Bantfu labanyenti bacale ngemphelasontfo kungenele indlela lebuyela emisebentini ngekwehlukana kwayo kantsi loku kubone sibalo senyuka eminceleni yakulelive. Sicocisene naGeneral David Chilembe lophuma kuBMA.

Litiko letemfundvo esifundzeni sase-Mpumalanga lente lubito kubahlali, imitimba leyengamele tikolwa kanye netinhlangano temimango  kutsi besekele yonkhe imisebenti yetikolwa kufaka ekhatsi kucinisekisa kuhlanteka kwetikolo. Umphatsiswa walelitiko Cathy Dlamini utsi njengobe sekusele emalangana lambadlwana ngembi kwekutsi tikolwa tivulwe, kumele kucinisekiswe kutsi bafundzi banikwa emagumbi ekufundzela lafanele, tincwadzi tekufundza kanye naletinye tinsita tekufundza. 

Kusebenta ngetebuchwepheshe  lekwatiwa nge-4IR kwente kutsi tinkapani letinyenti tintjintje tindlela tekusebenta. Loku sekutsintsa netinkapani tebemaphephandzaba. Kulenyanga leyengcile yeNgongoni 2024 emaphephandzaba lamanyentana lamakhulu lafaka ekhatsi i-City Press evakalisa kutsi angeke asagaya emaphephandzaba kepha kunaloko sekatawushicilelwa ngendlela ya-Online. Kubuka kutsi ingabe lendlela yaOnline incono yini kunaleyo letjwayelekile simeme Umnuzane Hopewell  Hadebe lovela enhlanganweni yebahleli betindzaba iSANEF

Kubonakala kukunyenti lekulindzeleke kutsi kwenteke kunawu mnyaka ngasehlangotsini letindzaba kupolitiki.  Simeme intsatseli yetepolitiki kaSABC Samkele Maseko kutewubuka naye tindzaba letitawuba sematseni.

Esigabeni setfu  sekucubungula emabhuku, namuhla sitawube sibuka libhuku lelitsi "Heiress Decides To Be A Princess" lelibhalwe ngekubambisana bo Mbali Sebapu naNtombenhle Khathwane. Ngekusho kwalababhali lelibhuku likhuluma ngetindlela tekulwa nekuhlukunyetwa kanye neludlame lolubhekiswe kubomake nebantfwana. Kepha lotasichazela kabanti ngulomunye walababhali lesinaye elucingweni, Ntombenhle Khathwane.

Kunemibiko letsi letinye takhamuti  taseveni lase Mozambiki, tibalekela eveni lase eSwatini kulandzela lemibhikisho lecubuke ngenca yekungenetiseki ngemiphumela yelukhetfo e Mozambiki. Kepha kuva kutsi lelive  lase e Swatini libukana njani nalesimo sicocissana nalokhulumela hulumende wase Swatini, Alphues  Nxumalo.

Umholi wenhlangano lephikisako eMozambiki, Venancio Mondlane sewucele kutsi kube nekuthula nelubumbano kulandzela lemibhikisho lecubuke kulelalive ngenca yekungenetiseki ngemiphumela yelukhetfo. Lemibhikisho itiphe emandla ngemuva kwesimemetelo semkhandlu wemtsetfo-sisekelo eMozambique sekutsi Daniel Chapo weFRELIMO nguye lophumelele lolukhetfo ngemavoti langu 65%, lekehle asuka-71% lowamenyetelwa likomishana lelukhetfo nakucedza kuvotwa ngenyanga yeMphala. Kukhuluma kabanti ngalesimo salelalive, ecingweni sichumana nemhlatiyi wetindzaba tangaphandle Thulisa Ndlela

Kungumkhuba lotayelekile kutsi njalo nakucala umnyaka lomusha bantfu babhalele phansi tintfo labafisa kutenta ngembi kwekuphela kwemnyaka. Kepha sincane sibalo sebantfu labaphumelela kutifeza leto tifiso tabo. Simeme umfundisi Jerry Khoza kutococa naye ngaloludzaba.

Kubuka tindzaba letihambe embili nga-2024 eMpumalanga sikhulumisana nentsatseli ye-SABC Motsebi wa Monareng.

Umkhandlu wemabandla kuleli i South African Council of Churches (SACC) ubita labasemandleni kutsi bangenelele ngekuphutfuma kulesimo lesichubeka eveni lase Mozambique. Sicocisana namabhalane jikelele walomkhandlu, Rev Mzwandile Molo.