Kabhi dakhl na dena “sahil” manzilen hain sab ki apni

Qaafiley bhi  apne apne raahen hain sab ki apni

Kya aisey bhi log hain zindagi men jo usi se na miley hon

Yeh  intekhaab bhi apna apna mulaqaten hain sab ki apni

Mahtaab ko takta hai koi, koi akhtar shumaari men masroof

Koi khwabon  ki justaju men mahv, raaten hain sab ki apni

Veeranon ka dost hai koi, baharon ka haamil koi

Nazariye sab ke apne  apne, nigahen hain sab ki apni

Mohabaten hain apni apni, nafraten bhi apni,

Humsafar sab ke apne  apne, qurbaten hain sab ki apni

Dars na dena kisi ko shaair, jee le hayaat tu apni

Ek jaisa nahin hai  koi, baaten hain sab ki apni

Haathon men hai qalam tere, kora kaaghaz bhi

“Sahil”, kahani teri  apni, daastaanen hain sab ki apni

Noticee : All material in this product is the intellectual property of Ashok Sawhny and cannot be used in any way without the written

             permission of the author Ashok Sawhny. Having said that, the author is always open to proposals and can be contacted

              via www.ashoksawhny.com

Ajab hai jahan yeh kitna bharey kahin aah koi

Shaikh, kor chashm nahin hai koi tere raaj men maana

Per, yeh bhi to bata kya hai kahin raushan raah koi

Vaaiz, takta hai tu falak ke paar, haath uthaye huay

Maalum hai to bata hamen us baargaah ki raah koi

Ujad gaya veeraan hua jab koocha o baazaar apna

Ab karey koi jidhar woh chaahe gulshan tabaah koi

Aate to hain ayadat karne, dost yaar zuroor

Chashm tar to sab, per kidhar hai khair khwah koi

Jeetey jee sunte hain aafreen aafareen bahot

Baad e marg dikhlaaye hamen lehraati hui waah koi

Kehte hain “sahil” ko nahin shayr goi ka shaoor

Magar, laaye to sahi is daawe ka kabhi gawaah koi

Notice : All material in this product is the intellectual property of Ashok Sawhny and cannot be used in any way without the written

            permission of the author Ashok Sawhny. Having said that, the author is always open to proposals and can be contacted

            via www.ashoksawhny.com

Humnawayi ki marham hi bahot kaafi hai

Saath chalna qadam ba qadam hi bahot kaafi hai

Mahrumiyon ka zikr kyon, yaan kaun tanha nahin hai

Na sahi hujum, yaad e humdum hi bahot kaafi hai

Kya bharosa tishnagi ka jaam e jam kaafi na ho

Jo giri falak se vaaiz, woh shabnam hi bahot kaafi hai

Behr e bekaraan ka kya, Shaikh tere sumundur ka kya

Pyaas bujhaane ke liye, aab e zamzam hi bahot kaafi hai

Yaro, hangaame kis liye, chhatiyaan kyon peet te ho

Tahammul zururi hai, num chashm hi bahot kaafi hai

Aaye jo ranj o alam aaye, seh lenge hum sitam saarey

Hum ne kab kaha thoda sa gham hi bahot kaafi hai

Har dum na jiyoge to nuqsaan tumhara hi hoga

Zeest hai har dum men zinda, ek dum hi bahot kaafi hai

Bheed yahan kis baat ki, kya bikta hai is baazaar men

 “Sahil”, mere liye ek khuda, ek sanam hi bahot kaafi hai

Dil naazuk hai bahot jab ghabraye tab ghabraye

Aur tabassum bijliyaan jab giraye tab giraaye

Tere rukh se nazar hatey to chaand ko dekhun, jaanam

Falak men taaron ki baari jab aaye tab aaye

Neend se kya shikayaten, palkon se kya giley

Meri khuftagi mujhe jab sulaaye tab sulaaye

Yaaron se kya kahun maazerat karun main kya

Muamla waqt ka hai, woh jab milwaaye tab milwaaye

Umeed ka kya bharosa haqeeqat to hai nahin

Khwaabon me chaahe woh jab jhulaaye tab jhulaaye

Raabata chaman men to baghbaan ka sab se, per

Baat tabassum ki, to gul jab muskuraye tab muskuraye

Duniya bhi to ek circus hi hai, ringmaster kahin joker

Hum to hanste rahenge dosto yeh jab rulaye tab rulaye

Zindagi se to main bahot khush hun ‘sahil’, har haal

Dekh lenge maut ko bhi, woh jab aaye tab aaye

Notice : All material in this product is the intellectual property of Ashok Sawhny and cannot be used in any way without the written

            permission of the author Ashok Sawhny. Having said that, the author is always open to proposals and can be contacted

            via www.ashoksawhny.com 

Hairatzada hun yaro zamaane dekh kar

Notice : All material in this product is the intellectual property of Ashok Sawhny and cannot be used in any way without the written

            permission of the author Ashok Sawhny. Having said that, The author is always open to proposals and can be contacted

            via www.ashoksawhny.com

’Sahil’ roz e jazaa ki baat kya jab roz hi qayamat hai

Aafat hai ke yahan sab ko tujh se hi mohabat hai

Ghuroor itna bhi achha nahin samajh le shaair yeh baat

Aahang dil ki sun le tu, khud sataaish to musibat hai

Khazan men kya mehakte gul, phool na kehlayenge

Khaar ho paasbaan to kya, un ki phir bhi nikahat hai

Kaash, bhool jaaun khud ko main chaman ke kisi goshe men

Muqaddar aisa naseeb kisey, kaho kisey itni faraghat hai

Manind e darya hai waqt bhi ravaani un ki dekhiye

Kitna waqt miley kisey yeh to us ki qismat hai

Imaan kaise pukhtah ho jab insan khud hi faani hai

Vaaiz, kya isi liye daanvandol itni is ki fitrat hai

Chaah bhi shai hai nadaan kaisi dil to kabhi bharey nahin

Le doobegi bande tujhe yeh deewaani itni hasrat hai

Mubalgha sab ki aadat hai, tabiyat isey maaniye

Mah jabeen to keh diya, per kis ki aisi surat hai

Jidhar dekhiye toofan dekhiye ghaarat ka hi raaj hai

Jab Insaniyat hi haari baithi hai, to kaho kis ki nusrat hai

Faramosh hai kitna insan aaj khud khuda ban baitha hai

Bhoola hai kyon bande tu zindagi usi ki nemat hai

Sun kar khutba aaj hum mutafiq to huay zurur

Labon per lafz khuda hi rahey, wohi kul ibadat hai

Sar jhukey kat te nahin, bas khuzu ho qaba teri

Sar jhuka kar chal “sahil’, usi men teri farhat hai

Notice : All material in this product is the intellectual property of Ashok Sawhny and cannot be used in any way without the written

             permission of the author Ashok Sawhny. Having said that,  the author is always open to proposals and can be contacted

            via www.ashoksawhny.com

Subh shaam saazgaar ho mausam yeh zururi to nahin

Har ja ho dair o haram yeh zururi to nahin

Riza Rab ki hai dosto salaam usey kijiye 

Har marz ka ho marham yeh zururi to nahin

Har aah men ho soz o dard yeh zururi hai magar 

Har dua per uska ho karam yeh zururi to nahin

Rakho ana ko qaabu firasat isi men hai, dosto 

Main nahin har ja ho hum yeh zururi to nahin

Raushan rahen umeeden dil men musalsal, lekin 

Khuda sab ka ho sanam yeh zururi to nahi

Maana ke ‘sahil’ hai sahib e imaan, magar 

Kaafir se mazeed ho dum yeh zururi to nahin

Saazgaar. Pleasing

Dair o haram. Places of worship

Firasat. Wisdom

Musalsal. Constantly

Sahib e imaan. Believer

Mazeed. Zyada

Pal men tola pal men maasha

Ajab hai yeh insan ajab iska tamasha

Jo aaj hai pur umeed musalsal

Kyon kal usey hai musalsal nirasha

Tishnagi teri ko hua kya aisa

Lab e darya kyon baitha hai tu pyaasa

Aab e hayaat hai is darya ka paani

Raahi, junoon kaisa yeh kaisa nasha

Barhainagi ka yeh hai saara tamasha

Paidaaish se le kar na muraad budhaapa

Qaba hi sambhaalte sambhaalte, vaaiz

Guzra hai waqt, hai hangama yeh kaisa

Le jaati hai qaza libaas hi to ‘sahil’

Jism milta hai khaak se, rooh ka kisey pata

Musalsal. Lagataar

Tishnagi. Pyaas

Lab e darya. Darya kinaarey

Aab e hayaat. Elixir

Barhainagi. Nudity

Qaba. Garment

Vaaiz. Preacher

Qaza. Maut

Libaas. Garment

Dil aa gaya ho jis per aaraam usi ke hain

Sultan ho ya majnoon ghulaam usi ke hain

Naseem kaho ya saba ya simoom usey koi

Jo chaley chaley magar paighaam usi ke hain

Dekh kar saudayi ko boli hans kar chameli aaj

Gulaab ho ya saman koi sab naam usi ke hain

Gol hai duniya sunte they yeh sab se aaj talak

Dekha phir hairatzada hum sar e baam usi ke hain

Daaman ke daagh dhulte nahin ilzaam usi ke hain

Mudayi o munsif wohi sang e dushnaam usi ke hain

Hoti nahin hai manzil junoon e ulfat ki koi

Jidhar dekhiye ‘sahil’ ji gaam usi ke hain

Naseem saba. Gentle breezes

Simoom. Garam hawa

Saudayi. Besotted

Saman. Jasmine

Sar e baam. Rooftops

Mudayi. Accuser

Munsif. Judge

Sang e dushnaam stone of accusation

Gaam. Qadam

Notice : All material in this product is the intellectual property of Ashok Sawhny and cannot be used in any way without the written

            permission of the author Ashok Sawhny. Having said that, the author is always open to proposals and can be contacted

             via www.ashoksawhny.com

Baraste nahin hain baadal angaaron ko dekh kar 

Milti nahin hain manzilen rahguzaron ko dekh kar

Hunar chahiye sayi chahiye mehnat o mushaqat bhi 

Mahal nahin bante hain kabhi patharon ko dekh kar

Mustaqil nahin hai kuchh bhi baqa bhi to nahin 

Khazaan se faramosh na hona baharon ko dekh kar

Murjhaate gul se puchhiye baharon ke baarey men 

Aati hai taskeen kashti ko kinaron ko dekh kar

Mat dikha ai vaaiz Tu khuld ke nazaarey hamen 

Kab bhara hai dil kisi ka nazaaron ko dekh kar

Kahan gayin woh tasveeren kidhar woh zamaane aaj 

Jawab nahin milte bande deewaron ko dekh kar

Gar bulandiyan hain shauq tera to kuchh kar ke dikha

 ‘Sahil’, azamaton ke khwaab na bun sitaron ko dekh kar

Rahguzaron raaste

Sayi effort. Koshish

Baqa. Immortality. Eternity

Faramosh. Oblivious

Taskeen. Sukoon. Chain

Khuld. Jannat

Azamaton. Heights

Notice : All material in this product is the intellectual property of Ashok Sawhny and cannot be used in any way without the written

           permission of the author Ashok Sawhny. Having said that, the author is always open to proposals and can be contacted

            via www.ashoksawhny.com