Hoxe estiveron na nosa sintonía Marisa Giráldez e Javier Argüelles, do clube Badminton Tui para contarnos que retoman a actividade de adestramentos o próximo martes 2 de agosto, de 10 da mañá ás 13 horas. Serán os martes e xoves no instituto San Paio de Tui.

“Volta ás Orixes” é o título do concerto que ofrecerán as irmás violinistas tudenses Sara e Raquel Areal Martínez xunto á pianista Karla Martínez ofrecerán este venres ás 22:15h na praza de San Fernando.

Ao longo dunha hora interpretarán as obras que as teñen acompañado ao longo da súa carreira musical. Así poderemos escoitar composición de Vivaldi, Falla ou Sarasate.

Lino Martínez, policía local no concello de Tui, segue a acadar éxitos. Hai uns días voltou de Rotterdam, nos Países Baixos, onde colgou catro medallas máis para a súa particular colección no Mundial de policías e bombeiros.

Popy, Anna, Silvester, Valentino e Alejandra son as cinco persoas voluntarias chegadas de Grecia, Eslovaquia, Letonia, Italia e España que realizan este verán labores de sostenibilidade, interculturalidade e promoción da inclusión social no Camiño portugués en Tui. Os participantes estarán dous meses no municipio e contarán coa supervisión da Asociación guardesa Foco.

O 28 de novembro deste ano cúmprense 100 anos dos sucesos de Sobredo, que anualmente se conmemoran neste lugar da parroquia tudense de Guillarei. Ante este aniversario o Instituto de Estudos Agrarios Mártires de Sobredo organiza un ciclo que comeza esta fin de semana. Falamos con Xosé Manuel Estévez, sobre unhas revoltas que, dende Tui, afectaron a toda Galicia.

Este sábado ás oito e media da mañá sairá da praza de Frómista, xunto ao Teatro Principal, a andaina “Memoria: espazos e tempos do Congreso Agrario a Sobredo”. Esta actividade forma parte do ciclo “Sobredo 100 anos despois” que organiza o Instituto de Estudos Tudenses Mártires de Sobredo. Falamos na nosa sintonía con José Martínez Tato, do Club AndaTui, que guiará esta camiñata.

Este domingo celébrase na lagoa de Caldelas o 3º torneo Liga Galega 5x5 de kayak-polo organizado polo Club Penedo de Importa. Unha cita competiva para a categoría senior para tamén sub 16 na que amais do club Penedo participarán os equipos de Rodeira de Cangas e Combarro. Así nolo contaba hoxe Nerea Alonso, deportista e directiva do Club Penedo.

Este domingo, ás 22.15 h no Paseo Fluvial terá lugar o Concerto do Día de Galicia organizado polo Concello de Tui dentro da programación do verán cultural. Correrá a cargo da Banda de Gaitas San Xoán de Paramos.

O seu director José Manuel Caballero, explicaba hoxe o repertorio que van interpretar, no que contarán coa actuación de Lara Villaverde, e no que anunciaba tamén haberá sorpresas.

O dúo Pärbo, formado por Begoña Riobó e Anxo Pintos actuará hoxe a partir das 20.30 h na igrexa románica de Santa María de Tomiño. Un concerto especial no que interpretarán música medieval pero tamén parte do seu repertorio de música tradiconal. Forma parte do ciclo "Música e Patrimonio" que organiza o Concello de Tomiño.

O presidente da Comisión de Festas de Malvas, David Besada, acudía esta mañá ao noso programa Día a Día para explicar a programación para a festividade desta fin de semana.