101 Reykjavík er jólamynd, samkvæmt víðri skilgreiningu stjórnenda, og er því til umfjöllunar í hátíðaþætti Bíó Tvíó. Fyrsta kvikmynd Baltasars Kormáks fjallar um hinn ósympatíska Hlyn, sem lendir í ástarþríhyrningi með móður sinni. Er Hlynur hin raunverulega söguhetja? Stenst þessi svipmynd af aldamótadjamminu í borg óttans tímans tönn? Og hver er saga Ingvars Þórðarsonar, framleiðanda myndarinnar og meðeiganda Kaffibarsins?Allt þetta og meira í Bíó Tvíó!

Þrátt fyrir að vera ein helsta heimildin um Ástarfleyið og Ace of Base tekst stjórnendum Bíó Tvíó stundum að tala um íslenskar kvikmyndir. Þessa vikuna er kvikmyndin Jóhannes með Ladda í aðalhlutverki til umfjöllunar. Hversu mikið er hægt að perrast yfir Unni Birnu? Hvaða eiturlyf eru notuð í myndinni? Og hver getur óttast mann sem kallar sig Hnotubrjótinn?

Bíó Tvíó fjallar um alvöru stöff þessa vikuna, Óskarsverðlaunakandídatinn sjálfan, Börn náttúrunnar frá 1991. Töfraraunveruleiki um aldraða Íslendinga í baráttu um að endurheimta sjálfstæði sitt og snúa til æskustöðvanna. Greiða landvættirnar sjálfar þeim leið? Eru lögreglumennirnir í myndinni fullkomlega vanhæfir? Og hver eru tengsl myndarinnar við dularfulla persónu þýska stórleikarans Bruno Ganz?

Bíó Tvíó snýr aftur! Í þætti vikunnar fjalla Andrea og Steindór um spennumyndina Foxtrot frá 1988. Bræðurnir á hvíta tjaldinu, Valdimar Flygenring (kapteinninn á Ástarfleyinu) og unglingastjarnan Steinarr Ólafsson, eru ekki berir að baki, en munu þeir berjast? Hver er norski Íslandsvinurinn Jan Bang? Er kindin steindauð?

Búið ykkur undir Bíó Tvíó, vikulegt hlaðvarp um íslenskar kvikmyndir á Alvarpinu! Í fyrsta þætti fjalla Andrea og Steindór um kvikmynd Baltasars Kormáks frá 2008, Brúðgumann. Jón Jónsson giftir sig á ný eftir að fyrri konan missti vitið. Mun hann guggna? Sá Þröstur Leó túristabóluna fyrir? Er Flatey ein af aðalpersónum myndarinnar? Allt þetta og meira í Bíó Tvíó!