犯後Check Chat

職場欺凌本身已經係好令人髮指嘅事，去到攞埋人哋條命，到底係幾咁禽獸先做得出？台灣芎林就有兩個喪心病狂，恃住自己係受害人嘅上級，唔單止經常打罵佢，甚至乎對佢拳打腳踢，搞出人命後，仲惡劣到將受害人放喺個膠桶入面，浸咗喺鹽酸入面足足兩個月企圖毀屍滅跡。最令人心寒嘅，係佢哋被拘捕之後對警方講嘅一番說話…… 如果大家同我哋一樣，曾經目睹或者經歷過職場欺凌，聽呢集應該會好心酸同感慨。希望各位打工仔都可以有健康嘅身心。

大家都話，幫朋友可以「兩脇插刀」，但如果真係要為朋友擋刀，你又願唔願意？

2016年，喺日本留學嘅中國留學生江歌，好心收留被前男友不斷滋擾嘅好朋友，結果卻不幸慘死喺自己屋企門前，而最令人絕望嘅係，當時佢嘅好朋友其實就喺屋入面，但直至江歌斷氣，大門一秒都冇為江歌而開過......事後江歌媽媽喺法院起訴呢位好朋友見死不救，到底法律可以點樣審判人性同道德呢？恐怖情人冇人想遇到，今集我哋就同大家講吓點樣從源頭解決！

可能因為人嘅力量太渺小，呢個世界又有太多解決唔到嘅問題，所以有啲人喺遇到自己處理唔到嘅事時，就會求神問卜。如果係純粹想求個心理安慰都無傷大雅，但如果愚昧到將生活一切事物，甚至連屋企人嘅性命，都寄託喺呢樣嘢上面，往往就會引嚟好多別有用心嘅人，金錢損失事小，連累到至親要以自己嘅尊嚴、生命嚟為你嘅無知埋單，真係用一世都補償唔到。

希望各位聽眾都要引此案為鑑，我哋堅信真正嘅信仰唔會要你做超出你能力範圍同常理以外嘅任何事，包括金錢、精神、價值觀等等方面，有任何人對你提出任何奇怪要求前都要停一停！諗一諗！

正義，原來有時唔只會遲到，仲可能會缺席。1994年，一個喺北京清華大學讀緊書嘅女仔，喺佢21歲生日當日，突然覺得好唔舒服，本來以為只係小病，點知原來惡夢喺嗰日先啱啱開始。呢個芳華正茂嘅大學生，喺好短嘅時間內經歷咗極大嘅身心摧殘，唔單只大量脫髮、出疹，之後竟然慢慢演變到四肢失去活動能力，喺呢三十年間，佢飽受嚴重後遺症嘅折磨，最後更鬱鬱而終。最可恨嘅係，原來呢一切，係疑似背後有人因為妒忌心作祟而搞鬼，而呢個人仲係每日都出現喺身邊嘅人……到底有咩深仇大恨，要將一個人折磨到咁嘅地步？而最後呢個人又有冇得到佢應有嘅懲罰？

P.S. Lily把聲仍然好性感，今集要繼續辛苦各位聽眾嘅耳仔啦～

Btw，為免悶親一啲鐘意聽外國案件嘅聽眾，下集我哋會講唔係香港嘅奇案！敬請期待！

雖然好多人話感情係無分對錯，但到底有冇一段感情，係值得你付上自己最寶貴嘅生命？再講，如果對方仲要係個渣男呢？呢一單發生喺80年代尾嘅情殺案，一個本應擁有大好年華嘅空姐，就因為錯愛渣男，而慘遭對方同另一個女人毒手。呢兩個喪心病狂嘅人，理應要用一世去償還呢段血債，但離奇嘅係，案件再審時，女被告竟然不惜推翻自己初審時嘅口供，將所有罪名獨攬上身，嚟換取渣男重獲自由......以為渣男會心存感激，眷戀住餘生都喺牢獄入面為自己服刑嘅女人？我哋都係唔好咁天真啦，一齊嚟聽吓渣男嘅極限可以去到邊度啦～

首先感謝聽眾們喺我哋IG story投票，俾我哋有機會做呢個我哋犯後channel自己想做嘅香港十大奇案～係滿滿嘅愛呀！咁今集第一集，我哋就為大家回帶返一單二十年前轟動全港，甚至到今時今日，講起天水圍呢個地方，好多人第一時間就會諗返起嘅呢一單「天水圍滅門慘案」。當年報紙頭版上面嗰張看似一家四口樂也融融嘅全家幅，背後原來有三個人一直都係過住地獄般嘅生活，被逼喺家門口外嘅走廊過夜、夜晚唔可以入睡、被打至全身體無完膚......最可怕嘅係，呢一切，都係身邊最親嘅人嘅所作所為，呢個魔鬼甚至狠毒到不但只殺害晒自己嘅親人，仲為咗自保，不惜斬埋自己，試圖嫁禍俾已經被佢斬死嘅老婆......到底呢個人面獸心嘅禽獸最後結局如何？呢個家庭又係點樣一步一步走向呢個悲傷嘅結局？

(P.S. 因為今條片嘅剪接係阿nat嘅處女作，唔知佢搞咩片尾有七分鐘空白咗，可以唔洗理同埋希望大家原諒一下佢:D)

開咗學先兩個星期度，已經有好多同學生有關嘅新聞，但都係令人心酸、難過嘅新聞，所以決定做多集因為失敗教育而釀成嘅慘案。成日都話教育係家庭同學校共同嘅責任，喺學校過得唔開心，可以轉校，而且都會有離開校園嘅一日，但如果被困喺一個控制欲極強嘅家庭，被逼迫到絕處嘅人，最後會走上一條點嘅路？呢個故事嘅主角活喺瘋狂虎媽嘅陰影下已經去到三十幾歲，到底係幾咁令佢絕望嘅環境，先會令佢憎恨母親到將佢殺害並分屍......？

今日係開學日，相信每個父母都想自己嘅仔女開開心心去返學，平平安安咁放學。有邊個父母會諗到，自己嘅仔女會死喺一個所謂作育英才嘅地方？新學年又開始啦，我哋點都要講一講呢單發生喺馬來西亞，犯案情節極嚴重嘅校園欺凌虐死案！雖然呢件案係七年前發生，主犯本來只係被判監，但直至啱啱過去嘅7月底（podcast入面講上個月底因為我哋錄音時係八月），上訴庭法官改判絞刑！法官更形容案情嘅嚴重程度係「罕見中嘅罕見」（rarest of the rare）。到底係有乜嘢咁大仇口，會對自己嘅同學落到咁重手，將受害人活生生咁用熨斗熨死？

今集帶大家去法國，睇一睇呢單由1987年開始發生，並持續咗十六年嘅連環殺人案。兇手專門挑選處女落手，仲一次比一次大膽，甚至利用埋老婆同自己個仔去幫自己行兇。因為受害者太多，而且犯案時間橫跨十幾年，坊間唔少人都覺得兇手嘅老婆其實係共犯，佢哋嘅口供亦都交代咗佢哋犯案後嘅變態癖好……