Programa muit centrau en los problemas demograficos d'Aragón. Charramos con Fer y David d'o II festival contra la despoblación que se fació en Allepuz lo 19 d'octubre. Pa mirar de trobar solucions, dende marzo leva treballando la red RIADA, una iniciativa que arrocla a buena cosa de chent en defensa d'o medio rural. Charramos con Anchel, un d'os participants d'iste ret.

Programa post-pilarista a on que torna la Educadora Ambiental Tamara Marzo pa charrar d'un animal bien queriu y important en Aragón: lo cluixiuesos. La campanya de recuperación d'ista au rapinyadera va conseguindo que reviscole la suya especie y antimás d'os Pirineus tamién la podemos veyer ya por lo Mayestrato.

Lo mes d'octubre ye important pa muitas creyadoras que fan lo reto Inktober. Charramos d'ixa iniciativa y tos leigo un d'os relatos d'o mio Inktober literario en aragonés.

En la parte mosical, torna la canción blasfema y conoixemos un abanze d'un dos temas incluyius en O zaguer chilo 3

Charramos con Mario y Paula, de l'Asociación Cultural Nogara, qui nos presientan los cursos 2019/2020 que imparte la suya escuela d'aragonés dende la envista d'un d'os suyos mayestros y una d'as suyas alumnas. En la segunda parte, replego los mensaches sobre los Pilars de 2019 que ninvioron las TdBelievers en respuesta lo clamamiento que facié por retz. Y antimás, la canción Lololo y atras propuestas mosicals.

Nueva temporada y nuevo programa. Entrevista con Chorche Paniello, sobre la XVI edición d'a Feria de colecccionismo Replega que se celebra en Monzón lo primer cabo de semana de setiembre. Antimás, leigo lo relato "Lo peduco royo" y tos foi dos propuestas mosicals pa que empecipietz bien lo curso. Nueva durada, nuevo horario, nueva freqüencia y nuevo formato!

Zaguer programa d'a temporada que, como totz los anyos, acaba con Dabi y Ruben de convidaus. Por mas de dos horas, tos proposamos catorce temazos pa sentir de toda mena de mosicas. Antimás, chugamos a bingo, charramos de B Vocal y nos lo pasemos de bitibomba! A la fin d'o programa s'anuncia bella novedat pa la siguient temporada.

Pa tener un verano divertiu, s'aprecisa buena cosa de libros pa aproveitar lo tiempo libre, si ye que en tiens. Las TdBlievers nos han empliu un programa con las suyas recomendacions literarias, y yo n'he anyadiu quantas atras mosicals. Por Tierra de barrenaus, a fe que no te aburrirás istos meses!

Deceno programa d'a temporada a on que viachamos ta Moncayo pa conoixer l'asociación Moncayo 900 de man de Dabi, un d'os suyos miembros. Empecipioron recuperando lo dance de Tarazona y china-chana van treballando en nuevos prochectos de cultura popular. En la segunda entrevista nos n'imos t'as Cuencas Meneras. En Montalbán, Elena ha empecipiau fa bell mes a emitir "Qué diz ixa mesacha?" un programa de radio en aragonés que s'emite en Radio Montalbán, dende una envista transfeminista y antiespecista.

Audio d'a presentación de Parola de Follet en Zaragoza, feita lo 15 de mayo en lo Centro d'historias. Libro en aragonés escrito por Carlos G. Esteban "Barrenau"

Parola de follet replega nueu cuentos ambientaus en un Aragón amagau, poblau por folletz, fadas, diaplerons y toda mena de sers fantasticos. Entre las suyas estrucias, la de dominar la parola. Con ellas fan edificios, treballan la tierra u mesmo fabrican obchectos. Los folletz son bien curiosos y viachan ta mundos exoticos mesmo pa ells. Siempre ubiertos a nuevas experiencias, descubren realidatz desconoixidas y fan partache d’as suyas experiencias con qui quiera ascuitar-los.

Un anyo mas, l'equipo de Tierra de barrenaus estió en la gala d'entrega d'os Premios d'a Mosica Aragonesa, organizaus por Aragón musical. Tos contamos muitas d'as cosas que i pasoron y debatimos sobre lo que nos pareixió y l'actualidat d'a scena mosical aragonesa.

Programa especial de raso sobre las XXVI Chornadas d'as luengas d'Aragón que organiza, como totz los anyos, l'Asociación Cultural Nogara, y que tendrá qualques charradas, un taste de trena y bombons, una visita turistica en aragonés, un vermu radiofonico y lo concierto de Koakzion y Orbita. Charramos con las personas que dinamizarán las diferents actividatz pa que nos recuenten en que consistirán y qué nos i trobaremos. Entre lo 1 y lo 13 d'abril de 2019 en Zaragoza.