Dasmal zemme mit de Nina (@quasigurus), dGründerin vo Lipboom & Bleachme. E sehr gueti kollegin, e Macherin, en Sunshine uf zwei Bei wo en Teil vo minere family isch. Nina verzellt über die erste Schritt ih de Businesswelt und das bereits mit 19ii, mir redet über eusi Fründschaft, über dLiebi und no vieles meh, teilwiis au überraschendi Themene..

En würki bsundrige Gast: De Chris oder wie ich ihn nenne Chrigi, eine mine engste Fründe. Er het als Kind grossi Aggressionsproblem gha und verzellt wie er hüt mit dene Gfühl umgaht. Zudem isch er langjährige Thaiboxkämpfer gsie und het 46 Kämpft bestritte. Chrigi verzellt wie er zum Sport cho isch, was ihm de Sport git und vorallem was ihm das Wort "Selbstreflexion" bedütet.

Jessy isch lideschaftlichi Personaltrainerin und verzellt im Gspröch über ihri Vergangeheit und die Problem wo sie zbewältige gha het. Riese Ruum im Gspröch nimmt sicher d`Essstörig ih, sie verzellt wies dezue cho sich, was sie alles dagege gmacht het und wie sie hüt demit umgaht.

Jetzt redemer mit de Vale! Eusi Hassliebi zunenand bestaht scho lang und aktuell e chli meh Liebi als Hass. Sie isch e langjährigi Kollegin, zweifachi Muetter, e Stimmigsmacherin und no so viel meh. Vale verzellt übers Mami sii, über ihri Art vo Erzihig und öppis wo anschinend nur 2% de Bevölkerig wüsset. LETS GO!

Das Video isch ufgno worde am 30.7.23. De Luci und ich kennet eus vom Kampfsport und sind durs BJJ gueti Kollege worde. Er verzellt wie er zum Sport cho isch, de Weg zum Kampfsport und wies dass das BJJ sis Lebe "grettet" het. Mir redet zudem über Egoproblem, über s`Vater sie und über ungueti gfühl wo er verspürt het und die ih de Gsellschaft tabu sind. Selbstverständlich werdet ih dene über 2h au über anderi themene gredet wie z.B d Polizei, über alti Gschichte, Fitness und vieles meh. De Luci isch e riese Persönlichkeit und ich bin mega froh hemmer das Gspröch ufgno. Viel Spass :-)

Humberto und ich kennet eus vom schaffe. "Er isch Spanier süsch, falls ihn bi Rasse wetsch nenne." Erst vor churzem het er chli verzellt über sin Ihsatz in Afghanistan. Drufabe simmer grad is Studio und hend det witer drüber gredet, will mirs mit eu hend welle teile. Wie muess me sich das vorstelle im Krieg? Ischs wie ih de Film oder gseht d`Realität anderst us? Wie isch es dezue cho, wie gahts ihm jetzt, was het er alles erlebt, het er sich veränderet und wür er wieder zurück? Loset ine...

Hüt mitm Faton, de Sunneschii us eusem Gfängnis! En Mensch mit viel Humor, Respekt & Nöchsteliebi. Mir redet über de Islam, Faton isch praktizierende Moslem & ich bin nöd religiös. Trotzdem simmer gueti Fründe, unterstützet eus gegesitig und respektieret dem andere sin Lebensstil vollumfänglich. Paar Themene schnidemer ah, gönd aber nonig all zu tüüf id Marterie, das gern es anderes mal, wenn Interesse vo eu bestaht. Mir sötted nöd das glaube, wo eus dMedie versuechet ih euse Kopf zsetze, sondern eus eh eigeni meinig bilde, basierend uf euse Erfahrige, en gsunde Wissensdurst und de Ustusch mit verschiedene Mensche und ihrne Ahsichte. Angst empfindemer denn, wenn öppis unbekannt isch! Toleranz und Respekt isch das A und O ih de gsellschaft und sött bi JEDEM ah erste Stell cho. Alles andere isch Hafechääs…

Erstmal Sorry fürs Video/ de Schnitt, und de Ton, dass isch die erst Folg wo für JetztRedetMir je ufgnoh worde isch! Has es super Gspröch gfunde und trotzdem mit eu welle teile. De Zammim isch min Gast und ich bin super happy drüber. Es wird FIX nöd sletzte Mal sie wo er zGast isch im Podcast. Mir hend e mega gwünnbringendi Fründschaft und hend immer super tüfgründigi Gspröch. Zur Abwechslig tuen ich mal es paar Frage vo mim Gast beantworte. Hauptthema: STOIZISMUS im Alltag. Was isch Stoizismus? Churz gfasst: Lah nöd dini Gfühl dis Lebe kontrolliere, sondern erlern die Kontrolle über dini Gfühl und nimm Situatione ah wo du eh nöd chasch ändere/beihflusse. Sicher de eint oder ander Tipp debi, wo dir mitneh chasch! Viel Spass mitenand!