Fyrir nokkru síðan hófst leit okkar að engu. Við horfðum til himins, litum inn í atómið, skoðuðum tilveru okkar í heiminum og hvernig vitundin er ekki neitt. Við veltum fyrir okkur sjálfinu og tóminu og grensluðumst fyrir um hugsunina. Ekkert var hvergi en ekkert leyndist víða. En eftir stendur stóra spurningin: skiptir ekkert máli? Í lokaþættinum hætta þáttastjórnendur sér út á slóð tómhyggjunnar, þar sem ekkert hefur neina merkingu. En það er ekki góður staður til að vera á. Með hjálp Sigríðar Þorgeirsdóttur, prófessor í heimspeki við Háskóla Íslands reyna þeir Tómas og Snorri að stemma stigu við tómhyggjunni og skilja hvernig ekkert skiptir máli. Því ekkert skiptir raunverulega máli.

Umsjónarmenn eru Snorri Rafn Hallson og Tómas Ævar Ólafsson.

Það er maðurinn sem hugsar ekkert inn í heiminn og í síðasta þætti var fjallað um það að vera ekkert. Í þetta skiptið er meginstefið er skrif heimspekingsins Hönnuh Arendt sem hélt því fram að það að hugsa fæli í sér að gera ekkert. Að hugsunin væri eiginlega gagnslaus, hún mótaðist og takmarkaðist af engu og skilaði engu. Hugsunin á sér stað á bjargbrún neindarinnar, tekur í sundur fastmótaðar hugmyndir en setur ekkert fram. Leggur ekkert inn, tekur bara út. Einmitt þess vegna getur hugsunin verið svo hættuleg, þar sem hyldýpi tómhyggjunnar er sjaldan langt undan. En eins og hlustendur fá að heyra, getur verið enn hættulegra að hugsa ekki. Rætt er við Vilhjálm Árnason heimspeking um óheilindi og Roger Berkowitz, forstöðumann Arendt seturins við Bard Háskóla í New York fylki um þær hættur sem hugsun hefur í för með sér.

Umsjónarmenn eru Snorri Rafn Hallson og Tómas Ævar Ólafsson.

Í síðasta þætti komumst við að því að vitund mannsins eða okkar innsti kjarni er eins konar ekkert. Vitundin er ekki það sem hún er og gefur okkur hæfileikann til þess að fjarlægja okkur frá hlutum heimsins. En hver erum við ef vitund okkar er ekkert? Í þessum þætti verður þessi spurning um sjálfið skoðuð og hugmyndinni velt fram hvort að sjálf okkar, þessi litli stýrimaður í höfðinu, sé mögulega ekki neitt. Rætt verður við heimspekinginn og taugafræðinginn Thomas Metzinger og Geir Sigurðsson prófessor í Kínverskum fræðum við Háskóla Íslands, einnig verður komið við í Zen á Íslandi og hlustað á Dharma ræðu flutta af Ástvaldi Zenki.

Umsjónarmenn eru Snorri Rafn Hallson og Tómas Ævar Ólafsson.

Fyrir viku síðan hófst leitin að engu. Þáttarstjórnendur horfðu til himins og reyndu að skyggnast inn í atómið en ekkert ekkert var þar að finna. En þrátt fyrir það er hugmyndin um það til. Því er nauðsynlegt að skoða hugarheim mannsins sem gerist sekur um að hugsa þetta ekkert inn í heim sem vill ekkert með það hafa. Í þessum þætti verður leitað til tveggja tilvistarspekinga, þeirra Ragnheiðar Eiríksdóttur og Vilhjálms Árnasonar, til að varpa ljósi á þetta ekkert eins og það birtist í hugarheimi mannsins.

Umsjónarmenn eru Snorri Rafn Hallson og Tómas Ævar Ólafsson.

Í þessum fyrsta þætti um ekkert hefja Tómas Ævar Ólafsson og Snorri Rafn Hallsson leit sína að engu. Ferðalagið hefst í efnisheiminum, í bilinu á milli hlutanna. Rætt er við Sigríði Kristjánsdóttur og Þóri Má Jónsson hjá Stjörnuskoðunarfélagi Seltjarnarness um bilið á milli stjarnanna og hvort ekkert leynist kannski þar. Einnig er skyggnst inn í atómið með Sævari Helga Bragasyni og þeirri spurningu velt upp hvort alheimurinn sé að mestu leyti ekki neitt.

Umsjónarmenn eru Snorri Rafn Hallson og Tómas Ævar Ólafsson.

Í áttunda þætti Hnotskurn verður farið yfir stöðu loftslagsmálanna á Íslandi í tilefni af borgarafundi Kastljóss um loftslagsmál sem fram fer í kvöld. Þá skoðum við hvers vegna bandarískir nýnasistar og hvítir þjóðernissinnar sjá poppstjörnunaTaylor Swift í dýrðarljóma.

Á Alþingi er nú til umfjöllunar frumvarp um Menntasjóð námsmanna sem ætlað er að koma í stað LÍN, við skoðum frumvarpið nánar og ræðum við Sigrúnu Jónsdóttur, forseta Landsamtaka íslenskra stúdenta. Svo skoðum við einar stærstu YouTube erjur sögunnar milli Logan Paul og KSI sem börðust í hnefaleikahringnum í annað sinn um helgina.

Í Hnotskurn vikunnar skoðum við CrossFit og lyfjanotkunarumræðu síðustu daga og rýnum í nýjustu plötu tónlistarmannsins Kanye West.

Í Hnotskurn í dag er fjallað annars vegar um sögu Hrekkjavökunnar, tengsl hennar við Ísland og gamlar hefðir. Í seinni hluta þáttarins er fjallað um barnahjónabönd á heimsvísu en þó sérstaklega í Malaví. Tilefni umfjöllunarinnar er Landssöfnun UN Women sem fer fram á RÚV 1. nóvember.

Í þessum fjórða þætti Hnotskurnar fjöllum við um vandræðin í bresku konungshöllinni en breskir fjölmiðlar hafa verið sérstaklega óvægnir í garð nýju hertogaynjunnar Meghan Markle. Þá segjum við einnig frá íslenskum nafnlausum áróðurssíðum á samfélagsmiðlinum Facebook og veltum upp áleitnum spurningum um hvort þeim takist ætlunarverk sitt.