Bergur Líndal og Þórður Helgi ræða kvikmyndagerð, kvikmyndir og allt sem því við kemur. Sérstakur gestur er Kjartan Kjartansson.

Elfa, Þórunn og Sandra fara yfir unglingsárin og rifja upp hvað var inn á árunum 1985 - 1995. Spiluð verður tónlist frá þessum tíma í bland við spjall um dægurmenningu þá og nú.

Í þættinum fara nemendur og kennarar í árgangi 2010 yfir reynsluna af uppsetningu söngleiksins Smells. Kór Grundaskóla lítur við og kíkt verður í tónmenntakennslu.

Pétur Magg stýrir þættinum "Akrafjall síðdegis" þar sem skemmtilegir Skagamenn koma í spjall um hreyfingu, útivist og ferðalög. Fallhlífastökkvari flotkennari og ferðamálafrömuðir hafa staðfest komu sína í þáttinn auk bakgarðshlaupara. Ekki missa af þessu!

Ólafur Páll Gunnarsson ræðir við Skagakonuna Svönu sem ólst upp á Stekkjarholtinu og Skagabrautinni og hefur unnið með mörgu af þekktasta tónlistarfólki heims undanfarinn aldarfjórðung - David Bowie, Beyoncé og Jay-Z, Rolling Stones, Kylie Minogue, Coldplay og ABBA, en hún er framkvæmdastjóri ABBA Arena og Abba Voyage í London.

Gummi og Hjörvar fara yfir stóru málin, Gummi stingur sér til sunds, farið í leikinnn Hver á röddina og þátturinn endar með tónlistaratriði.

Bræðurnir Heiðar Mar og Björn Þór Björnssynir ræða íþróttir á Akranesi og setja ÍA í fókus. Þá ræða þeir við fulltrúa þeirra íþróttagreina sem tilheyra ÍA en fólk veit ekki endilega mikið um.

Iddi, Viddi og TinderTom fara yfir árið 2025 og ræða kynþokkafyllstu menn Akraness. Nýir aldursflokkar kynntir til sögunnar í þeirri keppni.

Minning um Orra Harðar er þáttur þar sem við bregðum okkur inn á kvöldvöku til heiðurs Orra sem var haldin á bókasafninu á Vökudögum í lok október. Fjöldi tónlistarfólks kom fram og lék tónlist Orra og spjallaði um hann í sófanum á milli tónlistaratriða.

Umsjónarmenn kvöldsins, þeir Gulli Jóns, Halli Melló og Hjörtur Hjartar hafa búið til tvo þætti upp úr þessari mögnuðu kvöldstund og er sá fyrri á dagskrá útvarps Akranes 30.11.25 en sá seinni fer inn á hlaðvarpsveitur fyrir jól.

Samsetning og hljóðblöndun: Baldur Ragnarsson/Hljóðkirkjan

Helgi Reyr Auðarson Guðmundsson tekur á móti gestum og ræðir álitamál tengd jólunum og jólahefðum.