Chanzuns veglias cun novas notas Il mais da matg vegn connotà cun ils sentiments dal cor, cun novas inamuranzas e cun bellas charezzas. A questa occasiun preschentan las perlas in matg plain chanzuns che portan il messadi d'amur en il titel, e quai betg en las versiuns originalas, mabain en represas pli recentas. Qua figureschan betg mo il renumà «All You Need Is Love» u il «Love Is All Around», mabain er titels exotics sco «Äs git kei Kur gäg's Liäbi» (tenor Leonard Cohen) ubain «Ciao amore ciao» (tenor Luigi Tenco). Cun – tranter auters – Rod Stewart e Phil Collins, Diana Krall (foto) e Gianna Nannini.

Da la «Delilah» enfin tar la «Jesamine» La quarta e davosa ediziun da las perlas dal 1968 è marcada d'in pèr veritablas «schnulzas», sco per exempel la «Jesamine» dals Casuals u la «Young Girl» dals Union Gap. Dasperas datti però anc in ultim gir tras restanzas psicadelicas, tras las «Pictures Of Matchstick Men» dals Status Quo u il «Heavenly Club» da noss Sauterelles svizzers. E betg mancar na dastga la «Delilah» bunamain biblica dal nundestruibel tigher valisic, il Tom Jones (foto). La parada cumpiglia ultra da quai duas truvaglias talianas. In'annada vairamain ritga e multifara, quest 1968!

Dal bubblegum a la revolta La terza ediziun da las perlas dal 1968 mussa d'ina vart la ligerezza dal uschenumnà bubblegum-pop da chanzunettas sco «Yummy Yummy Yummy» ubain «Baby Come Back», ma revela da l'autra vart las chanzuns che reflectavan ils protests e er tumults da lezza stagiun, la «Revolution» dals Beatles ubain il «Street Fighting Man» dals Rolling Stones (foto). E lura anc duas u trais truvaglias or da la scena da country: la «Harper Valley PTA» ed il «Son of Hickory Holler's Tramp». Nunenconuschentas? Tadlar!

Melodias vairamain filmicas. L'onn 1968 è stà marcà musicalmain dad in pèr chanzuns colliadas al film. Quai tanscha dal «Born To Be Wild» dals Steppenwolf – daventà famus en il film «Easy Rider» – passond per la «Ballad Of Bonnie & Clyde» enfin tar la melodia signetica da l'italowestern «The Good, The Bad & The Ugly», filmada dal grond Ennio Morricone. Marcantas eran en il 1968 er chanzuns stralungas. Sco per exempel il «MacArthur Park», scrit dal cumponist Jimmy Webb per l'actur irlandais Richard Harris (foto), in epos da passa set minutas.

Dal «Jumpin' Jack Flash» enfin tar la «Eloise» 1968 n'è betg mo stà l'onn da las revoltas studenticas e da la revoluziun sexuala. En ina seria straordinaria da quatter emissiuns sa regordan «Las perlas» dals hits da lez onn, pia da la musica pop d'avant 50 onns.

Quai tanscha dal «Jumpin' Jack Flash» dals Rolling Stones enfin tar il «Hush» dals Deep Purple u dal «Son of a Preacherman» da Dusty Springfield (foto) enfin tar la «Eloise» da Barry Ryan. In chanaster plain regurdientschas damai.

Da «God Only Knows» enfin tar «Jesus Is Just Alright». Dad ina versiun angelica dals «Sounds Of Silence» enfin tar il «Helicopter» melanconic dals Deerhunter, da la «Cross» sacrala da Prince enfin tar la ballada dal «Lainari Jesus» da Johnny Cash (foto), dal «God Only Knows» da Brian Wilson e las Corrs enfin tar il «Jesus is Just Alright» dals Doobie Brothers – spiras chanzuns cun ina tempra adattada a l'emna sontga ed a Pasca, d'udir exclusiv en las perlas dad oz.

Il maister dal musical modern «Phantom Of The Paradise», «Cats», «Evita», «Jesus Christ Superstar» – ils musicals d'Andrew Lloyd-Webber fan part da la cultura populara dals onns settanta enfin oz. Chors a-capella, musicas da sturs, ensembles classics reprendan adina puspè las renumadas melodias sco «I Don't Know How To Love Him» ubain «Don't Cry For Me, Argentina». Nus tadlain però versiuns originalas u bunamain originalas, da Yvonne Elliman, Jason Donovan, Madonna, Sarah Brightman, Tom Jones. Tut a chaschun dal 70avel anniversari dal cumponist.

Dals Yardbirds enfin tar ils Beatles. Gruppas sco ils Bluesbrakers da John Mayall (foto) u ils Yardbirds avevan gia tschiffà si baud il vegl blues da Muddy Waters e Willie Dixon. Els han transformà el en ina varianta giuvna ed alva britannica.

Sut l'influenza da ghitarrists virtuos sco Eric Clapton e Jeff Beck è naschida vers la fin dals onns sessanta surtut en la Gronda Britannia in nov boom da blues electric ch'ha schendrà gruppas da pur blues sco ils Fleetwood Mac, ils Ten Years After u ils Chicken Shack. E perfin ils Beatles han rescuvert l'onn 1968 il vegl lament afroamerican, per exempel en il «Yer Blues» da John Lennon.

Il musical-clav da l'onn 1968 Igl era in teater provocant e scandalus – ils protagonists propagavan l'amur libra, il consum da drogas, il refus dal servetsch militar. Ed els paradavan schizunt tut nivs sin tribuna. Tant l'effect superfizial da «Hair», il musical american preschentà l'onn 1968 al Broadway da New York. Ma en vardad reflectava quest toc il spiert dal temp: il mund dals hippies, la revolta studentica, il protest cunter la guerra, l'emancipaziun dals Afroamericans, la revolta cunter il conservativissem. Ed el cuntegneva ina massa melodias nunemblidablas: «Aquarius», «Ain't Got No», «Hair», «Easy To Be Hard», «Let The Sunshine In».

Pop e rock dad autras terras. En in mund sonor, dominà da tuns angloamericans, emblidan ins gugent ch'auters pajais han er ina tradiziun da pop e rock en lur atgna lingua – sumegliant a quella svizra cun Züri West u quella tudestga cun Herbert Grönemeyer.

En questa ediziun da las perlas udinsa per exempel ils Pyx Lax da la Grecia, ils Kulna Sawa da la Syria, ils Mysloviz da la Pologna, ils Carabao da la Thailandia, ils Zi Yue da la China. E l'Angélique Kidjo dal Benin. Bun divertiment!