Beethovenek amildegiaren ertzean dantzatzen du. Hirugarren eta laugarren mugimenduak erritmo eta energia biziz lehertzen dira. Nola bihurtzen da tragedia ospakizun? Atal honetan jakingo dugu Wagnerrek zergatik esan zuen hau ez zela musika, soinu-estasia baizik.

Mundua itzali egiten da Beethovenentzat, baina berak musika entzuten jarraitzen du barru-barrutik. Nola sortzen du, ordea, isiltasunetik? Bakardadetik?Atal honek bere unerik ahulena aztertzen du, eta nola bihurtu zuen mina, hizkuntza unibertsal.

“Zazpigarren Sinfonia” obraren bigarren mugimendua, historiako ezagunenetakoa da. Zergatik hunkitzen gaitu hainbeste? Zer kontatzen digu erritmo malenkoniatsu horrek? Atal honek, belaunaldi asko liluratu dituen enigma musikal baten sekretuak argitzen ditu, XIX. mendetik Netflix aroa arteko bidea eginez.

Ludwig van Beethovenen “Zazpigarren Sinfonia”ren sorkuntzaren kontestu historiko eta pertsonala xehetzen da lehen atal honetan: gerrak edonon, eta musikaria ia erabat gor geratua. Edonola ere, egoera gogor horren aurrean, Beethovenek, itxaropen ezaren aurkako gerra deklarazio bat egiten du maisu-lan hau sortuz. Zehazki, sinfoniaren Allegretto mugimendua aztertzen da, taupaden erritmora sortutako musika hunkigarria.

Uztailaren 10etik aurrera “Hiru, bi, Bach! podcasta eskainiko dizu GUAU plataformak. Gazteak musika klasikora erakartzeko helburua duen proiektua da, musika mota honen sormena nola egituratzen den azalduz.Bost ataletan zehar, Ludwig van Beethovenen “Zazpigarren Sinfonia” puzzle bat bailitzan zatikatzen da, gor geratzen ari zen musikariak obraren sormena nola egituratu zuen azalduz. Mundu mailan ezagunenetakoa da “Zazpigarrena”, eta ehunka bertsio ditu musika estilo guztietan.Musikari gazteak aurkezle eta protagonista dituen proiektua EITB Mediak EGO, Euskal Herriko Gazte Orkestrarekin elkarlanean sortutakoa da. ULU Mediak egin du podcastaren ekoizpena.