Lets Talk Deep - eifach ehrlich.
Download on the App Store

Lets Talk Deep - eifach ehrlich. episodes

  • Folge 6 - Gfühl zeige, Dating & Erwartige vo Fraue - Let's Talk Deep X Bambi Herz
    De Podcast wo sich de mentale Gsundheit vo Männer widmet. ehrlichi Gspröch. echti Erfahrige. ohni Filter.

    Männer söllet meh über ihri Gfühl rede, dass ghört mer hützutags ziemlich oft. Aber was denkt eigentlich d'Gegesiite dezue? I dere Folg han ich d'Annouk vom Podcast «Bambiherz» zu mir is Studio iglade, wo sich selber mit em Thema emotionali Intelligenz uusenandersetzt. Mir redet drüber, ob d'Angst vo Männer berechtigt isch, dass mer als schwach agluegt wird, wenn mer sich öffnet, was uf emene erste Date Platz hät und wo d'Grenze isch zwüsche Gfühl zeige und z'viel si. Es gaht au drum, was Fraue selber falsch mached, was Männer- und Fraueundschafte vonenand chönd lerne und werum sich mentali Problem bi Männer oft als Wuet zeiget und bi Fraue als Truurigkeit.

    D'Annouk findet ihr uf Instagram under @bambiherzpodcast und ihre Pocast uf Apple Podcast & Spotify.

    1 hr 7 min
  • Folge 5 - Ich bin zu mim eigene Psycholog worde
    De Podcast wo sich mit de mentale Gsundheit vo Männer widmet. ehrlichi Gspröch. echti Erfahrige. ohni Filter.

    Sali mitenand :)

    I üsere Folg Nummer 5 isch de Nico z'Gast. Er verzellt ganz offe vo sinere Chindheit: Sini Eltere hend sich trennt, wo er vieri gsi isch, und im spötere Verlauf isch auno sin Brüeder relativ früeh vo deheime uszoge. Demnach isch de Nico scho ned wie vieli Persone da usse mit allne sine Familiemitglieder ufgwachse. Scho as Zehjährige isch de Nico zwüschet sine Eltere gstande und het d'Kommunikation müese übernäh. Vill Verantwortig, vill z'früeh.

    Mir redet drüber, was das mit em Selbstwertgfühl macht, wenn d'Anerchännig vo de Mueter usbliibt. De Nico verzellt au vom Fuessball und vo einzelne Moment, wo hüt no hange bliibed, vom Gruppedruck i sinere Jugend und vom Kampf mit sim eigene Körperbild.

    Er berichtet was ihm würklich ghulfe het, zum mit sich selber is reine z'cho: Journal schriibe, Selbstreflexion und sin Glaube. Es ehrlichs Gspröch über Verantwortig, Verzeihe und schwere Moment ide Entwicklig zumene erwachsene Maa.

    1 hr 23 min
  • Folge 4 - Unsicherheite & Ängst
    De Podcast wo sich de mentale Gsundheit vo Männer widmet. ehrlichi Gspröch. echti Erfahrige. ohni Filter.

    S'thema Angst und Unsicherheite wird bi vielne Männer oft belächlet oder ned ernst gnoh und das führt schlussendlich dezue, dass vieli Männer deisbezüglich schwieget. Mir wönd i dere Folg mit de Psychologin Andrea Moser genauer aneluege und usefinde wieso Männer vermehrt Problem hend sich über ihri Unsicherheit und Ängst uszspreche, was Underschied zu Fraue si chönd und was mer bi dem Thema alles underneh chan.

    Das Thema isch so gross, dass natürlich no lang ned alles i einere Folg gseit werde chan, weswege sicherlich im wiiter Verlauf vom Podcast no wiiter Folge zum Thema, i verschiedene Forme und mit underschiedliche Gäst, erschiene werdet :)

    1 hr 10 min
  • Folge 3 - Vode Liideschaft zum grösste Feind
    De Podcast wo sich de mentale Gesundheit vo Männer widmet. ehrlichi Gspröch. echti Erfahrige. ohni Filter.

    Sali zemme :)

    I üsem allererste richtige Deeptalk isch de Severin z'Gast. Er verzellt vo sinere Ziit als Leistigsportler im Schwiizer Spitzetennis, ganz offe und transparent über sini Erfahrige und drüber, was die Ziit i ihm dine alles usglöst het.

    Vo de erste Erfolg und internationale Turnier, über Rückschläg bis hin zu starche mentale Herusforderige. Es isch sogar sowiit gange, dass sich es Burnout abahnt het. Mittlerwile het de Severin sis Engagement im Tennis beendet und es eiges StartUp ufzoge.

    Wie die Ziit würklich usgseh het und was de Severin undernoh het, zum wieder uf sin Weg z'cho, bespreched mir i dere sehr persönliche Folg. En ehrlichi Gschicht über Druck, Loslah und de Wäg zrugg zu sich selber.

    1 hr 12 min
  • Folge 2 - Status Quo & Hilfsagebot
    De Podcast wo sich de mentale Gesundheit vo Männer widmet. ehrlichi Gspröch. echti Erfahrige. ohni Filter.

    Sali zemme :)

    I dere Folg redemer drüber was Let's Talk Deep i sim erste Monet als Podcast alles erreicht het. Zudem stell ich eu 6 verschiedeni Hilfsagebot vor, wo ihr nutze chönd falls ihr mal externi Hilf für üchi Problem in Aspruch neh wönd. Die Agebot chönd vo üch allne da usse gnutzt werde und sind da, um üch i schwere Ziite zur Siite z'stah.

    Machets guet und gnüsset de hütigi Tag!

    19 min
  • Folge 1 - Stark würke. Stark leiste. Mit Dipl.-Psych. Katharina Woog
    De Podcast wo sich de mentale Gsundheit vo Männer widmet. ehrlichi Gspröch. echti Erfahrige. ohni Filter

    Leistigsdruck isch öppis was üs alli, i irgendere Form immer wieder begleitet. Egal ob er vo üsem externe Umfeld wie Kollege, de Partner oder Familie geh wird, chaner au genau so starch und intensiv vo eim selber uferleit werde. De Druck chan vieles bewürke jedoch bringt er au vieli Risike mit sich mit. Ide hütige Episode wönd mir mit de Dipl. Psychologin Katharina Woog dem ganze genauer uf de Weg gah und üs tüüfer mit dem Thema usenandersetze. Mir redet über persönlichi Erfahrige, Grenze und au ersti Schritt sowie Massnahme wo helfe chönd wenner üs mal zu starch in Chopf stiigt. Druck wird üs i verschiedenste Forme immer begleite, aber es isch essenziell das mir lernet wiemer mit dem umgah chönd.

    56 min
  • Folge 0 - De Start vomene neue Kapitel.
    De Podcast wo sich de mentale Gsundheit vo Männer widmet. ehrlichi Gspröch. echti Erfahrige. ohni Filter.
    Sali zemme, I dere Folg erfahret ihr alles wichtige rundum de Podcast. Ich verzelle üch öppis über mich, wies zu dem Projekt cho isch, was mer sich vo Lets Talk Deep döf erwarte und was Ziel vom ganze wird si. Die Pilotfolg (Folge 0) isch nun de offzielli Start vomene Neue Kapitel.
    Ich wünsche dir ganz viel Spass bim alose und no en ganz schöne Tag :)
    22 min
  • Trailer: Lets Talk Deep - eifach ehrlich.
    De Podcast wo sich de Mentale Gsundheit vo Männer widmet. ehrlichi Grspöch. echti Erfahrige. ohni Filter.

    Herzlich Willkomme bi "Lets Talk Deep". Warum fallts üs Männer so schwer, über das z'rede was üs würklich beschäftigt und belastet? I dem Trailer erfahrsch du, was dich i dem Podcast alles erwartet. Ehrlichi Gspröch mit Psychologe und Betroffene, wo über ihri Erfahrige und Problem verzellet. Mit all dem schaffemers au din Rucksack mit dine tägliche Laste und Herusferoderige, wieder echli liechter z'mache.

    Ohni Tabus und ohni Filter.

    Abonnier de Podcast jetzt, um die ersti Folg ned z'verpasse!

    2 min

About Lets Talk Deep - eifach ehrlich.

From the publisher's feed

Lets Talk Deep - eifach ehrlich.