Todo preparado para o concerto de verán da Agrupación Musical de Goián. Ía ter lugar mañá venres, pero debido á previsión de choiva foi adiado para o domingo. Así celebrarase o domingo ás 21 na praza do Seixo. Baixo a dirección de Pedro Villarroel, a banda de Goián contará coma agrupacións convidadas cos Chavellos de Mos, dirixido por Juan Eiras, así coma co zanfonista Vitor Soto, Tonhito de Poi e a Treboada do Baixo Miño.

Este domingo na terraza do Club Náutico San Telmo celebrarase o Aloia Fest organizado pola Protectora de Animais Aloia de Tui. Dende ás once da mañá até ás doce da noite poderá gozarse de música en directo, charlas, sorteos, e un posto solidario. Así nolo contaba Pepín Solleiro, tesoureiro da Protectora Aloia.

Este sábado a partir das 20 h celébrase na rúa Compostela a XI Festa Gastronómica que pechará a programación da Festa do Miño que comeza ao mediodía en Caldelas. A concelleira de Cultura, Sonsoles Vicente, explicaba os pormenores deste evento festivo, a animación músical de rúa, e as asociacións participantes. Tamén se refería ao traslado a San Domingos do Festival de Bandas de Música mañá venres, e anticipaba algunhas das propostas que chegarán en setembro.

A Banda de Música Popular de Tui e a Unión Musical de Tenorio de Cerdedo-Cotobade serán este venres as protagonistas do XXVIII Festival de Bandas de Música de Tui que se vai celebrar a partir das 21 h na igrexa de San Domingos, debido á previsión de choiva.Falamos do mesmo con Eloy Carrera, director da Banda, e Manuel Madarnás, músico.

Este domingo en Guillarei celebran as festas na honra ao seu patrón, San Mamede. O programa festivo inclúe as tradicionais poxas, concerto da Banda de Música Popular de Tui, misa solemne e procesión. Amais aproveitarán para presentar o cartel das Festas da Virxe das Dores, coma nos explicaba Lucas González, secretario da Comisión de Festas.

Hoxe en Día a Día estiveron connosco Beatriz Fontán e Samuel Diz para facer balance da edición deste ano de Música no Claustro que rematou cos concertos este luns, pero que até onte estivo coa gravación do disco de Iria Folgado e que sairá á luz a finais de ano. Hoxe facían balance do evento destacando ao público que acode ao mesmo.

Hoxe no programa Día a Día recibimos a Eva do Campo, Sarai Limia, Auri Rodríguez, do grupo Arrancaxestas de Ribadelouro. Con elas falamos de como se creou o grupo, do seu repertorio, dos intrumentos que empregan, e dos seus obxectivos.

O Tyde vén de iniciar unha campaña de captación de socios da que hoxe nos falaron o seu presidente, Elías Vieiro, o director deportivo, José Manuel Quintana, o secretario, David Domínguez e o coordinador xeral deportivo, Juan Paramos. Tamén falamos con eles da pretemporada e da temporada na que xogarán en 1ª Rexional.

Mañá comeza a Semana Cultural da Virxe do Camiño en Rebordáns, que ofrecerá múltiples actividades até o domingo. Logo xa a partir do luns celebrarán as festas coma hoxe nos explicaron Marisol Ferreiro e Elisabeth Rodríguez.

O escultor Antúnez Pousa faleceu onte en Tomiño aos 77 anos de idade. Deixa unha pegada indeleble na comarca con esculturas coma o Monumento ao Mariñeiro na Guarda, o do Cabaqueiro no Rosal, ou o da Auga na súa parroquia natal Estás, pero tamén en moitos outros puntos da nosa xeografía.

Repasamos a súa biografía nesta reportaxe de Sara Marón.