Í níunda þætti Út í óvissuna fjöllum við um Hálendisvaktina í Landmannalaugum, Nýjadal og Herðubreiðarlindum. Einar Daníelsson segir frá tilgangi verkefnisins, verkefnum sumarsins og helstu tölum.

Síðan förum við í Skóga undir Eyjafjöllum, þar sem Guðbjörg Konráðsdóttir, starfsmaður Skógasafns, og Sigurður Harðarson segja frá sögu björgunarsveita og fjarskipta og mununum sem varðveittir eru í safninu í Skógum.

Fréttamolar og ábendingar - [email protected]

Í áttunda þætti Út í óvissuna er rætt við rithöfundinn Óttar Sveinsson, höfund hinna vinsælu Útkallsbóka, um sögurnar sem hann hefur safnað úr björgunarstarfi gegnum árin og nýjustu bókina Ég er á lífi.

Í seinni hluta þáttarins segir Þorsteinn Þorkelsson, gjaldkeri félagsins og sagnfræðingur, frá ævi og störfum Hannesar Þórðar Hafstein, sem gegndi lykilhlutverki hjá félaginu um áratugaskeið og vann ötullega að auknu öryggi á sjó.

Fréttamolar og ábendingar - [email protected]

Að þessu sinni hefjum við leikinn á Suðurlandi, nánar tiltekið á Hellu, þar sem Sigurgeir Guðmundsson, félagi í Flugbjörgunarsveitinni Hellu, tók á móti okkur. Við vildum kynnast sögu sveitarinnar og starfseminni á Hellu, og Sigurgeir var sannarlega rétti maðurinn til að leiða okkur í gegnum það. Hann er mikill sögumaður og kunni frá mörgu að segja.

Í síðari hluta þáttarins er rætt við Svanfríði Lárusdóttur, sem hefur verið ötul í starfi félagsins undanfarin ár og þekkir slysavarnamál vel. Viðfangsefnið er merkileg kona sem fór ótroðnar slóðir og lagði mikið af mörkum til slysavarna á Íslandi. Þar er átt við Frú Guðrúnu Jónasson, sem á sér afar áhugaverða sögu. 

Guðrún var formaður kvennadeildar Slysavarnarfélags Íslands um árabil á miðri síðustu öld. Hún var áhrifamikil í slysavarnastarfi kvenna og setti sterkan svip á starfið.

Fréttamolar og ábendingar - [email protected]

Ólafía Aðalsteinsdóttir hóf störf með Hjálparsveit skáta í Reykjavík í upphafi áttunda áratugar síðustu aldar og hefur því fylgst með starfinu þróast í meira en hálfa öld. Hún segir frá því hversu miklu máli skátastarfið skipti á unglingsárunum, vináttunni sem myndaðist, æfingunum og öllu því sem hefur setið eftir.

Við förum yfir víðan völl: leitir að rjúpnaskyttum, týndum ungmennum, björgunarstörf á hálendinu, snjóflóð og fleiri verkefni sem hafa markað langan feril hennar. 

En svo er það hin hliðin, útivistin og ævintýrin. Ólafía segir meðal annars frá eftirminnilegri ferð á Mont Blanc árið 1975, þar sem hún var hluti af átta manna hópi og er talin fyrsta íslenska konan til að ná á tindinn. Hún fór síðar á Kilimanjaro árið 2002 og deilir einnig áhugaverðri frásögn af þeirri ferð.

Einar Daníelsson, starfsmaður Landsbjargar og félagi í Hjálparsveit skáta Reykjavík, settist niður með henni.

Fréttamolar og ábendingar - [email protected]

Í fimmta þætti hlaðvarps Landsbjargar höldum við áfram að kynna okkur ólíkar hliðar starfsins.

Í fyrri hluta þáttarins ræðum við við Vilhjálm Halldórsson, varðstjóra hjá Neyðarlínunni. Hann hefur starfað þar um árabil og segir okkur frá fyrsta viðbragði þegar neyðarkall berst, samskiptum við þann sem hringir og samspili viðbragðsaðila, þar á meðal björgunarsveita, allt frá útkalli og út á vettvang.

Í seinni hluta þáttarins færum við okkur yfir í starf leitarhunda. Björgunarhundasveit Íslands fagnaði 45 ára afmæli undir lok síðasta árs og af því tilefni ræddum við við Björk Arnardóttur, formann sveitarinnar. Hún segir okkur frá starfinu, þjálfun hundanna og hvernig hundar nýtast við hin ýmsu björgunarstörf.

Fréttamolar og ábendingar - [email protected]

Í fjórða þætti verður fjáröflun í brennidepli enda mikilvægur liður í starfsemi félagsins. Bakvarðaverkefnið fór af stað árið 2013 og hefur vaxið mikið síðan þá. 

Rætt var við Flóka Guðmundsson hjá Takk, sem hefur starfað fyrir fjölmörg góðgerðarfélög og sjálfboðaliðasamtök. Við fórum yfir þróunina í fjáröflun, miðla og boðleiðir og hvernig hægt sé að ná til almennings á gervihnattaröld.

Í síðari hlutanum förum við í stutta heimsókn í ný húsakynni Hjálparsveitar skáta í Kópavogi, þar sem Valgeir Tómasson, fyrrverandi formaður HSSK, tók á móti okkur og sagði frá framkvæmdinni og hvað þarf að vera í björgunarsveitarhúsi nútímans.

Fréttamolar og ábendingar - [email protected]

Sjóbjörgun verður í aðalhlutverki í þætti vikunnar. Bogi Þorsteinsson, skólastjóri Slysavarnaskóla sjómanna, tók á móti okkur á Reykjavíkurhöfn og bauð okkur um borð í skólaskipið Sæbjörgu. Hlutverk skólans er að standa fyrir öflugu fræðslustarfi fyrir sjómenn og aðra sem starfa í haftengdri starfsemi. Við fengum kynningu á starfsemi skólans og skipinu sjálfu, auk þess að fræðast um sjóbjörgun og helstu menntun og þjálfun sjómanna.

Martha Karen Guðrúnardóttir fór síðasta haust til Eistlands í áhafnaskiptaverkefni á vegum alþjóðlegu sjóbjörgunarsamtakanna IMRF. Martha er félagi í björgunarsveitinni Erni og í áhöfn björgunarbátsins Kobba Láka í Bolungarvík, en ákvað að stíga út fyrir þægindarammann og taka þátt í verkefninu. Við fengum að heyra meira um upplifunina, sjóbjörgun í Eystrasalti og hvað hún tók með sér heim úr þessu áhugaverða skiptinámi.

Fréttamolar og ábendingar - [email protected]

Freyr Bjartmarz hefur séð tímana tvenna í starfi félagsins en hann gekk til liðs við Flugbjörgunarsveit Reykjavíkur á sjötta áratug síðustu aldar og hefur verið viðloðinn björgunarsveitina í tæp 70 ár. Við fórum yfir víðan völl og ræddum meðal annars eftirminnileg útköll, hvernig starfið hefur þróast í gegnum árin, svaðilfarir á vélsleðum og margt fleira.

Í seinni hluta þáttarins var haldið á Snæfellsnes í lok október á síðasta ári þar sem björgunarsveitarfólk og fulltrúar Skógræktarfélags Íslands komu saman til að gróðursetja tré í hlíðum Drápuhlíðarfjalls. Trén voru keypt í gegnum verkefnið Rótarskot og sagði Brynjólfur Jónsson, framkvæmdastjóri Skógræktarinnar, okkur allt um verkefnið og markmið þess.

Fréttamolar og ábendingar - [email protected]

Borghildur Fjóla Kristjánsdóttir, formaður Slysavarnafélagsins Landsbjargar, gaf okkur innsýn í starf sitt sem formaður. Hún fór yfir víðfeðmt starf félagsins, áskorunum í starfi og velti einnig fyrir sér framtíðinni, ekki síst í ljósi þess að 100 ára afmæli félagsins er á næsta leiti. Viðtalið var tekið upp í febrúar 2026.

Í síðari hluta þáttarins færum við okkur á Reykjavíkurflugvöllur í október 2025. Þar tóku Árni Birgisson og Friðfinnur Freyr Guðmundsson á móti okkur og sögðu frá flugslysaæfingu sem Isavia, björgunarsveitir og aðrir viðbragðsaðilar halda reglulega. Markmiðið er að skapa sem raunverulegastar aðstæður og undirbúningur er bæði umfangsmikill og krefjandi.

Fréttamolar og ábendingar - [email protected]