De Saftlade

Tagwohl mitenand (wie de Diego als Chrankepfleger imene wiise Kittel sege wür)! Nachdem de Diego sich i de letschte Episode als Gnocchi geoutet het, isch de Michi es Pasta-Orakel ga ufsueche, um meh über Gnocchi-Mensche usezfinde. Im Gegezug dezue, isch es de Diego das Mal, wo am Michi drüü Frage stellt: Eini unagnehmer als die ander (danke a dere stell, Bro): Vo Flexe vorem Spiegel bis zum Usscheide vo gwüsse Flüssigkeite i de Duschi und Guilty Pleasures isch Alles debi. Damit die Folg aber nöd ganz so verstörend ufhört, verzellt de Michi no, wie er zu sine erschte wiise schueh cho isch. Mega wholesome, gell? Naja, losed mal, wie es dezue cho isch. Danke a dere Stell a d’Verchäuferin und sorry nomal für d’Umständ. Ha. Ha. Ha.

Passend zum Früehlig redet de Diego und de Michi übers Thema Dating und mached sich luschtigi, aber au vil tüüfgründigi Gedanke dezue: De Diego verzellt, wie er sini Fründin imene Notfallmanöver het müesse kläre, während de Michi vomene chline Heartbreak berichtet. Beidi sind sich einig: Öper ohni klari Intentione z’küsse chan zimlich kompliziert werde (nöd, dass das ihne jemals passiert wär, nei, nei). Und denn gits no de Mitstudent vom Michi, wo offensiv uf alli los gange isch. Die Episode isch Emotion pur!

Nachdem de Diego em Michi fasch gege sin Wille en Spinatsaft mitbringt, chunts ih dere Episode zum erschte ultra professionelle Saftrating! Schlimmer aber no als de Spinatsaft isch s’Dilemma vom Michi: Er isch jetzt nämlich meh oder weniger freiwillig Abonnent vonere chostepflichtige Internetsiite und isch es paar Fränkli losworde (internally crying). Abgrundet wird das Finanzdebakel dur en epische Kampf bi Nacht, i dem de Michi sich zwunge gseht sin Zauberstab uszpacke, um e ominösi Frau z’konfrontiere und voreme tote Frosch z’flüchte.

I dere Episode setzt sich de Diego für e vernünftigi Chleiderordnig i de Schwiiz ih und verzellt vo sine Vorstellige als zuekünftige Musiker. De Michi redet vo sinere Arbet als Lehrer und bemerkt, wie assozial und komisch d’Logik vo Schüelerufsätz si chan. Bsunders in Bann zieht die zwei Jungs d’Gschicht vonere rachsüchtige Muetter, wo d’Aglegeheite vo ihre Tochter i ihri Hand nimmt und vor NÜT zrug schreckt. Zum Schluss redet d’Jungs no über «s’fake» und findet use, inwiefern «bullshitte» em Michi dur d’Matur ghulfe het… oder au nöd.