Liburuaren eguna gure tsundokuak desegiten ospatu nahi dugu.

Etenik ez duen liburuen pilaketa (eta irakurri ezina) azaltzeko asmatu zen Tsundoku hitz japoniarra. Zuk ere ziur badituzula hamaika liburu irakurtzeke. Gipuzkoako liburu-denden elkartetik zure liburu-dendari itxaroteko deia egiten dute. Ez erosi Amazon bezalako etxe handiei.

Arantza Urkia Liburutegi Zerbitzuen zuzendariak liburuaren egunerako prestatutako egitarauaren berri emango digu. Adolfo López Gipuzkoako Liburu-denden presidenteak, berriz, liburu-denden etorkizunaz hitz egingo digu. Eta gure kolaboratzaile den Tobacco Days liburu-dendako Ines Garcia Azpiazuk azalduko digu zer den liburuaren eguna, feriarik gabe.

Gainera, Fernando Savater idazle eta filosofoarekin hitz-aspertuan ariko gara, eta Harkaitz Canok bere ganbarako ateak zabalduko dizkigu.

Amaitzeko Beñat Hach Embareken Salabardoa eta Anartz Bilbaoren Urpeko Bonbarda, eguna musikarekin amaitzeko.

Jarri kaskoak eta entzun!

Sortzaileen greba digitalaren bigarren eta azken eguna gure museoetako arduradunekin hitz egiteko probestu dugu. Zertan dira? Eta garrantzitsuagoa: zein izango da haien lekua datorren mundu berrian?

San Telmo Museoko zuzendari Susana Sotorekin, Chillidalekuko Mikel Chillidarekin eta Gipuzkoako Gordailuko Karlos Olaetxearekin hitz egin dugu galdera horiei erantzuna topatzen saiatzeko. Horrez gain Parisekin egin dugu konexioa.

Parisen baita Miren Arzalluz Palais Galliera moda museoko zuzendaria. Museoa zabaltzekoak ziren apirilaren hasieran, berritze lanak amaituta; baina Covid-19a dela eta, dena bertan behera utzi behar izan dute.

Amaitzeko Beñat Hach Embarek kazetariak greba digitala izango du hizpide eta Anartz Bilbaok Nina Simoneren mundura gerturatuko gaitu Urpeko Bonbardan.

Jarri kaskoak eta entzun.

Etxean sartuta daramatzagu egun asko. Haurrak kalera atera gabe. Eskolara joan gabe. Maite ditugunak zaintzeko garaia da. Eta lana ere egiten dugu gero. Egunak amaitu egiten dira. Bata bestearen atzetik. Eta borroka bihurtu da gu geu ez amaitzea. Imaginatzen garaiok, libururik gabe? Musikarik gabe edo antzerkirik gabe? Eta zinemarik gabe? Gaur eta bihar greba digitala egingo dute Euskal Herriko sortzaile eta kulturgileek eta gure saioan Donostiako antzoki txikien egoerari erreparatuko diogu Daba Dabako Alex López Allende eta Doka Kafe Antzokiko Mikel Romanekin.

Gainera, Harri Fernandez liburuaren egunera begira jarriko da bere kultur periskopioarekin. Eta Beñat Hach Embarekek fotokazetaritzaz hitz egingo digu.

Amaitzeko Anartz Bilbaok urpeko bonbarda berezia prestatu du gaurko saiorako.

Bizitzen ari garenak thriller distopiko baten antza badu ere, ez da pelikula bat. Errealitatea da, gordin gordina. Donostiako zinema aretoek ateak itxi zituzten martxoaren 13an, eta badirudi urte amaierara arte ezingo dituztela berriz zabaldu. Pelikulen estreinaldiak atzeratu egin dira, jaialdiak bertan behera utzi, eta beldurgarria da etorkizuna asmatzen jartze hutsa.

Testuinguru honetan Iñaki Elorza Sade zinemen zuzendariarekin hitz egin dugu, aretoen egoeraz eta baita ere 'Etxebegiak' labur lehiaketaz. Iluntasunean piztu den poxpolo bat da Sade zinemek martxan jarri duten 'Etxebegiak' laburmetraia lehiaketa. Familiek etxean labur bat egiten ikasteko tailerra eta lehiaketa.

Gainera, Koldo Almandoz, Jon Garaño eta Izaskun Arandia zinemagileen etxeetara gerturatu gara. Bakoitzak pelikula bat gomendatu digu etxealditik ihes egiteko.

Beñat Hach Embarek kazetariak The New Yorker-ek artistei eskatutako hiri hutsen ilustrazioak ekarriko ditu gaurko saiora, eta aitzaki hori baliatuz Donostia eta New Yorken arteko konexioa egingo dugu Elizabeth Macklin The New Yorker-eko editore ohiarekin eta Kirmen Uribe idazlearekin. Azken honek konfinamenduan idatzitako poema bat irakurriko digu.

Gainera, Aitziber Garmendia aktorearekin hitz egingo dugu DK Etxean ekimenaren baitan egin duen 'Zortzirak' antzezlanaren inguruan. Eta Tobacco Days liburu-dendako Ines Garcia Azpiazuk liburu bat gomendatuko digu astebururako.

Jarri kaskoak eta entzun!

Saio espeziala da honakoa, hiru musikariren etxeetako ateak joko ditugulako pandemia garaiotan zertan diren jakiteko: Olatz Salvador, Joserra Senperena eta Joseba Irazoki. Hausnarketarako garaiak direlako, eta sortzekoak ere bai.

Gainera, Bingen Zupiria Eusko Jaurlaritzako Kultura Sailburua elkarrizketatu dugu iragarri duten sortzaile eta kulturgileentzako oinarrizko errentaz hitz egiteko, besteak beste.

Gotzon Barandiaranek apirilaren 21 eta 22arako deitu den grebaren gakoak azalduko dizkigu. Dagoeneko 400 sortzailetik gora dira grebaren dokumentua sinatu dutenak.

Beñat Hach Embarekek Salabardoan Berria egunkariaren erresistentzia kutxaz hitz egingo digu eta, azkenik, Urpeko Bonbardan, Anartz Bilbaok Rafael Berrio omenduko du bere kantetan zehar bidaia eginaz.

Jarri kaskoak eta entzun!

Pandemia garaiak salbuespenezko egoera batera eraman gaitu. Eta galdera bat datorkigu burura: Kulturgintza oinarrizko zerbitzu publikoa ote da? Erantzuna desberdina da herrialdearen arabera. Belgikan, Alemanian edo Italian baietz iritzi dute, eta Espainiar zein Frantziar Estatuan, berriz, ezetz. Gure liburu-dendak itxita daude. Egoera honetan liburugintzaren katebegiekin hitz egingo dugu; Garoa liburu-dendako Imanol Agirrerekin liburuaren egunerako martxan jarri duten ekimen interesgarri bat aipatzeko, Susa Argitaletxeko Leire Lopez eta Elkar argitaletxeko Olatz Osarekin, aldiz, editoreen aburua jasotzeko.

Horrez gain, Donostia Kulturako zuzendari Jaime Otamendik DK Etxean egitasmoaz hitz egingo digu. Beñat Hach Embarek eta Anartz Bilbao ere izango ditugu egunero bezala.

Jarri kaskoak eta entzun!

Rafael Berriok halaxe utzi zuen idatzita Paradoja diskoko 'Yo ya me entiendo' abestian. Patua izaerak eraikitzen du. Ez dakit zein den gure patua, baina, honaino ekarri gaitu: DK irratian kultur magazin bat hasteraino. ISPILU BELTZA deitu diogu, beste garai batzuetan artista eta errariek poltsikoan zeramaten ispilu txiki tolesgarriari keinu eginaz. Haren bidez islatzen zena ederrago, eta gordinago, ikusten zuten. Piktorikoago. Guk donostiako ekosistema kulturalari erreparatuko diogu. Kultura modu zabal bezain zintzo batean ulertuta. Saio honetan Harri Fernandez kazetariari galdetuko diogu ea nola demontre egiten den egunkari bateko kultur saila garai malapartatuotan. Gainera Beñat Hach Embarekekin salabardoa sartuko dugu interneten, azken kontuen bila eta amaitzeko Anartz Bilbaoren Urpeko Bonbarda musika saioa estrenatuko dugu.