地點：封閉區域 Area DB Island 千獸島

達：（讀白）盧綠被獵豹飛撞跌咗落山涯...生死未卜...而我都可能好快步佢後塵...因為喺我面前有可以控制其他動物嘅獨角獸，仲有一隻老虎、豹、熊同被盧綠打傷嘅猩猩...企喺山涯邊嘅我...望住手上嘅道具...包括紙紮人仔、一疊無圖案嘅黃紙，地上面有盧綠嘅藥、火柴同食人花黃紙...最後...我喺無其他辦法之下，唯有咁做！

*火柴燃燒紙張聲效
*樹藤聲效

燒紙紮人仔係就係可以返到Area 15，但我已經無晒入嚟封閉區域嘅船飛，所以我決定再搏一搏！燒咗嗰張食人花嘅黃紙！！！

*樹藤聲效

果然不出我所料！喺黃紙燒完嗰剎那，地面慢慢生出之前喺百草園同我激戰嘅食人花！唔駛幾秒，成2個人咁高嘅食人花就重現喺我面前！原本以為係廢同無用嘅黃紙，原來係可以咁用！

*獨角獸叫聲

獨角獸好似被我呢一著嚇到，大叫一聲，命令4隻猛獸停止攻擊。獨角獸，你命令到所有動物，但食人花嚴格嚟講係植物，應該唔受你控制掛！係我反擊時候啦！

「嚟啦！食人花！同我攻擊佢地！」

雖然食人花出現係我面前，但佢就得返墨綠色遊戲碼同灰色人工智能碼，屬於佢靈魂嘅紅色碼就唔見咗...同時食人花嘅花冧緊緊合埋...又無紅色靈魂碼又未開花...係咪代表佢依家只係得驅體呢？

「喂！你郁下啦！喂！」

食人花完全無反應...即係最後可以一搏嘅機會都無埋...咁無辦法啦...

*火柴燃燒聲效

盧綠...我出返去Area 15搵辦法先可以再幫你！

*獨角獸叫聲

就喺我準備燒我手上紙紮人仔，想離開之際，獨角獸一聲令下

*鷹叫加高速飛翔聲效

有一隻飛鷹由高空快速衝落我度，叼走咗我嘅紙紮人仔！佢將紙紮人仔拋到去獨角獸前面，獨角獸一踩！

*獨角獸腳踏聲效

就一腳踩走我逃走嘅最後希望...

「莫十三！你聽唔聽到啊！你可唔可以幫我強制登出啊！」

「莫十三！！！」

*猩猩叫聲

隻猩猩拐下拐下咁慢慢向我進迫...我就一步一步慢慢向後退...

*山涯跌石聲效

但我已經退無可退...腦入面突然諗返起最初入Game of Eden經常去睇星星嘅無人島，仲有識咗阿K、莫十三、見返阿爸仲遇到Gigi、Sabrina同盧婷嘅畫面...如果當初無入Game of Eden，無接受阿K解謎嘅邀請，我又會點呢？

橫掂都未玩過Sky dive，就用人生第一次同可能係最後一次嘅sky dive嚟思考呢條問題啦！

*踏腳聲效

*樹藤伸長聲效

「嘩！！！」

*樹藤伸長聲效

就係我凌空跳落山涯嘅時候，一條又長又粗嘅樹藤捉住咗我，仲拉返我上嚟地面！

*食人花叫聲

食人花逐漸回復返紅色嘅靈魂顏色，而佢嘅頭，即係花冧位置，仲有同我一樣嘅紫色，即係我嘅賭博成功咗！

咁究竟食人花可唔可以以1敵5呢？好快就會知答案！

*獨角獸叫聲

獨角獸再次發施號令，老虎、獵豹同熊慢慢向我呢邊行過嚟，反而拐下拐下嘅猩猩就快跑過嚟我面前！

我以為佢會向我攻擊！點知！

佢衝去攬住食人花！

*食人花及猩猩叫聲

頭先聽到盧綠問佢係咪袁叔…唔通…佢同食人花上一世係識嘅？

食人花同猩猩對望，跟住食人花折斷自己其中一條樹藤，將樹嘅汁液滴落猩猩流緊血嘅膝頭，好似幫佢療傷咁！

*獨角獸叫聲

可惜，獨角獸嘅號令破壞呢個溫馨場面！猩猩抱頭向後退，我透過全知狀態望到猩猩頭入面有獨角獸嘅紫色碼閃過！

*獨角獸叫聲

獨角獸叫得越大聲，紫色碼喺猩猩頭入面就越大越多！猩猩就越頭痛！

我仲見到紫色碼由猩猩嘅頭部伸延去猩猩嘅右手，代表獨角獸控制猩猩出右拳攻向食人花！食人花準備伸出樹藤檔格！

*猩猩大叫聲效

而猩猩只係得屬於佢橙色碼嘅左手竟然化手掌成手刀，大力一劈！將自己隻右手劈到骨折！

佢慢慢擰轉身，望向獨角獸大聲叫喊！佢好似用意志力迫走獨角獸喺佢腦入面嘅紫色碼！

依家就變成我，食人花、猩猩同獨角獸、老虎、獵豹仲有熊對峙！

*獨角獸聲效

獨角獸無執著猩猩嘅叛變！對其餘3隻猛獸落命令！老虎同獵豹向我快速撲過嚟！

佢哋快，但食人花反應都好快！樹藤一伸！將佢地兩個打返原位！

至於熊人就衝去同猩猩決鬥！兩隻本身攻擊力同氣力都好勵害嘅猛獸理論上會鬥得難分難解！但可惜，猩猩之前被盧綠斬傷，同時佢又打斷咗自己隻右手，所以佢嘅攻、防仲有移動能力都大減！

熊人向猩猩左右揮爪，猩猩都能夠勉強閃避！跟住熊人扒低，變做四肢爬行嘅姿勢，快速直衝去猩猩嘅中路！猩猩無得再避，只能掘膝做成紮馬嘅動作，硬接熊人嘅撲擊！

*撞地聲效

猩猩被熊人撲跌落地！熊人再用兩掌撳住猩猩，然後用好尖利嘅牙齒！咬擊猩猩！

*樹鞭聲效

食人花想伸出樹鞭幫猩猩解圍，可惜老虎同獵豹無比機會食人花！食人花伸出嘅一對樹鞭都被老虎同獵豹撲跌再咬斷咗！

不過好在食人花生命力好強，再次伸出兩條樹鞭綁實老虎同獵豹！再用力將佢地拋落山涯！

然後，食人花伸出其中一條樹藤，捆住地面上面嘅白橡蛇矛，用力揮向熊人！

*矛飛擊聲效
*刺肉聲效
*熊人大叫

熊人掛住攻擊猩猩，無為意食人花呢下攻擊！應聲被白橡蛇矛刺傷左胸！

食人花真係勁！可以以一敵三！

不過猩猩被熊人傷得太勁！呼吸聲越嚟越虛弱…食人花用樹藤將猩猩拉到自己身邊…想嘗試用自己嘅汁液滴落猩猩度幫佢療傷！

但可惜…猩猩傷口太深…失血太多…我見到佢身上嘅橙色碼越嚟越暗淡…

猩猩將自己嘅身體挨咗落食人花度…再伸出左手摸摸食人花嘅花瓣…我彷彿見到一個哥哥挨住落妹妹身上面嘅溫馨場面…

猩猩展現出微笑…

呢個時候，食人花用樹藤捉住我嘅左手掂住猩猩，另一條樹藤就將地上面一張黃紙帶到我面前。

「你想點啊？」

我右手拎咗佢遞比我張黃紙。呢個左手掂住猩猩，右手拎住黃紙嘅動作…咪即係之前我喺百草園成功收伏食人花嘅動作！

我將自己隻左手掂實猩猩…但係一啲反應都無…

我之前係點發射激光嘅呢？

第一次係整傷阿K隻手…當時我內心係想佢唔好掂我…

之後喺張保仔洞係被嚇親，唔想啲怪獸圖案行埋嚟…

上次就係想食人花消失…

全部都係負面嘅情感…同埋喺我面前嘅事物消失…

消失…我想佢消失…我想佢消失！

*激光聲效！

我左手發出激光！將猩猩嘅身體打散變成微粒，而啲微粒再被黃紙吸受！

*吸入聲效

最後變成一張畫有猩猩圖案嘅黃紙！

背面寫住：

28-61年 猴子
61-94 年狒狒
94-127長臂猿
127-170年 凱袁
170- 現在 黑猩猩

*獨角獸大叫

獨角獸又再大叫！今次佢召喚咗一隻獅子，犀牛，剛才出現過嘅飛鷹，頭先受傷嘅熊人企返起身。

*火柴燃燒聲效

我燒咗猩猩嘅黃紙，猩猩就再次出現喺我面前！

同獨角獸嘅決戰，依家開始！

Zip噏劇場 Game of Eden 第二季 小島篇 第61回「獸之魂」

阿攝 飾演 阿達

編劇及製作 阿攝
音樂 BEAT FRIDAY（SOMEWHERE, BEFORE DAWN, Kaji, thing, Almond, OTHER LOVE）
封面設計 Followmelikeblack 

Leave a comment and share your thoughts: https://open.firstory.me/user/ckyhgwclu0xlr08721i22wc7k/comments

Powered by Firstory Hosting

地點：封閉區域 Area DB Island 千獸島

達：（讀白）正當我地喺千獸島嘅蘇木搵到由第3個島飛過嚟嘅白鴿，仲喺佢腳度搵到盧葦寫嘅字條，想出發去第3個島嘅時候，獨角獸又再出現！

但奇怪嘅係，佢隻角無端端發光，仲大叫咗一聲！

*獨角獸叫聲
*叢林擺動聲效
*老虎、猩猩、豹、熊叫聲

達：（讀白）突然之間，有一隻老虎、猩猩、豹同熊出現喺我地身處嘅山頂平地上面！佢地左右排開，企喺獨角獸兩邊。佢地同獨角獸一樣，都係有第3隻顏色嘅！

*白橡蛇矛聲效

盧綠拎咗背後嘅白橡蛇矛出嚟戒備！獨角獸隻角又再發光，佢又大叫！

*獨角獸叫聲

然後，最右邊嘅老虎好似聽到佢嘅號令，就向我撲過嚟！

*老虎大叫聲

盧綠：阿達！小心！

*急步聲效
*墜地聲效

達：（讀白）好在盧綠反應夠快，喺老虎撲中我之前急步跑過嚟撲跌咗我，避開咗老虎嘅撲擊！老虎撲空之後，凝視咗我地幾秒，就慢慢行返去獨角獸身邊。

盧綠：佢地都有靈魂...但又同食人花一樣向我地攻擊...

達：你唔係以為佢地想用「打」嘅方法同我地溝通啊...

盧綠：我無咁諗...只係完全唔明發生緊咩事...

達：不如我地用穿雲箭向裘雪佢地求救？

盧綠：呢度距離啞鈴洲咁遠，佢地收到訊號過得嚟...我地可能已經死咗啦！

達：佢地依家守住咗落山條路...我地後面就係山涯...唔通我地要跳涯啊？

盧綠：你見唔見到嗰邊嗰棵蘇木？我地跳去樹頂，然後爬落去！

達：棵蘇木成百米咁高喎！

盧綠：但我地得呢個方法！你企喺我後面，我地慢慢行過去！

*獨角獸叫聲
*猩猩叫聲

達：（讀白）獨角獸好似睇穿我地嘅用意，佢再用叫聲比指令，今次就到隻猩猩向我地行過嚟...佢將兩隻手舉起...樣又無惡意，好似無任何攻擊我地嘅意圖

盧綠：你有咪有野想我地講啊？我放低武器，然後溝通下？

達：（讀白）喺我想鬧盧綠係咪傻咗之際，隻猩猩點頭，然後一隻手指住盧綠，做咁咗一個叫佢行開嘅動作。

盧綠：你想我行開？

達：（讀白）猩猩點頭...再指住喺盧綠身後嘅我...用手勢叫我上前...

盧綠：等等先！你地究竟想點？

達：我地無惡意架，只喺嚟搵去第3個島嘅方法，我地搵到架啦！依家走啦！

*獨角獸聲效

達：獨角獸完全無視我地講嘅野，隻角又發光！跟住隻猩猩雙手放喺心口前面，又打又叫咗幾下，就向我地衝過嚟！再揮出右拳攻向盧綠！盧綠好似唔想傷害猩猩，所以淨係用白橡蛇矛嘅矛身檔格！

我懷疑猩猩上一世係一個勵害嘅武術家！就喺拳同白橡蛇矛互碰前嘅一煞那，猩猩將拳頭打開化成掌，仲一掌握實盧綠嘅白橡蛇矛，再右手一揮，盧綠連人帶矛被猩猩拋到去右邊臨近山涯嘅位置！

盧綠：呢一招...係玄武拳法其中一招...可以做到拳掌短時間互換嘅...得一個人！袁叔！係咪你啊！

*獨白獸叫聲
*熊腳步聲

達：（讀白）盧綠！依家唔係親戚相認嘅時候！隻熊向我慢慢行緊過嚟啊！

盧綠：得！我即刻過嚟！

*猩猩叫聲

達：（讀白）盧綠想過嚟救我嘅時候，猩猩衝前，擋住佢嘅去路！

盧綠：雖然我唔確定你係咪袁叔，但我肯定你無惡意嘅！如果你想殺我，頭先我一落地嘅時候，你可以即刻衝過嚟攻擊我啦。既然係咁，就麻煩你讓路！

*猩猩叫聲

盧綠：如果係咁，就唔好怪我唔客氣啦！

*白橡蛇矛揮擊聲效

達：（讀白）盧綠揮出白橡蛇矛，同猩猩打起上嚟！不過同食人花唔同，食人花會主動攻擊我地，但猩猩只係不停閃避盧綠嘅招式！當盧綠用矛直刺向猩猩嘅時候，佢又用拳掌互換嘅招式擋格矛身，令盧綠根本行唔到過嚟！

*熊腳步聲效

但向我行緊埋嚟嗰隻熊...氣勢同感覺就唔似善男信女...佢喺我面前我2米嘅距離停低

*熊大叫聲效

一聲大叫之後就向我撲過嚟！

呢個時候我真係慶幸我之前贏到嗰個「赤套」道具！我屈膝一彈！順利避開佢嘅撲擊！但呢個只係佢嘅第一擊！佢竟然喺我面前企咗起身！向我揮爪！我即係彈後！蘇木喺我身後10米嘅位置...我係咪真係唔理盧綠跳過去蘇木，然後逃走呢？

*熊大叫聲效

隻熊變返四腳爬行！然後加速向我衝埋嚟！我下意識向前碌地閃過佢！

死啦！我中咗隻熊嘅計！佢根本唔係想攻擊我，只係想跳過我！封咗我跳去蘇木嘅路！然後隻熊慢慢向我進迫...我唯一嘅退路...只係得返身後20米嘅山涯...

*獨角獸聲效

獨角獸又大叫！今次到隻豹收到指令！不過又係向我嘅方向行緊過嚟！點解獨角獸同啲動物好似淨係針對我嘅！？

（大叫）盧綠！救命啊！

可惜盧綠根本無心力回應我，因為佢仲同緊隻猩猩惡鬥緊！

盧綠：（讀白，少少喘氣）凱安曾經過講過...袁叔精通玄武拳法...加上佢經常去千獸島觀賞猩猩、猴子嘅動作...慢慢將佢地靈活嘅動作融入拳法...令佢創出別樹一格嘅玄武猴拳...今日一試...果然勵害...但如果咁呢...

*全知狀態聲效

盧綠：（讀白）究竟雙眼快啲，定心眼快啲呢？我一直都好想測試一下！所以我合埋雙眼，將集中力由平勻放喺所有感官，變成集中喺聽覺同本能直覺！然後我嘅腦好自然地透過猩猩嘅呼吸聲得到佢嘅位置。眼看嘅角度有限，但聽覺就可以突破視角嘅盲點！

我依家就憑聲音早一步感知猩猩攻擊嘅方向！希望可以做到喺佢起手之前封咗佢攻擊嘅線路！當然，要憑我好純粹嘅直覺先可以做到心手合擊！

*揮矛聲效

首先我用白橡蛇矛駛出寸刺，直擊猩猩心臟位置！同時我聽到猩猩左邊膊頭帶頭左拳嘅微少聲音！而猩猩原本嘅快掌，喺我靈敏嘅聽覺之下，好似變慢咗，比我捕捉到佢攻擊嘅方向！佢想用左掌撥走我嘅矛擊！

先下手為強！我即刻由直刺改成向右橫斬，向佢左邊膊頭攻擊！

*斬擊刺肉聲效
*猩猩慘叫聲

就算猩猩及時反應後退，但都比我擊中咗！

（大叫）阿達！你捱多一陣！

達：（大叫）盡力啦！

呢個時候，熊同豹對我步步進迫...我就越退越後...山涯同我嘅距離...由20米...慢慢變成15米...再變成10米...如果盧綠都趕唔切...我係咪及燒個紙紮人仔逃走呢...?

*猩猩叫趕
*矛擊聲效

達：（讀白）盧綠合埋雙眼之後，好似越戰越勇，佢出矛嘅速度越嚟越快，好似每招都封住猩猩嘅攻擊路線，每一次攻擊都成功𠝹傷猩猩，最後...佢大叫一聲

盧綠：啊！！！

達：（讀白）佢作勢攻向猩猩嘅面部，猩猩想用掌擋格，但盧綠喺掌到之前收矛，再直刺猩猩嘅掌心，再用好快嘅速度刺咗猩猩嘅腹部幾下，最後快斬猩猩膝頭關節，猩猩單腳跪咗係度！

盧綠：阿達，我依家嚟救你！

達：（讀白）就喺盧綠打贏咗猩猩開返對眼，話救我嘅時候，喺我身前嘅豹突然快速撲向盧綠！盧綠閃避唔切！被佢撲飛跌出山涯啊！

盧綠！！！

我即刻跑去山涯邊！下面就係深海！盧綠就捉住咗山涯下面大約5米凸出嘅樹枝！

比隻手我！我拉你上嚟！

盧綠：阿達！唔好理我！快啲走！

達：伸隻手出嚟！

盧綠：阿達！一定要搵方法搵返婷婷啊！接住啊！

*樹枝斷裂聲效

達：盧綠！！！

（讀白）喺樹枝斷裂，盧綠再跌落去之前，佢好用力將佢嘅包袱拋比我...

*獨角獸大叫聲效

達：（讀白）獨白獸又大叫！不過佢係對住隻豹大聲撕叫！而原本惡凶嘅豹被獨角獸呼喝之後...變到好似貓咁溫馴...乖乖企喺獨角獸旁邊...但另外嘅老虎、猩猩同熊就慢慢向我行埋嚟...

*打開包袱聲效

達：（讀白）依家我除咗把唔識用嘅北斗七星劍...只係得返個紙紮人仔...同一疊空白嘅黃紙...盧綠嘅包袱...只係得啲藥...一盒火柴...仲有張食人花嘅黃紙...

呢個時候...無辦法啦...唯有咁做啦！

*劃火柴聲效
*燒紙聲效

Zip噏劇場 Game of Eden 第二季 小島篇 第60回「千獸戰」

阿攝 飾演 阿達
Cfun 飾演 盧綠

編劇及製作 阿攝
音樂 BEAT FRIDAY（List, Kaji, Surface, Interval, thing, Extension）
封面設計 Followmelikeblack 

Leave a comment and share your thoughts: https://open.firstory.me/user/ckyhgwclu0xlr08721i22wc7k/comments

Powered by Firstory Hosting

地點：封閉區域Area DB Island 千獸島

達：（讀白）公元前398年，一位古希臘史學家係佢本《印度紀聞》之中提及一種貌如野驢、大如馬、身軀白、雙目深藍、額上有角嘅生物，應該係最早有關獨角獸嘅文字記載。

之後，有唔同嘅經書或者文章都出現過獨角獸，例如西方宗教經文、中國嘅《山海經》等等。亦有人認為古代麒麟嘅描述，即係鹿身牛尾獨角嘅外形，同獨角獸相似。究竟佢係咪真實存在？定只係犀牛嘅祖先？或者同類？佢又有冇神奇嘅力量呢？

唔同故事唔同傳說對獨角獸嘅形容都好唔一樣。有啲話佢好暴躁，有啲就話佢係純潔善良…睇戲睇小說就聽得多佢嘅故事…我點估到喺千獸島…真係會有一隻獨角獸架…

*瀑布流水聲效
*獨角獸腳步聲及叫地

盧綠：阿達，你做咩咁驚嘅？

達：你…話佢係獸王…咁我哋依家會唔會好危險架…？

盧綠：哈哈，放心，佢係守護呢個島同掌管島上動物嘅瑞獸。對上一次有村民見到佢，已經係十幾年前嘅事。阿達！我哋今次行運啦！

*獨角獸腳步聲效

達：但佢好似望實我地…同埋行緊埋嚟…最重要嘅係…佢有第三隻色…紫色啊…

盧綠：係喎！我都話千獸島一定會有第三隻顏色碼嘅動物架啦！

達：咁你駛唔駛…

盧綠：梗係唔駛啦！首先，獨角獸已經出現咗至少150年，佢唔會係我爸爸嘅轉生。第二，以前唔知點解佢會係千獸島嘅獸王，依家飲完靈魂之水，入咗全知狀態就明白佢同其他生物唔同嘅地方。

*獨角獸叫聲
*拍翼聲
*飛翔聲效

達：呼…佢終於飛走啦…

盧綠：都唔知你驚乜。我哋行啦。

達：行…行去邊啊？

盧綠：海牛游到嚟呢個小瀑布前就離開咗，即係小瀑布下面嘅山洞應該有舅父或者阿葦留低嘅線索。

*腳步聲效

達：（讀白）我跟住盧綠行近呢個4米高嘅小瀑布，瀑布之下，就有一個好漆黑嘅小山洞

*燃點火把聲效

達：（讀白）盧綠點咗一個小火把，準備行入山洞之際！

*蝙蝠飛出聲效

盧綠：阿達！扒低！

達：係！

*蝙蝠聲效漸散

達：啱啱呢啲係…？

盧綠：係蝙蝠。佢哋通常都喺啲陰暗嘅地方聚居。佢地一見到火把就嚇親，所以一次過飛晒出嚟。依家無事啦。

達：不如…我係洞口等你？

盧綠：你連食人花都打得贏，仲有咩會驚呢？行啦。

*腳步聲效

達：（讀白）我跟住盧綠慢慢行入呢個山洞。行咗大約20米左右，盧綠就停咗。

盧綠：如果係舅父…會將暗號擺係邊個位置呢？

達：洞口就最方便，因為一入嚟就會睇到，如果喺洞嘅盡頭都易搵嘅，只係唔知嗰洞有幾深。最麻煩嘅係喺牆壁度…逐忽搵嘅話真係下世先搵到…

盧綠：咁我盡快行入去洞嘅盡頭位置啦！

達：（讀白）最後，我哋行多50米左右，終於走到去洞嘅盡頭。不過因為太黑，所以搵線索真係好難…

盧綠：阿達，你聽唔聽到啊？

達：聽到啲咩啊？又有蝙蝠聲啊？

盧綠：你試下將全知狀態縮到1米範圍

*全知狀態聲效
*水滴聲效漸大

達：聽到啦！係水滴聲！呢邊！

盧綠：無錯！係我哋右前方有一個鍾乳石

*腳步聲效

達：見到啦！咁線索或者暗號會係鍾乳石嘅石柱度？定上面嘅石壁呢？

盧綠：錯啦，係你踩住咗啊。

達：對唔住…原來喺地面上面…

盧綠：舅父又留咗啲圖案做提示。今次係雀仔同山嘅圖案。

達：第一行，有一個細小嘅右半圓形，之後有三個山形圖案由左到右排列。雀仔嘅圖案就係最左邊嘅山上面。

盧綠：第二行，係右半圓形變咗一個圓形，雀仔嘅圖案就喺中間嘅山上面。而第三行，就係一個左半圓形，雀仔圖案企係第三個山上面。

達：半圓同圓形係咪代表月亮嘅周期？而雀仔圖案喺山上面，上鳥下山，即係一個「島」字。即係代表3個島？

盧綠：唔通舅父嘅意思係有雀仔會喺唔同嘅時間飛去唔同嘅島度？但會係邊隻雀仔呢？

達：就係百草園差啲被食人花食咗嘅白鴿！

盧綠：千獸島有咁多雀鳥，點解你咁肯定係嗰隻白鴿？

達：因為成個百草園淨係見到嗰隻白鴿，無其他雀仔。你唔覺得好怪架咩？點解會有隻白鴿喺嗰度出現，千獸島有咁多果實，點解要飛嚟百草園食白橡樹嘅果實？

盧綠：唯一可以驗證你嘅推測，就係喺呢度搵隻白鴿出嚟。

達：但千獸島咁大，要搵一隻雀仔，點搵啊！？

盧綠：千獸島呢個區域有一棵最高嘅樹，叫做蘇木。佢係眾多雀鳥嘅屋企。嗰度係最大機會可以搵到你所講嗰隻白鴿。阿達，趁未天黑，我哋出發啦！

—————

達：（讀白）我明白點解盧綠會講趁未天黑要出發，因為真係會行到天黑…我地紮營瞓咗一晚，等天光再出發…行咗唔知幾多公里…由熱帶森林行到入大片嘅森林區...按地理位置嚟講，太約喺千獸島底部部份嘅最北面…我地終於望到棵蘇木啦…

盧綠：阿達，我哋將全知狀態集中係對眼度，搵隻白鴿出嚟。

達：等等先！呢棵蘇木，仲高過百草園棵白橡樹喎！佢有…有成百米咁高喎！

盧綠：就係咁高咁大，先可以成為雀鳥天堂啊嘛。嚟啦，你望下半部份，我望上半部份。

達：（讀白）呢棵成百米高嘅蘇木，依靠住一座高山。蘇木有好多唔同嘅雀鳥聚居，有一種百鳥朝樹嘅感覺。雖然我已經將全知狀態全力集中喺眼度，但要喺咁多雀仔搵隻白鴿出嚟，直頭係level 100嘅找錯處遊戲...

盧綠：阿達！你睇唔睇到啊！

達：睇到咩先...

盧綠：樹頂！佢喺接近樹頂嘅位置！

達：嘩...咁細同咁遠...你話係隻蚊都得架啦...

盧綠：嚟！跟我上嚟！

達：（讀白）之前穿越樹林...依家就要行山...我跟盧綠行上蘇木後面嘅座山，又用咗1到2個鐘嘅時間，我地極速登頂。一上到去，係一個籃球場咁上下大嘅地石，可以俯瞰成個千獸島，景色真係好宏偉。而盧綠氣都無喘，就行咗去最近蘇木樹頂嘅山涯邊。

盧綠：阿達，你無估錯，真係嗰隻白鴿！佢仲喺樹頂嘅樹幹度築咗個鳥巢。你望下！鳥巢入面，有一粒粒嘅白橡樹果實！

白鴿聲效

達：有一隻白鴿飛過嚟，但佢口叼住嘅唔係白橡果實，而係叼住一片樹葉...

*吹口哨聲效
*白鴿拍翼聲效

達：（讀白）盧綠唔知點解叫起口哨，而隻白鴿又真係停咗喺佢手上面。

盧綠：阿達！你見唔見到佢隻腳度綁住張字條啊？

達：見到！我即係拆出嚟！

*白鴿拍翼飛走聲效

達：張字條上面寫住...「3島在千獸島東面700公里位置，確實存在。盧葦字」...好囉！終於有線索啦！

盧綠：估唔到阿葦真係可以憑舅父嘅線索搵到第3個島出嚟！睇嚟舅父所講嘅野，係真架！

達：我地去到第3個島搵到盧葦先再讚舅父啦！行啦！

*拍翼聲效
*獨角獸步聲效

達：兩日見到兩次獨角獸？睇嚟我地真係好好彩喎！盧綠你睇下，佢隻角仲會發光添！

盧綠：（疑惑）我從未聽過村民提過獨角獸嘅光會發光架喎

*獨角獸叫聲效

達：佢會唔會有靈性到專登飛過嚟為我地送行架？

*爬樹聲效
*猩猩聲效
*動物奔跑聲效
*老虎、豹、熊等動物跑叫聲

達：但送行都唔駛咁齊人...又猩猩又老虎、豹...連熊都出埋...盧綠...發生咩事啊？

*劍出鞘聲效

盧綠：我淨係知有好重殺氣啫...

*獨角獸叫聲效

達：獨角獸隻角又發光，佢又叫啦喎！

*老虎奔跑聲效及叫聲

盧綠：阿達！小心啊！

Zip噏劇場 Game of Eden 第二季 小島篇 第59回「獨角獸王」

阿攝 飾演 阿達
Cfun 飾演 盧綠

編劇及製作 阿攝
音樂 BEAT FRIDAY（Roast,Two, Week, Blank, Kaji）
封面設計 Followmelikeblack 


Leave a comment and share your thoughts: https://open.firstory.me/user/ckyhgwclu0xlr08721i22wc7k/comments

Powered by Firstory Hosting

地點：封閉區域Area DB Island 千獸島

達：盧綠啊...你由淺灘一路向東北行...我地依家行咗入一個熱帶森林...其實你知唔知要點行架？

盧綠：總之你跟住我就得啦

達：你肯定嗰個箭咁係你細佬盧葦留低嘅？

盧綠：正確嚟講，係我舅父留低嘅標記。等我搵到另一棵樹再話你知。

達：（讀白）由於盧綠嘅堅持，我只好跟住佢一直行。不過我唔跟住佢，都無其他方法。因為我對第三個外島嘅位置同線索一啲頭緖都無...而我地依家身處嘅地點，係千獸島最南面嘅部份，呢個部份係一個熱帶森林區。按裘雪嘅資料，呢個區域有好多唔同種類嘅鳥類、哺乳類同爬行類動物。亦因為咁，我都進入全知狀態，將敏感度提高，防止被不知名嘅動物衝出嚟襲擊我地...當我地行咗應該有成一千米之後，盧綠終於有發現！

盧綠：有啦！阿達，你睇下！

達：喺呢棵樹度，又有一個好暗嘅黑色箭咀，係指向西北面嘅...

盧綠：你摸下嘅個箭咀先

達：無咩特別啊，都係用匕首雕出嚟嘅，然後有啲好暗好黑嘅墨水油咗中間嘅位置。

盧綠：舅父經常嚟呢個千獸島探險，佢喺我地好細個嘅時候教我地三兄妹野外定向嘅方法，同教我地用標記嚟通訊。箭咀嘅方向代表要去嘅位置，你又留意箭咀嘅低部，有無咩特別？

達：同上一棵樹嘅箭咀一樣，喺箭咀嘅底部有啲圓圈、交叉、一劃同啲點點

盧綠：上一個箭咀，就係指住東北方，箭咀下面有一個圓圈、5個交叉、5劃同5點。圓圈代表一千，交叉代表一百，一劃代表十，一點代表一

達：東北方...一個圓圈、5個交叉、5劃同5點...即係叫你向東北方向行1555米？

盧綠：無錯。依家我地面前呢一棵樹嘅箭咀係指向西北方，底部有兩個圓圈、一個交叉、一劃同一點

達：即係叫你去西北方向行2111米！但同盧葦有咩關係呢？

盧綠：細個時時候...我同阿葦會鬥快搵到舅父比我地嘅標記...領先嗰個...就會喺舅父刻劃嘅標記上面塗上暗黑色嘅墨水...所以...依我估計...標記應該係舅父留低，阿葦喺大凶日之後出海嚟到呢到，話比我知嘅提示...阿達，我地繼續出發啦。

達：（讀白）沿住西北方向行，就會慢慢深入熱帶森林嘅內部。千獸島植物嘅多樣性比百草園更豐富，應該係多得呢度各式各樣嘅昆蟲採花蜜，以及不同草食性動物食果實，幫助植物傳播種子。我地一路行，樹上面啲雀仔就好好奇咁望住我地，樹林之間，間唔時會有馬騮、小袋鼠、羚羊等等嘅動物經過。而途經一棵樹嘅時候，我向上一望，竟然會有一隻樹懶係度瞓緊覺！

盧綠：阿達！小心！

*蛇叫聲音

達：嘩！！！

*斬殺聲效

盧綠：雖然我知道千獸島有好多奇珍異獸，但你都唔好淨係掛住望，要留心啲先得架！被蛇咬到事少，一陣可能會有豹或者老虎撲出嚟架！

達：吓！！！咁會唔會有熊架？

盧綠：我地唔係嚟呢度睇動物！你留心啲，跟貼啲我，我地繼續行！

達：（讀白）一聽到盧綠所講嘅野獸，我又緊張又興奮，一嚟喺現實世界我從未見過呢啲動物，所以都好想親眼見識一下，但又好怕盧綠分唔到身保護我...所以...我都係收返遊客心態...再提高全知狀態嘅敏銳度...

盧綠：到啦。不過呢棵樹嘅圖案...咁奇特嘅...

達：係囉，雖然都有箭咀指住西面，但無晒啲圓圈、交叉圖案，反而有三個波浪紋，邊邊仲有一個魚嘅圖案。但魚口有牙，仲有個魚鰭長到好似手咁嘅？

盧綠：呢個唔係魚，喺呢個熱帶森林另一種生物。跟我過嚟！

達：（讀白）我跟住盧綠向西行，撥過一片叢林之後，見到一條長長嘅河流。上流向西北方，下流向我地登岸嘅淺灘。呢個時候，有聲由旁邊嘅叢林傳過嚟！

*踩草聲效
*羚羊叫聲

達：（讀白）有一隻羚羊慢慢由叢林走近河邊，佢低頭飲水。呢個情境同睇舊時嘅紀錄片係一模一樣架！跟住...

*水流聲效
*鱷魚叫聲
*羚羊慘叫聲

達：嘩！！！盧綠！有隻鱷魚咬實咗隻羚羊啊！我地要唔要救佢啊！

盧綠：阿達，我地唔好打擾大自然嘅規律...更何況...佢地兩隻動物都只係得墨綠色碼同灰色碼，即係...佢地唔同食人花咁，佢地係無靈魂嘅...

達：由我地登島到依家，所有動物都只係呢度嘅人工智能，可能食人花係例外呢...

盧綠：我唔信成個千獸島嘅動物都係咁...一定會比我地搵到嘅...

達：咁你舅父留低嗰個似魚又唔係魚嘅標記又係點解呢？

盧綠：比啲耐性，等多陣你就會知道。

達：（讀白）如是者，我地等咗半個鐘，等到隻鱷魚好血腥地拖走被佢咬死嘅羚羊，等到條河再回復平靜，再等到我有啲眼訓...

盧綠：阿達！醒啊！你睇下河嘅中心！

*水流聲效

達：又有鱷魚！？

盧綠：唔係鱷魚，係海牛啊。

達：咦！裘雪嘅千獸圖鑑有講！佢話海牛喺水入面約有一半時間係睡覺，平均每5分鐘浮到水面上呼吸一次，其它時間會喺水入面1-2米內進食。佢地主要以各種水生植物，例如海草、水藻、紅樹葉為糧食，但有時都會食魚等細小動物。

盧綠：海牛嘅記憶力好強，視覺同聽覺都好敏銳，舅父話佢地好有智慧，好可能前一世係人都未定。

達：但你依家睇到啦，呢隻海牛都只係兩隻顏色...

盧綠：你睇下，佢望住我地啦。

達：雖然佢無靈魂，但佢會唔會有導航嘅功能呢？

盧綠：跟住佢行就會知道。

達：（讀白）如是者，我哋就係沿住河岸跟住海牛游向上流嘅方向一直行。跟住，河流出現幾條分支，海牛停低咗，望一望我哋，就揀咗出中一條分支向前游。我哋無其向線索，唯有死跟住佢一直行。行咗大約3到4個鐘…海牛終於停低。而停低嘅位置，係一個有4米高嘅小瀑布

*瀑布流水聲效

盧綠：阿達，唔好向前行住！你望下瀑布入面！

達：入面有一個小山洞！仲有腳步聲傳出嚟！唔通係盧葦！

盧綠：（大叫）阿葦！係咪你啊！

*腳步踩水聲效

達：盧綠…睇個身影唔似係人喎…

盧綠：係邊個！

*腳步踩水聲效
*馬叫聲效

達：呢隻係白馬？但佢有角…仲有對翼嘅？係…係咩嚟架！

盧綠：佢就係呢個千獸島嘅獸王…獨角獸！

Zip噏劇場 Game of Eden 第二季 小島篇 第58回「千獸解碼」

阿攝 飾演 阿達
Cfun 飾演 盧綠

編劇及製作 阿攝
音樂 BEAT FRIDAY（Adjust,Heatwave, Nothing, Distance, Laboratory）
封面設計 Followmelikeblack 

Leave a comment and share your thoughts: https://open.firstory.me/user/ckyhgwclu0xlr08721i22wc7k/comments

Powered by Firstory Hosting

*風帆聲效
*海浪聲效

達：（讀白）根據裘雪嘅航海圖，千獸島位於百草園東邊大約400公里嘅位置，以依家嘅風向同風力，大約要3日嘅時間。而盧綠就好專心咁揸船，無咩做嘅我就繼續閱讀裘雪所寫嘅千獸島資料。千獸島嘅外型，同北斗七星第6粒星，ζ （zeta）嘅外型接近，即係似英文字母Z。

而千獸島嚴格嚟講係由3個大島所組成，即係將Z分折3個部分，按筆劃順序，頂部嘅一橫，之後嘅一斜，同底部嘅一橫，三大部分相距只係10-20公里，而每個島嘅氣候，動植物品種都唔一樣。裘雪亦特別表明，千獸島嘅「千」字，只係一個形容，按佢估計，成個千獸島存在嘅動物肯定超過一千種。但因為觀星閣嘅文件被裘雪燒毀咗…我手上嘅資料只係由佢憑記憶默寫加上佢家中僅餘嘅資料拼湊而成…所以我都無辦法想像千獸島嘅情況係點…之前百草園有好多現實世界無嘅植物，咁千獸島又會唔會出現現實世界已經絕種嘅動物呢？

我揭到其中一頁千獸圖鑑，情不自禁「啊」咗出聲！然後同盧綠講：盧綠！原來比食人花吞咗嗰隻，係白鴿嚟架！我睇電影就見得多，估唔到入到嚟可以見到真嘅，啊唔係…係實體…又唔係…唉，總之我第一次可以摸到白鴿啦！嗰陣可以太驚，撈亂咗白鴿同普通雀仔添！

盧綠：（反應冷淡）係咩…我都無留意添…

達：（讀白）今日已經係出發去千獸島嘅第2日，呢句係盧綠喺呢2日講嘅第3句說話。第一句係上返船嘅時間，佢話

盧綠：出發啦…

達：（讀白）第2句係

盧綠：可唔可以將仁嬸嗰張黃紙比我啊…

達：（讀白）其實我知佢內心一定諗緊係千獸島會唔會見到有靈魂嘅動物，而嗰啲動物究竟會唔會係佢爸爸或者其他親戚轉世呢？由於我唔想不斷輪迴咁同佢研究輪迴呢個問題…所以我見佢咁嘅心情同狀態…我都費事再打擾佢…而我腦入面就不斷係度諗…點解會有一隻白鴿喺百草園出現？佢由邊度飛過嚟？同埋點解要擔走白橡樹嘅果實？呢個封閉區域實在有太多解釋唔到嘅謎團…

而去到第3日，我哋終於到達千獸島最南邊嘅島嶼。同百草園一樣，我哋係島外嘅海域落水，慢慢行上島嘅淺灘。行上淺灘之後，不出我所料，盧綠做嘅第一件事…就係飲靈魂之水…

盧綠：阿達…如果一陣見到有第三隻色嘅動物…可唔可以幫我…

達：得啦。我知啦…但你要記住

盧綠：我知，我會以搵第3個島嘅線索為大前提…我唔會影響進度嘅…

達：（讀白）佢講完之後，就無再出聲，沉默咁向前行…我都無阻止佢，因為我都經歷過好想搵到爸爸嘅心情…而行咗大概15分鐘左右，盧綠好急咁跑咗向前，仲同我講

盧綠：阿達！你睇唔睇到啊？棵樹啊！

達：盧綠…呢棵樹得墨綠色同灰色碼…佢唔似棵食人花咁架…

盧綠：我唔係講緊有冇靈魂啊…你望下嗰樹幹！有一個好暗嘅黑色箭嘴…

達：係喎…唔用全知狀態…真係睇唔到架喎…但會唔會係你哋之前登島嘅時候留低嘅標記嚟架？

盧綠：會用呢個水墨畫箭嘴嘅人…得一個！

達：咁會係邊個？

盧綠：我細佬，盧葦！

Zip噏劇場 Game of Eden 第二季 小島篇 第57回「迷之箭嘴」

阿攝 飾演 阿達
Cfun 飾演 盧綠

編劇及製作 阿攝
音樂 BEAT FRIDAY（Atoms, Soothes）
封面設計 Followmelikeblack 



Leave a comment and share your thoughts: https://open.firstory.me/user/ckyhgwclu0xlr08721i22wc7k/comments

Powered by Firstory Hosting

達：（讀白）喺現實世界，曾經經過一條長長嘅小巷，小巷入面有一個個紅色帳篷，每個帳篷外面都貼咗兩個字 - 算命。

呢條就係幾出名嘅地下算命街。每個帳篷都有唔同門派嘅師傅。而外面都有唔少想預知命運嘅人。有一次，有一個帳篷無人，入面嘅算命中年阿叔企咗係帳篷外抖氣，佢見到我經過，就捉住我隻手同我講：嘩！後生仔！你骨格精奇！未來一定可以影響世界！

嘩，咁嘅說話都噏得出！搵食果然艱難…所以，我好有禮貌咁撥開佢隻手繼續行。點知佢用另一隻手再捉住我，好認真同我講：後生仔，有啲野係整定架！你上一世係一個基因工程師，再上一世係一個特務，再上上一世係一個程式員，而再上上上一世就係一個編劇！總之每一世都係改變緊個世界啦！

我聽完都係得啖笑，再撥開佢隻手，頭也不回咁走。但佢無放棄，係度大叫：喂！咁都比我撞到你，係緣份，我唔收你錢，幫你算命啊！因為你會有大劫啊！

當時只係得15歲嘅我係度諗，如果真係有命運，點解我爸爸會失蹤？如果有前世，咁究竟我上一世做咗咩事，今世會成為孤兒？

不過呢個世界無真正嘅解釋，只有自己認為嘅解讀。巧合定緣份，睇下你嘅觀點同角度。

而呢一刻，我望住我手上畫咗食人花圖案嘅黃紙，再回想剛才我左手發出激光打到佢粉碎，再比張黃紙吸入嘅情境，究竟發生咩事？我…可以點解讀呢？

第一問題，我左手點解可以發出激光？上一次有類似嘅情況，係同盧婷喺Game of Eden 張保仔洞入面，我射爆咗洞頂嘅岩石…再上一次就係喺area zero 出嚟之後，整到阿K無咗隻手…然後我諗起 AI 0 嘅說話：

「阿達，一切展露於33，但呢個只係開始，同一時間，善用D嘅能力啦。」

唔通…呢個就係D嘅能力？

第二個問題…我手上嗰張畫咗食人花嘅黃紙背面…寫住

125-130年 牡丹花
130-175年 凱花
175年-180年8月31日 豬籠草
180年9月1日 食人花

唔通…喺全知狀態望到有3隻顏色嘅食人花…真係有靈魂…而佢嘅靈魂…仲輪迴咗幾次…呢張黃紙係佢嘅三世書？但明明盧零一開始整呢個封閉區域唔係想模擬返現實世界嘅設定架咩？點解會有輪迴轉世嘅機制？

當我諗爆頭都諗唔明最合理嘅解釋嘅時候…嗰隻原本比食人花吞咗，身體好虛弱嘅雀仔終於回復返多少少嘅精神，仲可以慢慢拍翼起飛。佢先飛上去棵白橡樹，叼走一粒一白橡樹果實之後，就向東邊嘅海域飛走咗…同一時間，盧綠都蘇醒啦…

盧綠：阿達...棵...食人花呢...?

達：佢...消失咗啦...

盧綠：係...點消失架...？

達：嗱...就係呢張黃紙囉。佢整暈你之後，就向我攻擊...我隨手拎起呢張道具...喺佢嘅樹鞭掂到呢張黃紙嘅時候...就比佢吸咗入去啦...

盧綠：（冷笑）哈...總之一早叫你拎啲道具出嚟試，咁就唔駛打餐死...

達：係呢...你無事嗎...我幾驚你吸咗啲花粉之後會好似我咁中毒啊！

盧綠：無事...只係發咗一個好奇怪嘅夢啫...

達：好似我咁，夢到食人花？

盧綠：我...夢到仁叔細個時候嚟呢個島搵花嘅事...仲有就係仁嬸同仁叔相處嘅點滴...明明呢啲係我出世前嘅事...唔知點解我會夢到...我以為我係走咗入仁叔嘅記憶世界，但點知之後比我見到呢度嘅豬籠草，喺大凶日之後突變成食人花嘅經過...真係好奇怪...

達：盧綠啊...仁嬸嘅全名...係咪叫「凱花」啊？

盧綠：你又會知嘅？仁叔講過你聽？但仁嬸過身之後，仁叔都好少同人提及仁嬸嘅事...

達：係因為...呢張黃紙...

*接紙聲效

盧綠：（喃喃自語）125-130年 牡丹花...130-175年 凱花...175年-180年8月31日 豬籠草...180年9月1日 食人花...即係...

達：即係佢好有可能係仁嬸嘅轉世...?

盧綠：即係我地殺咗仁嬸？

達：又未必係死咗嘅...我見住佢比張黃紙吸咗入去...或者...有方法整到佢出嚟...?

盧綠：咁即係...頭先食人花其實唔係想攻擊我地？而係想同我地溝通？

達：你咁諗又極端咗少少...佢啲機鞭都真係唔野少架...

盧綠：咁你點解釋佢只係綁住我而無殺到我，同埋用花粉整暈我，令我發嗰個夢？

達：我點知喎...巧合掛？

盧綠：巧合？由你尋日嚟食咗惡夢磨菇，到夢見呢度有食人花，再到依家！真係巧合咁簡單？

達：你問我，我問邊個啫？我夠想知答案啦！你嘅祖先明明想呢度同現實世界設定係一樣，我又點知會有呢啲轉世嘅玩法啫！

盧綠：轉世...靈魂...根據代代相傳嘅習俗...我地過身之後，就會透過火燒遺體船嘅儀式，再次回歸玄武大帝啲懷抱...但阿爸死嘅時候...佢嘅遺體只係得返墨綠色同灰色碼...已經無咗靈魂...唔通...佢一死之後，即刻返咗玄武大帝身邊？唔通...佢好似仁嬸咁...有機會轉咗世？

達：盧綠，你都係估啫...不如我地

盧綠：阿達！比我！

達：比咩你啊？

盧綠：黃紙！我要啲無畫野嘅黃紙！

達：你要嚟做咩啊？

盧綠：比我！快啲比我！

達：喂！你冷靜啲，唔好搶！我比你我比你

*草地奔跑聲效

達：喂！盧綠！你去邊啊！

*草地奔跑聲效

達：（讀白）盧綠唔知做乜事，喺我腰度搶走一疊黃紙，就喺山頂平原跑落山，佢邊跑邊周圍望，好似搵緊野咁...跑咗一大段路...佢終於停咗喺一棵松樹度...

盧綠：阿達！你見唔見到啊！呢棵松樹都有3層顏色，而最入面嗰層，係綠色架！

達：你想講佢有靈魂？

盧綠：我阿爸佢好鍾意松樹...會唔會佢死咗之後就？

*黃紙貼上松樹聲效

盧綠：唔得嘅...阿達！可能要你先得啊！你幫我試下啊！

達：（讀白）盧綠遞咗張黃紙比我...想我收伏呢棵松樹...但我當然無話佢知之前可以收伏食人花...係因為我用左手嘅激光打到佢粉碎...先會被張黃紙吸受咗...我怕我同佢講我識激光呢件事...會嚇親佢...所以，依家我做下樣，將黃紙貼喺棵樹度。而當然，係乜事都無發生啦...

盧綠：點解唔得嘅？阿達，你係咪漏咗啲咩無做？例如係咒話？又或者動作？

達：盧綠啊...無啊...當時我真係遞張黃紙出嚟...就收咗棵食人花入張黃紙度...你信我啦...

盧綠：又係啊呵...阿爸死咗都唔夠2個星期，邊有可能咁快轉世成為呢棵咁高咁大啲松樹呢？應該係其他細小嘅植物...又或者...會唔會係昆蟲呢？

*草地奔跑聲效

盧綠：阿達，你做咩唔跟過嚟啊！我要你幫手架！

達：盧綠，可能你阿爸轉世咗做人呢

盧綠：係喎！點解我諗唔到呢個選項呢！但如果佢轉世咗做人...我點知佢前世係我阿爸呢...

達：盧綠！你冷靜啲啦！我地出海係要去第7個島嘅盡頭搵返盧婷架！

盧綠：但係依家...

達：依家做咩啫！你係咪想搵晒全個百草園有靈魂嘅植物去試，睇下佢地係咪你爸爸嘅轉世？你睇到啦，成個百草園有靈魂嘅植物唔多，可能仁嬸...即係凱花係個別例子呢？又可能佢地轉世係做人，又或者係千獸島嘅動物呢？總之依家就要冷靜！

盧綠：冷靜...我要冷靜...咁我依家應該要做啲咩...

達：我叫你冷靜啊！！！

*出鞘聲效
*劍插地聲效 

盧綠：阿達...你想做咩啊？

達：執起把劍！

盧綠：我依家無心情同你打啊...

達：我唔係要同你打啊！我想你拎起把劍！記返我地今次出嚟係要破解斗之盡處嘅秘密！我地去到盡頭，自然搵到盧婷同埋所有嘅答案！

*拔劍聲效

Zip噏劇場 Game of Eden 第二季 小島篇 第56回「轉世秘密」

阿攝 飾演 阿達
Cfun 飾演 盧綠


編劇及製作 阿攝
音樂 BEAT FRIDAY（All you need, Heatwave, Adjust, Recharge, Stack）
封面設計 Followmelikeblack 

Leave a comment and share your thoughts: https://open.firstory.me/user/ckyhgwclu0xlr08721i22wc7k/comments

Powered by Firstory Hosting

盧綠：（讀白）呢度係...百草園？但點解唔係最高嘅平原？而係淺灘附近摘卡比木嘅草地？嗰棵食人花呢？阿達呢？

「阿達！阿達！你係邊啊！！！？？？」

仲有...我啲手手腳腳呢？點解我望唔到我啲手腳架？

唔通我死咗？

「阿達！阿達！」

*腳步踏上草地聲效

嗰邊有腳步聲，阿達！係咪你啊？

*腳步踏上草地聲效

撥開草叢出現係我面前嘅...唔係阿達...而係一個拎住牽星板嘅5歲小朋友，仲向我呢個方向行過嚟添！

「喂！小朋友！小朋友！你應下我啊！」

但嗰小朋友完全聽唔到我講野...仲穿過咗我嘅「身體」，喺我旁邊嘅草地踎低咗...好聚精會神咁望住一棵花...而嗰棵花...係一棵比蟲蛀緊，就嚟淍㴬嘅牡丹花。呢位小朋友即刻整走啲害蟲，然後小心翼翼咁將棵牡丹喺泥土度起咗出嚟，放落一個盤度。

呢個時候，有另一個男人喺草叢度走咗出嚟，大叫：「仁仔，我地要行啦！」

仁仔？唔通呢個係仁叔？

跟住，我面前嘅景像一下子由百草園返咗去啞鈴洲。呢位叫仁仔嘅小朋友將牡丹花拎咗返嚟觀星閣，仲移植喺觀星閣旁邊嘅草地添。

我再眨一眨眼，呢位仁仔已經由一個5歲小朋友，長大到10歲。而花開花落，牡丹花亦都經歷好多個生命嘅周期，但無阻仁仔呢位花痴嘅熱情。佢依舊好用心咁照料帶嚟嘅牡丹花。

下一個剎那，仁仔去咗凱氏家族嘅村莊，我見到凱安嘅爺爺抱住一個啱啱出世嘅女嬰，仲同大家講：咁多位！呢個就係我個女，依家正值春季開花之期，我為佢取名花，全名凱花！」

10歲嘅仁仔慢慢走去小女嬰度，原本喊緊嘅小女嬰見到拎住一束牡丹花嘅仁仔就停止咗喊，仲慢慢展露笑容添！

眼前景像再轉，仁仔慢慢變成仁哥，而凱花都長大成為一個10歲嘅小女孩。凱花好鐘意黐住仁哥，仁哥亦好耐心咁教佢種花。每當仁哥好認真好專注講解嘅時候，凱花都報以仰慕嘅眼神。

眼前景像再跳，去到150年嘅春天。仁叔同凱花穿上新郎新娘嘅紅抱，喺全村嘅祝福之下結成夫妻。

裘仁：我裘仁對北帝星立誓，我會全心全意愛護凱花，我對你嘅愛就如北帝星嘅光芒一樣！

凱花：（甜笑）即係點啊？

裘仁：即係永恒啊！

估唔到我竟然觀賞到我出世前仁叔仁嬸嘅大婚日子...即係我入咗仁叔嘅記憶世界？

眼前景像一而再，再而三咁轉變，都係仁叔仁嬸嘅生活點滴，主要都係觀星、種花嘅甜蜜溫馨畫面。我仲見到細個嘅自己跑去仁叔屋企同佢地兩個玩添！

直到...175年夏天...仁嬸過身...仁叔喺仁嬸遺體上面放滿佢地一同種植嘅鮮花...

裘仁：你先返去玄武大帝身邊...我會好好守護我地嘅小花園...喺不久嘅將來...我會帶好多束鮮花去搵你。你安心上路啦。

當我以為下一刻係仁叔哀愁嘅畫面，點知我又返到百草園嘅白橡樹旁邊，望到一棵豬籠草係度捕食昆蟲。突然眼前景像一黑！

當再次變返光嘅時候，豬籠草竟然...

*樹木生長聲效

竟然由中間開始裂開...仲破土而出！變成剛才襲擊我同阿達嘅食人花啊！

下一刻畫面再轉，我望到一隻雀仔飛到白橡樹頂，然後慢慢飛到食人花旁邊，跟住食人花就突然合埋花瓣，吞咗隻雀仔！

一望到呢個畫面，我就嚇醒咗！返到原來嘅時空，我瞓咗喺草地上面...仲見到阿達好疑惑咁望住手上面嘅黃紙...

但係...

棵食人花食呢...？

Zip噏劇場 Game of Eden 第二季 小島篇 第55回「裘仁與凱花」

Cfun 飾演 盧綠
小強 飾演 裘仁
李麗蕊 飾演 凱花

編劇及製作 阿攝
音樂 BEAT FRIDAY（Nothing, Almond, Surface）
封面設計 Followmelikeblack 

歌：維納斯的誕生 The Birth of Venus
Composed by Kendy Suen/Duke
Lyrics by Kendy Suen/Chengman
Arranged and Produced by Kendy Suen

Leave a comment and share your thoughts: https://open.firstory.me/user/ckyhgwclu0xlr08721i22wc7k/comments

Powered by Firstory Hosting

地點：封閉區域Area DB Island 監控室

莫十三：（讀白）就喺人工智態K DB Island燒完一張黃紙，我就進入咗一個放滿電視嘅白色空間。呢個可以話係封閉區域Area DB Island 嘅監控室，因為每一部電視都直播住今敏幫盧零創造嘅啞鈴洲每一個角落。我起初以為呢一個封閉區域只係得啞鈴洲一個島，但原來北面仲有其他島嘅存在。而就喺其一個外貌同希臘字母「η」一樣嘅島上面，充滿各式樣嘅植物。喺呢個島最高嘅平原，有一棵好高好高嘅白橡樹，樹旁邊有一棵有兩個人咁高嘅花，鮮紅色嘅花瓣令佢望起嚟既怪異又吸引。而呢個平靜嘅夜晚，被另一個島飛嚟嘅雀仔打破咗。原本停喺白橡樹休息嘅雀仔好似望到呢一朵鮮紅色嘅巨花，所以佢由白橡樹枝慢慢飛向巨花。就喺佢飛近巨花之際，呢朵巨花突然合埋花瓣！吞咗隻雀仔！

乜盧零唔係想呢個啞鈴洲維持現實世界嘅設定架咩？點解會出現呢一種傳說嘅食人花？可惜今敏同K DB Island唔喺我身邊，暫時無人答到我呢個問題...而我轉咗去另一部電視，就見到阿達暈咗喺島嘅另一邊...有一位村民幫佢解毒...直到天光，阿達終於醒...仲同嗰位村民向白橡樹方向出發...阿達...你唔係想同食人花打吓嘛？如果有咩事，我點救你啊？

------------------------------------

*食人花移動聲效

達：（全知狀態）盧綠...依家點算啊？

盧綠：（全知狀態）咩點算啊？梗係走啦！

達：（全知狀態）但係隻雀仔...

盧綠：（全知狀態）呢個時候你仲諗住救佢？

達：（全知狀態）尋晚喺夢入面向我救求嘅應該係呢隻雀仔喎！我無理由唔理佢架！

盧綠：（全知狀態）弱肉強食，大自然係咁架啦！

*飛鞭聲效

達：盧綠！小心啊！

我無用到全知狀態大叫咗呢一句，因為就喺盧綠講完嗰句說話想轉身走嘅時候，食人花其中一條樹枝突然伸長，然後快速衝向盧綠！盧綠一個閃身避開咗食人花嘅樹枝攻擊！但食人花無就咁放過佢，伸長咗樹枝再次飛過盧綠！呢個時候，盧綠拎出收喺背後嘅白橡蛇矛出嚟

*白橡蛇矛聲效

用力一揮！劈開食花人嘅樹枝！

*斬劈樹枝聲效

盧綠：阿達！快啲走啊！

達：哦…知道！

*地裂聲效

達：（讀白）當我想轉身跑走，食人花嘅樹幹竟然破地而出！露咗出地面，仲攔住咗我嘅去路！我一時反應唔切，食人花又再攻擊盧綠啦！

*飛鞭聲效
*擋格聲效

達：盧綠！我哋依家點算啊！

盧綠：我依家唔得閒理你啊！

達：（讀白）食人花唔知點解淨係攻擊盧綠，而盧綠就拼命揮矛迎接食人花樹枝嘅攻擊！

盧綠：人我就打過，花真係第一次！

達：（讀白）食人花飛出嗰兩條樹枝，速度好似兩條鞭咁，盧綠好靈活咁揮動白橡蛇矛擋格樹鞭！佢邊擋邊避，希望逃出樹鞭嘅攻擊範圍！可惜，樹鞭好似識無限伸展咁，無論佢點拉開距離，樹鞭都可以照樣攻擊到佢！不過盧綠無驚，反而越打越起勁，仲笑起上嚟添！

盧綠：你估越長真係越強咩！

達：（讀白）佢一講完，就跳起避開兩條伸到成兩米長嘅樹鞭，然後兩腳踩實佢哋！再用力一個橫斬！斬斷兩條樹鞭！

*斬擊聲效
*魔獸慘叫聲

達：（讀白）唔知係咪我全知狀態嘅錯覺，我好似聽到食人花慘叫！

盧綠：仲望！走啦！

*跑動聲效

達：（讀白）跑唔夠兩步，食人花連花帶動樹幹由左至右向我哋橫掃！

*跌落地聲效

達+盧綠：（痛啊）啊！

達：（讀白）我哋反應唔切，就被食人花掃跌咗！盧綠仲甩手，枝白橡蛇矛飛到好遠！

盧綠：劍！阿達！劍啊！

達：係！

（讀白）我即刻將我背後嘅北斗七星劍拋比佢！

*出鞘聲效

盧綠：阿達，我哋唔諗下辦法，就會死喺呢度架啦！

達：解謎我就識，打人…我唔識架！

*食人花移動聲效

盧綠：總之就諗下辦法啦！

達：（讀白）仲喺全知狀態嘅我，可以睇到食人花同白橡樹嘅顏色…白橡樹只係由墨綠色同灰色點形成，唔似食人花咁有第三隻色，即係白橡樹係普通同正常嘅植物！而佢嘅樹莖好深好長，一直沿住山向下延伸，仲連結住其他植物添！反而食人花嘅樹莖好獨立咁埋係土地入面，即係佢係獨立個體！另外，佢身上嘅紅色點點比較集中喺花位置，係咪代表花就係佢嘅頭呢？

盧綠：佢依家嗰花柱對住我哋，好似同我哋對峙咁！被雄蕊綁住嘅雀仔好似越嚟越虛弱喎！

達：盧綠！你有無信心斬斷花柄？

盧綠：點解係花柄啊？

達：你睇食人花顏色嘅分佈，你唔覺得花係似頭，樹幹似身，攻擊你嘅樹枝似手，莖似腳咩？

盧綠：雖然我唔知你講緊乜，但點都試下啦！不過你就要郁下啦！

達：點郁先？

盧綠：你見唔見到佢嘅樹枝已經回覆得7788，一陣佢向我哋攻擊嘅時候，我哋一齊相反方向跑！

*飛鞭聲效

達：（讀白）我同盧綠背對背，就喺兩條樹鞭就攻擊到我哋嘅時候

盧綠：跑！

達：（讀白）我同盧綠就向相反方向圍住食人花跑！而其中一條樹鞭就追住盧綠，另一條樹鞭追住我！當我同盧綠跑咗一個圈之後

盧綠：繼續跑！

達：（讀白）就係咁，我哋跑咗兩三個圈，樹鞭就追足我哋咁耐！之後

*打結聲效

達：（讀白）兩條樹鞭打咗結，捆埋一齊！唔係好用到力！

*斬擊聲效

達：（讀白）盧綠一個斬擊，斬斷咗兩條樹鞭！然後一個踏步，做出寸刺嘅動作！

*地裂聲效
*硬物擋格聲效

達：（讀白）食人花嘅莖竟然喺地底露咗出嚟！仲擋住盧綠嘅攻！而北斗七星劍插實咗係樹莖度！拔唔到出嚟！

*食人花移動聲效

盧綠：阿達！唔好理我！快啲走啊！

*綑綁聲效

達：（讀白）樹鞭好快咁生返出嚟！然後綑住盧綠，再將佢升起到花瓣嘅位置，好似想食咗佢咁！

盧綠：（少少辛苦辛苦）走啊…阿達…走啊！

達：我…啊！道具！有咩道具珠啱用呢！但得返紙船飛同紙紮人仔，仲有唔知有咩用嘅黃紙！全部都廢嘅！

*食人花移動聲效
*噴放花粉聲效

盧綠：（虛弱）阿達…

達：盧綠！唔好講野！合埋口！食人花向你噴緊花粉啊！

盧綠：（虛弱乾咳）走…（乾咳）走啊…

*落地聲效

達：（讀白）食人花將盧綠放咗落地，盧綠完全無反應好似暈咗咁！跟住食人花嘅樹鞭慢慢向我伸埋嚟！依家點算呢？用紙紮人仔走？

*吹爆道具珠聲效
*紙張散落聲效

達：（讀白）死火！咬錯黃紙嗰個道具珠添！我是旦拎執起一堆黃紙！好似睇殭屍片嘅道士咁…同食人花講 - 你…唔好行埋嚟啊…食人花當然聽唔到我講野啦…兩條樹鞭繼續緩緩向我伸過嚟…就係我身前一米！突然加速！一條衝向我嘅左手，另一條衝向我拎住黃紙嘅右手！

跟住我合埋眼，同時大啊唔好啊！

*激光聲效

當我再開返眼！發現衝向我左手嘅樹鞭被一道激光燒爛咗…而道激光…係喺我左手掌心射出嚟…我再望一望自己隻左手手掌…發現掌心嘅交叉疤痕微微發光…然後樹鞭慢慢分解成微粒…

*分解聲效

但佢無隨風消失同消散，而係被我右手張黃紙吸咗入去！

*吸入聲效

唔駛幾秒！黃紙吸收晒變成粉狀嘅食人花！然後跌咗喺地面…本身被食人花吞咗嘅雀仔亦跌咗喺地面…好彩…佢仲有呼吸…但奇怪嘅係…佢只係由墨綠色同灰色嘅碼所組成…佢只係呢個區域嘅NPC 雀仔…咁喺夢入面叫「救我啊，救我啊」嘅，又係邊個？

我滿頭問號咁執起吸咗食人花嘅黃紙，本身乜都無嘅黃紙，其中一面就變成食人花嘅水墨圖案，至於背面…就寫咗幾行字…

125-130年 牡丹花
130-175年 凱花
175-180年8月31日 豬籠草
180年9月1日 食人花

Zip噏劇場 Game of Eden 第二季 小島篇 第54回「花戰」

彬臣 飾演 莫十三
阿攝 飾演 阿達
Cfun 飾演 盧綠

編劇及製作 阿攝
音樂 BEAT FRIDAY（Stack, Surface, List, Adjust, Bad End, Kaji）
封面設計 Followmelikeblack 

Leave a comment and share your thoughts: https://open.firstory.me/user/ckyhgwclu0xlr08721i22wc7k/comments

Powered by Firstory Hosting

地點：封閉區域Area DB Island，百草園
時間：180年9月15日晚上

*風吹樹葉聲效
*昆蟲叫聲效

盧綠：（讀白）細個嘅時候，我同阿葦仲有婷婷經常都會通山跑，然後會跑到啞鈴洲最高嘅地方，即係觀星閣，同阿雪、阿安一齊睇星星。阿爸話呢個世界係玄武大帝賜比我地，所以無論對一花一草，一樹一木，仲有所有昆蟲、動物，都要有敬意之心，同時對大自然要始於欣賞，終於相忘。

當然，我成為咗村長，得知呢個啞鈴洲嘅真相之後，就知阿爸所講嘅玄武大帝只係虛構嘅神話，但我呢一刻身處百草園，觀察四圍嘅景色，都不得不佩服創造呢個區域嘅造物主嘅偉大。

我抬頭望天，天上嘅北斗七星好閃耀咁發光，旁邊嘅滿月盈亮，映照成個百草園。當我合埋眼，就會聞到各種花草嘅香味，加埋昆蟲包圍住我嘅叫聲，真係好療愈，仿佛將由接任村長開始嘅煩惱一掃而空。我再開返眼，啱啱就有一大片雲遮住咗月亮，百草園好似回復夜晚應有嘅漆黑。誰不知突然有一股溫和嘅風吹過我身邊呢一棵樹，令樹上面嘅昆蟲嚇到飛起。原來佢地係螢火蟲，係飛嘅同時露出發光嘅尾巴，令到百草園嘅原本鮮艷嘅花草添加一種螢光嘅效果，呢一刻嘅美景，真係好想同阿葦仲有婷婷分享...

可惜...依家喺我身邊嘅係呢一位阿達！佢亂咁摘咗野生磨菇都算，仲又聞又舔，搞到中咗菇毒暈咗喺草地上面，然後開始發冷，標冷汗，仲係度自言自語

「你係邊啊？我會嚟救你架！」

重覆咗好幾次之後，開始周身出拳踢腿，好似想同人打架咁。所以，我搵條繩綁住佢嘅手腳，然後搵解毒嘅方法。

佢呢種情況，應該係食咗惡夢磨菇。凡係誤食咗呢種磨菇嘅人輕則會發惡夢，重則會做出傷人傷己嘅夢遊行為。依家阿達應該係屬於重症類別...有咩方法幫佢解毒呢？

*步行草地聲效

盧綠：（讀白）啊，搵到啦！阿雪講過大自然其中一樣奧妙之處，就係佢嘅相生相剋嘅循環。惡夢磨菇生長喺陰暗偏潮濕嘅環境，通常會喺枯木上面發現佢地。惡夢磨菇會分解枯木，轉化成養份比附近嘅植物生長。而有趣嘅係，惡夢磨菇旁邊都會有呢一種叫做「短尾草」嘅小型灌木植物。佢有唔同顏色嘅花，但因為葉型好似動物嘅短尾巴而得名「短尾草」。

我摘咗20塊短尾草，將佢地綁埋一齊，然後燒著佢地。燒著咗嘅短尾草會發出一陣陣香味，而呢種香味可以令人放鬆，抒解焦慮，甚至可以趕走負能量。果然，阿達聞咗一陣短尾草嘅香味之後，就停止咗夢遊嘅行為，開始平靜落嚟。

惡夢磨菇會令人發惡夢，但同時佢分解枯木化成養份比短尾草生長，而短尾草偏偏可以解到惡夢磨菇嘅毒性，呢個就係大自然奧妙嘅億份之一嘅例子。

而當我聽到阿達傳出一陣陣鼻寒聲，我就知道佢已經無事，我可以放心休息啦。
------------------------------------------------------------------------------------------------------------------------

*火燒聲效

達：嘩！好熱！好熱啊！

盧綠：燒咗咁耐，你終於有感覺，終於醒啦咩？

達：你做咩用啲草燒我腳板底啊？

盧綠：太陽曬你唔醒，梗係要用其他方法啦！唔燒你嗰湧泉穴，點幫你增加返啲精氣神，令你快啲有返體力啊！

達：但都唔駛熱到好似要燒熟我隻腳咁架！

盧綠：好啦好啦，聽你把聲知你回復返曬啦。我地可以返上船出發去千獸島啦。

達：等等先...我想去一去白橡樹望一望啊...

盧綠：白橡樹喺百草園最高嘅位置，登山落山至少一日...好影響我地嘅行程架！

達：但我尋晚暈低咗之後...就發現自己出現喺山頂嘅白橡樹旁邊，仲聽到有人叫「救我啊！救我啊！」

盧綠：你尋日食咗惡夢磨菇，所以發惡夢係好正常嘅症狀嚟嘅。

達：但個夢好真架！因為我真係好清楚有人叫救命！

盧綠：我都聽得好清楚，你尋晚發開口夢，係咁話要救人。但呢個島得我同你，邊有人要救呢？你發夢啫，阿達。

達：但個夢真係好真...我仲同棵食人花打境上添！

盧綠：咩啊？食人花？

達：係啊...係白橡樹旁邊，有一棵一個人咁高，花瓣有成張櫈咁大咁闊咁食人花，佢合到實一實，好似含住啲野咁...而把聲就喺花入面傳出嚟....

盧綠：睇嚟你中毒真係好深，我再燒嘅短尾草令你回復精神先！

達：我知係好誇張...但我可唔可以去望一望？

盧綠：我喺啞鈴洲生活咗咁耐，都未聽過有食人花！豬籠草就有。

達：豬籠草？

盧綠：即係捕捉昆蟲為食物嘅植物，同埋佢最多只係得腳咁高，你所指嘅食人花，必定係你幻想出嚟架啫。

達：你當滿足一下我嘅好奇心！比我去望一望啊！

盧綠：阿達，「一下」呢個量詞，好可圈可點。

達：真係一次！之後所有行動都由你話事！

盧綠：一言為定？

達：係！

盧綠：依家係早晨時間，我地腳步快嘅話，希望日落之前上到山。出發！

達：（讀白）前往山頂嘅過程之中，盧綠講咗有關誤食惡夢磨菇嘅事件比我知道。佢話曾經有村民食完之後，話自己可以同動物溝通，亦有村民話夢見離世嘅親人。但由於有村民曾經做出傷害到自己嘅夢遊行為，所以，早幾任村長訂咗規則，禁止大家食用惡夢磨菇。而我再諗返尋晚發嘅夢...真實到...我分唔到嗰個係唔係夢...

盧綠：（少少喘氣）阿達...呢度就係山頂平原，你依家都望到啦...得棵白橡樹咋嘛...喂...你行去邊啊！

達：我印像中，嗰棵食人花喺白橡樹樹幹後面啊！

盧綠：唉...都話咗係夢嚟架囉...

*行草地聲效

盧綠：邊有可能會有食人花啫！

達：殊！！！

盧綠：做咩事...嘩！

達：殊！

盧綠：（讀白）喺白橡樹後面...真係好似阿達夢入面提到...有一棵顏色鮮艷，花瓣合到實一實嘅花出現喺我地面前...但唔同嘅係...棵食人花係有兩個人咁高...呢個時候，阿達對我做出飲水嘅手勢，我即時會意！

*飲水聲效
* 全知狀態聲效

達：（全知狀態）盧綠，你睇唔睇到啊！

盧綠：（全知狀態）咁大棵點會睇唔到啊？

達：（全知狀態）我係指佢嘅顏色啊！

盧綠：（全知狀態）花瓣係鮮紅色嘛！

達：（全知狀態）我意思係全知狀態之後佢嘅顏色啊！

盧綠：（全知狀態）最外面係墨綠色...中間係灰色...最入面係紅色...即係...

達：（全知狀態）其他植物都只係得墨綠色同灰色，佢係最入面嗰層紅色，即係佢同其他植物唔同，佢係有靈魂架！

*食人花移動聲效

盧綠：（全知狀態）阿達...佢係咪郁緊啊...

達：（全知狀態）佢個花頭...好似郁緊過嚟啊！

*食人花快速移動聲效

達：（全知狀態）佢對住我地打開花瓣！花蕊中間...係一隻垂死嘅雀仔啊！

Zip噏劇場 Game of Eden 第二季 小島篇 第53回「食人花」

阿攝 飾演 阿達
Cfun 飾演 盧綠

編劇及製作 阿攝
音樂 BEAT FRIDAY（Night, Recharge, Crates, Nothing, List）
封面設計 Followmelikeblack 


Leave a comment and share your thoughts: https://open.firstory.me/user/ckyhgwclu0xlr08721i22wc7k/comments

Powered by Firstory Hosting

*帆船出海聲效
*海浪聲效

地點：封閉區域Area DB Island，北面海域
時間：180年9月15日早上7時

*金屬支架轉動聲效

達：盧綠啊，點解船頭會有隻用金屬做嘅鐵雀，下面有個十字型啲轉盤，係咁順時針咁轉，呢嚿係咩嚟架？

盧綠：你身處嗰個世界唔係好高科技架咩？連呢樣野都唔知？

達：就係我嗰個世界太高科技，所以唔知你呢啲舊科技係咩嚟囉...

盧綠：我地叫呢隻做測風鳥，外型就模仿啞鈴洲最常見嘅雀鳥整成，下面嘅十字型轉盤就係順住風向去轉，測風鳥嘅鳥頭指向邊一個方向，就知風由邊度吹過嚟。

*吹波膠聲效

盧綠：你呢個銀色圓盒係咩嚟？

達：比你望下啦

盧線：東南西北四個方位，各寫住一個我唔識嘅符號...入面有一枝針，永遠指住一個方向...難度就係指南針？

達：無錯！依家你隻測風鳥個頭指向東北方，即係風由西南方吹過嚟

盧綠：按依家嘅風力，應該4個時辰之後就可以到達百草園

達：我正想問你啦！點解我地唔向東北偏東嘅方向行，直接去千獸島搵第3個島嘅線索，反而要去百草園咁浪費時間呢？

盧綠：因為我需要去百草園採摘藥材

達：仲要採啲咩啊？仁叔已經準備咗一箱藥比你啦喎，又有止血草、葛根湯、行軍散等等，仲唔夠？

盧綠：因為我要採摘更多九節木維迪斯葉同卡比木磨成粉去製作靈魂之粉，咁就可以隨時隨地進入你口中嘅「全知狀態」。

達：依家都無其他村民係度，唔駛再用「全知狀態」溝通啦

盧綠：但我對千獸島仲有其他嘅島完全唔熟悉，以防萬一，有靈魂之水旁身會更安全。

達：好啦好啦...

盧綠：依家太陽咁猛，你都係返入船艙休息一下，差唔多到百草園嘅時候我會通知你。

-----------------------------------

達：（讀白）根據裘雪所畫嘅地圖，百草園距離啞鈴洲大約120公里，呢個百草園嘅外形同北斗七星第7粒星 η係一樣，即係似一個細階n字，而島長70公里，闊50公里，「n」字字頭海拔最高，太約1000米，由上而下，「n」字腳就到水平左右；而裘雪漏夜抄寫嘅百草圖鑑上面，將百草園嘅植物分咗藻類、苔蘚、蕨類、裸子同被子植物，即係無花同開花5大類別，而每一種植物都標明究境係藥用 / 食用定未知用途。食用嘅有小麥、大麥、米等等，喺貼近海拔嘅高度位置生長；飲用嘅就係茶葉類，喺海拔大概600米左右高嘅位置；亦有不同嘅生果、花草嘅特徵同簡介。如果裘雪喺現實世界，一定喺一位不可多得嘅生物學家。

*敲門聲效

盧綠：（門外）阿達，我地到啦

達：係！

*開木門聲效

達：嘩！！！

盧綠：咩事咁大反應？

達：無...頭先睇裘雪嘅資料，雖然知道百草園好大...但估唔到真正出現喺自己面前嘅時候，係會比呢個巨大嘅綠島所吸引！

盧綠：大驚小怪。準備上岸啦！

達：（讀白）盧綠將船泊咗喺百草園100米外嘅海域，佢話因為海唔夠深，駛唔到入百草園嘅沙灘，所以我地要跳落水，然後游上岸。因為潮退嘅關係，水深都唔夠2米，所以半游半浮之下，就好快上到百草園嘅沙灘啦。

*行上沙灘聲效

盧綠：阿達，我依家去採摘卡比木，你喺呢個沙灘度等一等我

達：我可唔可以跟埋一齊去？

盧綠：咁就唔好發呆，快啲跟上嚟啦。

達：（讀白）我跟住盧綠沿著沙灘旁邊嘅小路行上去上面嘅樹林。盧綠就去採摘卡比木，而我...就不斷係咁索！！！

*大力吸氣聲效

達：（讀白）究竟我喺現實世界吸咁新鮮嘅空氣係幾時呢？2203年，末日鐘已經倒數到淨返最後一秒，雖然科學家喺200年前已經開設種子庫實驗室...保存唔同植物嘅種子同基因...但係天氣反常，空氣、土地、水源污染嚴重...好多動植物已經絕種...由於資源短缺，所以各個政府主力種植super food，即係能夠抵抗極端天氣，就算土地貧瘠都可以生長又俱有營養價值嘅農作物...而喺電影或者紀錄片入面出現嘅大形樹林...已經所淨無幾...我只可以喺Game of Eden感受一下咩叫大自然。不過可能Area 15都比較現代化，反而入到嚟封閉區域Area DB Island，好似回到過去咁，切切實實體會森林嘅美，我咁大個仔...好似第一次被咁多樹包圍住...呢種草青味、花香味、流水嘅聲音，如果現實世界都可以有咁嘅環境...就好啦

盧綠：喂，喂！喂！阿達，你做咩望棵樹望到咁入神啊！行啦！

達：哦...係...係嘅

盧綠：九節木維迪斯葉喺島嘅另一邊，我地要快啲行啦，要喺太陽落山之前過到去。

達：吓？要由「n」字嘅左邊腳，去右邊腳？咁我地上船駛過去？

盧綠：嗰邊無淺灘，登唔到岸，要徒步行過去

達：咁咪有排行？？

盧綠：你咁鍾意望住啲樹，望下望下行下行下就到啦！

達：不如我返上船等你啊...?

盧綠：唔可以。

達：哦...

-----------------------------------

達：（讀白）就係咁...我同盧綠沿島嘅山路，由「n」嘅左邊行到徒步行去右邊最邊嘅樹林。一路行，眼前就出現更多未見過嘅植物，仲見到蜜峰、蝴蝶係度採花蜜，但係一隻動物都見唔到...一個無動物，得昆蟲以及植物嘅地方，係一個點嘅生態系統呢？

盧綠：依家入夜啦。我地係度紮營休息一下，聽朝日出嘅時候再起行。

達：行過去又半日，返嚟上返船又半日...真係有排搞...

*生火聲效

達：（讀白）盧綠無理我嘅抱怨，喺附近拎咗啲樹枝生火，再喺火上面用石砌咗一個爐頭，然後喺佢自己嘅袋入面拎咗一個小型嘅鐵鑊出嚟。

盧綠：你餓唔餓？

達：我唔駛食野啦

盧綠：咁我煮自己嗰份啦

達：做咩唔食村民比你嘅乾糧，要自己煮呢？

盧綠：一陣你試一啖咪知囉。

達：（讀白）盧綠喺附近嘅樹度摘咗唔同嘅果實同植物，再去殼清洗之後，就喺鐵獲上面加水，再煲煮

*煮湯聲效

盧綠：雖然只係得栗子、淮山同其他果實，無粟米、蘿蔔，但呢個野生素湯味道都唔錯架！

*飲湯聲效

盧綠：可惜無帶鹽，差少少咸味。阿達，你真係唔試下？

達：好啦，飲一啖啦。

*飲湯聲效

達：（讀白）由於Game of Eden係連接大腦腦電波嘅遊戲，所以理論上可以刺激大腦唔同區域，產生唔同官感嘅感覺。而我一飲盧綠煲嘅呢碗素湯，好似感受到一股暖流由我嘅口流入肚入面。雖然我知道我喺現實世界只係瞓喺莫十三病房張床度，駁住Game of Eden啲儀器，呢股暖流係大腦產生嘅感覺，但都真係搞到我真係有少少肚餓...

盧綠：點啊，唔錯呢？

達：幾好幾好。不過味道可以再豐富多少少。你等我一等！

盧綠：你去邊啊？

達：我印像中裘雪嗰本百草圖鑑有一個篇章係菌類，佢話有一隻菇味道幾好架，好似就係呢款啦！

盧綠：阿達，你唔好亂摘呢度嘅菇啊！

*摘菇聲效
*聞菇聲效

達：呢個菇幾香喎！瀨落去仲有啲好特別嘅味，如果加入去湯度一齊煮…可能…或者會…幾…好味…添…

*跌倒聲效

盧綠：阿達！

Zip噏劇場 Game of Eden 第二季 小島篇 第52回「百草園」

阿攝 飾演 阿達
Cfun 飾演 盧綠
Maggie 客串飾演 迷之聲音

編劇及製作 阿攝
音樂 BEAT FRIDAY（Atoms,Camel,Soothes,Distance,Crates,Nothing）
封面設計 Followmelikeblack 

達：呢度係…邊度嚟架？盧綠呢？呢一棵…咪係白橡樹？我係百草園最海拔最高嘅地方！但更奇怪嘅係呢一棵高50米嘅白橡樹嘅附近只有一棵一個人咁高嘅花，鮮紅色嘅花瓣合到實一實，尺寸有成張櫈咁大咁闊，好似就嚟會結果咁。我慢慢行近呢棵怪花，仲隱約聽到有一把聲係花入面傳出嚟…

迷之聲音：救我啊…救我啊…

（TBC）


Leave a comment and share your thoughts: https://open.firstory.me/user/ckyhgwclu0xlr08721i22wc7k/comments

Powered by Firstory Hosting