Nkomishana wemaphoyisa aKwaZulu Natal L.t Jenene Nhlanhla Mkhwanazi utjele iPhalamende kutsi luphiko lemaphoyisa laphenya ngekubulawa kwabosopolitiki iPKTT lasukunyiswa ngetizatfu letiphatsekako. Bekatfula bufakazi embikwekomidi yesikhashane yePhalamende lephenya ngetinsolo letimayelana nekuphepha kwelive. Lekomidi yasungulwa kutsi iyophenya ngekungenelela kwebugebengu, inkohlakalo kanye netepolitiki etinhlelweni temsebenti wetebulungiswa letavetwa nguMkhwanazi ngaKholwane. Ubutwe kutsi nakakholwa kutsi loluphiko liphumelele kulelatfunywa kona, nguwuphi umphumela lotjengisa umsebenti lomuhle. Uchubeke watsi kuchubeka kwaloluphiko kutjengisa umehluko wekulwa nebugebengu...,.

Litiko letemisebenti yesive, imigwaco netekutfutsa kulesifundza seMpumalanga kulindzeleke lisukumise ngalokusemtsetfweni inyanga yetekutfutsa namuhla. Kulomnyaka lelitiko litawusukumisa lomkhankaso ngekubambisana netinhlaka letiphima etifundzeni iGauteng, Kwazulu-Natal kanye ne Free state. Sinemphatsiswa walelitiko Thulasizwe Thomo.

Inhlangano i- ActionSA  seyimemetele Xolani Khumalo njengalotayimelele embangweni wesikhundla sekuba ngusodolobha wamasipala Ekurhuleni elukhetfweni lwabohulumende basekhaya. Khumalo watiwa ngekulwa kakhulu nenkhohlakalo, kusetjentiswa nekushushumbisa tidzakamiva eluhlelweni lolwatiwa ngekutsi Sizokuthola.

Tinhlangano  tepolitiki  letintsatfu letatiwako kuleli lekuyi Rise Mzansi, GOOD Party kanye Build One South Africa timemetele kutsi titawungenela lukhetfo lwabohulumende basemakhaya nga 2026  ngaphansi kwelicembu lelisha lelibitwa nge Unite For Change. Kukhuluma kabanti ngalendzaba asemukele lisekela le-Mengameli we-Build One South Africa (BOSA) , Nobuntu Hlazo-Webster.

Kunetikolo letingu 20 000 letinebasiti babothishela labangakaholi kulenyanga lefile. Indvuna yelitiko lekucasha kanye netisebenti Nomakhosazana Meth uticitsile tinsolo tekutsi litiko lakhe amange likhulule timali tekukhokhela basiti babothishela nalabo labasebenta imisebenti leminye etikolweni, etikweni lemfundvo lesisekelo. Kuva kahle kutsi kwentekeni, sicele lisekela lendvuna yalelitiko Jomo Sibiya kutosichazela.

Umhlatiyi wetepolitiki Prof Nsikelelo Breakfast utsi ngumcondvo lohlakaniphile lokubunjwa kwalenhlangano lensha iUnite for Change, lesungulwe tinhlangano letintsatfu, lekuyi-Rise Mzansi, BOSA kanye ne-GOOD Party.

Indvuna yelitiko latagezi Dr Kgosientsho Ramokgopa ukhutsata bantfu kutsi basebentise titofu netifutfumeti te-hasi (gas) (gas stoves and heaters), njengendlela yekwehlisa kutfwala matima kwagezi. Simeme  Umnumzane Abdul Phiri loyi professional Gas installer kutosichushisa ngekuphepha kwe-hasi.

Sicocisene naKanego Thete lophetse lihhovisi letekuchumana etikweni letekutfutfukisa tenhlalakahle kulesifundza se-Mpumalanga mayelana nekubungatwa kwenyanga yekutfutfukisa tenhlalo. 

Inkapani iEzulwini Investments itsi itimisele ngekuyilandza yonke imali leyikolotwa iANC. Loku kulandzela kutsi lenhlangano yephule sivumelwano sekukhokhela lenkapani sikoloto lesidzala semali lengu-150 Million wemarandi. iANC ibukene nekutsatselwa imphahla kulandzela kutsi inkantolo igunyate lenkapani lekolotwa imali lengu-85 Million wemarandi yekukhankasela lukhetfo lwavelonke nga-2019. Lenkapani ifuna kudla impahla lesemahhovisini lamakhulu eANC iLuthuli House eJozi. Ummeli weEzulwini Shafique Sarlie...,

Ikomidi yePhalamende yelitiko lekuphatfwa kwetimali tesive iSCOPA lamuhla itawucala luphenyo letinsolo tekungaphatfwa kahle kwemsebenti wembuso, kusetjentiswa kabi kwetimali tesive esikhwameni sekuncephetelisa etingotini temgwaco iRoad Accident Fund. Inhloso lenkulu ngaloluphenyo kufuna kutfola kabanti kutsi kwabakhona yini kungalandzelwa kwemtsetfo nobe imigomo yekusebenta kweRAF. SCOPA nasitawutfola emaphutsa sitawenta tiphakamiso tekutsatfwa kwetinyatselo. Loluphenyo luta ngemuva kwetinyanga letimbalwa SCOPA setama kutfola umniningwane wetimali ebhodini yeRAF kanye natikwetikhulu tayo.