Sa halos linggo-linggong pagtaas ng presyo ng gasolina, diesel at kerosene, nabuhay muli ang panawagan na suspendihin ang koleksyon ng excise tax na ipinapataw sa bawat litro ng produktong petrolyo. Pero sa kabila ng bilyun-bilyong pisong koleksyon ng gobyerno mula sa buwis sa langis, hindi sumang-ayon ang kasalukuyang administrasyon sa panukalang tigil-koleksyon ng excise tax. Bagkus ay mistulang nagbalato lamang sila ng libreng sakay para sa pasahero at fuel subsidy sa mga apektadong sektor, na hanggang ngayon ay napakagulo pa rin ng sistema ng pamimigay. Sa laki ng nakokolekta ng pamahalaan mula sa buwis sa petrolyo, aasa pa ba tayo na pakakawalan ito ng gobyerno? Think about it...

Nagsampa ng Diplomatic Protest ang Pilipinas laban sa tatlo't kalahating buwang fishing moratorium na ipinatupad ng China sa karagatang sakop ng West Philippine Sea. Ito ay nangangahulugang bawal tayong mangisda sa sarili nating teritoryo kahit pa ang deklarasyon ng moratorium ay walang basehan sa batas ayon sa Department of Foreign Affairs. Hindi lang pangingisda sa karagatang sakop ng ating teritoryo ang ipinagbabawal ng China, maging ang pagsasaliksik sa yaman ng ating karagatan ay kanilang hinahadlangan. Ganito ba ang gawain ng isang bansa na nagpapakilalang kaibigan ng Pilipinas? Think about it...

Isa sa mga ipinangako noong panahon ng kampanya ni presumptive  President Bongbong Marcos Jr. ay ang pagbaba ng presyo ng bigas sa dalawampung piso kada kilo. At para mangyari ito sa kanyang administrasyon, kailangang mag-ambagan ng mga Pilipino upang makalikom ng bilyong pisong pondo na subsidiya ng gobyerno sa bawat kilo ng bigas. Panibagong pondo ang kakailanganin para rito gayong sa kasalukuyan, ang utang at gastusin ng Pilipinas ay malaki na kaysa sa kayang kitain ng pamahalaan. Maisakatuparan kaya ang pangakong pagmura ng presyo ng bigas sa kabila ng napakalaking problemang pangpinansyal na kinakaharap ng gobyerno, o ang pangako ay pangako na lamang? Think about it...

Lumawak ang kaalaman ng publiko tungkol sa mga aklat pambata na kasama sa #NeverAgain book bundle ng Adarna House matapos ang "red-tagging" na ginawa ng ilang mga opisyal ng gobyerno laban sa publishing house ng mga libro. Pinapalabas na ang CPP-NPA-NDF ang nasa likod ng paglimbag ng mga aklat na ito na nagtuturo umano sa mga kabataan na maging radikal laban sa gobyerno. Subalit nilimbag ang mga aklat noon pang taong 2001, habang ang iba ay mula sa Barcelona na nasulat noon pang 1977 na isinalin lang sa wikang Filipino... Pero hanggang ngayon ay akma pa rin ang laman ng mga libro sa totoong nangyayari sa ating lipunan. Kaya ba pinapatigil ng ilang mga opisyal ng pamahalaan ang pagtangkilik ng mga aklat na ito, dahil takot silang mamulat ang mga kabataan sa naghaharing-uri ng mga nasa kapangyarihan? Ang pamamayagpag ng mga dinastiya sa nakaraang halalan ay isang klarong patunay. Think about it...

Nasa probisyon ng ating saligang batas ang pagbabawal ng dinastiya, pero walang kaukulang batas para maipatupad ito na nagresulta sa nagtatabaang dinastiya sa ehekutibo at lehislatura ng mga probinsya, lungsod at bayan dito sa Pilipinas. At kung dati ay nagsasalitan lang sa puwesto ang magkakamag-anak na pulitiko, ngayon ay sabay-sabay na silang tumakbo at nanalo sa iba't-ibang posisyon sa kanilang mga lokalidad. Pati Party-list ay kinukuha na rin nila. Ayon sa pag-aaral, kung saan naghahari ang matatabang dinastiya, doon rin laganap ang kahirapan dahil mas madaling bumili ng boto kung kumakalam ang sikmura ng mga taong nasasakupan mo. Ito ang malupit na katotohanan na ang sinasabing serbisyo sibil, ay nagmistula nang negosyo ng mga makapangyarihang pamilyang pulitiko. Pilipinas mong mahal... Ano na ang nangyari sa'yo?

Tapos na ang panahon ng halalan at marami nang naiproklamang kandidatong nanalo para sa lokal na pamahalaan, habang hinihintay ang proklamasyon ng mga nanalong Senador, Party-list Representatives, maging ng bagong Pangulo at Pangalawang Pangulo. Nanalo ba ang iyong kandidato, o ikaw ba'y lumuluha ngayon? Huwag kang tumangis... Ipahinga ang iyong isipan at katawan dahil nasa ibang yugto na tayo ngayon ng ating demokrasya. Tama, move on tayo... Panahon naman ng paghingi ng pananagutan; accountability and moral ascendancy.

Malaking pagbabago sa sistema ng halalan sa Pilipinas ang paggamit ng automated election system ng Commission on Elections na pinabilis ang pagboto at paglabas ng resulta ng botohan. Maliban sa pagbabagong ito, may ilang nagbago rin sa sistema ng ating eleksyon, ang problema, hindi lahat ng pagbabago ay tungo sa kaayusan, dahil ang iba ay tungo sa kadiliman. Sa kasalukuyan, mas talamak ang vote-buying, mas tumaba ang political dynasty, at higit sa lahat ay mas kalat ngayon ang disinformation gamit ang makabagong media. Ang mga botanteng Pilipino ay may kalayaang pumili ng kanyang iboboto, subalit paano na kung ang pagpili ay hango sa kasinungalingan at maling impormasyon? Think about it...

Sa panayam kay Dr. Jonathan Ong, isang professor na nagsagawa ng pag-aaral tungkol sa trolls, ipinaliwanag niya kung paano kumikilos ang mga ito at nagagamit ng mga kandidato bilang makinarya sa pagpapakalat ng propaganda.

Isang linggo bago ang halalan sa Mayo a-nuwebe, talamak at lantaran na ang mga ulat ng vote-buying sa iba't-ibang lugar sa Pilipinas. Pinipilahan ang pagbili ng boto na nagbabalatkayo bilang ayuda, mula sa mga kandidato na ang adhikain ay manalo... Pero isipin niyo, kapag ang pera ay ninakaw at hindi pinaghirapan, napakadali nitong ipamudmod sa iba, subalit kung ang pera ng pulitiko ay kanilang pinagpawisan at pinaghirapan, wala sigurong kandidatong gagasta at mamimigay ng milyun-milyong pera para bumili ng boto. Kaya sa darating na eleksyon, huwag iboto ang kandidatong binibili ang inyong boto, dahil ang salaping ibinigay sa inyo ay mula rin sa perang ninakaw sa inyo, at patuloy silang magnanakaw kapag sila ay nanalo.

Naglabas ng show cause order ang LTFRB laban sa mga kumpanya ng bus na hindi bumabyahe sa kanilang ruta dahil may window hours lamang na pinapayagan silang gamitin ang kanilang pribadong terminal na nasa loob ng Metro Manila. Ipinipilit pa rin kasi ng mga ahensya ng DOTr, LTFRB at MMDA na tangkilikin ng provincial bus operators at commuters ang itinalaga nilang Integrated Terminal Exchange, partikular na ang North Luzon Express Terminal o NLET, sa kabila ng mga perwisyong dulot nito na suportado ng pag-aaral ng mga eksperto. Dagdag pa rito ang katotohanan na hindi naman mga pampublikong transportasyon ang sanhi ng mabigat na trapiko sa Edsa dahil sa datos ng MMDA, ang mga bus ay maliit lamang na porsyento ng kabuuang bilang ng mga sasakyang bumabagtas sa Edsa. Sa dami ng tumututol sa NLET, ano ba ang tunay na dahilan kung bakit nasisikmura ng DOTr at LTFRB na pahirapan ang pangkaraniwang mamamayan para matuloy lamang ang operasyon ng NLET? Think about it...