Mañá martes ás 19 h inaugúrase unha exposición de máis de 50 obras de participantes do concurso de pintura Pinta Tui, nesta novena edición e anteriores. Será no anexo da Sala Municipal de Exposicións. Hoxe coñecemos os detalles con José Manuel Díez, de Artes Creativas Efectos.

Con Sandra González, presidenta da Asociación de Desenvolvemento Rural Galicia Suroeste EuRural e alcaldesa de Tomiño, coñecemos os detalles da campaña presentada en FITUR, "Para lembrar". Unha presentación que foi conducida pola xornalista María Rey e, no acompañamento musical, Rubén Simeó.

Javi, "Maneiro", vén de lanzar un novo sinxelo, que supón un agradecemento a todas aquelas persoas que o salvaron. Así, explicounos no programa Día a Día todo o que hai detrás deste "Anxos no inferno".

Este domingo, día 26, ás 18.00 horas celébrase o Concerto- Audición da escola de canto Ponte das Febres. Será na Casa Cultural da Asociación Xuntanza de Randufe. A entrada é libre e gratuíta.

Hoxe coñecemos os detalles con Rafael Dopeso, director da Coral Ponte das Febres, e José Antonio Martínez, alumno da escola de canto.

Ventura cumpre este ano tres edicións funcionando como un laboratorio cinematográfico onde os e as cineastas participantes están no proceso de desenvolvemento dos seus filmes.

Un proxecto que se desenvolve en Tui, en tres fases, e do que coñecemos hoxe máis detalles da man do seu coorganizador, Ángel Sánchez; e do titor, Joao Pedro Rodrigues.

Seis serán os espectáculos que se poderán disfrutar no Teatro Municipal de Tui dende o venres 31 de xaneiro até o venres 14 de marzo. Hoxe repasamos con Sonsoles Vicente, concelleira de Ensino, Cultura e Mocidade de Tui esta programación pensada para o desfrute de todos os públicos.

As entradas para todas as funcións poranse á venda mañá venres, 24 de xaneiro, ás 12 h, en tui.gal.

Coñecer a situación do río Miño, profundando nalgúns aspectos como especies exóticas ou a pesca de meixón e lamprea, foi o obxectivo da conversa que mantiñamos no programa Día a Día co comandante naval do Miño, Andrés Díaz-Ripoll.

O vindeiro luns,27 de xaneiro, celébrase a tradicional Romaría de San Xulián no cumio do monte Aloia. Todos os anos un grupo formado por máis de 50 persoas parte dende a cafetería El Pilar ás 9:00 h para subir a pé.

Unha das novidades deste ano é a posibilidade de subir ao monte en tren turístico, que sairá dende a praza da Inmaculada ás 10.30 h e para o que é preciso inscribirse gratuitamente na Oficina de Turismo.

Así nolo contaron Manuel Crisóstomo e José Ángel Villaverde.

132 persoas inscribíronse xa para participar na Ultreia 2025, que se celebrará o domingo 6 de abril. Unha cita que o ano pasado superou os 500 participantes dos que o 70% foron mulleres, e na que se anotaron persoas de até 12 comunidades autonómicas.

Hoxe, David Acevedo, membro da organización, explicou os detalles desta proba de 52 quilómetros, que chega até Pontevedra pero que se pode concluir en Porriño, Redondela, ou Arcade e atoparse con personaxes históricos coma San Telmo, Xulio César, ou Teucro.

As persoas que desexen participar teñen até o 23 de marzo para inscribirse en www.cronotec.es.

O Cine Club Tui retoma mañá as súas proxeccións con “En corpo e alma” da directora húngara, Ildikó Enyedi. Haberá dobre sesión ás 18.30 h e ás 20.45 h na Aula da UNED.

O prezo das entradas é de 4,5 € para público xeral e 2€ para socios.

Hoxe falamos con Pablo Romero, do Cineclub sobre este filme. Tamén deu conta da asemblea que convocan para este xove 23, ás 20.30 h, na aula da UNED. E avanzou a homenaxe que a próxima semana farán a David Lynch, recentemente falecido.