លោក ម៉ែន គឹមសេង អ្នក​យក​ព័ត៌មាន​ប្រចំា VOA ដែល​តាមដាន​ភូមិសាស្ត្រ​នយោបាយ​ក្នុង​តំបន់​អាស៊ាន និង​នៅ​ទូទាំង​ពិភពលោក បាន​ចូលរួម​ជា​វាគ្មិន​ក្នុងកម្មវិធី Hello VOAស្ដីពី «‍អាស៊ាន» កាលពី​ថ្ងៃទី៣១ ខែមករា ឆ្នាំ២០១៩​នេះ ហើយ​លោក​បាន​លើក​ឡើង​ថា ហេតុផល​សេដ្ឋកិច្ច​ជា​គោល​បំណង​សំខាន់​របស់​ប្រទេស​ចិន ក្នុង​គម្រោង​ក្រវ៉ាត់​ផ្លូវ​ពាណិជ្ជកម្ម ប៉ុន្តែ​ឥទ្ធិពល​នយោបាយ​ក៏ជា​គោលបំណង​របស់​ប្រទេស​ចិន ដែល​អ្នក​វិភាគ​មើល​ឃើញ​ផងដែរ។ លោក ម៉ែន គឹមសេង ថ្លែង​ថា៖ ‍‍«គោល​បំណង​របស់​ចិន​គឺ​ចង់​ពង្រឹង​អំណាច​ទន់ ដែល​មាន​សិទ្ធិ​នៅ​ក្នុង​ពិភពលោក​ក្នុងនាម​ជា​មហាអំណាច​ដែល​ទើប​តែងើប​ឡើង​មួយ ដែល​ត្រូវ​ប្រឈម​ជាមួយ​សហរដ្ឋអាមេរិក»។ លោក ម៉ែន គឹមសេង ពន្យល់​ថា ដំបូង​ចិន​ផ្តល់​ប្រាក់​កម្ចី បន្ទាប់​មក​បញ្ជ្រាប​ឥទ្ធិពល​វប្បធម៌​ដូចជា​ការ​ឲ្យ​រៀន​ភាសា​ចិន ហើយ​ជំហាន​បន្ទាប់​គឺ​ប្រហែល​ដាក់ទ័ព​នៅ​បណ្ដា​ប្រទេស​មួយ​ចំនួន។ (ចាប ចិត្រា, Hello VOA, វ៉ាស៊ីនតោន, ៣១ មករា ឆ្នាំ២០១៩)

លទ្ធផល​នៃ​ការ​បោះឆ្នោត​នៅ​ប្រទេសម៉ាឡេស៊ីកាល​ពី​ថ្ងៃ​ទី​៩ ខែ​ឧសភា​កន្លង​ទៅ​នេះ​ បាន​ធ្វើ​ឲ្យ​មាន​ការ​ភ្ញាក់​ផ្អើលច្រើន​ ដោយសម្ព័ន្ធភាព​នៃ​គណបក្ស​ប្រឆាំង​បាន​យក​ឈ្នះ​គណបក្ស​កាន់​អំណាច​ជា​លើក​ដំបូង​ក្នុង​រយៈពេល​ជាង​៦០​ឆ្នាំ។ ការណ៍​នេះមាន​ឡើងស្រប​ពេល​ដែល​និន្នាការ​នៃ​លទ្ធិប្រជាធិបតេយ្យ​បាន​ថយ​ចុះ​នៅ​បណ្តា​ប្រទេស​ផ្សេង​ទៀត​នៅ​ក្នុង​តំបន់​អាស៊ីអាគ្នេយ៍។ អ្នក​តាមដាន​ការ​បោះឆ្នោត​ពីររូប​គឺលោក​ យឿង សុធារ៉ា អ្នកជំនាញ​ខាង​កិច្ចការបោះឆ្នោត និង​លោក សេង សុភ័ណ នាយកប្រតិបត្តិ​នៃ​ប្រធានគណៈកម្មាធិការដើម្បីសិទ្ធិបោះឆ្នោតរបស់ពលរដ្ឋខ្មែរនៅក្រៅប្រទេស (CEROC) ថ្លែង​ថា​ ប្រទេស​កម្ពុជា​និង​ប្រទេស​អាស៊ី​អាគ្នេយ៍ផ្សេង​ៗ​អាច​រៀន​សូត្របាន​ច្រើន​អំពី​ដំណើរ​ការ​បោះឆ្នោត​ឯករាជ្យនៅ​ប្រទេស​ម៉ាឡេស៊ី សិទ្ធិ​បោះឆ្នោត​នៅ​ក្រៅ​ប្រទេស​របស់​ពលរដ្ឋ​ម៉ាឡេស៊ី ការ​ផ្ទេរ​អំណាច​ដោយ​សន្តិភាពទៅ​កាន់​រដ្ឋាភិបាល​ថ្មី និងការ​ធ្វើ​តុល្យភាព​នយោបាយ​ការ​បរទេស​ក្នុង​ទំនាក់ទំនង​ជាមួយ​ប្រទេស​ចិន។​ (សឹង សុផាត, Hello VOA, វ៉ាស៊ីនតោន, ៧ មិថុនា ២០១៨)

នៅ​ពេល​ស្ថានការណ៍​តំបន់​និង​សកល​ ផ្លាស់ប្តូរលឿន​ ក្នុង​ពេល​កម្ពុជា ​មាន​ភាព​វឹកវរ ផ្នែក​នយោបាយ​ផ្ទៃក្នុង​ ហើយ​សាមគ្គី​ភាព​អាស៊ាន​ក៏មាន​បញ្ហាផង​នោះ​ អ្នកវិភាគ​បាន​អះអាងថា​ទាំង​កម្ពុជា​និង​អាស៊ាន​មានផល​ប៉ះពាល់​ដូចគ្នា​ ដល់​គោល​នយោបាយ ការណ៍​បរទេស។​ នេះ​បើតាម​ការអះអាង​របស់​លោក​ បណ្ឌិត​ ឈាង វណ្ណារិទ្ធ​ អ្នក វិភាគ​កិច្ចការ​តំបន់​ ដែល​បាន​ថ្លែងក្នុង​កម្មវិធី ​Hello VOA ​កាលពី​យប់ថ្ងៃ​ព្រហស្បតិ៍​ទី៣ ខែឧសភា​ឆ្នាំ២០១៨។ ​លោក​ បន្ថែមថា​ កម្ពុជា​មានបញ្ហា​ផ្ទៃក្នុង​ផ្នែក​នយោបាយ​ដែល អាច​ប៉ះពាល់​ដល់​គោល​នយោបាយ​ការទូត​របស់ខ្លួន​ ហើយ​អាស៊ាន​ក៏ដូចគ្នា​ដែរ​ ពេល​មានបញ្ហា​ផ្ទៃក្នុង​របស់ខ្លួន ​លើបញ្ហា​ជម្លោះ​ដណ្តើម​កាន់កាប់​កម្មសិទ្ធិ​នៃដែន​អធិបតេយ្យ​របស់ខ្លួន​ជាមួយចិន​ក្នុងដែន​សមុទ្រចិន​ខាងត្បូង៕ (លោក សុខ ខេមរា, Hello VOA, រដ្ឋធានី​វ៉ាស៊ីនតោន, ថ្ងៃទី០៣ ខែឧសភា ២០១៨)

ពលរដ្ឋហ្វីលីពីនធ្វើបាតុកម្មនៅមុខស្ថានទូតសរអានៅទីក្រុងម៉ានីល ប្រឆាំងនិងទស្សនកិច្ចលើកទីមួយរបស់លោកប្រធានាធិបតីសរអា Donald Trump មកកាន់ប្រទេសហ្វីលីពីនដើម្បីចូលរួមក្នុងកិច្ចប្រជុំកំពូលអាស៊ានលើកទី៣១និងកិច្ចប្រជុំអាស៊ានអាមេរិក ព្រមទាំងកិច្ចប្រជុំកំពូលផ្សេងៗទៀតនៅដើមសប្តាហ៏ក្រោយ។ លោក ត្រាំគ្រោងនឹងអញ្ជើញមកដល់ទីក្រុងម៉ានិលនៅថ្ងៃអាទិត្យនេះ៕

ប្រទេស​កម្ពុជាចាំ​បាច់ត្រូវ​ដោះស្រាយបញ្ហាប្រឈមខាង​ផ្នែកអភិវឌ្ឍន៍ធនធានមនុស្សជា​ច្រើននៅ​ពេលចូលក្នុងសហគមន៍អាស៊ានក្នុង​នោះមានភាព​មិន​ស៊ី​សង្វាក់​គ្នារវាងការ​អប់​រំនិង​ទីផ្សារ​ការងារ បញ្ហា​ក្នុង​ផ្នែក​ឧត្តមសិក្សា កង្វះ​ការ​យល់​ដឹងពីការ​ចូលរួម​ក្នុងអាស៊ាននិងសហគមន៍សេដ្ឋកិច្ច​អាស៊ាន​ និង​បញ្ហា​ប្រឈម​ខាង​ហេដ្ឋារចនា​សម្ព័ន្ធ​បច្ចេក​វិទ្យា​ជាដើម។ នេះ បើ​តាម​ការលើក​ឡើងរបស់លោក​ ​រ៉ាណា សុវត្ថិ បេក្ខជនបណ្ឌិតនៃសាកលវិទ្យាល័យមីនីសូតា (Minnesota) សហរដ្ឋ​អាមេរិក ដែល​បាន​បញ្ជាក់​នៅ​ក្នុង​កម្មវិធី Hello VOA «វេទិកា​អាស៊ាន‍»។ (ម៉ែន គឹមសេង, Hello VOA វេទិកាអាស៊ាន, វ៉ាស៊ីនតោន, ០៣ ធ្នូ ២០១៥)

អ្នក​ឃ្លាំមើល​ស្ថាការណ៍​នយោបាយ សេដ្ឋកិច្ច សន្តិសុខនៅ​កម្ពុជា​និង​តំបន់​ បាន​ទទូច​ដល់​ពលរដ្ឋ​ឲ្យ​តាម​ដាន​ការ​រីកចំរើន​ជឿន​លឿន​ទៅ​មុខ​របស់​អាស៊ាន​ ហើយ​ត្រៀម​ខ្លួន​ក្នុង​បរិបទ​ថ្មី។ លោក​ក៏​បាន​ជំរុញ​ដល់​រដ្ឋាភិបាល​ពង្រឹង​សន្តិភាព​ ស្ថេរភាព ហើយ​កុំ​បង្ក​អសន្តិសុខ​ដែលនាំ​ឲ្យ​អ្នក​វិនិយោគ​មិន​ហ៊ាន​ចូល​មក​បណ្តាក់​ទុន។ នេះ​ជា​ការ​អះអាង​របស់លោក យ៉ង់ គឹមអេង ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍​ និង​សន្ដិភាព ក្នុង​កម្មវិធី Hello VOA «វេទិកា​អាស៊ាន‍» កាល​ពី​ថ្ងៃ​ព្រហស្បតិ៍។ (សុខ ខេមរា, Hello VOA «វេទិកា​អាស៊ាន‍», ៥ វិច្ឆិកា ២០១៥)

លោកស្រី ​លឹមមុនី អ្នកស៊ើប​អង្កេត​ជាន់ខ្ពស់​នៃអង្គការ​សិទ្ធិមនុស្ស​អាហុក​បាន​ថ្លែង​ក្នុងកម្មវិធី​ Hello VOA «វេទិកា​អាស៊ាន‍» ​កាល​ពីយប់​ថ្ងៃ​ព្រហស្បតិ៍​ថា អំពើជួញដូរ​មនុស្ស​នៅកម្ពុជា​និងនៅក្នុង​តំបន់​អាស៊ាន​ត្រូវការ​រដ្ឋាភិបាល​អាស៊ាន ទប់ស្កាត់​ខ្លាំងឡើង​ថែមទៀត។​ (សុខ ខេមរា, Hello VOA វេទិកា​អាស៊ាន, វ៉ាស៊ីនតោន/ភ្នំពេញ, ១ តុលា ២០១៥)

មាន​កត្តា​ជា​ច្រើន​ដែល​រារាំង​មិន​ឲ្យ​ពលករ​ខ្មែរ​នៅ​ក្រៅ​ប្រទេស​ទៅ​ធ្វើ​ការ​នៅ​ កម្ពុជា​វិញ​ ទោះ​ជា​កម្ពុជា​នឹង​ធ្វើ​សមាហរណកម្ម​អាស៊ាន​នៅ​ដំណាច់​ឆ្នាំ​នេះ​ក្តី។ បញ្ហា​ទាំង​នោះ​រាប់​ទាំង​រឿង​ប្រាក់ខែ​ ស្ថេរភាព​ប្រទេស​ និង​ទីផ្សារ​ការងារ​ ការ​ខ្វះ​ ជំនាញ​ ហើយ​នឹង​ការ​ទទួល​ខុស​ត្រូវ​របស់​រដ្ឋាភិបាល។​ នេះ​ជា​ការ​អះអាង​របស់​លោក​ យឹម ស៊ីណន ​ប្រធាន​សមាគម​ពលករ​ខ្មែរ​ប្រចាំ​ប្រទេស​កូរ៉េខាង​ត្បូង​ហើយ​នឹង ​លោក ​ព្រីង ឆេង ​ពលករ​ផ្នែក​វេច​ខ្ចប់​ផលិតផល​គីមី​ក្នុង​ប្រទេស​កូរ៉េ ​ខាង​ត្បូង។ (សុខ ខេមរា, Hello VOA វេទិកា​អាស៊ាន, វ៉ាស៊ីនតោន/កូរ៉េ​ខាង​ត្បូង)

លោក ជា មុនី ប្រធាន​សហជីព​សេរីកម្មករ​កម្ពុជា​និង​កញ្ញា ង៉ាក សាវឿន តំណាង​កម្មករ​រោងចក្រ​កាត់ដេរ​ F.Y Factory ថ្លែង​ថា ប្រសិន​បើ​មិន​មាន​ជំនាញ​គ្រប់គ្រាន់ នោះ​កម្មករ​រោងចក្រ​កាត់ដេរ​កម្ពុជា​ជិត៧០​ម៉ឺននាក់នឹងក្លាយ​ជា​ឧបសគ្គ​នៃការ​ប្រកួតប្រជែង​ ពេល​កម្ពុជា​ធ្វើ​សមាហរណកម្ម​ទៅក្នុង​សហគមន៍​សេដ្ឋកិច្ច​អាស៊ាន។​ (សុខ ខេមរា, Hello VOA, វ៉ាស៊ីនតោន/ភ្នំពេញ, ២ កក្កដា ២០១៥)

មេដឹកនាំ​ក្រុម​អង្គការ​ធ្វើ​កិច្ចការ​ទាក់ទងនឹង​បញ្ហា​ស្ត្រី​នៅ​កម្ពុជា​គឺ​លោកស្រី ធីតា ឃិះ នាយិកា​អង្គការ​សីលការ (Silaka) ដែល​ចូលរួម​ជា​វាគ្មិន​នៃ​កម្មវិធី​ហេឡូ​វីអូអេ បាន​ទទូច​ឲ្យ​រដ្ឋាភិបាល​កម្ពុជា​បង្កើន​ប្រសិទ្ធិភាព​ក្នុង​យន្តការ​ដែល​មាន​ ស្រាប់ ហើយ​ទទូច​ដល់​ស្រ្តី​កម្ពុជា​ចូលរួម​ក្នុងការ​អភិវឌ្ឍន៍​ប្រទេស​តាម​រយៈ ការអប់រំ និង​រៀនសូត្រ​ពី​ចំណេះដឹង​ស្រប​ទៅ​នឹង​ស្ថានការណ៍ ដើម្បី​ត្រៀមខ្លួន​ ពេល​កម្ពុជា​ធ្វើ​សមាហរណកម្ម​ទៅក្នុង​សហគមន៍​សេដ្ឋកិច្ច​អាស៊ាន​នៅ​ចុង​ឆ្នាំ ២០១៥​នេះ។ (សុខ ខេមរា, Hello VOA, វ៉ាស៊ីនតោន/ភ្នំពេញ, ០៤ មិថុនា ២០១៥)