Chiap-sio̍k téng hôe teh kóng chêng-sū chiòng-gāi ê hoat-chok, chit hôe beh iau-chhiáⁿ ta̍k-ke lâi se̍k-sāi “ut-chèng”. Ut-chèng-hoat-chok m̄-sī kan-na tan-sûn sim-chêng ut-chut niā-niā. Ut-chèng sū-si̍t-siōng sī seng-lí in-sò͘ chiâⁿ tāng ê pēⁿ-chèng. Hoān-chiá ê ho͘-lú-bóng, bián-e̍k, kap náu-sîn-keng hē-thóng kî-si̍t lóng ū piàn-hòa. Tī-liâu mā ū chin chē mê-kak. Siōng iàu-kín sī lán ài iōng siáⁿ-mih thāi-tō͘ lâi kā hoān-chiá chi-chhî. Ǹg-bāng thiaⁿ-chiòng ē-sái tùi chit hôe chiat-bo̍k ke-kiám-á liáu-kái ut-chèng ê pún-chit.

Lán ê podcast chóng-sǹg koh khí-kiâⁿ—lo͘h. Si̍t-chāi sī chit chām-á sin-thé bô kài hó-sè, sim-chêng tòe leh bô sóng-khoài. Soah hioh-khùn pí pún-lâi phah-sǹg—ê khah kú. Lán lâng ê sim-chêng chū-liân sûi-tio̍h lán ê keng-giām ū khí-lo̍h piàn-hòa, m̄ koh nā chhiau-kòe it-tēng ê hoān-ûi, hêng-ûi kap su-khó khó-lêng ē ū chin tōa ê piàn-hòa, hō͘ lâng kám-kak piàn chi̍t-ē lâng, sīm-chì éng-hióng tio̍h ji̍t-siông seng-oa̍h. Chit hôe lán chò-hóe lâi liáu-kái tàu-té chêng-sū piàn-hòa kàu siáⁿ-mih thêng-tō͘ ē sǹg sī pēⁿ-thài ê chiòng-gāi.

Kòe-nî chêng siōng bóe chi̍t hôe, lán sió hioh-chhoán chi̍t-ē. Kā ta̍k-ke hun-hióng chiat-bo̍k pháng kàu taⁿ siu-tio̍h—ê thiaⁿ-iú ì-kiàn. Sūn-sòa hun-hióng góa tùi choan-iú-sû hoan-e̍k ê khòaⁿ-hoat.

Chit hôe lán lâi pó͘-chhiong su-kak-sit-tiâu-chèng ê pēⁿ-in, pí-lû seng-bu̍t-ha̍k siong-koan ê chèng-kù. Sian-thian kap hō͘-thian ê in-sò͘ lóng kài tiōng-iàu. Mā ē kán-tan kái-soeh su-kak-sit-tiâu-chèng tī-liâu kòe-têng ê chi̍t-kóa mê-kak.

Chiap-sio̍k lán téng chi̍t hôe thó-lūn ê cheng-sîn-pēⁿ, lán chit hôe beh lâi chò-hóe liáu-kái su-kak-sit-tiâu-chèng, tiō sī í-chá kiò-chò cheng-sîn-hun-lia̍t-chèng ê ki-chhó͘ tì-sek. Chit ê pēⁿ ē ū siáⁿ-mih piáu-hiān, hoat-pēⁿ liáu khó-lêng ê piàn-hòa, koh ū tn̂g-kî tī-liâu ê tiōng-iàu.

Bêng-khak ê chèng-thâu biâu-su̍t ē-sái kóng sī cheng-sîn i-ha̍k ê ki-chhó͘ Liáu-kái lîn-lūi ê cheng-sîn ū khó-lêng sán-seng siáⁿ-mih khoán ê piàn-hòa, ē-sái hō͘ lán sióng-siōng hoān-chiá ê keng-giām. Chit hôe lán beh lâi kóng it-poaⁿ lâng hán-tit ū keng-giām kòe ê chèng-thâu, tiō sī pau-koat hoàn-kak, bōng-sióng, su-khó hêng-sek chiòng-gāi ê cheng-sîn-pēⁿ.

Chòe-kīn ū chi̍t-kóa pêng-iú hòⁿ-kî lán ūi-siáⁿ-mih ài iōng Tâi-gí lâi kóng cheng-sîn-i-ha̍k ê tāi-chì. Só͘-pái chit-hôe beh lâi kóng pún chiat-bo̍k chè-chok pōe-āu ê chi̍t-kóa siūⁿ-hoat. Pau-koat góa kò-lîn o̍h Tâi-gí-bûn ê keng-giām, koh ū tùi tong-chiân Tâi-gí khoân-kéng ê khòaⁿ-hoat. Góa m̄ sī chia̍h-pá siūⁿ êng, sī līn-ûi lán Tâi-oân-lâng chiâⁿ su-iàu khah chē choân Tâi-gí ê mûi-thé kap ha̍k-su̍t chu-goân. Hi-bāng ta̍k-ke nā-ū tông-ì góa ê khòaⁿ-hoat, chò-hóe lâi iōng Tâi-gí-bûn līn-bat chit-ê sè-kài.

Thiaⁿ kóng cheng-sîn-kho hō͘-sū chi̍t kang chò tiám-pòaⁿ-cheng tio̍h hó？Kám ū-iáⁿ hia khin-sang？Cheng-sîn-kho ê choan-gia̍p beh án-chóaⁿ kap hoān-chiá poa̍h kám-chêng？Kî-si̍t hó ê tī-liâu koan-hē m̄-nā hō͘ hoān-chiá khah phòe-ha̍p, choan-gia̍p khah khin-sang, i pún-sin mā ū tī-liâu ê hāu-kó o͘h！

Chiap-sòa téng-hôe kóng—tio̍h cheng-sîn-kho ê tī-liâu, sim-lí-tī-liâu mā sī hui-siông tiōng-iàu ê goân-sò͘. Sim-lí-tī-liâu kám lóng ài chhiūⁿ tiān-iáⁿ toh tī phòng-í bīn-téng kóng-ōe？Kám kóng khai-káng pēⁿ tiō ē hó？Chit hôe lâi thiaⁿ sim-lí-tī-liâu tàu-té sī lōa sîn-bi̍t.

Phòa-pēⁿ tong-liân tiō ài chhōe hong-hoat lâi i, m̄ koh cheng-sîn ê būn-tê beh án-chóaⁿ chhú-lí? Chia̍h io̍h-á kám m̄ sī tùi sin-thé bô hó? Tû-liáu chia̍h io̍h-á í-gōa koh ū siáⁿ-mi̍h hong-sek thang i? Chit hôe lâi kán-tan siāu-kài tī pēⁿ-īⁿ ê cheng-sîn-kho ū hoat-tō͘ chò ê tī-liâu, koh ū io̍h-bu̍t ê ki-pún tō-lí.