Esta tarde, ás 20.00 horas, o Teatro Municipal de Tui acolle a representación de “Fado Alexandrino” por parte do Teatro Nacional São João. A concelleira de Cultura tudense, Sonsoles Vicente explicaba a importancia de que esta gran compañía peche a súa xira no municipio e animaba a toda a veciñanza a que asista a esta cita teatral.

O espectáculo ten unha duración de catro horas, no que haberá dous descansos. As entradas poden mercarse en tui.gal aos prezos de 12€ e 9€.

A Cristina Rodríguez de O Fuchique, é candidata ao premios Iniciativa Emprendedora de AJE Vigo, cuxo fallo se dará a coñecer esta tarde. Hoxe falamos con ela de como xurdiu esta candidatura, e tamén da súa empresa, O Fuchique, dedicada a coidar e mimar marcas corporativas e persoais, construindo identidades sólidas e memorables que conectan cos seus clientes.

Grazas á colaboración do Centro Dramático Galego mañá estará no Teatro Municipal de Tui o Teatro Nacional Sao Joao de Porto con "Fado Alexandrino". Fran Núñez, director do CDG, explicaba precisamente esta colaboración e coma consideraban Tui era o lugar ideal en Galicia para facer esta aposta por un espectáculo de gran formato e amplo despliegue.

A tudense Claudia Montes da empresa Altitude é unha das candidatas aos premios Iniciativa Emprendedora de AJE Vigo que van ser entregados esta tarde no Auditorio de Zona Franca, en Porto do Molle en Nigrán. Hoxe falamos con ela do que significa esta candidatura e tamén a da súa empresa dedicada a actividades na natureza, principalmente no Parque Natural Monte Aloia.

“Unha historia que amosa a construción do Portugal democrático”. Así define o director de “Fado Alexandrino: O tempo engoliu-me”, Nuno Cardoso, a obra da que poderemos desfrutar este venres 31 de xaneiro no Teatro Municipal de Tui ás 20 h. Unha obra que adapta a que se considera a mellor novela da Revolución dos Cravos, de António Lobo Antunes. As entradas están á venda en tui.gal aos prezos de 12 e 9 euros.

Pancho 3.0 está nas semifinais de The Best Coffee Shops 2025, un selo que equivale á Estrela Michelín, no mundo do café. Adri Vila, xerente do establecemento tudense, relatou a importancia de que Pancho 3.0 se atope entre os 40 mellores de toda España, mantendo a súa filosofía de parroquia.

As votacións están abertas ao público e poden facerse a través de thebest-coffeeshops.com, até o luns, 3 de febreiro.

Tomiño estará presente esta fin de semana na gala dos Premios Goya de Fotografía, que se celebra este sábado en Zaragoza. A fotógrafa tomiñesa Pily Reñones opta a dous galardóns, un no apartado de retrato e outro na categoría de libre creación. A artista deu máis detalles das súas obras e contou como se atopa a poucos días de coñecer o veredicto.

Onte conmemorouse o Día Internacional en Memoria das Vítimas do Holocausto e o 80 aniversario da liberación do campo de concentración de Auschwitz. No Concello de Tui o acto consistiu no acendido de 6 candeas. Nese acto participou Esther Cabral, arxentina descendente de vítimas do Holocausto afincada en Tui dende hai tres anos. Coñecemos a súa historia e o simbolismo desta data.

Sara “Tui” Gonzaléz non deixa de colleitar éxitos deportivos. A futbolista vén de fichar por Aniquiladoras FC, como xogadora número 11, o que implicará que volva viaxar semanalmente á península para formar parte desta liga, que se desputará en Barcelona a partir do 22 de febreiro. Amais, está nominada como Mellor Xogadora de Fútbol Praia do Mundo 2024. Con ela puidemos conversar esta fin de semana.

Unha proxección sorpresa para homenaxear a David Lynch é o que organizan dende o Cineclub Tui. Mañá martes proxectarán unha, ou varias, obras deste cineasta nos horarios habituais: 18.30 h e 20.45 h aos prezos de 2 euros para persoas socias e 4,5 para público xeral. Hoxe nolo contou Noemí Guisande.