ពលរដ្ឋមួយចំនួនក្នុងស្រុកខ្សាច់កណ្តាល ខេត្តកណ្តាល បានចាប់ផ្តើមដាក់ទីងមោងខាងមុខផ្ទះ ជាជំនឿមួយឲ្យពួកគេជៀសផុតពីការឆ្លងវីរុសកូរ៉ូណា ដែលឆ្លងនៅកម្ពុជាទៅដល់៨៧ករណីហើយរហូតមកដល់ថ្ងៃចន្ទ។

លោក ឈុំ វ៉ាន់ អាយុ៦៣ឆ្នាំ ជាកសិករម្នាក់ក្នុងភូមិកំពង់ល្វា ឃុំស៊ីធរ ស្រុកខ្សាច់កណ្តាល ខេត្តកណ្តាល មានប្រសាសន៍ថា លោកធ្វើទីងមោង ដាក់ខាងមុខផ្ទះនេះ ដោយតាមអ្នកភូមិនៅទីនេះ និងជាជំនឿមួយដែលមានតាំងពីបុរាណមក។ ប៉ុន្តែលោកថាលោកនៅតែការពារសុខភាពរបស់លោក បន្ថែមលើជំនឿនេះ។

កន្លងទៅ កម្ពុជាបានសិក្សាលទ្ធភាពនៃការស្ថាបនាទំនប់វារីអគ្គិសនីនៅលើតួ និងដៃទន្លេមេគង្គ ក្នុងនោះមានទំនប់ដ៏ធំបំផុតក្នុងខេត្តក្រចេះ ដែលមានទំហំថាមពលទៅដល់២៦០០មេហ្គាវ៉ាត់។ ពលរដ្ឋដែលរស់នៅតាមដងទន្លេមេគង្គមានការព្រួយបារម្ភថាពួកគេនឹងត្រូវបម្លាស់ទីកន្លែងរស់នៅ ខណៈការស្ថាបនាទំនប់នេះនៅមានភាពមិនច្បាស់លាស់នៅឡើយ។ មន្រ្តីនៃក្រសួងរ៉ែ និងថាមពល បានអះអាងថា កម្ពុជាមិនមានផែនការស្ថាបនាទំនប់វារីអគ្គិសនីលើតួទន្លេមេគង្គនោះទេក្នុងរយៈពេល១០ខាងមុខ។ លោក ស៊ុន ណារិន នៃ VOA រាយការណ៍ពីខេត្តក្រចេះ៕

អស់រយៈពេលប្រមាណ៣ឆ្នាំមកហើយ ប្រជាពលរដ្ឋនៅភូមិស្រែគរដែលជាជនជាតិដើមភាគតិច បានជួបប្រទះបញ្ហាទឹកឡើងជាបន្តបន្ទាប់ ក្រោយភូមិចាស់របស់គេត្រូវបានលិចលង់ ដោយសារការស្ថាបនាទំនប់វារីអគ្គិសនីសេសានក្រោម២ក្នុងខេត្តស្ទឹងត្រែង។ ប៉ុន្តែពួកគេរស់នៅក្បែរទឹក ដែលលិចភូមិចាស់របស់គេ។ លោក ស៊ុន ណារិន រាយការណ៍លម្អិតពីខេត្តស្ទឹងត្រែង។

ថាមពល​ពិសេសរបស់​កញ្ញា អែម សុវណ្ណារី គឺ​ដៃ​ស្តាំ​របស់​នាង។​ នាង​ប្រើ​ដៃ​ស្ដាំ​ដើម្បី​ផ្ដួល​គូប្រកួតក្បាច់គុន ហើយ​នាង​ក៏​ប្រើ​ដៃ​ស្តាំ​នោះ​សម្រាប់​គូរ​គំនូរ​ពហុ​មេឌា​ផង​ដែរ។ កីឡាករ​ក្បាច់​គុន​ចម្រុះ​ខ្មែរ-អាមេរិកាំង​វ័យ២៧ឆ្នាំ​រូប​នេះ ក៏​ជា​អ្នក​គូរ​រូប​ដ៏​ជោគជ័យ​ម្នាក់​ផង​ដែរ។ នាង​ ប្រើ​ការ​ប្រកួត​និង​សិល្បៈ​របស់​នាង​ដើម្បី​លើក​កម្ពស់​ផ្នត់​គំនិត​អំពី​ភាព​រឹងមាំ​របស់​ស្ត្រី​នៅ​ក្នុង​ប្រទេស​កម្ពុជា និង​នៅ​ជុំវិញ​ពិភពលោក។ កើត​និង​ធំធាត់​នៅ​ទីក្រុង Long Beach រដ្ឋ California កញ្ញា សុវណ្ណារី ជា​កូន​ស្រី​ច្បង​របស់​ម្ដាយ​ខ្មែរ​ដែល​ជា​ជន​ភៀស​ខ្លួន។ នាង​បាន​ចាប់​ផ្ដើម​ហាត់​កីឡា​ប្រដាល់​នៅ​ឆ្នាំ២០១១ ខណៈ​ពេល​កំពុង​សិក្សា​ថ្នាក់​បរិញ្ញាប័ត្រ​ផ្នែក​ប្រព័ន្ធ​ផ្សព្វផ្សាយ​ឌីជីថល​នៅ Fashion Institute of Design & Merchandising ក្នុង​ទី​ក្រុង Los Angeles។ សព្វ​ថ្ងៃ​នេះ កញ្ញា សុវណ្ណារី ព្យាយាម​កសាងកំណត់ត្រា​ប្រកួត​ ឈ្នះ​៤ដង ចាញ់​ម្ដង របស់​នាង​ឲ្យ​កាន់​តែ​ល្អ​ឡើង ហើយ​និង​បង្កើន​ជំនាញ​គំនូរឲ្យ​កាន់​មាន​ភាព​ប៉ិនប្រសប់។ កាល​ពី​ខែ​កញ្ញា​ឆ្នាំ២០១៩ លោក ចាប ចិត្រា នៃ VOA បាន​ទៅ​ដល់​ផ្ទះ​ក្នុង​ទីក្រុង Los Angeles របស់​កញ្ញា សុវណ្ណារី ដើម្បី​ជជែក​ជា​មួយ​នាង​អំពី​ដំណើរ​នៃ​ការ​បំពេញ​កាតព្វកិច្ច​យ៉ាង​ស្វិតស្វាញ ក្នុង​ការងារ​ដ៏​អស្ចារ្យ​ទាំង​ពីរ​របស់​នាង។

ញូវយ៉ក​ជា​ទី​ក្រុង​មួយ​ដែល​មាន​ភោជនីយដ្ឋាន​ និង​ហាង​លក់​ម្ហូប​របស់ជាតិ​សាសន៍​ជា​ច្រើន។ ក្នុងចំណោម​ហាង​ទាំង​នោះ​ មាន​ហាងមួយ​ដែល​មានឈ្មោះជា​សំនៀងខ្មែរដែរ។​ លោក ប៉ូច រាសី​ រាយការណ៍​ពី​សង្កាត់​ Manhattan ទី​ក្រុង​ញូវយ៉ក​ថា ហាងដែល​សរសេរ​ជា​ភាសា​អង់គ្លេសថា Num Pang នោះ លក់​ទាំង​នំបុ័ង​ដាក់​សាច់ បាយ និង​បន្លែ​ផង​ដែរ។

បណ្ឌិត្យ​សភា​អាមេរិកាំង​សម្រាប់​សិល្បៈ​និង​អក្សរ ឬ American Academy of Arts and Letters បាន​ជ្រើសរើស​សមាជិក​ថ្មី​មួយ​ចំនួន​នៅ​ឆ្នាំ២០២០ ដែល​ក្នុង​នោះ​រួម​មាន​អ្នកនិពន្ធ​តន្ត្រី​ខ្មែរ​អាមេរិកាំង​ម្នាក់គឺលោកបណ្ឌិតសាស្ត្រាចារ្យ អ៊ុង ជិនណារី។ ការក្លាយជាសមាជិកនៃបណ្ឌិតសភាអាមេរិកាំងនេះ គឺជាកិត្តិយសដ៏ខ្ពង់ខ្ពស់មួយជាលក្ខណៈអន្តរជាតិ។ បណ្ឌិត្យ​សភា​ដ៏ល្បីល្បាញរបស់អាមេរិកនេះ ត្រូវ​បាន​បង្កើត​ឡើង​ក្នុង​ឆ្នាំ១៨៩៨ ហើយ​គឺ​ជា​សហគមន៍​សិល្បៈ​កំពូល​គួរ​ឱ្យ​គោរព​បំផុត​មួយ​នៅ​សហរដ្ឋ​អាមេរិក។ សហគមន៍នេះ សមាជិក​តែ ២៥០នាក់​ប៉ុណ្ណោះ ដោយ​រួមមានស្ថាបត្យករ សិល្បករ អ្នកនិពន្ធ​តន្ត្រី និង​អ្នក​និពន្ធ​សៀវភៅឈាន​មុខ​គេ ​គ្រប់​គ្រង​លើពាន​រង្វាន់​សិល្បៈ​ចំនួន៧០ ដើម្បី«ជំរុញ ជួយ និង​ទ្រទ្រង់​ឧត្ដមភាព» ផ្នែក​អក្សរ​សាស្ត្រ តន្ត្រី និង​សិល្បៈ​ក្នុង​សហរដ្ឋ​អាមេរិក។ លោក ចាប ចិត្រា នៃ VOA រាយការណ៍​ពី​ទីក្រុង San Diego រដ្ឋ California។

រដ្ឋាភិបាល​ក្រុង​ប៉េកាំង​កំពុង​ពង្រឹង​ចំណង​សេដ្ឋកិច្ច​ ការទូត និង​យោធា​ជាមួយ​នឹង​រដ្ឋាភិបាល​របស់​លោក​នាយករដ្ឋមន្ត្រី ហ៊ុន សែន តាមរយៈ​ការ​វិនិយោគ​ ប្រាក់​ឧបត្ថម្ភ និង​កញ្ចប់​ប្រាក់​ជំនួយ​យោធា​ដ៏​ច្រើន។ ស្រប​ពេល​ជាមួយ​គ្នា​នេះ ភ្ញៀវ​ទេសចរណ៍​ កម្មករ និង​អ្នក​ជំនួញ​ចិន​សម្រុក​មក​ប្រទេស​កម្ពុជា​ក្នុង​ចំនួន​ដ៏​ច្រើន​ដែល​មិន​ធ្លាប់​មាន​ពី​មុន។ ខណៈ​ដែល​ពលរដ្ឋ​ខ្មែរ​មួយ​ចំនួន​ទទួល​បាន​ប្រយោជន៍​ពី​ការ​ហូរ​ចូល​មក​ដល់​របស់​ជនជាតិ​ចិន និង​ប្រាក់​របស់​ចិន ជីវិត​របស់​មនុស្ស​ជាច្រើន​ទទួល​រង​ផល​ប៉ះពាល់​អវិជ្ជមាន​យ៉ាង​ខ្លាំង។ ស្រប​ពេល​ដែល​មាន​អារម្មណ៍​មិន​ពេញចិត្ត​លើ​ជនជាតិ​ចិន​នោះ អ្នក​ខ្លះ​ជឿ​ថា មិន​គួរ​បន្ទោស​ទៅ​លើ​ជនជាតិ​ចិន​តែ​ម្ខាងនោះ​ទេ ដោយសារ​តែ​ពួកគេ​ត្រូវ​បាន​អនុញ្ញាត​ឱ្យ​ចូល​មក​ក្នុង​ប្រទេស​កម្ពុជា។ រាយការណ៍លម្អិតដោយអ្នក​នាង Liyuan Lu អ្នក​យក​ព័ត៌មានផ្សាយ​ជា​ភាសា​ចិន​នៃ​វីអូអេ ​ពី​ក្រុង​ព្រះសីហនុ។ លោក សាយ មុន្នី ជូនសេចក្តីប្រែសម្រួល។

ស្ថាប័ន​សារព័ត៌មាន​ឯករាជ្យ​នានា​នៅ​កម្ពុជា​កំពុង​តែ​ប្រឹងប្រែង​ងើប​ឡើង​វិញ បន្ទាប់ពី​រង​ការ​បង្ក្រាប​ទ្រង់ទ្រាយ​ធំ​របស់​រដ្ឋាភិបាល​នៅ​ក្នុង​អំឡុង​ពេល​នៃ​ការ​បោះឆ្នោត​ជាតិ​ឆ្នាំ ២០១៨។ ការ​បង្ក្រាប​នេះ​បាន​បង្ខំ​ឲ្យ​មាន​ការ​បិទ​ស្ថានីយ​វិទ្យុ​រាប់​សិប​កន្លែង និង​កាសែត​លេចធ្លោ​មួយ​ចំនួន បញ្ឈប់​ការ​ផ្សាយ​របស់​ប្រព័ន្ធ​ផ្សព្វផ្សាយ​បរទេស រួម​ទាំង​បណ្ដាល​ឲ្យ​មាន​ការ​ចាប់​អ្នក​កាសែត​ពីរ​នាក់​ដាក់​ពន្ធនាគារ​ពី​បទ​ចារកម្ម​ផង​ដែរ។ លោក Brian Padden នៃ VOA រាយការណ៍​ពី​រាជធានី​ភ្នំពេញ​មក​ថា រដ្ឋាភិបាល​កម្ពុជា​ឥឡូវ​នេះ​បាន​បន្ធូរបន្ថយ​ការ​ដាក់​សម្ពាធ​ទៅ​លើ​ប្រព័ន្ធ​ផ្សព្វផ្សាយ​ខ្លះៗ បន្ទាប់​ពី​សហភាព​អឺរ៉ុប​បាន​គំរាម​ដាក់​ទណ្ឌកម្ម ក៏​ប៉ុន្តែ​អ្នក​កាសែត​នៅ​តែ​បន្ត​ប្រឈម​នឹង​ការ​ជាប់​ពន្ធនាគារ និង​ការ​ធ្វើ​ទុក្ខបុកម្នេញ​សម្រាប់​ការ​សរសេរ​សេចក្ដីរាយការណ៍​ណា​ដែល​រិះគន់​រដ្ឋាភិបាល​កម្ពុជា។ អ្នកស្រី ហុង ចិន្ដា ជូន​សេចក្ដី​ប្រែ​សម្រួល។

កម្មវិធី Plugged In with Greta Van Susteren​ បាន​ទៅ​ដល់​ប្រទេស​កម្ពុជា​ដើម្បី​ស្វែង​យល់​ថា​តើ​បច្ចេកវិទ្យា​និង​ប្រជាជន​វ័យ​ក្មេងកំពុង​ព្យាយាម​យក​ឈ្នះ​លើ​ប្រវត្តិសាស្ត្រ​សង្គ្រាម​និង​អំពើ​ប្រល័យ​ពូជសាសន៍​យ៉ាង​ដូចម្តេច។ អ្នកស្រី Greta បាន​និយាយ​ជាមួយ​អ្នក​រស់​រាន​មាន​ជីវិត​ពី​របប​ខ្មែរ​ក្រហម គឺលោក ឆាំង យុ នាយក​ប្រតិបត្តិ​មជ្ឈមណ្ឌល​ឯកសារ​កម្ពុជា អ្នកស្រី រស់ សុភាព នាយិកា​ប្រតិបត្តិ​អង្គការ​យេនឌ័រ​និង​អភិវឌ្ឍន៍​ដើម្បី​កម្ពុជា និងលោក ផៃ ស៊ីផាន អ្នក​នាំ​ពាក្យ​រដ្ឋាភិបាល​កម្ពុជា។

រឿង​ល្ខោន Cambodian Rock Band ឬ ក្រុម​ភ្លេង​សម័យ​ខ្មែរ ដែល​និពន្ធ​ដោយ​នាង Lauren Yee កំពុង​សម្តែង​នៅ​រោងល្ខោន Signature Theater ក្នុង​ទីក្រុង​ New York។ រឿង​ល្ខោន ក្រុម​តន្ត្រី​រ៉ុក​កម្ពុជា‍‍ ដែល​ពោរពេញ​ទៅ​ដោយ​ចម្រៀង​ខ្មែរ​ពិរោះៗ​ថ្មី​ចាស់​ជា​ច្រើន​នោះ ​លាត​ត្រដាង​អំពី​ការ​តស៊ូ​របស់​ពលរដ្ឋ​កម្ពុជា ក្រោយ​របប​ខ្មែរ​ក្រហម និង ការ​ប្រឈម​នឹង​អតីត​កាល​ដ៏​ឈឺ​ចាប់។ ​លោក ប៉ូច រាសី រាយការណ៍​ពី​ទីក្រុង​ញូវយ៉ក មក​ថា រឿង​ល្ខោន​នេះ​នឹងសម្តែង​ជា​ផ្លូវការ​ពី​ថ្ងៃ​ច័ន្ទ​ទី​២៤ ដល់​ថ្ងៃ​ទី​១៥ ខែ​មីនា ឆ្នាំ​២០២០។