Umphatsiswa welitiko letekuphepha kwemphakatsi, kuvikeleka nekuchumana eMpumalanga Jackie Macia ngekubambisana nelibamba laNkomishana wemaphoyisa esifundza Major General Dr Zeph Mkhwanazi, betfule umkhankaso wekulwa nebugebengu ngalamaholide letako akhisimusi. Sinaye umphatsiswa Jackie Macia kutosichazela ngalomkhankaso.

Hulumende wase Zimbabwe umemetele kutsi utawucephetelisa balimi labamhlophe labakulelalive kanye nalabakulamanye emave labatsatselwa umhlaba eminyakeni lengemashumi lamabili leyengcile, kuloluhlelo lwekulungisa umonakalo lowadalwa ngulabo bebacindzetele i-Zimbabwe. Sicocisene nemhlatiyi wetindzaba tase Africa, Advocate Sipho Mantula.

Inkinga yekuswelakala kwemanti ngulenye yaleto letikhungetse lelive nalebanga imibhikisho leminyenti kubomasipala labahlukahlukene. Kunemibiko letsi namuhla ekuseni maspala weCity of Mbombela ubonakele atsatsa emaloli latsengisela bahlali baKaBoKweni emanti.  Simeme lokhulumela Masipala weCity of Mbombela Umnumzane Joseph Ngala kutosichazela ngalendzaba.

Sikhungo lesiholela imali yesibonelelo sahulumende kulelive iSASSA sesibike kutsi sitfole umkhonyovu lowenteka ngeticelo temali yesibonelelo sahulumeni letingetulu kwetigidzi letimbili. Kuva kahle kutsi kwentekeni simeme lokhulumrla iSASSA kulesifundza seMpumalanga Umnumzane Senzeni Ngubeni.

Liphini lendvuna yetekutfutsa Mkhuleko Hlengwa utsi kumele tibuyeketwe tindlela letisetjentiswa sikhwama i-Road Accident Fund (RAF) ekwenteni imali. Kubuka kutsi  ingabe  lesikhwama njani nyalo futsi sihlongota tiphi tichibiyelo, simeme lokhulumela iRAF, Umnuzame McIntosh Polela.

Litiko letemfundvo eMpumalanga lisukumise luphenyo ngemuva kwekutsi bafundzi labangema-21 basesikolweni iMarhagi Secondary e-Verena bahlatjwe kugula baphutfunyiswe esibhedlela ngemuva kwekukhala ngenhloko, nesisu kantsi labanye bacale kuhlanta. Nonhlanhla Ntshingila na-Bongani Mondlane bayasibikela.

Mengameli Cyril Ramaphosa utsi usacubungula umbiko lombiko lowetfulwe yindvuna yetebulungiswa nekutfutfukiswa kwemtsetfo-sisekelo, Thembi Simelane mayelana nalendzaba yeVBS. Mercedes Besent na-Bongani Mondlane bayasibikela.

Sikhulumisana nemhlatiyi wetembangave Sandile Swana ngendzaba yekwesula kuEFF nasephalamende kwaloyi abengumvikeli wesive, Advocate Busisiwe Mkhwebane. 

I-Melika ibhalele i-Israyeli, iyinika tinsuku letingema 30, kutsi ivumele kungena kwelusito loluyiswa ebantfwini base-Gaza, yatsi nakungeke kwenteke loko itawunciphisa lusito letebusotja leliniketa lelalive. Lencwadzi leyesekelwe yiNdvuna yetangaphandle eMelika kanye neyelitiko letekuvikela, ifana nesecwayiso , sekucala kutfunyelwa kulelalive lelingumlingani we Melika kusukela kucale lemphi. Sicocisene neMnumzane Thulisa Ndlela longumhlatiyi wetindzaba temave emhlaba. 

Ungena elangeni lesibili lomhlangano wavelonke we-Shelter Indaba lobanjelwe esifundzeni sase Gauteng. Lomhlangano uhlose kubuka inchubekelembili yetinhlelo tetindzawo tetetiphephelo letisetjentiswa ngulabahlukunyetiwe. Sikhulumisana nelisekela lemcondzisi etikweni letekutfutfukisa tenhlalo eMpumalanga, Sarah Tladi.