Kunalabatsi liphalamende angeke lisafana kulandzela kwesula kwelilunga le-EFF Dr Mbuyiseni Ndlozi. Inhlangano yeEFF ikhiphe sitatimende lesitsi yemukele tincwadzi tekwesula ngekutitsandzela ephalamende kwa Ndlozi kanye naYazini Tetyana losule kusishayamtsetfo saseMphumalanga Kapa.  KLubuka umsebenti waNdlozi ephalamende sicocisana nentsatseli yeSABC ephalamende Lulama Matya. 

Kufika kwetebucwepheshe kuletse tingucuko letinkhulu emikhakheni nesetimbonini letahlukahlukene kulelive. Lucwaningo lolwetintiwe tati tetemfundvo kulelive ngekusebetjentiswa kwelucingo, i-Zoom kanye neMicrosoft Teams luveta kutsi tikolo tasemadolobheni ngito letisebentisa tinhlelo tesimanje ekufundziseni letikufaka ekhatsi iWhatsApp, Google Apps, YouTube, Office 365 kanye ne Zoom. Sati setemfundvo Dr Phumlani Myenge utsi kuswelakala kwetinsita etikolweni kusaseyinkinga lenkhulu.

Umtimba lowengamele tikolo wente lubito kutsi emalunga emndeni asekele bafundzi bakamatikuletjeni nakukhishwa imiphumela yabo emaphephandzabeni kuleliviki lelitako. Bangetulu kwa 900 000 bafundzi bakamatikuletjeni lababhale luhlolo lemnyaka wa 2024 labalindze ngalabovu lokukhishwa kwemiphumela.  Sicocisene nanjingalwati lobuke imfundvo yasemaphandleni eNyuvesi ya KwaZulu Natal, Prof Phumlani Myende.

Ukhululwe ngebheyli yenkulungwane yemaRandi munye walabasolwa lababili lababposhelwe kukhwabanisela gogo loneminyaka lengu-71 imali yakhe yemphesheni lengu R1700 ,  lapha e-Dayizenza Complex eMasoyi.  Thembi Mhlanga loneminyaka lengu-46 budzala, wake waba liphoyisa esiciwini setinyamatane kaSkukuza, ukhululwe ngebheyili. Kantsi loyi laboshwe naye Sarel Sithole loneminyaka lengu 37 inkantolo yalile kumnika ibheyili ngoba unalamanye emacala labukene nawo. KMuyikhuluma lendzaba sicocisene na Colonel Jabu Ndubane.

Sikhungo llesilawula kushicilelwa kwemininingwane i- Information Regulator, sesivakalise kudvumala ngesincumo senkantolo lenkhulu yase Pitoli. Lenkantolo isicitsile sicelo salesikhungo sekwetama kuvimbela litiko lemfundvo lesisekelo kutsi lishicelela imiphumela yakamatekutjeni emaphephandzabeni kuleliviki lelitako  Kutfola luvo lwebatali ngalesincumo, sikhulumisana nasihlalo wemtimba lowengamele tikolo kulelive, iNatyional Association of School Governing Bodies,  Elphus Maseko.

Ngemuva kweminyaka lecishe ibe ngemashumi lamabili takhamuti tase Hammanskraal  tingenawo emanti ekunatsa lahlantekile etimpompini, nyalo setitawukhona kudvonsa umoya njengobe sekayaphuma. Sodolobha wase Tshwane Nasiphi Moya wente lesimemetelo ngalesikhatsi avakashele sikhungo lesihlanta emanti e Magalies Klipdrift. Intsatseli yeSABC Nonhlanhla Ntshingila usihlanganisele lombiko lesiwetfulelwa nguSindisiwe Mlangeni.

Umkhandlu lowengamele imboni yetemculo kuleli (SA Music Industry Council, [SAMIC]) utsi Winnie Khumalo uyibekile indvuku ebandla kulomkhakha wetemculo.  Khumalo wendlule emhlabeni aneminyaka lengema-51. Lisekela lamabhalane walomkhandlu Umnumzane Thobela Dlamini uchaze Khumalo njengemuntfu webantfu, lebekuhlala kuhlekwa nakunaye. 

Sikhulumisana nelisekela lesibili lemengameli weCOSATU Umnumzane Mike Shingange ngalokugubha iminyaka lelikhulu nelishumi nakutsatfu kwehlangano i-ANC namuhla.

I ANC ihlanganisa iminyaka lengu-113 namuhla kantsi kulindzeleke buholi lobusetulu balenhlangano butseleke ngetinkhani eNshonalanga Kapa kutewugubha lelilanga lekukhula kwayo. loku kusendlalelo semcimbi lotawubanjelwe eKhayelitsha ngeMgcibelo. Itolo ehlelweni letfu Letiphuma Embiteni sicocisene nalokhulumela iANC Mahlengi Bhengu-Motsiri kutesihlephulela ngetinhlelo tabo.

Kuyachubeka namuhla lokufunwa kwalabantfu lababili lekusolwa kutsi bemuke nemfula e-Asseggaai kumasipala wase Mkhondo kulesifundza sase Mpumalanga. Loku kwenteka nje solomane ichubeke njalo nekuyidliva lemvula etincenyeni letinyenti kulelive. Umcondzisi weligumbi lelibukene netinhlekelele etikweni letekubusa ngekubambisana kanye nebaholi bendzabuko kulesifundza Slykie Dhludhlu, utsi sebeme ngemumo kusita emalunga emphakatsi latawukhahlanyetwa timvula.