ស្របពេល​ដែល​អត្រា​ឆ្លង​ថ្មី​នៃ​ជំងឺ​កូវីដ ១៩ នៅ​តែ​ខ្ពស់​ គឺ​ក្នុង​ចន្លោះ​ប្រមាណ ៤០០នាក់ ទៅ ៦០០​នាក់​ក្នុង​មួយ​ថ្ងៃ មន្ត្រី​សុខាភិបាល​កម្ពុជា​ក៏​កំពុង​បង្កើន​សកម្មភាព​យក​សំណាក​ពី​ប្រជាពលរដ្ឋ​រាប់​ពាន់នាក់ ជាពិសេស​ពលរដ្ឋ​រស់​នៅ​ក្នុង​តំបន់​ក្រហម​នៃ​ទីក្រុង​ភ្នំពេញ​ ដើម្បី​ធ្វើ​តេស្ត​រក​វីរុស​កូរ៉ូណា ដែល​បង្ក​ជា​ជំងឺ​កូវីដ ១៩ ដោយ​ប្រើ​ប្រាស់​ឧបករណ៍​ធ្វើ​តេស្ត​រហ័ស​ឈ្មោះ Rapid Antigen Test Covid-19។ កាលពី​ថ្ងៃ​ទី ២២ ខែមេសា ក្រសួង​សុខាភិបាល​កម្ពុជា ក៏​បាន​អនុញ្ញាត​ឲ្យ​ក្រុម​អ្នក​ជំនាញ​សុខាភិបាល​ពី​វិស័យ​ឯកជន ចូលរួម​សកម្មភាព​ធ្វើ​តេស្ត​យក​សំណាក​ពី​ពលរដ្ឋ ដោយ​ប្រើ​ប្រាស់​ឧបករណ៍​ធ្វើ​តេស្ត​រហ័ស​ Rapid Antigen Test Covid-19 ដើម្បី​ជួយ​ពន្លឿន​សកម្មភាព​ធ្វើ​តេស្ត​ក្នុង​ក្រុង​ភ្នំពេញ និង​ទប់ស្កាត់​ការ​ឆ្លងរាលដាល​បន្ថែម​ទៀត៕

កាលពី​ថ្ងៃ​ច័ន្ទ រាជរដ្ឋាភិបាល​កម្ពុជា​បាន​សម្រេច​បន្ត​វិធានការ​បិទ​ខ្ទប់ក្រុងនេះ និង​ក្រុង​តាខ្មៅ​នៃ​ខេត្ត​កណ្តាល រយៈពេល ១ សប្តាហ៍​ទៀត ដើម្បី​ព្យាយាម​ទប់ទល់​នឹង​ការ​ឆ្លង​ជំងឺកូវីដ១៩ ដែល​កំពុង​រាលដាល​ខ្លាំង រហូត​ដល់​ថ្ងៃទី ៥ ខែ​ឧសភា។ សេចក្តី​ប្រកាស​របស់​រាជរដ្ឋាភិបាល​កម្ពុជាក៏​បាន​បញ្ជាក់​ថា បើ​សិន​ជាការ​វិវត្ត​នៃ​ការ​ឆ្លង​រាលដាល​នៃ​ជំងឺកូវីដ ១៩ ក្នុង​ក្រុង​ភ្នំពេញ មិនមាន​ភាព​ប្រសើរ​ឡើង នោះ​វិធានការ​ដាក់​រាជធានី​ភ្នំពេញ ឲ្យ​ស្ថិត​ក្នុង​ស្ថានភាព​បិទខ្ទប់​នេះ អាច​នឹង​ត្រូវបាន​បន្តទៀត៕

រាជធានី​ភ្នំពេញ ត្រូវបាន​បិទខ្ទប់​រយៈពេល​២​សប្តាហ៍ តាំងពី​មុន​ពេល​ចូលឆ្នាំ​ប្រពៃណី​ខ្មែរ​ដោយសារ​ការឆ្លង​វីរុស​កូរ៉ូណា​កើនឡើង​យ៉ាងខ្លាំង ដោយនៅ​ថ្ងៃ​ខ្លះ​ឆ្លង​ឡើង​ដល់​ជាង​៦០០​នាក់​ក្នុង​១ថ្ងៃ។ លោក ឱក សេរីសោភក្តិ៍ អ្នក​ឯកទេស​អភិបាលកិច្ច​ល្អ បាន​បញ្ជាក់​ក្នុង​កម្មវិធី Hello VOA នៅ​ថ្ងៃចន្ទ​ថា កត្តា​ជីវភាព​ជារឿង​សំខាន់​ដោយសារ​តែ​ពលរដ្ឋ​ជាច្រើន​រស់នៅ​ក្បែរ​នឹង​បន្ទាត់​នៃ​ភាពក្រីក្រ​ដែល​ធ្វើ​ឲ្យ​ពួកគាត់​ងាយ​រងគ្រោះ។ លោក​យល់​ថា កម្ពុជា​មាន​ធនធាន​តិចតួច​ហើយ​អាជ្ញាធរ​ក៏​ឆាប់​ខ្សោះ​ខ្យល់​ដោយ​សារ​តែ​វិបត្តិ​សុខភាព​ដែល​មិនធ្លាប់​ជួបពីមុនមក ប៉ុន្តែ​លោក​ស្នើ​ឲ្យ​យោគយល់​និង​សណ្តោស​ពលរដ្ឋ​ក្នុង​ការអនុវត្ត​វិធានការ​បិទខ្ទប់​ដើម្បី​ឲ្យ​មាន​ការចូលរួម​អនុវត្ត​ជាជាង​ការប្រើ​ហិង្សា៕

រាជធានីភ្នំពេញត្រូវបានបិទខ្ទប់ចាប់តាំងពីថ្ងៃទី ១៥ ខែមេសាមក រហូតដល់ថ្ងៃទី ២៨ ខែមេសា ដើម្បីទប់ស្កាត់ការរាលដាលជំងឺកូវីដ១៩។ ទីក្រុងដែលមានមនុស្សកកកុញ និងចរាចរណ៍ស្ទះស្ទើរតែរាល់ថ្ងៃ ប្រែក្លាយជាកន្លែងស្ងប់ស្ងាត់។ ក៏ប៉ុន្តែការធ្វើដំណើរចាំបាច់មួយចំនួន ក៏ត្រូវបានអនុញ្ញាតដោយកងកម្លាំងការពារ ប្រសិនបើមានលិខិតអនុញ្ញាតពីអាជ្ញាធរពាក់ព័ន្ធ។ លោក ស៊ុន ណារិន មានសេចក្តីរាយការណ៍ឲ្យវីអូអេពីរាជធានីភ្នំពេញ៕

រលកទី ៣ នៃការឆ្លងវីរុសកូរ៉ូណានៅប្រទេសថៃ បានបង្កបញ្ហាប្រឈមដល់ពលករខ្មែរ ដែលធ្វើចំណាកស្រុកដោយខុសច្បាប់ និងកំពុងធ្វើការក្នុងប្រទេសថៃ។ នេះបើតាមការអះអាងរបស់សកម្មជនការពារសិទ្ធិពលករ។ លោក សុន សីហា ប្រធានមូលនិធិពលករខ្មែរប្រចាំប្រទេសថៃ បានបញ្ជាក់ក្នុងកម្មវិធីហេឡូវីអូអេថា ការណ៍នេះដោយសារអាជ្ញាធរថៃតម្រូវឲ្យអ្នកដែលមិនមានឯកសារស្នាក់នៅ ឲ្យធ្វើបំពេញក្រដាសស្នាមនិងត្រូវធ្វើឲ្យទាន់ពេលដែលតម្រូវឲ្យបង់ថវិកាជាច្រើន ខណៈពេលដែលពួកគាត់ខ្លះធ្វើការមិនបានពេញម៉ោង និងខ្វះខាតប្រាក់ចំណូល៕

អ្នកឃ្លាំមើលផលប៉ះពាល់នៃគម្រោងអភិវឌ្ឍន៍និងសិទ្ធិសហគមន៍មូលដ្ឋាននៅកម្ពុជា លើកឡើងថា រដ្ឋាភិបាលគួរតែធានាថាគម្រោងអភិវឌ្ឍន៍នៅតំបន់ឆ្នេរខេត្តកែបនិងកំពត មិនប៉ះពាល់ធ្ងន់ធ្ងរដល់សហគមន៍នេសាទចំនួនពីរ ដែលមានពលរដ្ឋជិត ១៥០០ គ្រួសាររស់នៅក្នុងតំបន់នោះ។ លោក សាយ មុន្នី បានសម្ភាសន៍លោក វណ្ណ សុផាត អ្នកសម្របសម្រួលគម្រោងដីធ្លីនិងធនធានធម្មជាតិតំបន់ឆ្នេរនៃមជ្ឈមណ្ឌលសិទ្ធិមនុស្សកម្ពុជា ក្នុងកម្មវិធី Hello VOA កាលពីថ្ងៃច័ន្ទ ទី ១២ ខែមេសាឆ្នាំ ២០២១៕

អ្នកតស៊ូមតិដើម្បីគណនេយ្យភាពសង្គមនៅកម្ពុជា លើកឡើងថា ការស៊ើបអង្កេតលម្អិតមួយគួរត្រូវបានធ្វើឡើងដើម្បីស្វែងរកឬសគល់នៃបញ្ហាពុករលួយដែលអាចបណ្តាលឲ្យមានការឆ្លងរាលដាលនៃជំងឺកូវីដ១៩យ៉ាងធ្ងន់ធ្ងរក្នុងប្រទេសកម្ពុជាបច្ចុប្បន្ន។ លោក សាយ មុន្នី នៃវីអូអេ បានសម្ភាសន៍លោក សន ជ័យ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា នៅក្នុងកម្មវិធី Hello VOAកាលពីថ្ងៃព្រហស្បតិ៍ទី៨ ខែមេសា ឆ្នាំ ២០២១៕

នៅថ្ងៃព្រហស្បតិ៍នេះ មាន​ការ​ដាក់​ពង្រាយ​កម្លាំង​ប៉ូលិស​និង​នគរបាល​មាន​សមត្ថកិច្ច នៅតាម​ដង​ផ្លូវ​ជាច្រើន​ ដើម្បី​ត្រួតពិនិត្យ​ការ​ធ្វើ​ដំណើរ​ក្នុង​ក្រុង បន្ទាប់​ពី​រដ្ឋាភិបាល​បាន​ដាក់​និង​អនុវត្ត​វិធានការ​បិទ​ខ្ទប់​ភូមិសាស្ត្រ​នៅរាជធានី​ភ្នំពេញ និង​ក្រុង​តាខ្មៅ​នៃ​ខេត្ត​កណ្តាល ដើម្បី​ទប់ស្កាត់​ការ​ឆ្លង​រាលដាល​កាន់​តែ​ខ្លាំង​ឡើឹង​នៃ​ជំងឺ​កូវីដ ១៩៕

ក្នុង​នាម​ជាជនជាតិ​ខ្មែរ​ម្នាក់ លោក ម៉ន វ៉ាន់ថាត បាន​ប្រឈម​មុខ​នឹង​គ្រា​លំបាក​ជាច្រើន​ក្នុង​ជីវិត រាប់​តាំង​ពី​ការ​រត់​គេចពី​អំពើ​ប្រល័យ​ពូជសាសន៍​ខ្មែរ​ក្រហម រហូត​ដល់​ការ​សិក្សា ដើម្បី​ក្លាយ​ជា​គិលានុបដ្ឋាក​ម្នាក់​នៅ​សហរដ្ឋ​អាមេរិក។ ក្នុង​នាម​ជា​គិលានុបដ្ឋាក​អស់​រយៈពេល ១៥ឆ្នាំ លោក វ៉ាន់ថាត និយាយ​ថា​ការ​រាតត្បាត​ជំងឺ​កូវីដ១៩ គឺ​ជា​បញ្ហា​ប្រឈម​ដ៏​លំបាក​បំផុត​របស់​លោក។

វត្ត​អារាម​ទូង​ស្គរ​ និង​គង​ដើម្បី​ដាស់តឿន​អំពី​ជំងឺ​កូវីដ១៩​ នៅ​ពេល​ការ​រាតត្បាត​នៃ​ជំងឺ​កូវីដ១៩​កើន​ឡើង ​និង​មាន​មនុស្ស​ស្លាប់​ដោយ​សារ​ជំងឺ​នេះ ប្រទេស​កម្ពុជា​បាន​ចាប់​ផ្តើម​ប្រើ​វិធី​តាម​បែប​ប្រពៃណី​ក្រើន​រំឭក​អំពី​គ្រោះថ្នាក់​នេះ​ដោយ​ទូងស្គរ​និង​គង​តាម​វត្តអារាមតាម​បញ្ជា​របស់​លោក​នាយក​រដ្ឋមន្ត្រី ​ហ៊ុន សែន។ ​ទីភ្នាក់ងារ​ព័ត៌មាន​ Reuters​ រាយការណ៍​លម្អិត។ ​លោក ​ពិន ស៊ីសុវណ្ណ​ ជូន​សេចក្ដីប្រែសម្រួល។