ក្រុម​អ្នក​គាំទ្រ​លោក​សម រង្ស៊ី​ ដែល​បាន​ធ្វើ​ដំណើរ​ពី​សហ​រដ្ឋ​អាមេរិក​ និង​កាណាដាទៅ​រង់ចាំដំណើរ​លោក នៅ​ឯ​ប្រទេស​ថៃ​បាន​អះអាង​ថា ​ពួក​គាត់ក៏​រង​ការ​ដាក់​សម្ពាធ​ផ្លូវ​អារម្មណ៍​តាម​រយៈ​ការ​តាម​ដាន ​និង​សួរ​នាំ​ច្រើន​លើក​ច្រើន​សារ​ពី​សំណាក់​ប៉ូលិស​ថៃ ​និង​សមត្ថកិច្ច​ខ្មែរ​ដែល​បន្លំ​ខ្លួន​ជា​ប៉ូលិស​ថៃ។

ក្រុម​គ្រូពេទ្យ​ខ្មែរ​អាមេរិកាំង​ប្រមាណ​១៣១​នាក់​ និង​សិស្សសាលា​ពេទ្យ​ស្ម័គ្រចិត្ត​កម្ពុជា​ប្រមាណ​៩០​នាក់​ ផ្តើម​ផ្តល់​សេវា​ព្យាបាល​ជំងឺ​ដល់​ប្រជាពលរដ្ឋ​ខ្មែរ​នៅ​ក្នុង​ខេត្ត​កំពង់​ស្ពឺ​តាំងពី​ថ្ងៃ​អាទិត្យ​ ទី​១២​មករា​ ឆ្នាំ​២០២០​។ ការ​ផ្តល់​សេវា​ពិគ្រោះ​ និង​ព្យា​បាល​ជំងឺ​ដោយ​ឥត​គិត​ប្រាក់​កម្រៃ​នេះ​ នឹង​បញ្ចប់​ទៅ​នៅ​ថ្ងៃ​ទី​១៧​ ខែ​មករា​ ឆ្នាំ​២០២០។ នេះ​គឺជា​ខួបលើក​ទី​១០ឆ្នាំ ដែលគ្រូ​ពេទ្យ​ស្ម័គ្រ​ចិត្ត​ខ្មែរ​អាមេរិកាំង​នៃ​សមាគម​សុខាភិបាល​ខ្មែរនៅ​អាមេរិកបាន​ផ្តល់​សេវាពិនិត្យ​ព្យាបាលជំងឺ​ និងផ្តល់​ថ្នាំ​ដោយ​ឥតគិត​ថ្លៃ​នៅប្រទេស​កម្ពុជា។​ លោក​វេជ្ជបណ្ឌិត​ Song Tan ប្រធានក្រុម​បេសកកម្ម​គ្រូ​ពេទ្យ​ស្ម័គ្រ​ចិត្ត​ខ្មែរ​អាមេរិកាំង​នៃ​សមាគម​សុខាភិបាល​ខ្មែរនៅ​អាមេរិក​ ផ្តល់សម្ភាសន៍​ជាមួយ​លោក ហ៊ុល រស្មី នៃ VOA ​កាលពី​ថ្ងៃចន្ទ ទី​១៣ ខែមករា ឆ្នាំ​២០២០​ ទីនៅមន្ទីរ​ពេទ្យ​បង្អែក​ខេត្ត​កំពង់​ស្ពឺ​ អំ​ពីបេស​ក​កម្ម​ខួបទី​១០ឆ្នាំ​នៃ​ការ​ផ្តល់​សេវាព្យាបាល​ជំងឺ​ដោយ​ឥតថ្លៃ​ដល់​ពលរដ្ឋ​ខ្មែរនៅតាម​បណ្តាខេត្ត​នានា​នៃ​ប្រទេស​កម្ពុជា៕

ប្រជាពលរដ្ឋខ្មែរអាមេរិកាំងនិងកាណាដានិងអ្នកគាំទ្រអតីតបក្សសង្គ្រោះជាតិប្រមាណជាង២០០នាក់បានមកជួបជុំគ្នា នៅមុខវិមានសភា សហរដ្ឋអាមេរិក និងបានទៅតវ៉ានៅស្ថានទូតចិត្តឲ្យរដ្ឋាភិបាលប្រទេសនេះគោរពកិច្ចព្រមព្រៀងក្រុងប៉ារីសឆ្នាំ១៩៩១៕

លោក សឿនវឌ្ឍនានៃវីអូអេរាយការណ៍ពីរដ្ឋធានីវ៉ាស៊ីនតោន

លោក W. Patrick Murphy ក្លាយ​ទៅ​ជា​ឯកអគ្គរដ្ឋទូត​សហរដ្ឋ​អាមេរិកទី១៧ ប្រចាំប្រទេស​កម្ពុជា បន្ទាប់ពី​លោក​ត្រូវ​បាន​តែងតាំង​ឲ្យ​កាន់​តំណែង​ កាល​ពី​ខែ​សីហា​ ឆ្នំា២០១៩ កន្លង​មក។ កាល​ពី​ថ្ងៃ​ទី​១៣ ខែ​ធ្នូ លោក​ឯកអគ្គរដ្ឋទូត Murphy បាន​អញ្ជើញ​មក​ការិយាល័យ​ព័ត៌មាន VOA ក្នុង​រាជធានី​ភ្នំពេញ ដើម្បី​ផ្ដល់​បទ​សម្ភាសន៍​ដល់ កញ្ញា ផន បុប្ផា អំពី​ស្ថានភាព​លទ្ធិប្រជាធិបតេយ្យ​និង សេរីភាព​ព័ត៌មាន​នៅ​កម្ពុជា ទំនាក់ទំនង​កម្ពុជាជាមួយ​អាមេរិក​និងចិន និង​បេសកកម្មការទូត​របស់​លោក។

ការ​ហូរ​ចូល​យ៉ាង​គំហុក​នូវ​ចំនួន​ពលរដ្ឋ​និង​វិនិយោគទុន​ចិន បាន​ប្រែក្លាយ​ទីក្រុង​ជាប់​មាត់សមុទ្រ​នៃ​ខេត្ត​ព្រះសីហនុ​ដែល​ធ្លាប់​តែ​ស្ងាត់ស្ងៀម ទៅ​ជា​ទីក្រុង​របស់ចិន ពោរពេញទៅដោយកាស៊ីណូ រង្គសាល ភោជនីយដ្ឋាន និងហាងម៉ាស្សា​ដែលគ្រប់គ្រងដោយអ្នកវិនិយោគជនជាតិចិន មកពីប្រទេសចិន។ អ្នក​នាង Liyuan Lu អ្នក​យក​ព័ត៌មានផ្សាយ​ជា​ភាសា​ចិន​នៃ​វីអូអេ ​រាយការណ៍លម្អិតពី​ក្រុង​ព្រះសីហនុ។ លោក សាយ មុន្នី ជូនសេចក្តីប្រែសម្រួល៕

ជន​ជាប់​ចោទ​លោក​អោ អាន​ ស្នើ​ឲ្យ​តុលាការ​លើក​លែង​ការ​ចោទប្រកាន់លើ​រូប​លោក​ ដោយ​លោក​អះអាង​ថា​ លោក​មិន​ជាប់​ពាក់​ព័ន្ធ​នឹងឧក្រិដ្ឋកម្មណាមួយ​នោះ​ទេ។ ការ​ស្នើ​របស់​អតីត​មេ​បញ្ជាការ​រង​ភូមិ​ភាគ​មជ្ឈឹម​ក្នុង​របប​ខ្មែរ​ក្រហម​រូប​នេះ​ ​ធ្វើឡើង​ នៅ​មុន​ពេល​សាលាក្តី​ខ្មែរ​ក្រហម​ចេញ​សាលដីកា​របស់​ខ្លួន​លើ​បណ្តឹង​ឧទ្ធរណ៍​របស់​លោក​ ប្រឆាំង​នឹង​ដីកា​ដំណោះស្រាយ​ (ដីការ​បញ្ជូន​ទៅ​ជំនុំ​ជម្រះ)​ នៅថ្ងៃ​ទី​១៩​ ខែ​ធ្នូ​ ឆ្នាំ​២០១៩​នេះ។ លោក​សុខ ខេមរា​ និង​លោកហ៊ុល រស្មីនៃ​ VOA ​បាន​សម្ភាស​ លោក​អោ អាន​ នៅ​ពេល​លោក​កំពុង​សម្អាត​ដី​ចម្ការ​របស់​លោក​ក្នុង​ស្រុក​កម្រៀង​ ខេត្ត​បាត់​ដំបង​កាលពីថ្ងៃ​ទី​១៥​ ខែធ្នូ ឆ្នាំ​២០១៩​កន្លង​ទៅ​នេះ៕

លោក សម រង្ស៊ី ប្រធាន​ស្តីទី​គណបក្ស​សង្គ្រោះជាតិ ​បាន​បញ្ចុះបញ្ចូល​អ្នក​តាក់តែង​ច្បាប់​សហរដ្ឋ​អាមេរិក​ឱ្យ​អនុម័ត​ច្បាប់​ដាក់​ទណ្ឌកម្ម​រដ្ឋាភិបាល​កម្ពុជា​ដើម្បី​ស្តារ​លទ្ធិប្រជាធិបតេយ្យ​និង​សិទ្ធិ​មនុស្ស​ឡើងវិញ។ ​លោកសម រង្ស៊ី​ បាន​មកដល់​រដ្ឋធានី​វ៉ាស៊ីនតោន​នៅ​សប្តាហ៍​នេះ​ បន្ទាប់​ពី​ការ​ព្យាយាម​វិល​ត្រឡប់​ទៅ​ប្រទេស​កម្ពុជា​វិញ​កាលពីថ្ងៃទី​៩ ខែ​វិច្ឆិកា ​ត្រូវ​បាន​រដ្ឋាភិបាល​កម្ពុជា​រារាំង។ (លោកម៉ែន គឹមសេង, Hello VOA, វ៉ាស៊ីនតោន, ១២ ធ្នូ ២០១៩)

ម្ហូប​ខ្មែរ ជា​រឿយៗ​មិន​សូវ​មាន​អន្តរជាតិ​ស្គាល់​ដូច​ម្ហូប​ថៃ​និង​វៀតណាម​ មួយ​ផ្នែក​ដោយសារ​ប្រវត្តិសាស្ត្រ​ដ៏សោកសៅ​របស់​ប្រទេស​កម្ពុជា។ ប៉ុន្តែ​ចុងភៅ​ខ្មែរ​ម្នាក់​កំពុង​តែ​ធ្វើ​ការ​ផ្លាស់​ប្ដូរ​រឿង​នេះ។ លោក ចាប ចិត្រា នៃ VOA រាយការណ៍​ពី​រដ្ឋធានី​វ៉ាស៊ីនតោន។

អ្នកលេងខ្លែងនៅកម្ពុជាជួបជុំគ្នានៅខេត្តកោះកុងកាលពីថ្ងៃពុធ ដើម្បីប្រកួតការបង្ហោះខ្លែងប្រចាំឆ្នាំលើកទី២៣ ដែលមានខ្លែងគ្រប់ពណ៌ គ្រប់ខ្នាត និងគ្រប់ប្រភេទ។ ការប្រកួតខ្លែងនៅឆ្នាំនេះរៀបចំឡើងដោយក្រសួងវប្បធម៌និងវិចិត្រសិល្បៈ ដោយមានអ្នកចូលរួមប្រកួត១០៧នាក់ មកពីខេត្តចំនួន២៣ នៃ២៥ខេត្តក្រុង។ ពិធីនេះមានគោលបំណងអភិរក្សប្រពៃណីសន្តិភាពនៅកម្ពុជា បង្រៀនរបៀបធ្វើខ្លែងពីមួយជំនាន់ទៅមួយជំនាន់។ ការឲ្យពិន្ទុខ្លែង គឺយោងតាមកត្តាសម្រស់ កម្ពស់ហោះ លំនឹង និងសំឡេង។ ទីភ្នាក់ងារព័ត៌មានReuters រាយការណ៍ពីខេត្តកោះកុង៕

អ្នកស្រី រស់ រតនៈ ដែល​គេ​ស្គាល់​ថា​ជា Chef Nak កំពុង​ដាក់​ចិត្ត​ដាក់​កាយ​ថែរក្សា​និង​លើកស្ទួយ​ម្ហូប​ខ្មែរ។ មេ​ចុងភៅ​វ័យ​៣៤ឆ្នាំ ដែល​រៀន​ចម្អិន​ម្ហូប​អាហារ​ដោយ​ខ្លួន​ឯងនេះ មាន​ដើម​កំណើត​នៅ​រាជធានី​ភ្នំពេញ ហើយ​បាន​ដឹង​ថា​ខ្លួន​ស្រលាញ់​សិល្បៈចម្អិន​ទាំង​ពី​កុមារភាព​មកម្ល៉េះ។ ឥឡូវនេះ Chef Nak ក្លាយជា​អ្នក​ផ្សព្វផ្សាយរស់​ជាតិ​ម្ហូប​ខ្មែរ​នៅ​ទូទាំង​ពិភពលោក ហើយ​កំពុង​ធ្វើការ​ជាមួយ​ក្រសួង​ទេសចរណ៍​ដើម្បី​អភិវឌ្ឍ​សិល្បៈ​ធ្វើ​ម្ហូប​ខ្មែរ​ស្តង់ដារ​អន្តរជាតិ​មួយ។ កាល​ពី​ខែ​កក្កដា នៅ​ក្នុង​ដំណើរ​ទស្សនកិច្ច​ម្ហូប​នៅ​សហរដ្ឋ​អាមេរិក​ Chef Nak បាន​ផ្ដល់​បទសម្ភាសន៍​ដល់ VOA អំពី​ដំណើរ​អាជីព​របស់​អ្នក​ស្រី ចាប់​តាំង​ពី​ហាន់​ខ្ទឹម​ស​នៅ​ក្នុង​ផ្ទះ​បាយ រហូត​ដល់​ដឹកនាំ​ក្រុមហ៊ុន​មួយ​ដែល​បង្កើត​មីនុយ​សម្រាប់​ភោជនីយដ្ឋាន​ ផលិត​កម្មវិធី​ធ្វើម្ហូប​លើ​ទូរទស្សន៍​ និង​និង​និពន្ធ​សៀវភៅ​ធ្វើ​ម្ហូប។