Kosmos 94.1

Old Mutual Namibia het 'n WhatsApp-diens bekendgestel wat lede van die Orion Namibia Pensioen- en Voorsieningsfonds in staat stel om onmiddellik toegang tot hul voordeelstate te kry. Hoofbestuurder Monique Christiaan sê die hulpmiddel verwyder hindernisse en bemagtig lede om hul aftreespaargeld gerieflik dwarsdeur hul werkslewe te monitor.

AR-leier Job Amupanda beweer dat 'n maatskappy wat met die musikant Gazza verbind word, gekoppel word aan die aankoop van drie militêre voertuie, elk na bewering ter waarde van 18 miljoen Namibiese dollar. Amupanda beweer dat die voertuie uit Uganda verkry is deur middel van die staatsbeheerde verdedigingsmaatskappy, August 26. Hy het vandag by 'n perskonferensie in Windhoek gepraat.

Brent ru-olie, die internasionale maatstaf, het Woensdag met sowat 9 persent gedaal, van net onder 105 Amerikaanse dollar per vat tot onder 94 dollar per vat. Dit het gevolg ná die Demokratiese party se oorweldigende oorwinning in die Amerikaanse middeltermyn-verkiesings, wat hoop laat opvlam het oor 'n de-eskalasie in die oorlog met Iran. Teen 4-uur vanmiddag was die olieprys 96 dollar 53 sent. Ekonoom Dawie Klopper sê aan Kosmos 94.1 Nuus dit kan baie positief wees vir Namibië en Suid-Afrika.

Arbeidsminister Wise Immanuel het nuwe lede van die Arbeidsadviesraad en die Kommissie vir Gelyke Indiensneming gewaarsku dat afwesigheid en ’n gebrek aan verantwoordbaarheid ernstige gevolge kan hê, insluitend ontslag. Hy het geykte verskonings en die stadige vordering met arbeidswetgewing-hervormings gekritiseer. Immanuel het die lede aangemoedig om te bedank indien hulle nie hul verantwoordelikhede kan nakom nie. Hy het by die inhuldiging van die 16de Arbeidsadviesraad en die aanstelling van nuwe lede van die Kommissie vir Gelyke Indiensneming in Gobabis gepraat.

'n Belangrike bulletin misgeloop? Geen probleem, luister na elke bullie net hier. Al die hoof nuus op een plek.

Die Coca-Cola maatskapy, Global Water Challenge en die World Wildlife Fund het 1,22 miljoen Amerikaanse dollar bewillig om klimaatveerkragtigheid te versterk en die Swakoprivierbekken te herstel. Die //Gam-i Swakop-bekkenveerkragtigheidsprojek is vandag in Windhoek geloods en sal fokus op grondwateraanvulling, waterberging en die herstel van ekosisteme. Energieminister Modestus Amutse sê die inisiatief sal help om die land se waterbronne vir toekomstige geslagte te beskerm.

Die Demokratiese leier in die Amerikaanse Huis van Verteenwoordigers, Hakeem Jeffries, sê die party sal sy volle aandag op lewenskoste en aanspreeklikheid toespits en nie op president Donald Trump se vervolging nie. Die Demokrate het beheer van die Senaat en die Huis oorgeneem in Dinsdag se middeltermynverkiesing. Associated Press se meningspeilings toon lewenskoste en regerings-korrupsie was kiesers se twee belangrikste oorwegings. Jeffries sê die lewe is tans net te duur vir Amerikaners:

'n Belangrike bulletin misgeloop? Geen probleem, luister na elke bullie net hier. Al die hoof nuus op een plek.

Oshikoto-goewerneur Sacky Kathindi moedig die streek se inwoners aan om hul eie kos te verbou midde toenemende voedselonsekerheid weens droogte, armoede en klimaatsverandering. Hy het by die streek se Wêreldvoedseldag-herdenking beklemtoon dat almal toegang tot veilige en voedsame kos behoort te hê. Hy sê voedsel is nie net noodsaaklik vir gesondheid en menswaardigheid nie, maar ook vir ekonomiese ontwikkeling.

Hoofverkiesingsbeampte Sy Mamabolo sê die vaslegging van uitslae is reeds afgehandel in 18 munisipaliteite in die Noord-, die Wes- en die Oos-Kaap. Hy het in die Verkiesingskommissie se nasionale uitslagsentrum in Midrand, Gauteng, gesê 35,5-persent van die verwagte uitslagstate is reeds geskandeer, terwyl 34,8-persent vasgelê is. 'n Kwart van alle uitslagstate is ook reeds deur onafhanklike ouditeure nagegaan. Mamabolo sê goeie vordering word gemaak ondanks langer stembriewe en 'n groter as verwagte kiesersopkoms: