Tsa ka Pukung tsa Moremogolo e tswelapele go go tlisetsa dipuku tsa go ngwalwa ka Sepedi magareng ga tse dingwe nepo e le go agana ka melaetsa ye matla ya go tswa ka dipukung tse, mmogo le go kwalakwatsa bangwadi ba rena ba Sepedi. Puku ya rena ya kgwedi ye ya Diphalane batheeletsi ke puku ya mohuta wa Dikanegelokopana ya go bitswa Dimaka tsa Bo Lehono. Puku ye e ngwadilwe ke Matshidiso Phaladi. Kanegelokopana yeo re ratago go ka boledisana ka yona le mongwadi bosegong bja lehono e reilwe hlogo ya Go Hlompha Lehu. Batheeletsi ka go kanegelongkopana ye ya go bitswa Go Tlhompha Lehu, motho o kopana le ditsholo tsa mongwadi e le ge a sola maitshwaro a bana bao ba phelago maphelo a bona a boiketlo mme ba hlokomologile batswadi bao ba ba godisitsego ka lerato ge se tse ba tsofetse, mme batswadi bao ba re go hlokagala, bana bao ba nyake go somisa dipoloko tsa batswadi bao ba bona bjalo ka manamelelo a go bontsha maemo a bona. Mongwadi gape kanegelongkopana ye o re bontsha le ditiragalo tse dingwe tsa mahlabisadihlong tseo e le go gore ga di bontshe le gannyane go tlhompha lehu le mohu owe a tla be go a bolokwa.