Wie ide letscht Folg versproche, präsentiere mir i dere Folg eusi Verschwörigstheorie! Usgehend vo dere, redemer über verschiedeni Weltahsichte und Welt- bzw. Endvorstellige vom Lebe. Dezue zählt Glaube und Wüsseschaft. wie stönd die zunenand? Was isch üserer Meinig nache stärker? Eif well mirs chönnd, stossemer mitem geile "Röteli"-Lickeur uf eusi sechsti Folg ah. Btw....was isch euses Lieblings-Alk-Getränk und wie stönd mir generell zu Alk? 

DER FRAGENGENERATOR gaht i die nächst rundi....Random isch nur de Vorname. Welli froge gits echt dieses Mal im Fragengenerator?

Nach eis zwei Würderst du lieber-Frage und sKläre vo eusem Lieblingskomponist oder Lieblingsmusikstil gahts au scho ufs Endi zue und wie mer uf de super Name vo dere Folg cho sind. 

I de Folg 5 vo LAUCH UND LOCKE nehme mir de Sicherheitsabstand weg Corona echli zu serious: Mir sitze es paar Kilometer usenand; de Raúl i sim Zimmer und de Josh i sim. Aber hey, dank de moderne Welt hämmer trotzdem endlich wieder en neuei Folg, und die isch sogar gar ned mal so schlecht!

Mir beginned mit Verschwörungstheoretiker und Verschwörungstheorie und rede denne drüber, öb homosexuelli Ehepaar dErlaubnis zum hürote und Kind adoptiere becho söttet, sowie was sProblem a eusere Gsellschaft in Hinsicht uf die Themene sind. Well euse Podcast für Randomness staht, gömmer zumene komplett andere Thema über: Schnarche! Wer i euser Family schnarchet, und was gits so für miesi tricks diejenige zum schweige zbringe.... ;))

Und denn isch es au schowieder Ziet: DER FRAGENGENERATOR gaht i di nächst Rundi. Komplet dumm, random wie nüt anders und darum so perfekt für euse Podcast. So nebebie erfinde de Raúl und de Josh no en neui Zietform im Dütsch und verabschiede sich mit es paar Würdisch-du-eher-Frage.

ASMR isch beliebt. Darum hemmer am Afang extra lut Chips gfrässe...en guete! Es ich Winterziet; Hauptthema i eusem Podcast. Snowboarde oder Skifahre, was isch geiler? Wo ligged die jewilige Vorteil/Nachteil? Mir verzellet wo mir so gönnd go fahre, mit wem und was det sosch no so alles abgaht. Während mir so nebeher Chips mampfed, gits chli (berechtigte) Hate gege Afänger und Ski-Schuele! Denne isches so wiet: Eusi absolut unspektakuläri und random Rubrik: DER FRAGENGENERATOR! En Generator, de us zwei Teil ein Frag bildet. Jede Teil vo dem Satz isch jewils einzeln durchmischbar...die Froge möched grundsätzlich weder grammatikalisch no generell kein Sinn...trotzdem isch das eusi Rubrik..LOL!

Nach dere Frag muetmasse mir, ob mir inere Zombieapokalypse überläbbe würde und wieder über de Winter: Schneeballschlacht ide Schuel oder 3. Weltkrieg? Denne wechsle mer in Sommer und seged wieso Strand grundsätzlich geil-, aber eig lästig isch. Wemmer bi chille sind: Film Dihei oder Film im Kino? Wieso? Zum Abschluss verzellemer no was mir unbedingt mal wennd mache und was so geil/ned geil dra isch. 

Lauch und Locke trifft i dere Folg ned ganz zue. De Special-guest Raphi isch nämli weder en Lauch no hetter Locke. In Folg 3 vo Lauch und Locke gahts um super hochintelligenti Sonderexemplar vo Lüt  und darum was de Raphi so im unterricht frisst. Mir erkläred euses Psychologie Experiment und redet drübber wo mir im Falle vomene Weltuntergang heregah würde. Denne wirds spannend: De Raphi verzellt vomene Vorfall mit nem Fake-Schlüsseldienst und wie sie i die Situation inecho sind!  Denach gits en gmüetliche Talk über lustigi Schuelsituatione währendem Unterricht und mir kläred under anderem dFrag, was mir eus wünsche würde, wenn mir 3 Wünsch frei hätte. Zum Schluss gits no en tolle kurze Deep-Talk über em Raph sini grösste Ängst und mir rede über die schöni Wienachts- und Wichtelziet.

ES ISCH HALLOWEEN!!!!!!! Was isch geil a Halloween und wieso isches unnötig? Süsses oder Saures...Was isch eusi Lieblingssüessigkeit? Nach dem mir die LeBeNsWiChTiGi Frag klärt hend, führemer en deep Talk über de Tod! Hend mir Angst vom Tod? Und was wemmer unbedingt no Erlebe? Denn führemer luter random Gspröch über random Frage wo mir oder ihr eus gstellt hend. Under anderem führemer en churzi Diskussion zum Thema Abtribig und ob mir Ländler oder Städtler sind. Denne chömmemer zude Frag vode Frage, wo mir eigentlich scho ide erste Folg hätte beantworte sölle, aber well mirs chönd, erst jetzt beantworte: Wie sind mir ufd Idee cho en Podcast zmache? Nachher redemer über euses grösste Erfolgserlebnis und chömed zu de Frag öbmer lieber Luxushotel oder Alphüte händ. Zum Abschluss redemer no über eusi geilste Gschenk wo mir je becho hend. 

I de erste Folg vo LAUCH UND LOCKE redemer über en umelaufende Pool, führed en churze Deeptalk über eusi grösste Ängst und üsi 5 grösste Fehlkäuf. Mer rede drübber, dass de Raúl gern en Gummizelle i sim Hus hetti und dass de Josh gern die drü schlimmste Diktatore zum Esse Ilade wür, eifach um sie umzbringe. Jede verzellt sin schlechtischte Witz, woner aber als sin Beste verkauft, de Raúl haut en funny suufstory use und de Josh verzellt wie er es Tesla-Glasdach gschrottet het. Zum Abschluss frogemer üs wie dWelt in 10 Jahr usgseh wird und hend de unepischti Schluss wos git.