن الدرونز وطريقة عملها إلى الفروقات ما بين استخدام التقنيات الإلكترونية والتقليدية وعن طريقة عمل الراديو والأجهزة اللاسلكية. المواضيع أتشعبت واتشكلت وبإذن الله تعجبكم.

وكمان حابين نقول لكم انه حلقتنا اليوم برعاية الجيل الجديد من جهاز كيندل. والجماعة في آمازون حابين يعرفوكم على الجيل الجديد من جهاز كيندل واللي فيه مميزات جديدة عشان تساعدكم على القراءة بمتعة أكبر وبسعر مناسب… يحتوي أحدث جهاز Kindle على شاشة عالية الدقة حجم 6 بوصة، مع ميزة وضعية الإضاءة الداكنة، ببوصات ودقة 300 بكسل. وتتضمن أجهزة Kindle الجديدة كليا،ً الأخف والأصغر في فئتها، بطارية تدوم لفترة تصل إلى ستة أسابيع، بالإضافة إلى سعة تخزين 16 جيجابايت - ضعف سعة تخزين الجيل السابق – وهي تكفي لاستيعاب الآلاف من العناوين والكتب، وهذا الشيء حيتمكنكم من اصطحاب مكتبتهم الشخصية لأي مكان. الجهاز متوفر الآن بسعر 449 ريال سعودي بسعة 16 جيجابايت وباللون الأسود أو اللون الأزرق. وتتوفر كمان أغطية قماشية جديدة لجهاز Kindle بسعر 129 ريال سعودي بالألوان الأسود والوردي والأزرق والزمردي .

ممكن تعرفوا أكثر عن الجهاز عن طريق حسابهم في إنستجرام أو موقعهم الرسمي:

https://www.instagram.com/amazonksa/

https://www.amazon.sa/-/en/kindle-%D8%A5%D8%B5%D8%AF%D8%A7%D8%B1-2022/dp/B09SWV1FSS/ref=sr_1_6?crid=VN7WMTSXCMPK&keywords=kindle&qid=1677366858&sprefix=kindl%2Caps%2C243&sr=8-6&th=1

بمشاركة [ فيصل عسيري و عمر شبعان و كريم سماقي ]

حلقة اليوم مختلفة شوية… جاتنا دعوة خلال الأسابيع اللي راحت اننا نشارك في مؤتمر ليب في نسخته الثانية واللي أقيمت سنة 2023، المؤتمر جمع أكثر من مية ألف مبتكر تقني وخبير من جميع انحاء العالم لاكتشاف الأفكار الخلّاقة والرائدة وبناء شراكات جديدة، إلى جانب التواصل مع المستثمرين والملهمين. ومع إننا للأسف كنا مشغولين وما قدرنا نحضر المؤتمر ما حبينا نضيع الفرصة واتواصلنا مع أحد الدوافير الأصليين عشان يفزع لنا… صديقنا فيصل عسيري مسك زمام الأمور وسجل لنا حلقتين مع بعض رواد الأعمال اللي حضروا المؤتمر. في حلقة اليوم أستضفنا رائد الأعمال المبدع وصديق البرنامج الأستاذ عمر شبعان وشارك معاه في الحلقة صديقنا الأستاذ كريم سماقي.

بمشاركة [ عبدالله غازي ]

وأخيراً بعد طول غياب… ولدنا الضايع الدكتور والدافور عبدالله غازي رجع لنا بعد طول غياب. وعشان ما نعرف متى حيرجع لنا ثاني، استغلينا الوضع وقعدنا ندردش تقريباً ساعتين تكلمنا فيها عن يوم الحب وإذا كان له أي جوانب سلبية أو إيجابية. وكمان تكلمنا عن إذا ما كنا نفضل الطاقة والحماس اللي نمتلكهم واحنا صغار أو الخبرة والحكمة اللي نكتسبهم واحنا كبار.

وفي الآخر تطرقنا لمقومات تقييم أي محترف كأفضل مؤدي في تاريخ مجاله، واللي في نقاشنا استخدمنا لاعب كرة السلة الأمريكية البطل ليبرون جيمز كمثال في مقارنته مع أسطورة اللعبة مايكل جوردان. وتجادلنا في موضوع مين فيهم يستحق اللقب أكثر من الثاني.