إنتاج المحتوى - المثالية

المثالية التي أعنيها لها تعريف جميل بالهارڤارد بزنيس ريڤيو و الي بتقول ان المثالية سمة شخصية يسعى صاحبها للكمال و الخلو من العيوب و القصور بوضع معايير عالية و مرات فلكية لا يسطيع الوصول لها. و لكن في عقله ممكنة و بسيطة بس لو في وقت و بس لو في فلوس و بس لو في فريق عمل و بس لو في الماك ستوديو الترا و بس لو في…. فمعظم المشاريع "البيرفكت" بتعيش في عالم البكرا. التسويف.

في الغالب سعي المثالي في المقام الاول هو ليس لتحقيق النجاح و لكن لتجنب الفشل. و هذا التوجه سلبي جدا. و السلبية بتجر سلبية. و خودلك على دوامة ساحبة لتحت.

و كمان في عندك وحدة قياس الانجاز. هون الموضوع بيشل المثالي. أنا ما أنتجت بشكل مثالي إذًا أنا ناقص أنا فاشل و كل شي بحبه قلبك من قاموس إبليس لجلد الذات. و هاتك تعرف تطلع.

بيقلك في العديد من الاحيان تم ربط المثالية بالمشكلات الصحية. اضرابات اكل قلق اكتئاب صداع نصفي اضطرابات شخصية من الي بيحبه قلبك.

آخر شي في عالم السلبية الساحقة تحت مسمى المثالية. في الغالب يستمد المثالي قيمته من منجزاته و شو بيقول الناس عني. و الحلو انو بيقلك لاااااا كلااااا انااااا نو ويييي ولوووو.

طيب و الحل ؟

هلا إذا كانت عندك السعي وراء الكمال مرضي. فينا نروح على دكتور نفساني أو معالج نفسي سلوكي معرفي. يساعد المريض على تغيير أفكاره ومعتقداته وبالتالي سلوكه

اما اذا عندك وهم المثالية و تعودت انك تسوق لحالك على انك هيك و كذبت الكذبة و صدقتها فبطل

بطل و بلش شوي شوي. بلش بمشاريع صغيرة و في حالتنا. محتويات صغيرة. و ما بعمرك تقييم نفسك بكلام الناس

والي بياخذنا لموضوع حلقة بكرا و الي هو ذباب الانترنت و الفيدباك و الهيترز و الامراض النفسية الي بتشوفها بصندوق التعليقات و الي هي سبب حقيقي لعدم بدأ العديد من الاشخاص في رحلة انتاج المحتوى.

تمام؟

و لليوم سلام.

إنتاج المحتوى - التحضير

بالكتابة.

يا بكتب كل شي بدي قوله بالفيديو أو البودكاست

أو بكتب النقاط الاساسية اذا أنا جدًا متمكن من الموضوع إلي رح أحكي فيه.

لا يوجد مذيع أو مقدم محتوى يتحدث على أي قناة تلفزيونية مش مكتوب كل حرف بيتنفسه على الهوا.

و بيتم استخدام اجهزة خاصة اسمها تيليبرومبتر بتعكس الحكي امام الكاميرا و بيقرأ منها المقدم.

مع الممارسة و التدريب بتصير تقرأ كأنك عم تحكي. و الي هو التلوين الي ذكرناه في السابق.

هلا في حالة مقدمين البرامج على التلفزيون في عندك بدل المعد عشرة أو عشرات.

و المقدم الشاطر بيشارك في الاعداد ولكن في كل الحالات… شاطرين أو لأ… لازم تحضير. مارح تطلع قدام كاميرا ببرنامج ناجح من غير تحضير. نقطة انتهى.

في حالة الإعلام الحديث و الي نحنا عم نشتغل عليه. و الي هو بوجة نظري أهم بحبتين من الإعلام التقليدي. أنت كل شي. أنت الي رح تعد و تصور و تمنتج و تسوق وا وا وا. يعني حضر

و التحضير بيجي بالكتابة و القراءة

أنا شخصيًا بستخدم تطبيق النوتس على الايفون. أبسط برنامج كتابة في كوكب الارض. ما فيه إلا إلي لازمني.

بكتب فكرة في أي زمان و أي مكان. و بحط نقاط على هذه الفكرة إذا عندي شي قوله. إذا لا. بكتب فكرة و بتركها لأعمل بحث. عشان أقرأ و يصير عندي فكرة.

بحب أكتب كل كلمة بدي قولها قدام الكاميرا و حتى النكت. البايخة و المنيحة. ايه ايه. كله مكتوب.

بتذكر أول ما اشتغلت في الاذاعة من شي كتير سنة و نص كنت عم دور على مدارس إذاعة و تقديم في المنطقة ولم أجد و توجهت اونلاين و كانت ايامها الاونلاين صورتين و ويب سايت. هاد الحكي قبل ما يولد مارك زكربيرج مؤسس الفيسبوك تقريبًا. قبل يوتيوب كمان. المهم. لقيت سكريبت للحلقة الاخيرة لتقاعد مذيع قناة بي بي سي الاذاعية الأقدم للبرنامج الصباحي.

و لأن الحدث كان في غاية الأهمية نقلوه على التلفزيون. نعم. نقلوا الحلقة مباشر لايڤ كاملة على التلفزيون. الشباب حتى الهاهاهاها كاتبينها.

تيجي تقلي ما رح أكتب و مشيت ورا إحساسي بحب قلك يعطيك العافية. ما جايبنا ورا غير عدم التحضير.

طيب خليني كون لطيف حبتين. كل ما حضرت أكتر بتكون دايما مسيطر؟ كويسة؟

أكتب. و بعدين إقرأ كل شيء كتبته. و عدل. إذا في بداياتك سجل عالموبايل و تفرج بعين الناقد. انقد حالك بس ما تكسر حالك. اتفقنا ما رح تزبط من أول ألف فيديو.

تمام؟

و لليوم سلام.

الزبدة؟

ما بحياتك رح تكون جاهز! سهلة ؟

خلص الفيديو تمام؟ و للي بدو الزيادة.

هيَّا الى التفاصيل.

بالستينات درسوا شوية علماء قمامير كمية الاستفادة من العلم للمتعلم و لخصوا الموضوع بشي سموه هرم التعلم.

طلع يا سيدات يا سادة ان العملية التعليمية المبنية على المحاضرات ممتازة جدًا في تضييع وقت و حياة و روح المتعلم. يعنى بمعدل وسطي الي قاعد عم يسمع من محاضر في المجمل بيستطيع الاحتفاظ ب و الرجوع الى خمسة في المية من المطروح فقط. ايه ايه. جد مش مزح.

هالكلام مكتشفينه من الستينات. ولسى المحاضرات شغالة على أبو جنب في المدارس و لم يتم تطويرها من أيام خوفو.

و أفضل طريقة للاحتفاظ ب و الرجوع الى ٩٠٪؜ من المعلومات تأتي بتدريسها و تعليمها للغير أو تطبيقها بشكل مباشر.

يعنى المحاضر مستفاد أكثر من التلاميذ. خير ان شاء الله.

و المحاضر هو منتج المحتوى الى عم يقدم شيء لجميع من هو مهتم في المجال المطروح.

فجماعة عم جهز حالي. و بسمع محاضرات و ما عم ضيع ولا ثانية من وقتي. عم اسمع كتب و انا عم كنس البيت. عم اقرأ كل يوم قبل ما أنام. مسحت التيكتوك و الانستاغرام و استبدلتم بكورسات تيد يعطيكم ألف عافية. جميل الي عم تعملوه. خمسة في المية استفادة بتظلها احسن من صفر في المية. و لكن شو رايك ب ٩٠٪؜. بالله عليك مش أحسن شوي؟

شو يعني يا حسان.

يعني تعلم و علم. ما تفتي. و شارك رحلتك مع الي انت سابقهم بخطوة. أو خطوات. كون الدافع لغيرك انو يستفاد من ما تعرفه.

قد لا يكون الكثير بوجهة نظرك الي ما بعرف من وين جايبها بس بتضلها أكتر من غيرك.

كتاب. فيديو تعليمي. مصلحة أو خبرة حياتية مهتم أنت فيهم. لخص أول تشابتر / فصل و علِّم حدا غيرك شو تعلمت. بحب. مش بتنمر و تعالي. مش إنك أحسن من غيرك. غرور المعرفة حقيقة الله يبعدها عنا يا رب.

هاد بالنسبة لما يتم طرحه. جينا هلا لكيفية الطرح

فيديو. صوت. صورة. كتابة.

بما انك عم تحضر هالفيديو أو عم تسمع البودكاست فإنت جاهز.

بإيدك الجهاز الي رح تنتج من خلاله محتواك.

هالحلقة حضرتها و كتبتها على نفس الموبايل / الجوال الي صورتها عليه.

و الموبايلات فيها تطبيقات للمونتاج و تعديل و انتاج المحتوى بين المجانية و المدفوعة. انت و استطاعتك المادية.

ما تخلي شي يوقف بطريق تحقيقك لهدفك. كله موجود. لا مش لازمك الماك ستوديو الي عند فلان و فلان. لا مش لازمِك الاضاءة الفلانية الي كل الأنفالاوانسارز بيحكو عن الرنج لايت الفلاني و لازم أجيبو. شركات الاضاءة عم تقلد ضو الشمس و الشمس ببلاش لكل المخلوقات و لله الحمد.

تعلم تستفيد من الموجود.

تمام؟ و لليوم سلام.

قبل ما بلش أي شي بدي خبركم أنو مبارح إيلون مسك عرض يشتري تويتر ب ٤٣ مليار دولار. لايمانه باهمية المحتوى الرقمي على منصة متل تويتر. لايمانه باهمية حرية و أهمية التعبير. لايمانه باهمية المحتوى. ٤٣ مليار ايه. و فهمكم كفاية.

الناس بتحب القصص.

بتحب الحكايات.

بتحب البداية و الحبكة و النهاية.

القِصص هي الطريقة المثلى لتعلم أي شخص و كيف بتقول هاي القصة.

السرد. الإلقاء. الخطابة. هنن الطريق الي بتعطي للقصة حياة أو بتقتل أمتع القصص.

في عدد لا متناهي من مدارس الإلقاء. و أساتذة هذا الفن. هناك نقاط تتقاطع بين كل هذه المدارس و إلي رح نذكر بعضهم.

بوجهة نظري الخاصة

أدوات الإلقاء تعتمد و ترتكز على الثقة في النفس و الي بتيجي من التمكن من ما تقدمه.

قبل ما نبدأ في نقاط بدنا نتفق عليها:

اتفقنا ؟ حبيباتي قلبي قبيلة.

هل شاشة الستوديو ديسبلاي من ابل بتستاهل 

شوف إذا انت عم بتدور على شاشة:

- ٢٧ انش

- دقتها 5k

- فيها كاميرا و سنتر ستيج 

- سماعاتها منها و فيها و صوتهم كتييييييير حلو. سبيشال أوديو. 

- مايكاتها الثلاثة واضحين كنك باستوديو 

- مابدك درجة سطوع اكتر من ٦٠٠ نتس 

- ما بدك اكتر من ٦٠ هيرتس ريفريش ريت

- بورتات يو اس بي سي و كمان ثاندربولت ٤

- و كتير بتلبق مع طقم ابل الي حاطه على الطاولة 

إذًا هالشاشة الك بالمية مية. و صراحة. أكتر من ٩٠٪؜ من المستخدمين مش لازمهم أكتر من هيك أبدًا (احصائيات شركة من بيتنا للعد و التنظير)

هاي مش شاشة جيمرز. الجيمرز الهم شاشاتهم و مفضلاتهم. 

هاي الشاشة مش للبروسومرز (المستهلك الاحترافي جدًا). البروسومرز الهم برو ديسبلاي اكس دي ار. 

هاي الشاشة لمنتج المحتوى 

المخرج

الجرافيك ديزاينر 

للمبرمج 

للمصور

للموسيقي و الديجي 

لمصمم الازياء 

للي عم تعمل بحث الجامعة 

و هون بنيجي لنقطة مهمة

السعر 

هاد السعر مش محطوط لتسعير التكنولوجيا المستخدمة في هذه الشاشة لانو كل شي فيها تقريبا عمره خمس سنوات بالميته. 

هاد السعر محطوط عشان النفسية. 

نفسية المشتري. 

هاد السعر محطوط ل"صنع" احساس الفخامة. الفخامة النفسية. 

الشغلة ما إلها علاقة بالتكنولوجيا على قد مالها علاقة بالانتماء لجماعة ما. لطبقة من قدرة شرائية ما. لبراند ما. 

براندنچ نفسي 

بس بتضلها حلوة. 

هل الماك ستوديو الترا من ابل بيستاهل؟

الجواب المختصر أكيد جدًا نعم بالطبع حقًا ولكن

وال"ولكن" هون بتعتمد على مين الي عم بيسوق.

وهون "الترك" أو "التوكة" أو "كيف أضرب عصفورين بحجر مع عمو تيم كوك و فريق العمل"

لانه الشباب رفعوا مش السقف. هنن رفعوا القاعدة الي رح يبلشوا فيها مرحلة جديدة و عاطين الكوكب الرقمي الوقت الي بدهم ياه عشان ينضموا للرحلة

ايه لانو اذا هيك عم نبلش (نبدأ) فيا شباب و شابات التطوير و البرمجة شدوا همتكم لتطوير برامج بتعرف تستغل هالقوة و السرعة الجبارة المقدمة في بوكس صغير.

و يا شركات العتاد / الهاردوير هِزُّولِي كتافكم و أنتجوا إكسسوارات و شغلات بتستفيد من السرعة المطروحة و ما بتخنقني و بتعيشني في عنق الزجاجة.

الوضع الحالي في الغالب. كنك جاي تِفَضِّي البحر بمعلقة شاي.

المهم نرجع لمطوري المحتوى.

شوف مين المستفيد رقم واحد والي هالجهاز انعمل عشانه

الي بيقدر الوقت و عنده شغل أو أشغاااال و بده يخلص و ما يقضي نص عمره ناطر الرندر أو الاكسبورت أو تطبيق الفلتر أو الإيفكت. الكومبايل. و أخواتها و بنات عمها.

الي لازم ينتج كميات من المحتوى بشكل مستمر. و كبير. و كتير. يعني زيادة المخرجات و تقليل الوقت. تخيل مثلا غرفة أخبار بقناة تلفزيونية. كم فيديو لازم يطلعوا و قديش معهم وقت؟

الي عنده كلاينتس بيشلوا و بيطلب منك سبعتين نسخة من اللبروجكت مع تغييرات ما الها ستين داعي و دائمًا بياخد أول شي قدمتلوا ياه بعد مايكون مرق بمراحل تحول القمر كاملة لوصل القمر كيف كان أول الشهر و بعدين بقلك هاه. شفت. هيك أنا بدي. و بيضربك من نية إنو عم يعلمك شغلك و لولاه إنت لازم تفتح مطعم.

إلى بيستخدم سوفتويرات عرفانة تستغل كل ترانزيستور من الابل سيليكون و الي الورك فلو (آليه أو نظام عمله) بيعتمد عليهم.

و في الغالب اليد العليا هو لسوفتويرات ابل. لغاية الان

اذا كانت المخرجات "ابلاوية"

الفيدو كودك من و الى ابل مثلا.

الكومبايل اكس كود

الباونس لوجك

و غيرها.

هلا خلي في بالك نقطة جدًا مهمة. انو كمان غيرهم سريعين جدًا جدًا جدًا.

بس بتضل الاولوية من و الى ابل.

نقطة أخيرة و هي في غاية الأهمية للعديد من المبدعين و منتجي المحتوى.

في ناس بتحب تشتغل عالبحر

إلهام ما بتيجي الا هناك (او بالكافيه او بالترين)

و مافي فيشة كهرباء.

الموبيليتي و الي هي القابلية للعمل أثناء الحركة جزء مهم من طبيعة عملهم أو الورك فلو.

فخلي بالك من هاي النقطة و ما تتحمس عالباور العالي و تنسى انت مين.

جماعة حبيتو و حبيبي غير و بكرا بيتغير ما بتزبط هون.

مرحبا ماك ستوديو الترا 🚀

أنا شايف شاشة أبل الجديدة غير  أنا صراحة شايف أن مقارنة التفاحة (أبل) مع أي منتج آخر هي مقارنة غير  منصفة (لأي طرف) لأن الشركة في رأيي المتواضع لا تسلك أي سلوك يدل على أنها  في السوق للمنافسة أو لطرح منتجات فقط لأن عمرو و زيد عندهم نفس المنتج.   هذه الشاشة هي من أبل لأبل و ليست للاستخدام مع الأجهزة الأخرى على الرغم  من استطاعتك لذلك. الهدف الاول و الوحيد هو مستخدم أبل و تجربته في  الاستخدام. الشاشة الجديدة من أبل ما عملوها للألعاب، ولاكن فيك تلعب معظم  ألعاب أبل عليها بكل جمال. شاشة أبل الجديدة لا تحتوي على العديد من  المواصفات التقنية الجبارة المتوفرة في شاشات أخرى ولكن السؤال الأدق هو:  ما أهمية ذلك؟  لا يوجد منتج واحد يناسب أو يلبي متطلبات الجميع. وضوح صورة المستخدم  المراد في و لكل المنتجات المطروحة مَيَّز هذه الشركة و هذا لايعني  بالضرورة الكمال و الدوام ولكنه يعني “الجماعة عارفين شو عم يعملوا كتير  منيح”  محبتي دوت كوم

قبيلة... كيف الحال؟  رحلة جديدة بنحكي فيها عن الأدوات الي لازمتنا للرحلة القادمة لمواجهة  المتغيرات... مافي شغل؟ شهادة الجامعة بطَّلِت تكفي؟ طيب في شهادة و مافي  شغل؟ وين المشكلة؟ من مين المشكلة؟  بوجهة نظري المتواضعة لازم نعمل أبديت لنظام بابا و ماما القديم... تبع  شهادة وظيفة و تزوج و خلف و لووووب. هناك طرق لانهائية هالأيام لكسب العيش و  كلها استجدت بسبب التكنولوجيا و التطور العلمي. فبدل ما تقضي وقتك عم  تستهلك المحتوى الغير مفيد رح نتعلم نغيير عاداتنا و رح نتعلم نحب  التكنولوجيا و العلوم و الفضاء و الإستثمار و بالأخير ننتج.