នៅពេល​ដែល​បុគ្គលិកនិង​នយោជិក​របស់​ក្រុមហ៊ុន​ឬ​រដ្ឋាភិបាល ត្រូវ​បាន​លើកទឹកចិត្ត​ឲ្យ​ធ្វើ​ការ​ពី​ផ្ទះ​ឬ​ពី​ចម្ងាយ​ ដើម្បី​បង្ការ​ការ​ឆ្លង​រាលដាល​នៃ​ជំងឺ​កូវីដ​១៩ អ្នក​ជំនាញ​ខាង​សុចរិតភាព​ លើកឡើង​ថា ភាព​ស្មោះ​ត្រង់​និង​ការ​មាន​សុចរិតភាព​ខ្ពស់ គឺ​ជា​កត្តា​ចាំបាច់ ដើម្បី​កុំ​ឲ្យ​មាន​ទំនាស់​ផលប្រយោជន៍​នៅ​កន្លែង​ធ្វើ​ការ។ នេះ​គឺជា​ការ​ដកស្រង់​បទសម្ភាសន៍​រវាង​លោក សាយ មុន្នី នៃ​វីអូអេ ជាមួយ​លោក ប៉ិច ពិសី នាយក​ប្រតិបត្តិ​នៃ​អង្គការ​តម្លាភាព​កម្ពុជា។

(លោក​អ្នក​នាង​ អាច​ស្តាប់​បទសម្ភាសន៍​នេះ​ទាំង​ស្រុង​នៅ​ក្នុង​កម្មវិធី​ផ្សាយ​តាម​វិទ្យុរបស់​វីអូអេ​នៅ​ពេល​ក្រោយ។)

សហរដ្ឋ​អាមេរិក​ប្រារព្ធ​ខែ​នៃ​មរតក​ពលរដ្ឋ​អាស៊ី​អាមេរិកាំង​និង​អ្នកដែនកោះ​ប៉ាស៊ីហ្វិក​នៅ​ខែឧសភា​ជារៀងរាល់​ឆ្នាំ ដើម្បី​លើក​កម្ពស់​ការចូលរួម​របស់​ពួកគេ​ដល់​វប្បធម៌ ប្រវត្តិសាស្រ្ត​និង​សមិទ្ធិផល​របស់​ប្រទេស​ជាតិ។ នៅ​ឆ្នាំ​នេះ​លោក ម៉ែន គឹមសេង​នៃ VOAបាន​សម្ភាស​លោក នួន វាសនា សមាជិក​ក្រុមប្រឹក្សា​ទីក្រុង​ឡូវែល​រដ្ឋម៉ាស្សាឈូសិត ដែល​បាន​ជាប់ឆ្នោត​ចំនួន​៣​អាណត្តិ។ ក្រុមគ្រួសារ​លោក​បាន​ភៀសខ្លួន​មក​ដល់​សហរដ្ឋ​អាមេរិក​កាលពី​ដើម​ទសវត្សរ៍​ទី៨០។ លោក វាសនា បាន​ចាត់ទុក​ថា ខែនេះ​ប្រៀបបី​ដូចជា​កំណើត​ទីពីរ​របស់​លោក និង​ក្រុមគ្រួសារ​ហើយ​បាន​ស្នើ​ឲ្យ​យុវជន​ជំនាន់​ក្រោយ​ត្រូវ​ខិតខំ​ប្រឹងប្រែង​ចាប់​យក​ឱកាស​នៅ​លើ​ទឹកដី​សហរដ្ឋ​អាមេរិក ដើម្បី​ឈាន​ឡើង​ខ្ពស់​ជាង​រៀមច្បង៕

ការ​ស្លាប់​បុរស​ស្បែក​ខ្មៅ​ម្នាក់​ដៃ​ជាប់​ខ្នោះ​ហើយ​ថា ​លោក​ដក​ដង្ហើម​មិន​កើតពេល​ប៉ូលិស​ស្បែក​ស​ម្នាក់យក​ជង្គង់​សង្កត់​ក​គាត់​ផ្ទប់​នឹងដី​នោះ​ បាន​នាំ​ឲ្យមាន​ការ​តវ៉ា​នៅ​តាមទីក្រុង​នានា​នៅ​ទូទាំង​សហ​រដ្ឋ​អាមេរិក។​ ប្រធានាធិបតី​សហ​រដ្ឋ​អាមេរិក​លោក​ដូណាល់ ត្រាំ​បាន​និយាយ​ថា​ លោក​គាំទ្រ​ការ​តវ៉ា​ដោយ​សន្តិវិធី ​ក៏​ប៉ុន្តែ​បាន​ព្រមាន​ថា​ លោក​នឹង​មិន​អនុញ្ញាត​ឲ្យមានស្ថានភាព​អនាធិបតេយ្យ​ច្របូក​ច្របល់ ​មិន​គោរព​ច្បាប់​បន្ថែម​ទៀត​ទេ។​ អ្នកស្រី ​Patsy Widakuswarak ​អ្នក​យក​ព័ត៌មាន​របស់ ​VOA ​ប្រចាំ​សេតវិមាន ​រាយ​ការណ៍​អំពី​រឿង​នេះ។​ លោក​ជឹង ប៉ូជីន ​ប្រែ​សម្រួល​សេចក្តី​រាយ​ការណ៍​នេះ​ជូន​ដូច​ត​ទៅ៖

ខណៈ​ដែល​អ្នក​វិទ្យាសាស្ត្រ​នៅ​ជុំវិញ​ពិភពលោក​កំពុង​ស្រវាស្រទិញ​ស្រាវជ្រាវ​និង​បង្កើត​វ៉ាក់សាំង​ ឬ​ថ្នាំ​បង្ការ​ជំងឺ​កូវីដ​១៩ ក្រុម​អង្គការ​ក្រៅ​រដ្ឋាភិបាល​មួយ​ចំនួន​ក្នុង​ប្រទេស​កម្ពុជា បាន​អំពាវនាវ​ដល់​មេដឹកនាំ​ពិភពលោក​និង​ក្រុមហ៊ុន​ផលិត​វ៉ាក់សាំង​ ឲ្យ​ចែកចាយ​វ៉ាក់សាំង​កូវីដ​១៩​នេះ ដោយ​ឥត​គិត​ថ្លៃ​ដល់​ពលរដ្ឋ​ទូទៅ​ក្នុង​សកលលោក នៅពេលវ៉ាក់សាំង​នេះ ត្រូវ​បាន​រកឃើញ​និង​ផលិត​បាន។ ​លោក សាយ មុន្នី នៃ​វីអូអេ បានសម្ភាសន៍អ្នកស្រី លឹម សូលីន នាយិកា​ប្រចាំ​ប្រទេស​កម្ពុជា​នៃ​អង្គការ Oxfam អំពី​ការ​អំពាវនាវ​នេះ៕

ប្រទេសកូរ៉េខាងត្បូងបានគ្រប់គ្រងស្ថានភាពជំងឺកូវីដ១៩ បានល្អនិង​ត្រូវបានបណ្តានានាសរសើរ ហើយមិនសូវមានផលប៉ះពាល់ខ្លាំងលើដំណើរការផលិតកម្មនានា ដូចប្រទេសធំៗឡើយ។ លោក យឹម ស៊ីណន ប្រធានចលនាយុវជនគណបក្សសង្គ្រោះជាតិនៅកូរ៉េខាងត្បូង បាន​បកស្រាយពីផលប៉ះពាល់នៃវីរុសកូរ៉ូណាលើពលករចំណាកស្រុកកម្ពុជា ​ដែលកំពុងធ្វើការនៅទីនោះ ​និងការសង្កេតលើវិធានការសុខាភិបាល ដែលអាជ្ញាធរ​កូរ៉េខាងត្បូងបានដាក់ចេញក្នុងគ្រាមានវិបត្តិសុខភាពនេះ។ លោក ម៉ែន គឹមសេង នៃវីអូអេ បានសម្ភាសលោក យឹម ស៊ីណន អំពីរឿងនេះ៕

អង្គការ​សុខភាព​ពិភព​លោក​ បាន​ប្រកាស​ថា​ជំងឺ​កូវីដ១៩ គឺ​ជាជំងឺ​រាតត្បាត​សកល​កាល​ពី​ខែ​មីនា។ ខណៈ​ដែល​មនុស្ស​រាប់លាន​នាក់តាម​ដាន​ព័ត៌មាន​នេះ​ ដើម្បី​ដឹងអំពី​ការ​វិវត្ត​នៃ​ជំងឺ​នេះ និង​របៀប​ការពារ​ខ្លួន​ពី​ការឆ្លង ​អ្នក​បក​ប្រែ​ភាសា​សញ្ញា​កម្ពុជា​ ព្យាយាម​សិក្សា​សញ្ញា​ថ្មី​ និង​ពិភាក្សា​ជាមួយ​សហគមន៍​មនុស្ស​ថ្លង់​ ថា​តើ​ត្រូវ​ធ្វើ​កាយ​វិការ​បែបណា​ ដើម្បី​ឲ្យ​មនុស្សថ្លង់​នៅ​កម្ពុជា​ទទួល​ព័ត៌មាន​អំពីជំងឺ​កូវីដ១៩​នេះ។ កញ្ញា ហ៊ាន សុជាតា និង​ ខាន់ សុគុំមនោ រាយការណ៍​លម្អិត​ពី​រាជធានី​ភ្នំពេញ។

អណ្តើករាជ​ ​និង​កន្ធាយ​យក្សដែល​ជា​អម្បូរ​សត្វ​កម្រ​ ជិត​ផុត​ពូជ​ត្រូវ​បាន​លេង​ទៅ​ក្នុង​ធម្មជាតិ​ក្នុង​ទិវា​សត្វ​អណ្តើក​ពិភព​លោក ​World Turtle Day ​កាល​ពីថ្ងៃទី​២៣ ​ខែ​ឧសភា។​ អង្គការ​អភិរក្ស​សត្វព្រៃ​ The Wildlife Conservation Society​ ការ​រាតត្បាត​នៃ​វីរុសកូរ៉ូណា​កាត់​បន្ថយ​ចំនួន​អ្នក​ប្រមាញ់​អណ្តើក​និង​កន្ធាយប្រភេទ​នេះ។ លោក ពិន ស៊ីសុវណ្ណ ប្រែសម្រួលសេចក្តីរាយការណ៍ពី Reuters ពីរដ្ឋធានីវ៉ាស៊ីនតោន។

លោក កើត រិទ្ធ រដ្ឋមន្ត្រី​ក្រសួង​យុត្តិធម៌ ដែល​ទើប​ចូល​កាន់​តំណែង​បាន​ប្រកាស​ចាប់ផ្តើម​ធ្វើ​យុទ្ធនាការ​ដោះស្រាយ​បញ្ហា​កក​ស្ទះ​សំណុំរឿង​នៅ​តុលាការ​ខេត្ត​ក្រុង​និង​រាជធានី​ដែល​មាន​ជិត​៤​ម៉ឺន​ករណី។ សំណុំ​រឿង​ទាំង​នោះ​ពាក់ព័ន្ធ​នឹង​គ្រឿង​ញៀន ទំនាស់​ដីធ្លី និង​បទល្មើស​ព្រហ្មទណ្ឌ​នានា។ នៅ​ក្នុង​កម្មវិធី Hello VOA ប្រចាំខែ​ស្តីពី​អភិបាលកិច្ច​ល្អ​លោក ឱក សេរីសោភក្តិ៍ ដែល​ជា​អ្នកឯកទេស​ខាង​ផ្នែក​អភិបាលកិច្ច​ល្អ​នឹង​ផ្តោត​លើ​ដំណោះស្រាយ​លើ​ការ​កក​ស្ទះ​សំណុំ​រឿង​និង​ពន្ធនាគារ​កកកុញ។ លោក ម៉ែន គឹមសេង ​ជា​អ្នកសម្របសម្រួល​កិច្ចពិភាក្សា​នេះ៕

ស្រុក​ស្អាង ខេត្ត​កណ្តាល​ ជា​តំបន់​មួយ​ដែល​ជា​កន្លែង​ដាំ​បន្លែ​ផ្គត់​ផ្គង់​តម្រូវ​ការ​នៅ​ភ្នំពេញ។​ ប៉ុន្តែ​កសិករ​នៅ​ទីនេះ​ត្អូញត្អែរ​រឿង​តម្លៃ​មិន​ថេរ ​ដែល​ធ្វើ​ឲ្យ​ពួក​គេ​ប្រឈម​ហានិភ័យ​ខ្ពស់​នៃ​ការ​ខាត​បង់។​  ជាង​នេះ​ទៅ​ទៀត ​កាល​ពី​អំឡុង​ពេល​ប្រជាជន​កម្ពុជា​ភ័យ​ខ្លាច​ជំងឺ​កូវីដ​ជា​ខ្លាំង​នោះ​ ​បន្លែ​របស់​កសិករ​មួយ​ចំនួន​ធ្លាក់​តម្លៃ​ទៅ​ដល់​៣០០​រៀល​ឬ​៤០០​រៀល​ក្នុង​មួយ​គីឡូ​ក្រាម។​ កសិករ​មួយ​ចំនួន​សម្រេច​ចិត្ត​ភ្ជួរ​ស្ពៃ​ខ្មៅ​ចោល​តែ​ម្តង ​ពី​ព្រោះ​បើ​សិន​ពួក​គេ​ដឹក​ទៅ​លក់​នៅ​ភ្នំពេញ​ នោះ​នឹង​ខាត​ថ្លៃ​ដើម​បន្ថែម​ទៀត។

ល្ខោនស្បែកដែលមានចំណាស់តាំងពីសតវត្សរ៍ទី៧កំពុងត្រូវវីរុសកូរ៉ូណាយាយី។ ការសម្តែងល្ខោនស្បែកតូចស្បែកធំត្រូវផ្អាកដោយសារគ្មានអ្នកទេសចរនិងដោយសារបម្រាមរដ្ឋាភិបាលដើម្បីទប់ទល់ការរាតត្បាតនៃជំងឺកូវីដ១៩។

ទីភ្នាក់ងារព័ត៌មានReuters រាយការណ៍ ហើយលោកពិន ស៊ីសុវណ្ណប្រែសម្រួល