Украина Улуу Британиядан Орусиянын камакка алынган активдеринен түшкөн каражаттын эсебинен алгачкы 752 млн фунт же 969 млн доллар каражат алды. Бул тууралуу Украинанын премьер-министр Денис Шмыгал билдирди. Анын айтымында, каражат өлкөнүн коргонуусун бекемдөөгө жумшалат.

Москванын четиндеги Щёлково шаарында бала сатып алууга шектелип кармалган төрт кишинин экөө кыргызстандык жубайлар экени кабарланды. Орус полициясынын маалыматына караганда, шектүү катары жубайлар, баланы төрөгөн түркмөнстандык келин жана акушер-гинеколог кармалган.

Президент Садыр Жапаров Кыргызстан менен Тажикстандын чек арасын тактоо келишимдери тууралуу “Кабар” улуттук маалымат агенттигине интервью берди.

6-мартта жарыяланган маекте эки өлкөнүн чек ара маселеси түбөлүк чечилип жатканын айтып, Жогорку Кеңештин депутаты Султанбай Айжигитовдун кыргыз-тажик чек арасы боюнча макулдашууга байланыштуу парламенттеги сүйлөгөн сөзүнө комментарий берди.

Баткенде 4-мартта Достук айылынын тургундары менен курулуш, архитектура жана турак жай-коммуналдык чарба министри Нурдан Орунтаев, жергиликтүү бийлик өкүлдөрү жолукту. Айылдыктарга же толугу менен акчалай кенемте төлөнүп, алар каалаган аймактан үй алып чыгып кете алышат, же Баткен шаар четине план менен айыл кайра курулат, же, каалашса, мурдагы жашаган жерине жакын Кызыл-Бел айылынын четине кайрадан типтүү айыл курулат.

Кыргызстанда соңку жылдары жолбун иттер көбөйүүдө. Адистер жолбундар жергиликтүү фаунага коркунуч туудурганы аз келгенсип, жугуштуу ылаңдын да таратуучусу болуп жатканын айтып келишет. Расмий органдар жолбундар маселесин атуу жолу менен чечкенге аракет кылышууда. Зооактивисттер мындай күрөшкө каршы чыгып, жаныбарларды өлтүрүү ордуна тукумсуздандыруу көбүрөөк пайда берерин белгилешет. “Жер Эне” подкастында бүгүн жолбун иттерге байланыштуу маселеге токтолобуз.

Энергетика министрлиги 20-февралда Токтогул гидроэлектрстанциясындагы (ГЭС) №3 гидроагрегат реконструкцияга берилип, 300 мВт кубаттуулук азайганын кабарлады. 10-мартта Үч-Коргон ГЭСинин да бир гидроагрегаты реконструкцияга берилсе дагы 45 мВт кыскарарын билдирип, элди электр энергиясын үнөмдөөгө чакырды.

Министрликтин маалыматына ылайык, реконструкция иштери аяктагандан кийин Токтогул ГЭСинин кубаттуулугу дагы 60 МВтка көбөйөт.

Бул таңкы берүү Бишкек убакыты боюнча саат 08:00ден 09:00га чейин обого чыгарылат.

Кыргызстанда соңку учурда дары-дармек тартыштыгы байкалып жатканы айтыла баштады. Айрым бейтаптар керектүү дарылар табылбай, табылса да кымбат болуп жатканын билдирүүдө.

Дары-дармекке байланыштуу маселе парламентте дагы бир канча жолу көтөрүлдү.

Израил Газага багытталган гуманитардык жүктү кое бербей жатат. Ага чейин премьер Биньямин Нетаньяхунун кеңсеси АКШ жана Еврошаркетте террордук деп таанылган ХАМАС радикал тобу убактылуу жарашууну алты жумага узартууга көнбөй койгонун билдирген.