De Döschkassen

De Döschkassen

Download on the App Store

All De Döschkassen episodes

  • Corona un de Vörhöll
    So, nu is dat sowiet. Siet güstern mutt man in Bus un in de Iesenbohn keen Maske mehr opsetten.
    De Gefohr is vörbi – seggt man. Na jo, wenn Experten sowat seggt, denn stimmt dat ook. Besüüners, wenn düütsche Experten sowat seggt. 2007 to’n Bispeel, dor hett Joseph Ratzinger, de düütsche Papst Benedikt, de Vörhöll dichtmokt. De hett he eenfach afschafft.
    De Lüüd in Vatikan weern sülms ni so ganz övertüücht dorvun, wat dat de Vörhöll, to de man ook Limbus seggt hett, överhaupt geev.
    Overs to Seekerheit hebbt se ehr afschafft. Wat ganz bestimmt wech is, mit Stempel un Siegel un Vörgangsnummer, dat mokt ook keen Arger mehr.
    Tscha, un Corona mokt nu ook keen Arger mehr. Dat is je wunnerbor. Man kann seggen, de Gefohr dör Corona is afschafft worrn. Dat hett man so besloten. Un dorüm mutt man nu ook in Bus un Bohn keen Maske mehr opsetten.
    Dat bringt overs wat anners mit sick. Nu markt man no meist dree Johr weller, wo de Lüüd eegentli rüüken doht un wo se in Würklichkeit utseht. Dor mutt man för schwärm‘.
    Kann angohn, dat nu weller mehr Lüüd vun Bus un Bohn op dat eegene Auto ümstiegt oder leever to Foot löppt, weil se dat ganze Elend ni mehr rüüken un ook ni mehr mit ansehn mögt.
    Na jo, man „dörft“ de Maske je afsetten, man „mutt“ dat ni. Man kunn sick je dorop eenigen, dat man sick de Dingers gegensiedi to’n Gefalln wieder opsett – so mehr ut kosmetische Grünnen meen ick.
    Overs, ick glööv, dat ward nix.
    Dorüm mööt wi uns bilütten dorüm kümmern, wat mit all de Masken passeern schall de noch in de Regole oder bi uns in de Schappen liggt.
    Veellicht kann man dor je Bikinis ut moken oder Knee-Schoners för de Arbeid in Goorn. Och, irgendwat ward uns al infalln.
    Richti ümdinken mööt nu overs all de, de sünst jedeneen, de mol kort ’n schluck drinken wull, angnegelt hebbt: „Maske op!“ Overs ook de ward wat anners to’n Gnegeln finnen. Op’t Letzt‘ künnt se sick je vör de Vörhöll stelln un fordern, dat se weller opmokt ward…
    In düssen Sinn
    3 min
  • Is Pistorius würkli Pistorius?
    Vörigen Sünndag is bi Christine Lambrecht in ehr Stuuv in Berlin Füüer utbroken. Dor hett ’n Adventskranz brennt. Nu weet ick ni, wat se den Kranz een Monot to lot oder ölben Monot‘ to fröh ansteekt hett. Is ook annerlei.
    Wichti is, dat se den Brand al sülms löscht harr, as de Füüerwehr mit 40 Lüüd anrückt is.
    Kiek an: Se kann je doch verteidigen. Dat se dat wiest hett, keem overs leider ’n beten to lot för ehr.
    Intwüschen is Boris Pistorius Verteidigungsminister, den sien Noom Annalena Baerbock un mennige annere vun ehr Kollegen noch ni so recht utsnacken künnt.
    Nu geistert in’t Internet overs Mellungen rüm, no de mennige Privotlüüd meent, dat Boris Pistorius in Würklichkeit Armin Laschet is, de ünner annern Noon nochmol versöcht, sick op de Regeerungsbank to schummeln.
    Un tatsächli süht Laschet un de niede Chef vun‘ Bendlerblock sick tehmli ähnli. Dorbi seggt Olaf Scholz je overs, dat Pistorius ’n Fründ vun em is. An un vör sick mutt Scholz denn je ook weeten, wo sien Fründ utsehn deiht. Op de anner Sied, vergitt de Bunneskanzler je bilütten mol wichtige Sooken.
    Tscha. Wat schall man dorvun holn? In’t Nett ward jedenfalls de Froog stellt: „Hebbt ju Boris Pistorius un Armin Laschet al mol tosom sehn?“
    Doröver keem mi ’n ganz annern Gedanken: Veellicht is Pistorius je in Würklichkeit Günter Wallraff, de sick blots as Verteidigungsminister verkleed‘ hett, üm ’n niede Enthüllungs-Story to dreihn. Pistorius un Wallraff heff ick nömli ook noch nie tosom‘ sehn. Dat kunn overs ook angohn, dat Olaf Scholz in Würklichkeit Günter Wallraff is, denn tominst, wat de Frisuur angeiht, hebbt de beiden ook Gemeensomkeiten.
    Mi is dat annerlei. Wenn de Arbeid anstänni löppt, dörft ook Wallraff Kanzler oder Verteidigungsminister ween. Wiss ist dat overs allns blots Bleudsinn. De Laschet-Geschicht ut‘ Internet un ook de Wallraff-Theorie. Denn Verteidigungsminister to warrn, dat wurrn sick wohrschienli beide ni friewilli andohn...
    In düssen Sinn
    3 min
  • Över Overglooven
    Hebbt Ju hüüt al mol op’n Kalenner keeken? Nä? Na jo, wi hebbt Friedag. Un wi hebbt den 13. Januar. Friedag de 13., glieks in Januar.
    Dat fangt je good an, kunn man seggen. No dat verdreihte Johr 2022 hebbt wi nu al in ersten Monot so’n Unglüksdag. Tominst, wenn man den Overglooven nohangt un doran glöövt, dat düt un dat Unglück bringt.
    Mennige Historikers meent je, dat de ganze Sook mit Friedag den 13. mit de Tempelritters tosomhangt. In’t Johr 1307 hett de Französche König Philipp IV sien Truppen losschickt, üm de Templers all ehr Gold un Geld wechtonehm‘. Philipp wull den Mammon nömli sülms hebben.
    Annere seggt, dat de Lüüd al veel länger dinkt, dat Friedag ’n Unglücksdag is un de 13 ’n Unglückstohl. Tosom schall dat sick denn richti slimm op dat Glück utwürken. Tscha. De Lüüd snackt veel, wenn de Dag lang is.
    Ick persönli heff dat je ni so dull mit den Overglooven. In mien Leven heff ick nömli al ’n ganzen Barg Dörteihnste belevt, de op’n Friedag fulln sünd. Un siet ick op de Welt bün, heff ick wiss al mehr as teihn Speegels tweismeeten. Ook Paraplüs, also Regenschirms, heff ick al ’n Barg in’t Huus opspannt un Schoh heff ick noch un nöcher op’n Disch stellt. Dat schall je allns Unglück bringen.
    Dorto kümmt all de swatten Katten, de mi över’n Weg loopen sünd. Dree swatte Katten heff ick je sülms hatt. Ick weet gor ni, vun wülke Sied de Tigers komen mööt, dormit se Unglück bringen schüllt.
    Nu will ick ni seggen, dat ick noch nie Pech hatt heff. Overs all dat keem an un för sick ni vör, wenn kort vörher wat mit Schoh op’n Disch, Paraplüs in’t Huus oder swatte Katten passeert is, oder wenn even mol weller Friedag de 13. ween is.
    Blangbi: Friedag den 13. kann dat heuchstens dreemol in’t Johr geeven. Düssed Johr hebbt wi dat overs blots tweemol. Eenmol hüüt un eenmol in Oktober. Dat is je noch ’n beten hen. Overs sülms wenn wi in düt Johr 13 mol Friedag den 13. harrn, wurr mi dat ni nervös moken.
    Un dorüm wünsch ick Jüm un mi sülms besünners veel Glück – hüüt un ook för’n Rest vun’t Johr...
    In düssen Sinn
    3 min
  • Frohed nieded Johr!
    Jo, dat wünsch ick Jüm. Mit Gesundheit un allns, wat dor sünst noch so toheuert.
    För Katholiken is dat Johr overs ni so scheun anfungen. Papst Benedikt de 16. hett för ümmer sien Hoot nohm.
    Nu gifft dat also keen düüschen Papst mehr is‘ Vatikan. Denn ook, wenn he ni mehr in Deenst weer, Papst hett he je noch heeten.
    Un weet Ju noch, wo dat mit em anfungen hett? An 20. April 2005 stunn de Johrhunnert-Överschrift in de Zeidung mit de veer grooten Bookstoben: „Wir sind Papst“.
    As wenn de Natschonolmannschop ünner ehrn Kaptein Joseph Ratzinger de Meisterschop wunnen harr. Wunnerbor.
    Nu weer Ratzinger overs ni half so extroverteert as de Football-Legende Olli Kahn to’n Bispeel. Dat weer wat ween, Olli Kahn as Papst. De harr den Ostergottesdeenst ganz scheun in Schwung bröcht. De harr dor wohrschienli grölt, dat de Putz vun‘ Petersdom rieselt weer.
    Overs dat is natüürli dumm‘ Tüch. Joseph Ratzinger weer ’n ganz Liesen. Man hett meist den Fernehn luuder dreihn musst, wenn he op de Kanzel stunn un sick wat in Boart nuschelt hett. Na jo. De een is so, de anner anners.
    Menniged, wat man vun em gern heuert harr, hett Papst Benedetto overs ni utsprooken.
    Dorüm mutt de Vatikan sick ook wiederhen üm ole un unscheune Buusteeden in sien eegen‘ Stall kümmern. Dat ward sick wohrschienli ook noch lang hentrecken.
    Overs dormit sick sülms Probleem‘ to moken, kinnt sick je ook anner Lüüd recht good ut. Christine Lambrecht to’n Bispeel. Tscha, Düütschland un sien Verteidigungsministerium – dat is ’n Geschicht för sick.
    In Oogenblick hebbt wi je dor je de drütte Fruu in’t Amt. Jüst doröver sünd mennige an Quarken. Dorbi hebbt veele Mannslüüd, de vörher op den Posten weern, dat ook ni beter trech kreegen.
    Veellicht schull man eenfach mol een op de Stohl setten, de sülms mol bi de Bunneswehr ween is.
    Op’t Letzt‘ kann man nömli ook ni Lehrer warrn, wenn man sülms ni no School gohn is…
    In düssen Sinn
    3 min
  • Kuum to glööven
    Lüüd, wat weer dat blots för’n Johr? Harr mi vör fief Johr een vertellt, wo 2022 utsehn ward, denn harr ick em seggt, wat he sick mol ünnersööken loten schall. He harr je, dat de Greun‘ den Wirtschopsminister stellt, de gliektiedig för den Klimaschutz verantwoordli is. Un düsse greune Minister sorgt dorför, dat de Atomkraftwerke länger löppt un he besorgt Gas ut Katar.
    Gegen sowat hebbt de Greun‘ fröher mol demonstreert, dor wulln se noch Windkraft un Solar no vörn bring‘.
    De Kanzler heet ni mehr Merkel, sünnern no dat 16 Johr CDU an Chefsessel stohn hett, kümmt he vun de SPD. Dormit hebbt de SPD un de Greun‘ doch 1998 al mol Pech hatt, ook wenn dormols de FDP noch ni mit in’t Boot seeten hett.
    Dormols sünd se ook no 16 Johr CDU-Kanzlerschop an de Regeerung kom‘. Un so tehmli dat erste, worüm se sick kümmern musst hebbt, dat weer de Krieg op’n Balkan.
    Nu harrn se kort no de Regeerungsbillung weller mit Krieg to dohn. Se hebbt doröver entscheeden musst, wat se Militärutrüstung no de Ukraine hen schickt. Dor hebbt se je noch hoopt, wat sick dat gau weller inrenken wurr. Dat weer doch so praktisch mit dat Gas ut Russland.
    Dorüm hett de Verteidigungsministerin keen Waffen, sünnern erstmol 500 Helme no Kiew schickt. Äh, jo. Wüllt wi blots hopen, dat se nu vun de 100 Milliarden Euro, mit de uns‘ Militär intwüschen oprüst‘ warrn schall, ni twee Milliarden Helme köfft.
    Vun Freeden snackt in Oogenblick jedenfalls keeneen mehr. Un in‘ Kosovo knistert dat ook al weller, jüst so as mang China un Taiwan un an veele annere Steeden op de Welt.
    Tscha un denn all dat mit de Pandemie. Dor hett vör fief Johr ook noch keeneen wat vun ohnt.
    Nu hett Chrischan Drosten overs as Moses vun‘ Barg Sinai verkünnd, wat de Pandemie vörbi is. Mol sehn, wat dat noch allns an Larm no sick treckt.
    Nä. Vör fief Johr harr ick wiss ni glöövt, dat 2022 so utsehn wurr.
    Wüllt wi hoopen, wat sick op de Welt in’t näste Johr tominst weller ’n beten mehr de gesunne Minschenverstand dörsett. Un dormit wünsch ick Jüm nu all ’n gooden Rutsch.
    In düssen Sinn
    3 min
  • Bunted Licht un Cholesterin
    Wiehnachen 2019 – dat weer ’n ganz normoled Wiehnachen: Veele Lüüd weern trech mit Jack un Büx – no dat op’n letzten Drücker noch de Geschinke besorgt un inwickelt worrn sünd, gung dat dorüm to plon‘ bi wülken Deel vun de Verwandschop man an wülken Dag in de Stuuv sitt.
    Un an jede Statschoon wurr man mit Eeten stoppt as’n Wiehnachsgoos – mitünner sogor mit Wiehnachsgöös.
    Liekers kreeg se tominst mi denn overs doch tofot‘: De Besinnlichkeit. Sick an den Glanz un de bunten Lichter freun, mol över sick sülms un de Minschen üm sick rüm nodinken, Dankbor ween, över dat, wat dor is.
    Heiligobend 2020 weer al Corona. Oma un Opa besööken schull man ni. Överhaupt schull man an leevsten to Huus blieven. Een Johr wieder, also 2021 weer dat jüst so.
    Intwüschen weern al ’n Barg Fründschopen toschann gohn, de al siet ’n halved Johrhunnert oder länger bestohn hebbt. Blots weil de een‘ an Corona un Impen glöövt hebbt un de annern ni.
    Denn keem de Krieg in de Ukraine. Weller hett sick de Sellschop opdeelt, in de, de för düt un dat weern un de Gegners. Noch mehr Fründschopen un ganze Famieljen gungen doröver in Dutt. Un dorto all de Biller in’t Fernsehn vun dat Elend, dat de Krieg mit sick bringt. Annerletzt op’n Wiehnachsmart heff ick sogor dacht: „Dörf ick nu överhaupt wiehnachliche Geföhle hebben? Dörf ick mi freun? Dörf ick dat scheun finnen, wenn ’n lütted Kind den Wiehnachsmann ’n Gedicht opseggt?
    Tscha: Mien Antwoord dorop is „Jo“! Wi dörft uns freun. Wi dörft uns freun an dat, wat is, an de Lüüd, de wi üm uns hebbt. Ook an de, de wi al lang ni mehr sehn hebbt.
    Wi dörft uns freun an den Glanz un de bunten Lichter.
    Op de Welt ward jümmers irgendwo wat Slimmed losween. Dat is overs keen Grund dorför sick ni to freun, wenn een dat doch good geiht.
    Denn wenn man truuri is un sick mit sien Frünnen vertöörnt, ward de Welt dorvun ook ni beter.
    Dorüm wünsch ick Jüm all ’n besinnliched un scheuned Wiehnachsfest. Mokt dat Beste dorut. Och jo – un passt ’n beten op dat Cholesterin op, ne…
    In düssen Sinn
    3 min
  • Verwickelte Packerie
    All, de dat noch ni mokt hebbt, schulln nu langsom mol dormit anfangen – besünners de, de dat ni so good köönt: Geschinke inwickeln.
    Wokeen nu op’n letzten Drücker noch Geschinke in ganz lütte Geschäfte oder in de grooten Koophüüs inköfft, de kann Glück hebben: Glück dormit, wat ehr oder em de Geschinke professchonell inpackt ward.
    Dor fallt mi in: Mien Madam hett to den Verkööper in ’n Speeltüüchloden mol seggt, as se em ’n Katong mit ’n Speeltüüch bin över’n Tresen langt hett: „Köönt se mi dat mol ’n beten inpacken?“ Dor hett de Mann so’n lütten Fitzel Geschinkpoppier nohm, de dor noch rümleeg un dat Stück Poppier mit ’n beten Backeband an den Katong fastmokt. Denn hett he sien Kunstwark ümdreiht, so dat mien Seute dat sehn kunn, un seggt: „So, nu is dat ’n ‚beten‘ inpackt.“
    Jo man mutt sick vörsehn, bi dat, wat man sick wünscht. So’n Wunsch kann ook wohr warrn.
    Overs trüch to’n Geschinke inpacken: All, de nu noch in Supermart inköfft oder veellicht in’t Internet oder de ehr Geschinke al lang to Huus hebbt, mööt nu sülms sehn, wo se de Sooken inwickelt kriegt. Ick heff düt Johr ook weller sülms inpackt, dütmol harr ick allns, wat ick verschinken wull, sogor eenigermoten rechttiedig besorgt. Mit dat Mehrste bün ick ook recht good trechkom‘, weil dat allns veerkanti weer. Blots över twee Geschinke, de ick as een verpacken wull, bün ick meist dördreiht. Dat weer ’n veerkandiged Geschink op dat ick boben noch ’n Runned roppackt heff. Jungedi wat heff ick afwesselnd mit mi un denn weller mit dat Poppier gnegelt. Dat wull eenfach ni schnuck utsehn. Dorbi harr ick so scheuned Poppier, dat wi noch vun’t vörige Johr opwohrt hebbt.
    Op’t Letzt‘ heff ick den Snurrkrom, so good as dat gung, tosomfalt‘ un mit fief Meter Backeband seekert. Tofreeden weer ick dormit overs ni. Dorüm heff ick op dat Poppier noch schreeven, wat mi dat leed deiht, dat ick dat ni schmücker inwicken kunn.
    Jo. Man mutt sick blots to hölpen weeten. Un nu tööv ick blots noch op’n Wiehnachsmann, dat he de Geschinke afholn kann, üm se Heiligobend weller trüch to bringen…
    In düssen Sinn
    3 min
  • Wenn Mannslüüd suugen wüllt…
    Is ni lang her, dor weer ick in so’n grooten Elektroonik-Mart. Mien Madam weer ook mit. An un för sick wull’n wi dor blots wat an Info-Stand afgeeven, wat wi uns utlehnt harrn.
    Dorbi harr ick je noch wat anners vör, dor heff ick overs leever erstmol nix vun vertellt. Dat harr vörher al Diskusschoon‘ geeven, un vör mi weer dat ganz un gor genog, wenn de Diskusschoon erst dor in Mart losgohn wurrn.
    Dat gung ook fuurts los. Glieks as ick vun‘ Info-Stand wieder rin in‘ Loden loopen bün: „Wat wullt du denn nu noch?“, keem de Froog, mit de ick al reekend harr, vun achter. Ook, dat „Wi“ doch an un för sick loswulln.
    „Ick will mi noch wat bekieken“, heff ick seggt. Vun Wieden heff ick al dat Schild sehn, op dat „Staubsauger“ stunn. Dor bün ick direkt op toloopen. „Wat wullt Du denn mit’n Huulbessen? Wi hebbt doch een in’t Huus. Langt dat ni?“ Jo, ick heff wusst, vör düssed Verhanneln wurr ick mien ganze Diplomatie bruuken. Ick wull nömli ’n Extra-Huulbessen mit Akku in de erste Etoosch hebben, dormit ick mien Schrievstuuv kommodig schier holn kann.
    „Wat? Blots weil du to fuul büst no ünnen to loopen, schall nu ’n tweeten Huulbessen anschafft warrn?“
    Na jo, so half harr mien Seute dat dormit op’n Punkt bröcht. Ick wull overs ’n Apparoot, mit den man allns anstänni moken kunn, in de lütten Ecken reinmoken, overs ook den Footborrn gau un anstänni afsuugen.
    Un jüst so’n Akku-Huulbessen weer dor nu in’t Angebot. De keem ook mit no Huus, sülms wenn mien Betere Hälfte dat för’n dumme Idee holn hett. Erstmol jedenfalls.
    Intwüschen hett se nömli markt, wat ick an den nieden Huulbessen richti Spoß heff. Jede friee Minut‘ treck ick mit dat Dings in’t Maneuver gegen Sand un Stoff.
    Nu schimpt se ni mehr, sünnern seggt sowat as: „De Trepp mutt ook noch mol soogen warrn.“ Un ick freu mi denn, dat ick mit mien lütten Fründ speeln dörf.
    Dorüm mien Tipp an alle Fruunslüüd: Wenn Ju’n Kirls sick friewilli ’n nieden Huulbessen kööpen wüllt – lot se moken. Dor lebbt Ju mehr vun, as Ju sick dat vörstelln künnt…
    In düssen Sinn
    3 min
  • Korturlaub üm de Eck
    Annerletzt harr ick mol weller Gerbuurtsdag. Ick weet gor ni genau, wo old ick doröver worrn bün. Tehmli old wohrschienli. So föhlt sick dat mitünner jedenfalls an.
    Un weil ick so lot in’t Johr Gebuurtsdag heff, fier ick bilütten leever in nästen Sommer no. Dor kann man nömli buten fiern, ohn‘ sick de Schwindsucht intohanneln, weil dat denn warmer is as in November.
    Dorüm bün ick düssed Johr to mien Gebuurtsdag mit mien Madam in‘ Korturlaub fohrt. So richti wiet wech sünd wi ni ween. Bummeli 30 Kilometers. Vun Windbargen ganz bet no Büsum. Dat gifft je ook Dithmarschers, de no Mallorca reist.
    Dat gifft overs ook Lüüd, de vun Bayern no Büsum reist. De dorsten Bayern seggt, wat dat so scheun is in Büsum. Dat wulln wi nu mol sülms rutfinnen. So sind wi also an dat nördliche Enn vun de Dithmarscher Bucht verreist. Dorbi hett uns‘ Auto blots 20 Kilo Co2 produzeert.
    Weern wi no Bayern verreist, weern dat mehr as 400 Kilo ween.
    Wi sünd also mit ’n eenigermoten reinet Geweeten in uns‘ Hotel in Büsum ankom‘. Ick will nu keen Reklame moken, dorüm nöm‘ dat Hotel eenfach mol „Hotel Jess“.
    An mien Gebuurtsdag stunn morns bi’t Fröhstück sogor ’n lütten Kooken mit’n Talliglicht an mien Platz. Un överhaupt weer dat dor richti scheun.
    Över’n Dag sünd wi denn an Hoben un op’n Diek langloopen. Dorbi hebbt wi op’t Letzt‘ sogor noch ’n poor ole Frünnen droopen, de wi to’n Deel al siet veele Johr’n ni mehr sehn hebbt.
    Dat – mutt ick seggen – is mi in Bayern noch nie passeert. Un op Mallorca erst recht ni. Ick weer je ook noch ni op Mallorca. Dor mutt ick an un vör sick ook gor ni erst hen.
    Dat gifft nömli so veele scheune Ecken bi uns üm de Eck, de wi ook denn ni all to sehn kriegen wurrn, wenn wi vun hüüt an, jedet Weekenenn in Korturlaub fohrn dehn Na jo, wenn ick ehrli bün, överlot ick Büsum in‘ Sommer leever de Bayern un all de annern Lüüd, de vun wiet wech kümmt.
    Overs mi dücht, dat weer lang ni unsen letzten Korturlaub in Büsum. Dorför mööt mien Seute oder ick ni mol Gebuurtsdag hebben…
    In düssen Sinn
    3 min
  • Över hunnert Perzent dösig
    So langsom froogt sick veele Lüüd weller: Wat schall man to Wiehnachen blots verschinken.
    De wat to verschinken, de geföhlt al allns hebbt, is jüst so figeliensch, as de wat in’t Poppier to wickeln, bi de man gor ni so recht weet, wat se möögt. Natüürli, man harr sick je rechttiedig informeern kunnt, overs dat gifft je jümmers so veel annern Krom to nusseln.
    Bet vör’n poor Weeken harr ick noch ganz wunnerbore Idee: Meist all, de ick wat verschinken will, harr ick dat verschinken kunnt. Un dat weer ’n Gasbuddel ween – so een, de man to’n Kämping bruukt.
    Nu heff ick overs jüst ut de Norichen to weeten kreegen, dat de Gas-Spiekers bi uns in’t Land to „mehr as hunnert Perzent vull“ sünd.
    Dor heff ick mi erstmol frogt: Wat kann den överhaupt to mehr as hunnert Perzent vull ween.
    Kippt man ’n Glas Beer to mehr as hunnert Perzent vull, denn löppt dat Beer dor överhen. Vör ’n poor Johr bün ick in‘ Frietiedpark mol mit so’n Holtachterbohn fohrt. Dor harr ick geföhlt de Büx to mehr as hunnert Perzent vull – overs ick glööv dat tellt ni so richti.
    Na jo, jedenfalls harr mi dat jeden Mathelehrer in de School as Fehler anstreeken, wenn ick utreekend harr, das irgendwülke Gas-Spieker to mehr as hunnert Perzent vull sünd.
    De harrn to mi seggt: „Dien Reeken is to fief Viddel verkehrt.“
    Nu bringt mi dat allns overs överhaupt ni wieder in de Froog‘ wat ick verschinken schall. Vellicht schull man dat as fröher moken, blots annersrüm: „Oma, schriev doch mol ’n Breef an‘ Wiehnachsmann…“
    Eegentli gor ni so övel, de Idee. Overs ick kunn mi vörstelln, dat Oma mi to hunnert Perzent dösig ankieken wurr, wenn ick ehr mit so’n drulligen Krom keem.
    Tscha. Wi mokt uns Gedanken doröver, wat wi uns verschinken schüllt un annerwegens hebbt de Lüüd keen Hüüs mehr, weil dor Bomben rinflogen sünd. De wünscht sick nix wieder as Freeden. Overs de, de ehr Freeden schinken kunnen, doht dat ni, weil se anschien’d to mehr as hunnert Perzent ehr Hart un ehrn Verstand verlorn hebbt…
    In düssen Sinn
    3 min