ទឹក​ទន្លេ​មេគង្គ​ហូរ​ធ្លាក់​ចូល​ទន្លេសាប​យឺត​សម្រាប់​ឆ្នាំ​នេះ។ កាល​ពី​ដើម​ឡើយ ក្នុង​ខែ​មិថុនា ទឹក​ទន្លេសាប​ចាប់​ផ្តើម​ឡើង ហើយ​មក​ដល់​ខែ​សីហា​នេះ ​ជាធម្មតា​ ទឹក​ហក់​ឡើង​ខ្ពស់​ទៅ​ហើយ។ ប៉ុន្តែ​ឆ្នាំ​នេះ ទឹក​ទន្លេសាប​ប្រែ​ប្រួល​ខ្លាំង។ ការ​ផ្លាស់​ប្តូរ​របប​ទឹក​ទន្លេសាប​នាំ​ឲ្យ​ពលរដ្ឋ​កាន់​តែ​ព្រួយ​បារម្ភ​អំពី​ផល​នេសាទ​ធ្លាក់ចុះ។ លោក ស៊ុន ណារិន នៃវីអូអេ រាយការណ៍​ពីឃុំ​កំពង់​ហ្លួង ខេត្ត​ពោធិ៍សាត់៕

កង្វល់​អំពី​វីរុស​កូរ៉ូណា​មិន​អាច​បំភ័យ​សប្បុរសជន​ខ្មែរ​អាមេរិកាំង មិន​ឲ្យ​មក​ជួប​ជុំ​គ្នា​ចូល​បច្ច័យ​ជាវ​វត្ត សម្អាត​វត្ត​ថ្មី​នោះ​ទេ ក្រោយពី​ព្រះសង្ឃ ប៊ុត ប៊ុនតិញ គ្មាន​វត្ត​គង់​ព្រោះ​វត្ត​មួយ​ចំនួន​នៅ​ស.រ.អា. មិន​អនុញ្ញាត​ឲ្យ​ព្រះអង្គ​គង់​ដោយសារ​តែ​ព្រះអង្គ​ធ្វើ​សកម្មភាព​នយោបាយ។ លោក ពិន ស៊ីសុវណ្ណ រាយការណ៍​ពី​ទីក្រុង Ayer រដ្ឋ​ម៉ាស្សាឈូសេត៕

ការដុត​គោ​យន្ត​របស់​ប្រជា​ពលរដ្ឋ​ដឹក​ឈើ ដែល​ពលរដ្ឋ​ថា ជា​ឈើ​សម្រាប់​ធ្វើ​អុស ​នោះ​នាំ​ឲ្យ​មាន​ការ​រិះគន់​យ៉ាង​ខ្លាំង​លើ​អង្គការ​សម្ព័ន្ធ​មិត្ត​សត្វ​ព្រៃ​ (Wildlife Alliance) ​ដែល​ជា​ដៃ​គូ​សហការ​របស់​ក្រសួង​បរិស្ថាន​ក្នុង​ការ​ការពារ​ព្រៃឈើ​ក្នុង​តំបន់​ជួរ​ភ្នំ​ក្រវាញ។​ ប្រជា​ពលរដ្ឋ​ដែល​រង​គ្រោះ​ក្នុង​ភូមិ​ដាច់​ស្រយាល​មួយ​ក្នុង​ខេត្ត​ពោធិ៍សាត់ ​អះអាង​ថា​ ​សកម្មភាព​ដុត​គោយន្ត​នេះ​«ហួស​ហេតុ»​នាំ​ឲ្យ​ជីវភាព​របស់​ពួក​គេ​កាន់​តែ​លំបាក។ អង្គការ​ការពារ​ព្រៃ​ឈើ​មួយ​នេះ​បាន​ទទួល​ស្គាល់​កំហុស​ចំពោះ​ការ​ដុត​គោយន្ត​នេះ ប៉ុន្តែ​លើក​ឡើង​ថា ពួក​គេ​មាន​បំណង​ការពារ​ព្រៃឈើ ​ព្រោះ​ការ​កាប់​ឈើ​មិន​មែន​សម្រាប់​ធ្វើ​អុស​ដុត​នោះ​ទេ។ លោក ស៊ុន ណារិន នៃវីអូអេ រាយការណ៍​ពី ឃុំស្វាយស ខេត្តពោធិ៍សាត់ នៃប្រទេសកម្ពុជា៕

មន្ត្រី​សហភាព​អឺរ៉ុប​បាន​ថ្លែង​ថា ទណ្ឌកម្ម​សេដ្ឋកិច្ច​ដោយ​យក​ពន្ធ​ចំនួន ២០ភាគរយ លើ​ទំនិញ​កម្ពុជា នឹង​ចូល​ជា​ធរមាន​នៅ​ថ្ងៃពុធ ទី១២ ខែសីហា​នេះ បន្ទាប់ពី​គ្មាន​សមាជិក​សហភាព​អឺរ៉ុប​ណា​ម្នាក់​ជំទាស់​នឹង​ការសម្រេច​របស់​គណៈកម្មការ​អឺរ៉ុប។ ការដាក់​ទណ្ឌកម្ម​នេះ ដោយសារ​គណៈកម្មការ​អឺរ៉ុប​បាន​រក​ឃើញ​ថា ប្រទេស​កម្ពុជា​បាន​រំលោភ​យ៉ាងធ្ងន់ធ្ងរ​និង​ជា​ប្រព័ន្ធ​លើ​សិទ្ធិ​ពលរដ្ឋ សិទ្ធិ​ការងារ សិទ្ធិ​នយោបាយ និង​សិទ្ធិ​លំនៅដ្ឋាន ជាដើម។ លោក សម រង្ស៊ី ប្រធាន​ស្តីទី​គណបក្ស​សង្គ្រោះ​ជាតិ​បញ្ជាក់​ប្រាប់​វីអូអេ​ថា រដ្ឋាភិបាល​កម្ពុជា​មិន​បាន​ធ្វើ​សកម្មភាព​អ្វី​ដើម្បី​កែលម្អ​ស្ថានការណ៍​ទេ ហើយ​បណ្តែត​បណ្តោយ​ឲ្យ​ទណ្ឌកម្ម​នេះ ចូល​ជាធរមាន​ដែល​នឹង​មាន​ផលប៉ះពាល់​ដល់​កម្មករ និង​ក្រុមគ្រួសារ​របស់​ពួកគេ។ ប៉ុន្តែ មន្ត្រី​គណបក្ស​កាន់អំណាច​អះអាង​ដដែលៗ​ថា កម្ពុជា​មិន​អាច​លះបង់​អធិបតេយ្យភាព​ជាតិ​ដោយ​សម្ពាធ​ពី​បរទេស​ឡើយ។សូម លោក​អ្នករង់ចាំ​ស្តាប់​សេចក្តី​រាយការណ៍​ទាំងស្រុង​របស់​លោក ម៉ែន គឹមសេង នៃ​វីអូអេ នៅ​ថ្ងៃអង្គារ​ខាងមុខ៕

ផ្លែចេកកំពុងមានតម្រូវការនាំចេញទៅប្រទេសចិនខ្លាំង នាពេលចុងក្រោយនេះ។ អ្នកវិនិយោគធំៗចាប់ផ្តើមដាំចេកអំបូងលឿង ដែលអាចនាំទៅប្រទេសចិនបាន។ ខណៈកម្ពុជា និងចិន នឹងចុះហត្ថលេខាលើកិច្ចព្រមព្រៀងពាណិជ្ជកម្មសេរីក្នុងពេលឆាប់ៗនេះ ទីផ្សារផ្លែចេកនឹងបន្តកើនឡើង។ នៅក្នុងខេត្តត្បូងឃ្មុំ និងខេត្តកំពង់ចាម អ្នកជំនួញបានចាប់ផ្តើមកាប់ដើមកៅស៊ូដែលពួកគេដាំច្រើនឆ្នាំមកហើយ មកដាំដើមចេកវិញដើម្បីនាំផ្លែចេកទៅលក់នៅប្រទេសចិន។ លោកស៊ុន ណារិន លោកអូន ឆេងប៉រ និងកញ្ញាហ៊ាន សុជាតា រាយការណ៍ឲ្យវីអូអេពីខេត្តត្បូងឃ្មុំនិងខេត្តកំពង់ចាម៕

នៅក្នុង​អំឡុងពេល​ដែល​ជំងឺ​កូវីដ១៩​រាតត្បាត ធ្វើ​ឲ្យ​កម្ពុជា​ជួប​វិបត្តិ​សេដ្ឋកិច្ច​នោះ​ ពលរដ្ឋ​មួយ​ចំនួន​នៅក្នុង​ភូមិគោកគ្រើល ឃុំលាងដៃ ស្រុកអង្គរធំ នៃ​ខេត្តសៀមរាប​បាន​យក​ផ្លែ​ដូងស្តរ ធ្វើ​ជារូប​មេអំបៅ ចាប ទា ឃ្មុំ ដើម្បី​រក​ចំណូល​បន្ថែម ដើម្បី​ចិញ្ចឹម​គ្រួសារ​របស់​ពួកគេ។ អ្នកនាង ខាន់ សុគុំមនោ និង​កញ្ញា ផន បុប្ផា នៃ​វីអូអេ រាយការណ៍​ពី​ខេត្តសៀមរាប៕

កម្ពុជា​និង​ចិន ​គ្រោង​នឹង​ចុះ​ហត្ថលេខា​លើ​កិច្ច​ព្រមព្រៀង​ពាណិជ្ជ​កម្ម​សេរី​ទ្វេភាគី​នៅក្នុង​ខែ​សីហា​នេះ ​ដោយ​ផលិត​ផល​កសិកម្ម​របស់​កម្ពុជា​ បាន​ក្លាយ​ជា​ចំណុច​កណ្ដាល​នៃ​ការ​ផ្ដោត​របស់​កិច្ច​ព្រមព្រៀង​នេះ។ ​កសិករ​ចិញ្ចឹម​ត្រី​និង​អ្នកធ្វើ​ស្រែ​មួយ​ចំនួន​នៅ​ស្រុក​ពាមរក៍​ ខេត្ត​ព្រៃវែង​ បង្ហាញ​ក្តី​សង្ឃឹម​តិចតួច​ថា​ ពួកគេ​នឹង​អាច​ទទួល​បាន​ផល​ប្រយោជន៍​ដោយ​ផ្ទាល់​ពី​កិច្ច​ព្រមព្រៀង​មួយ​នេះ។ លោក​ស៊ុន ណារិន ​លោក​អូន ឆេងប៉រ និង​កញ្ញា ​ហ៊ាន សុជាតា នៃ​វីអូអេ​រាយ​ការណ៍​ពី​ស្រុក​ពាមរក៍ ខេត្តព្រៃវែង៕

ក្នុង​ពេល​ដែល​ពលរដ្ឋ​កម្ពុជា​ជាង ២,៦ លាន​នាក់​ជំពាក់​ប្រាក់​គ្រឹះស្ថានមីក្រូហិរញ្ញវត្ថុ​និង​មាន​បំណុល​សរុប​ជាង ១០ ពាន់​លាន​ដុល្លារ លោក សម​ រង្ស៊ី​ ប្រធាន​ស្តីទី​គណបក្ស​សង្គ្រោះ​ជាតិ​បាន​រិះគន់​ថា​វិស័យ​មីក្រូ​ហិរញ្ញវត្ថុ​កម្ពុជា​បាន​បំភ្លេច​ចោល​បេសកកម្ម​ដើម​ដែល​ជួយ​ពលរដ្ឋ​ចាកចេញ​ពី​ភាពក្រីក្រ។​ លោក សម រង្ស៊ី​ ដែល​ជា​អតីត​រដ្ឋមន្ត្រី​ក្រសួង​សេដ្ឋកិច្ច​និង​ហិរញ្ញវត្ថុ​ផង​ដែរ​បានព្រមាន​ថា​ វិស័យ​ធនាគារ​កម្ពុជា​អាច​នឹង​ឈាន​ទៅ​ដួល​រលំដោយ​ពលរដ្ឋ​ជំពាក់​បំណុល​វ័ណ្ឌក​ និង​គ្មាន​ប្រាក់​សង​ហើយ​បាត់​បង់​អស់​ដី​ស្រែ​ចម្ការ។ លោក​ក៏​បាន​ស្នើ​ឲ្យ​រដ្ឋាភិបាល​ចាត់​វិធានការ​មធ្យ័ត​ដោយ​ក្នុង​នោះ​ត្រូវ​លុបចោល​បំណុល​ពលរដ្ឋ​ខ្លះៗ​ និង​បញ្ចុះ​ការប្រាក់​ជាដើម។ លោក សម រង្ស៊ី បាន​បកស្រាយ​លម្អិត​នៅ​ក្នុង​កម្មវិធី​ Hello VOA ជាមួយ​នឹង​លោក ម៉ែន គឹមសេង ដូច​ត​ទៅ៖

ក្រសួងមហាផ្ទៃសម្រេចកាលពីថ្ងៃទី១ខែ​កក្កដា ផ្ទេរ​សិទ្ធិ​ពី​ថ្នាក់​អធិការ​ខណ្ឌ​ទៅ​ប៉ុស្តិ៍​នគរបាលរដ្ឋបាលឃុំ​សង្កាត់ដើម្បី​ចុះ​សៀវភៅ​គ្រួសារ​ និង​បណ្ណ​ស្នាក់​នៅ​វិញ​។ នេះ​ជា​ការ​ផ្តល់​អំណាច​បន្ថែម​ទៀត​ដល់​ថ្នាក់​មូលដ្ឋាន និង​បង្ខិត​សេវា​ទៅ​ដល់​ជិត​ប្រជាពលរដ្ឋ​ដែល​បានជួប​ការ​លំបាក​ខ្លាំង​ក្នុង​ពេល​កន្លង​មក។ ​លោក ឱក សេរីសោភក្តិ៍ ​អ្នក​ឯកទេស​ខាង​ផ្នែក​អភិបាលកិច្ច​ល្អ​យល់​ថា​នេះ​គឺ​ជា​កំណែទម្រង់​ដែល​ពលរដ្ឋ​រង់ចាំ​ជា​យូរ ​ហើយបើ​អនុវត្ត​បាន​ល្អ​គឺ​នឹង​ធ្វើ​ឲ្យ​ជីវិត​របស់​ពលរដ្ឋ​កាន់​តែ​ប្រសើរ​ឡើង។ ប៉ុន្តែ​លោក​ព្រួយបារម្ភ​ថា ​អភិបាល​កិច្ច​មិន​ល្អ​អាច​នឹង​ជះឥទ្ធិពល​ក្នុង​ជួរមន្ត្រី​ប៉ូលិស​ដោយសារ​មិនទាន់​មាន​ការ​តាមដាន​ពី​គណនេយ្យភាព​សង្គម។ លោក ឱក សេរីសោភក្តិ៍ ពិភាក្សា​ជាមួយ​នឹង​លោក ​ម៉ែន គឹមសេង នៃ​វីអូអេ​ដូចតទៅ៖

ពលករខ្មែរជាច្រើនម៉ឺននាក់​បានវិលត្រឡប់ចូលមកប្រទេសថៃវិញជាបន្តបន្ទាប់ ​ក្រោយពីសម្រាកនៅប្រទេសកំណើតមួយរយៈដើម្បី​គេចចេញពីជំងឺកូវីដ១៩។ ប៉ុន្តែពួកគេជួបបញ្ហាប្រឈមជាច្រើនដោយត្រូវបន្លំ​ចូលវិញទាំង​ខុសច្បាប់ ពីព្រោះច្រកព្រំដែននៃប្រទេសទាំងពីរមិនទាន់បានបើកវិញជាផ្លូវការនៅឡើយ និង​ត្រូវចំណាយថវិកាជាច្រើន។ ទន្ទឹមនឹងនោះ កន្លែងធ្វើការពួកគេខ្លះមិនទាន់បើកដំណើរការវិញដែលនាំឲ្យពួកគេពិបាក រីឯអាជ្ញាធរថៃក៏តាមប្រម៉ាញ់រកអ្នកស្នាក់នៅដោយខុសច្បាប់ផងដែរ។ លោក លី រតនៈរស្មី ប្រធានប្រតិបត្តិគណបក្សសង្គ្រោះជាតិប្រចាំប្រទេសថៃ​ចូលមកពិភាក្សាជាមួយនឹងលោកម៉ែន គឹមសេង​ក្នុងកម្មវិធី Hello VOA ស្តីពី​ «ស្ថានភាពពលករកម្ពុជានៅក្នុងប្រទេសថៃក្នុងគ្រាមានវិបត្តិសុខភាពកូវីដ១៩»។ (លោកម៉ែន គឹមសេង, Hello VOA, វ៉ាស៊ីនតោន, ២៣ កក្កដា ២០២០)