Etikèt podkas

Kévin Mesidor kanpe Aurélie sou rezo sosyal yo. Se yon pèsonaj k ap simaye latwoublay tout kote l pase depi l santi dwa l menase. Kit li antò, kit li gen rezon, li toujou sou zen li menm. Ki moun ki pa konn Aurélie? Radi, tapajè, feminis. Nan nimewo sa a, Kévin rakonte nou kijan l jere siksè Aurélie, popilarite l ak anpil lòt bagay ki pral fè w dekouvri kiyès li ye.

Pou nouvo nimewo sa a, envite nou se Nora Chavenet. Li se yon moun ki rezève anpil, li renmen danse e li konsidere dans lan kòm yon kote li ka al kache pou li ka eksprime sa l santi pi byen. Nora se pitit Farah Ménard. Yon non nou p ap janm bliye nan peyi a. Si w te konn tande feyton radyofonik VIP sou radyo Métropole, ou pa ka pa sonje Paola Delarue. Nora pataje eksperyans li sou kijan l te rive jere etikèt "Tifi Farah a" pandan lontan e menm jiskaprezan kèk kote li pase.

Pou nouvo nimewo sa a, envite nou se Elder J. Joseph. Li se mizisyen, chantè, pwodiktè epi manm fondatè gwoup Akoustik. Elder grandi epi t ap viv ak 4 frè li genyen yo, e l ap pataje ak nou nan ki pwen sa te difisil pou li chak fwa moun tout kote l pase te konn ap idantifye ak youn oubyen 2 nan frè li yo. Eksperyans sa a te mete l nan sitiyasyon pou l chache tèt li e rive kreye pwòp idantite pa l.

Pou nouvo nimewo sa a, envite nou se Nick Ndouta Nicolas. Misye se yon etidyan ki prèske fini nan relasyon entènasyonal e li se yon jèn antreprenè. Li se pitit Harry Nicolas ke tout moun konnen sou non "Mèt fèy vèt." L ap pataje avèk nou kijan li viv popilarite papa l, e kijan li grandi nan yon fanmi ki kwè nan konsomasyon lokal, san konte pakèt bèl inisyativ fanmi sa a pran pou bay lakilti plis jarèt nan peyi nou Ayiti.

Envite nou pou nouvo nimewo pòdkas etikèt sa a se Gaël Jean Baptiste. Fotograf, sineyas, e li travay nan libreri tou. Gaël pataje ak nou eksperyans li nan Pòtoprens kote l ap evolye, nan yon sektè kote moun ap plede idantifye l ak gran frè l e bliye si l egziste kòm moun. Viv ak etikèt sa a pa t fasil ditou pou li.

N ap envite w koute!

Aprè anviwon yon mwa poz, pòdkas etikèt tounen. Nou te oblije fè yon ti kanpe pou al bay bourad nan kèk zòn ki te afekte nan tranbleman tè 14 Dawout 2021 an. Dènye moman yo te difisil anpil tou. Men nou la. N ap jere. Jodi a nou pote pou ou katriyèm nimewo pòdkas la. Envite nou se Nick Ndouta Nicolas. Misye se yon etidyan ki prèske fini nan relasyon entènasyonal e li se yon jèn antreprenè. Li se pitit Harry Nicolas ke tout moun konnen sou non "Mèt fèy vèt." L ap pataje avèk nou kijan li viv popilarite papa l, e kijan li grandi nan yon fanmi ki kwè nan konsomasyon lokal, san konte pakèt bèl inisyativ fanmi sa a pran pou bay lakilti plis jarèt nan peyi nou Ayiti.

Envite nou pou twazyèm nimewo pòdkas etikèt se Paul Beaubrun. Gitaris, chantè, fondatè gwoup Zing Eksperyans. Paul pataje ak nou eksperyans li kòm moun ki grandi nan yon fanmi ki bay anpil enpòtans ak lakilti, patikilyèman ki anbrase eritaj vodou zansèt nou yo te kite pou nou sou bout tè sa a. Pitit Manzè ak Lòlò (Banabe), pitit pitit Théodore Beaubrun Jr  (Languichatte Débordus), Paul rakonte nou kijan li te entegre mond mizikal la epi viv ak tout etikèt (ti Boukman) ki vini ak sa, san konte kliche fanmi vodouyizan li fèt la toujou ap sibi jiskaprezan... 

N ap envite w koute!

Pou dezyèm nimewo pòdkas etikèt, Georgy resevwa Samanta Péan,  ki li menm se yon fotograf, yon aktivis, epi li se pwofesè tou. Samy ap rakonte nou kijan li te rive jere presyon ki vini ak etikèt "Pitit Alessandra Lemoine" epi "Pitit pitit Bob Lemoine", jiskaske li vin kreye pwòp non pa l san li pa nye sa fanmi sa a reprezante nan mond odyovizyèl nan peyi a. Li pataje ak nou tou kijan sosyete a wè l epi trete l akoz fanmi li soti a.

Pou premye nimewo pòdkas etikèt, Georgy resevwa Richard William Morse, ki se gitaris gwoup RAM. Nan konvèzasyon sa a, William pataje ak nou nan ki peryòd li te vin reyalize ki tip moun manman l (Lunise E. Morse) ak papa l (Richard A. Morse) reprezante pou sosyete a, e ki pwa sa te vin genyen sou do l kòm pitit moun sa yo pandan li t ap grandi. Li pale tou de lanmou l ak atachman li genyen pou paran l. Ki avantaj ak ki pwoblèm ke li jwenn akoz fanmi li fèt la. 

N ap envite w koute!

Lasosyete pa bezwen konn mezi w ni pran mezi w pou taye bonèt met sou ou. Li tèlman fasil pou sosyete a mete tag, anbale epi met etikèt sou lòt moun; pou anpil moun sa nòmal. Gen moun ki viv sa mal. Viv nan lonbraj yon lòt moun, sispann egziste oubyen egziste apati egzistans yon lòt moun, se reyalite anpil moun ap viv nan sosyete nou an. Anpil fwa yo pa vle pale. Konsa tou yo konn pè pale. Pòdkas "Etikèt" se yon espas ki la pou moun sa yo vin eksprime yo epi pataje sa yo viv ak sa yo sibi. Se yon mikwo ki louvri pou yo ka fè tande vwa yo.