ពលរដ្ឋខ្មែរកម្ពុជាក្រោមជាង ២០០នាក់ ដែលបានភៀសខ្លួនមកដល់ប្រទេសថៃកំពុងតែប្រឈមមុខនឹងអនាគតមិនច្បាស់លាស់មួយ ក្នុងពេលដែលជួបការលំបាកក្នុងការរស់នៅប្រចាំថ្ងៃ។ ក្នុងចំណោមអ្នកទាំងអស់នោះ មានអ្នកខ្លះទទួលបានឋានៈជនភៀសខ្លួនពីអង្គការសហប្រជាជាតិ និងអ្នកខ្លះនៅមិនទាន់បាន ប៉ុន្តែលទ្ធភាពក្នុងការចាកចេញទៅប្រទេសទី៣ គឺនៅតែជាឧបសគ្គដ៏ធំ ដោយសារមានការរឹតបន្តឹងនានា ហើយអ្នកខ្លះបានរង់ចាំជាច្រើនឆ្នាំហើយ។ លោក ប្រាក់ សេរីវុឌ្ឍ ប្រធានសហព័ន្ធខ្មែរកម្ពុជាក្រោម បានផ្តល់សម្ភាសន៍ដល់លោកម៉ែន គឹមសេងនៃវីអូអេ។

ទិវា​ជនភៀសខ្លួន​ពិភពលោក​ឆ្នាំ​នេះ​ ប្រារព្ធ​ក្រោម​ប្រធានបទ ​«គ្រប់សកម្មភាព​មានតម្លៃ»​។ ​ចំ​ពេល​ដែល​ពិភពលោក​ប្រឈម​នឹង​វិបត្តិសុខភាព​បង្កឡើង​ដោយ​ជំងឺកូវីដ​១៩ គឺ​វេជ្ជបណ្ឌិត​ទាំង ៦រូប ​នៃ​គ្រួសារ​លោកវេជ្ជបណ្ឌិត​ សៀង សេង ដែលជាអតីតជនភៀសខ្លួន​ចូលរួម​ចំណែក​នៅ​ជួរមុខ​ប្រយុទ្ធនឹង​ជំងឺកូវីដ​១៩ ដែល​កំពុង​តែ​វាយ​ប្រហារសហរដ្ឋ​អាមេរិក។ លោក​វេជ្ជបណ្ឌិត​ សៀង សេង​ មានជំនឿ​ថា​ ​ពួកគេ​នឹង​ឈ្នះសមរភូមិ​នេះ ​គឺមិន​ដូច​កាលពី​ជាង​ ៤៥ ឆ្នាំមុន​ នៅ​ពេល​ដែល​សមាជិក ២៤ នាក់ ​នៃ​ក្រុមគ្រួសារ​របស់​លោក​ត្រូវបាន​ជម្លៀស​ទៅសហករណ៍នៅ​ទី​ជនបទ​ក្រោមការគ្រប់គ្រង​របស់ខ្មែរ​ក្រហម​ ប៉ុន្តែនៅពេលរបប​នេះ​បាន​ដួល​រលំ​ក្រោយ​ពី​កាន់​អំណាច​ជិត ៤ ​ឆ្នាំ គឺ​មានតែ​លោក​ម្នាក់​ទេ​ដែល​នៅ​រស់រាន​មានជីវិត​ ​ដើម្បី​យក​រឿង​ដ៏​ឈឺចាប់​នេះ​ប្រាប់​ដល់​ពិភពលោក​ឲ្យ​បាន​ដឹង៕

អ្នកស្រាវជ្រាវ​ផ្នែក​វេជ្ជសាស្ត្រ​នៅ​វិទ្យាស្ថាន​ជាតិ​ផ្នែក​អាលែកហ្សុី និង​ជំងឺ​ឆ្លង​នៃ​សហ​រដ្ឋ​អាមេរិក​និង​សហការី​នៅ​កម្ពុជា​ជឿ​ថា ពួកគេ​អាច​ប្រើ​ប្រូតេអ៊ីន​ទឹកមាត់​មូស​បង្កើត​វ៉ាក់សាំង​បង្ការ​រោគ​ទូទៅ​ដែល​អាច​ប្រឆាំង​នឹង​រោគ​ទាំងអស់​ ដែល​មូស​ចាក់​ចូល​ក្នុង​ខ្លួន​មនុស្ស​ដូចជា​មេរោគ​គ្រុនចាញ់​ គ្រុនឈាម​ ហ្ស៊ីកា​ គ្រុនលឿង​ និង​មេរោគ​ផ្សេង​ទៀត​ដែល​ចម្លង​ដោយសារ​មូស។ ទីភ្នាក់ងារ​ព័ត៌មាន Reuters រាយការណ៍។ ​ លោក ពិន ស៊ីសុវណ្ណ ប្រែសម្រួល៕

លោក ប្រាជ្ញ លី តារាចម្រៀង Rap ខ្មែរអាមេរិកាំងមួយរូប កំពុងរៃអង្គាសថវិកា ដើម្បីជួយជួសជុលហាងនៅក្រុងខ្មែរ ក្នុងទីក្រុងឡុងប៊ិច រដ្ឋកាលីហ្វញ៉ា ដែលត្រូវក្រុមជនខិលខូចវាយបំផ្លាញ និងលួចសម្ភារៈ ក្នុងអំឡុងពេលបាតុកម្មទាមទារយុត្តិធម៌ដល់លោក ចច ផ្លយ (George Floyd) ដែលបានស្លាប់ក្នុងការឃាត់ឃាំងរបស់ប៉ូលិស។ យ៉ាងហោចណាស់មានហាងជាង ៣០ បានខូចខាត ហើយត្រូវការជំនួយជាបន្ទាន់។ ក្រុងខ្មែរជាកន្លែងដែលលោក ប្រាជ្ញ លី បានរស់នៅតាំងពីក្មេង ហើយលោកបារម្ភថា បើហាងទាំងនោះលែងបើកដំណើរការបាន គឺគួរឲ្យសោកស្តាយខ្លាំងណាស់។ លោកបានបង្កើតទំព័រមួយដែលមានឈ្មោះថា We Love Cambodia Town លើវេបសាយ Gofundme ដោយដាក់គោលដៅរៃអង្គាសចំនូួន ១០ ម៉ឺនដុល្លារ។ លោកម៉ែន គឹមសេង នៃវីអូអេ បានសម្ភាសលោក ប្រាជ្ញ លី ពីយុទ្ធនាការរបស់លោក៕

អ្នកតស៊ូមតិ​ប្រឆាំង​អំពើ​ពុករលួយ​ក្នុង​ប្រទេស​កម្ពុជា លើកឡើង​ថា ​ក្នុង​អំឡុងពេល​មាន​ការរីក​រាលដាល​នៃ​ជំងឺ​កូវីដ១៩​នេះ បុគ្គលិក​ក្រុមហ៊ុន​ អង្គការ​និង​រដ្ឋាភិបាល​ ត្រូវ​មាន​សុចរិតភាព​ខ្ពស់ និង​ភាព​ស្មោះត្រង់​ដើម្បី​បញ្ចៀស​ទំនាស់​ផលប្រយោជន៍។នេះ​គឺជា​ការ​ដកស្រង់​បទសម្ភាសន៍​រវាង​លោក សាយ មុន្នី នៃ​វីអូអេ ជាមួយ​លោក ប៉ិច ពិសី នាយក​ប្រតិបត្តិ​នៃ​អង្គការ​តម្លាភាព​កម្ពុជា៕

ការបាត់​ខ្លួន​សកម្មជន​ជាតិ​ថៃ​នៅ​ភ្នំពេញ​ ដោយ​សង្ស័យ​ថា ជា​លទ្ធផល​នៃ​ការចាប់​ពង្រត់​នោះ ពលរដ្ឋ​ថៃ​ដែល​គាំទ្រ​សកម្ម​ជន​នេះ បាន​ធ្វើការ​តវ៉ា​នៅ​មុខ​ស្ថានទូត​កម្ពុជា​ នៅ​ក្រុង​បាងកក​ ទាមទារ​ការពិត​ កាលពី​ថ្ងៃ​អាទិត្យ​ និង​ថ្ងៃ​ច័ន្ទកន្លង​ទៅ​នេះ។ ទីភ្នាក់ងារ​ព័ត៌មាន ​Reuters រាយការណ៍។ លោក ពិន ស៊ីសុវណ្ណ ជូន​សេចក្តី​ប្រែ​សម្រួល៕

ខណៈដែលអ្នកវិទ្យាសាស្ត្រនៅជុំវិញពិភពលោកកំពុងព្យាយាមស្រាវជ្រាវនិងផលិតវ៉ាក់សាំងបង្ការជំងឺកូវីដ១៩ ក្រុមអង្គការសង្គមស៊ីវិលមួយចំនួនក្នុងប្រទេសកម្ពុជា បានទាមទារឲ្យមេដឹកនាំពិភពលោកនិងក្រុមហ៊ុនផលិតវ៉ាក់សាំង ផ្តល់ថ្នាំបង្ការជំងឺនេះដោយឥតគិតថ្លៃដល់ពលរដ្ឋនៅទូទាំងសកលលោក នៅពេលដែលវ៉ាក់សាំងនេះ ត្រូវបានរកឃើញនិងផលិតបាន។ លោក សាយ មុន្នី នៃវីអូអេ បានសម្ភាសន៍អ្នកស្រី លឹម សូលីន នាយិកាអង្គការ Oxfam ប្រចាំកម្ពុជា អំពីការទាមទារនេះ។នេះគឺជាការដកស្រង់បទសម្ភាសន៍ដែលបានធ្វើឡើងតាមអ៊ីនធើណិត នៅថ្ងៃទី២៨ ខែឧសភា ឆ្នាំ២០២០៕

ក្នុង​ការរំឭក​ខួបទី​៧១ នៃ​ការប្រគល់​ដែនដី​កម្ពុជា​ក្រោម​ទៅ​ក្រោម​ការគ្រប់គ្រង​របស់​វៀតណាម​ដោយ​អាណានិគម​បារាំង​ លោក ថាច់ ង៉ុកថាច់ ប្រធាន​សហព័ន្ធ​ខ្មែរ​កម្ពុជា​ក្រោម​ពិភពលោក ​ស្នើឲ្យ​មាន​សាមគ្គីគ្នា​ក្នុងចំ​ណោម​ពលរដ្ឋ​ខ្មែរក្រោម​ និង​ពលរដ្ឋ​កម្ពុជា ​ដើម្បី​ពង្រឹង​ព្រលឹង​ជាតិ​ឡើង​វិញ។ ក្នុង​រយៈពេល​បីឆ្នាំ​កន្លង​មក​នេះ លោក​បាន​រៃអង្គាស​ថវិកា ដើម្បី​ឧបត្ថម្ភ​សៀវភៅ​សិក្សា និង​វចនានុក្រម​ដល់​កុមារ​និង​ព្រះសង្ឃ នៅ​ដែនដី​កម្ពុជា​ក្រោម​ ដើម្បី​ឲ្យ​ពួកគេ​នៅ​រក្សា​អត្តសញ្ញាណ​ជាតិ។ លោក ម៉ែន គឹមសេង នៃ VOA បាន​សម្ភាស​លោក ថាច់ ង៉ុកថាច់ កាលពី​ពេល​ថ្មីៗ​នេះ៕

ការ​តវ៉ា​ប្រឆាំង​ និង​ការ​ស្លាប់​របស់​លោក George Floyd ដែល​ជា​ជន​ជាតិ​អាមេរិកាំង​ដើម​កំណើត​អាហ្វ្រិក កាល​ពី​ថ្ងៃទី២៥ ឧសភា នៅ​ទីក្រុង Minneapolis រដ្ឋ Minnesota ក្រោយ​ពី​ត្រូវ​បាន​ប៉ូលិស​សង្កត់​ក​អស់​ជាង​៨​នាទី​នោះ បាននាំ​ឲ្យ​មាន​ការ​ធ្វើ​បាតុកម្ម​តវ៉ា​ចំពោះ​ការ​សម្លាប់​ពល​រដ្ឋ​អាមេរិកាំង​ដើម​កំណើត​អាហ្រ្វិក​ នៅ​សហរដ្ឋអាមេរិក ជាហូរហែរនៅ​ក្នុង​ទីក្រុង​ជា​ច្រើន​អស់​ពេលជាង​មួយ​សប្តាហ៍ហើយ។ បាតុកម្ម​ទាមទារ​ឲ្យ​មាន​ការ​ដោះ​ស្រាយបញ្ហានេះ ភាគ​ច្រើន​ធ្វើ​ឡើង​ដោយ​សន្តិវិធី ក៏​ប៉ុន្តែ​មាន​ការ​ដុត​បំផ្លាញ​និង​វាយ​ហាង​លក់​ទំនិញ​នៅ​ទី​ក្រុង​ផ្សេងៗ​ ដែល​មាន​រួម​ទាំង​ទី​ក្រុង Long Beach ដែល​មាន​ពល​រដ្ឋ​អាមេរិកាំង​ដើម​កំណើត​ខ្មែរ​រស់​នៅ​យ៉ាង​ច្រើន​ដែរ។ លោក ប៉ូច រាសី នៃ​វីអូអេ បានសាកសួរ​លោក ឆល សុង ប្រធាន​សម្ពន្ធ័​ខ្មែរ​អាមេរិកាំង អំពី​ការ​វាយ​បំផ្លាញ​ហាង​ជំនួញ​របស់​ពល​រដ្ឋ​ខ្មែរ​អាមេរិកាំង កាល​ពី​យប់​ថ្ងៃ​អាទិត្យ។

ថ្ងៃទី៤​ ខែ​មិថុនា គឺជា​ខួបទី៣​នៃ​ការបោះ​ឆ្នោត​ក្រុមប្រឹក្សា​ឃុំសង្កាត់​នៅក្នុង​ប្រទេស​កម្ពុជា​ ដែល​បាន​បង្ហាញ​ការ​ធ្លាក់ចុះ​នៃ​ប្រជាប្រិយ៍ភាព​របស់​គណបក្ស​ប្រជាជនកម្ពុជា ដោយ​បាន​បាត់បង់​ការ​គ្រប់គ្រង​នៅ​ថ្នាក់​មូលដ្ឋាន​អស់​យ៉ាង​ច្រើន​ជា​លើក​ដំបូង​តាំងពី​ឆ្នាំ​១៩៧៩​មក។​ ប៉ុន្តែ គណបក្ស​សង្គ្រោះជាតិ​ដែល​ឈ្នះ​សំឡេង​ឆ្នោត​ជាង ៤៣ ភាគរយ និង​គ្រប់គ្រង​លើ​សង្កាត់​ជិត ៥០០ ក្នុងចំណោម​ ១៦៤៦ ​មិន​បាន​កាន់​ការងារ​យូរ​ទេ ដោយសារតែ​តុលាការ​កំពូល​បាន​រំលាយ​គណបក្ស​ប្រឆាំង​នេះ​ចោល ដោយសារតែ​ចោទ​ប្រកាន់​លោក កឹម សុខា ​ប្រធានគណបក្ស​ថា ឃុបឃិត​ជាមួយ​នឹង​បរទេស​ដើម្បី​ផ្តួលរំលំ​រដ្ឋាភិបាល​កម្ពុជា។​ កញ្ញា​ ស៊ិន ចាន់ពៅរ៉ូហ្សេត អតីត​ចៅ​សង្កាត់​អូចារ ខេត្ត​បាត់ដំបង បាន​ស្នើ​ឱ្យ​មេដឹកនាំ​នយោបាយ​ចរចាគ្នា​ ស្វែងរក​ដំណោះស្រាយ​នយោបាយ​ឱ្យ​បាន​ឆាប់ៗ ដើម្បី​យុវជន​ជំនាន់ក្រោយ​អាច​ចូលរួម​សកម្មភាព​នយោបាយ​នៅ​ថ្នាក់​មូលដ្ឋាន​ ដើម្បី​ជួយអភិវឌ្ឍន៍​សហគមន៍​របស់​គេ។ 

លោក​ម៉ែន គឹមសេង នៃ​វីអូអេ​ បាន​សម្ភាស​កញ្ញាស៊ិន ចាន់ពៅរ៉ូហ្សេត៕