Rona aaye ‘Sahil’, to zaar zaar aaye

Tufaan aaye kabhi to jandaar aaye

Kaun jaane kis shaakh par kal bahaar aaye

Urta kahan se mere gul par koi khaar aaye

Jungle hai Jahan , haiwaan hain yahan

Kya mumkin hai veeraane mein gulzaar aaye

Samandar ki dost, khaufzadah hai kashti

Be khabar hai, gardaab kinare ya manjhdhar aaye

Yaro, lutf kya nabard ka zindagi se, kaho

Jab talak na ru ba ru, ado shandaar aaye

Fanaa ho jaana fitrat hai zeist ki

Phir tafreeq kya, maut aaye ya rasan o daar aaye

Khizaan ke is daur mein, afsurdah hai dil mera

Andaleeb aaye, khwah mera dildar aaye

Jaam tha, gulfaam tha, sukun na tha saqi magar

Tere maikadah se aaye, to bekraar aaye

Karle mujh se sauda, banale hamsafar

Ai qaza, baad merg mujhe bhi, mukammal qarar aaye

Aasaan hai jeena ‘Sahil’, leta reh nafs tu

Wada nahin hai lekin, ke tujhe qaraar aaye