N mierculdi ai 31/08 gëura la 28. edizion dla mostra anuela dl artejanat artistich de Gherdëina. Coche for tl zënter dal tennis de Runcadic, chëst'ann cun n presidënt nuef dl'Unika, Matthias Kostner. Cunsciderazions sun la nuviteis da chëst'ann. Conduzion Leo Senoner

Giuvani Pescollderungg maester in punsiun che vir a Al Plan, à fat tröp por la cultura ladina,cun la publicaziun de dui libri de poesies y süa ativitè pro la Uniun di maestri, la Lia dai Crëp de Mareo y la Uniun di Ladins dla Val Badia. Deache ël à scrit la cronica dl paisc Al Plan por le libr Sass dla Crusc 50 agn alalungia,ti à la Uniun di Ladins, che dà fora la publicaziun fata na picera festa de onoranza. N program de Alessandro Dapunt.-

L valor del volontariat no l é stimabol e, semper de più, se rendon cont de la valuta e de l'amor che l é vindedò la azions de persones che dèsc sie temp per didèr i etres. I ujes del volontariat te noscia valèdes é semper averc e fora per l'an vegn enjigné corsc per tor su neva jent. N rejonon con Linda Debertol, presidenta de la Crousc Biencia de Cianacei. Conduzion Cinzia Pistoia

Plu suvenz dàl tl uedl sperses plu o manco grandes de lëns ghiëi y rosc te nosc bosc. L se trata de lëns amalei o urmëi morc, vitimes dl chëifer dla scorza. N gran problem per l balanz dl bosch, che n muessa resolver dan che l sibe massa tert. Ntervista cun l cumandant dla stazion furestela de Gherdëina, Marco Planker. Conduzion Leo Senoner

“Cie vuelel pa dì ester Ladins encuei?” a chesta domanda ge va dà l concurs fotografich “Ladinia” metù a jir da l’Union Generela di Ladins dla Dolomites, termin per der jù i retrac fotografics è ai 31.08.2022. En rejonon con Milva Mussner, vize presidenta de l’UGLD, conduzion Anna Mazzel

Cun le musical 'Ujöp da Oies' che è gnu raprejentè a Oies ala fin de messe, èl chersciü l' interesc por le santuar de Oies, olache Sant Ujöp Freinademetz è nasciü tl ann 1852. Le santuar de Oies cun la ciasa nadè dl sant y la dlijia te stil cineje è daverta ai pelegrins y tignì vì dala prejënza di patri verbic/miscionars de Styl. Na intervista cun Pater Franco Pavesi, superiur provinzial dl ordinn.

En piena sajon da d’istà rua te noscia valèdes ghesc de duta la sorts e i operatores del setor se dèsc ju per sporjer servijes che va envers i besegnes de la persona con n eie ascort ence a jent che à pedimenc. N rejonon con Mirella Florian, Conseiera de Procura tel Comun General de Fascia e con Elisa Cincelli, titolèra de na boteiga de rodes da mont. Conduzion Cinzia Pistoia

Dò doi egn de limitazions e desfortuna l l nef comitat de endrez met a jir la Festa Ta Mont ai 6 e 7 de aost che arà al zenter la comunanza per troèr endò chel spirit fersucol del ster adum che à scialdi caraterisà la Festa te Val Sén Nicolò. En rejonon con Melissa Locatin, presidenta de la Festa Ta Mont, conduzion Anna Mazzel

L cheder sozio-economich particuler dl mumënt à si ripercuscions nce sul mond dl artejanat. Co ie pa la situazion te Gherdëina y ciunes la prospetives per l daunì ? Ntervista cun l nuef presidënt dla lia di artejans de Gherdëina, Hannes Senoner. Conduzion Leo Senoner

Le teater musical Ujöp da Oies, organisè dala müjiga de Badia y dal Servisc ai Jogn dla Val Badia è na raprejentaziun che restarà tla storia. Por le tema - la vita dl sant, por le carater popolar - cun 70 musicontri y 50 joblers, por l' originalitè - cun i tesc' de Carlo Suani y musighes de Antonio Rossi y por la desfida organisativa - fa la raprejentaziun ala lergia da sëra tert dailò dal santuar. Intervistes cun le presidënt dla müjiga de Badia Philipp Lerchegger, cun Valentin Erlacher organisadù por le Servisc ai Jogn y cun la regista Valentina Kastlunger. N program de Alessandro Dapunt